1 Mipei ge mipui ge de luulu nah penau luge, pecu pa pesui tadi cai, pa pe dade ma kesa pesui kemak be ngau kedine, ciude pa nauta laisiu raulu zie, cide pe ba gage peu zie, nah pe ki gade pecu langgi dizie.✝ 2 Pa pe ki gade mpet kecu dau, pa tet eh mi keda peige nau di lubui. 3 Magade pe nahpei pekenabe pecu ngkau nah pecu nauta laisiu raugai, cide pe ba gage peu, nah pe ki gade pecu langgi di cai; mede pecu pe naulu kerane ngngwa kelube, pe nahpei pekenabe pecu luulu delwe tsaidi cai, 4 ciucai pecu langgi kedi pe nahpei keraibe de, pecu pe nau dailu kerane luu dailak; pa hera kedi caine, kedanemene cide RAMPAUBE kengkau ge zielu. Nnui RAMPAUBE nnui Tinggwang nnuide gumlu kera peu lai kebam deu gade nnui kemau cikenzwa be tei lak. 5 Mipei ge pe nau keheci tei keludau, pa reugwame de ngngwa hereu ga mie lak, mede pecu peu lang ketang kecu ta tei lak; pa mmi ge ziemne kilung ga mtak zie nah pa luu kelu pe nau suiyi tei zie.

6 Migede hepa mede tsuniakkang le teu bamdo diso, kedanemene cide au mige teilung teu eh bamdo ketei ge di zielu.

7 Magade mige Israelme kakgade pe sinamedung keheibede tui eh, nah hebaangme nzwa tei nah pecu zwa kecu ngaulu cai, cipau kerega be tsaizie; nah nnui nnui kakgade kemau de keu mpet dizie. 8 Kempa mateei keteei de ziemne nnui mriaksütlu, iciu eh nnuide cingkume, Levime, ne ledeu kebeu keledeu samdung leune pie sünne eh nnui teilu bi kerane; Ih penui dage rang kebeu de, nnuide tei mzai zie.* 9 RAMPAUBE nnui Tinggwang nnui Egypt gade gwang keladau Miriam dage daipai teigai bi nsung lulo.* 10 Nang n kidabe de ma keheibe releu kebeu dau, nang pa bamdo beu kera pai de keu kera pe ki ga lüt so. 11 Nang hegwale kwa luzie, nah nang ma releu kebeube de ndage bamdo de hegwale teugwang beuzie. 12 Magade pa ma gah kecume ge cai, nang pa bamdo kenzeu de n mabam gage kai eh zeu so.* 13 Nang pecu bamdo kenzeu de peu caili bi dilu tingnaimiak kenlüt dau ge, ciude pa pe pai de ba eh ziplu kerane nah ncu samlam beuzie; RAMPAUBE nnui Tinggwang dwa gade n ziemne cide petau luzie. 14 Nnui ma gah nah keherei eh liteu kela kilame suisiet teiso, pa nnui zangme Israelme mede sangme ge nnui namdi riekidung nnui deu ga lungh kebamme ge liede. 15 Nnui tingba ramsangne pecu pe ziehi peu dilu; aide tei mci mene peu tingnaimiak de nlüt diso, kedanemene pa au ma gah nah cide ngaulu kerane peei lalu. Aide teilu, ciude pa nnuide mmau eh RAMPAUBE dage hap gai lak kerane, nah ciu eh cide nnui tei kedi kemau melu kerane.✝ 16 Pe name kemau tei kedi ziemne puipeime de teitsetdi lak, mede penui puipei kemau tei kedi ziemne penui name de de teitsetdi lak. Meliene, migede pekatei pe mau ziemne teitsetdi zie. 17 Sangme mede nggiana de penui qwa be mzeu de ketang eh nnui keu gidi kera bata tei so, nah hemipui ge painidung teu samkak tei so. 18 Meliene, nnui Egypt ga nnui hebaang tei kecu nah cika de RAMPAUBE nnui Tinggwang nnuide lung mpet kebeu nsung lulo. Cine Ih nnuide aja aidungde mzai lulo peula. 19 Nnui nnui luh gade ciu pwa hekwa kecudau nnui rumkelu mei omer ge luh gage nsungta gai dicai, nnui cide ziemne caili mie so; cide sangme ziemne, nggiana ziemne, mede hemipui ziemne gi nzeu zie, ciude RAMPAUBE nnui Tinggwang nnui ma keheibe ketei leune gage samlam beuzie. 20 Nnui olive bang kecui kecudau, nnui pe kiak ga cailigwang dai so; cidungde sangme ziemne, nggiana ziemne, nah hemipuidung ziemne. 21 Nnui kubeluh gade kubetsi hekwa keludau, nnui mie hekwa dai so. Bang kenzeu dungde au sangme ziemne, nggiana ziemne, nah hemipui ziemne. 22 Nnui Egypt deudi ga hebaang tei kecu de nnui nsung bi lulo; ciziemne Ih nnuide aja aide mzai lulo ranggai la.