2 Akini inga mntu khakoa masa kwa kutamwiiya kwakwe, naho uyo ni mtu mwekuiganiaye, na yee mwenye adaha kwekindia kugombeka mafyaimi.

27 Akini Mntu amvikiyae Muungu ikundigwavyo, akundigwa agosoe aya, kuita kuwaambiza wesaokuwa na wavyazi na wekufiwao na wagosi mwe suuba zao, na kweinda na khachu za wantu wesaokumzumiiya Muungu.

17 Kia kintu kilavigwacho chekuwacho chedi na chekuiganiacho chalawa uwanga kwa Muungu, kulawa kwa Tate mwekuumbae ung’azi wose ya uwanga, ambae khahituka hituka inga kizui kisamavyo samavyo.

9 Ekuiganywavyo akawa chando cha uohozi wa misi yose na kwa wantu wose wamtegeezaho,

21 Yesu akamwamba, "Inga ukakunda kuwa mwiganizi, hita ukatage vintu vyako vyose na izo hea ukawekhe wakiwa, nawe wendauwe na kiikizo uwanga kwa Muungu, ukabinda soo unitongee."

11 "Nawamba mbui izi, nakunda nywie muwe na nyemi na miye, inga viya miye niwavyo na nyemi na nywie.

24 Adi isasa khamzati kuombeza chochose kwa udaho wangu. Akini isasa ombezani nanywi mwenda mwekhigwe, ili muwe na nyemi muno.

2 Mwesekumamakhanya na kutenda inga wantu wa inusi inu, ziya mwekeeni Muungu ahitue ziya mamakhanyo. Nee aho mwendamdahe kumanya na kuonyesha ziya mbui akundazo Muungu kulawa kwenu, yada yekuwayo yedi na yamtamizayo yee na yaiganayo.

10 Wandugu zangu, kwa udaho wa Zumbe yetu Yesu Klistu, nawahembeeza nywie wambuya wangu mwevane kwa yada mgombekayo, iya muwe na nia mwenga na mamakhanyi mwenga.

14 Mbui khuu kusima ayo yose mkundisane kwaajii kukundisana kwawatenda muwe hamwe mwe uhamwe wa kwei.

1 Ivi, kwekaa kwenu mwe Yesu Klistu kwawawekha udaho? Ivi, ukundiso wakwe wawatenda mtuiye? Ivi, mnao uhamwe na Muye wa Muungu na kuoneana mbazi na kuambizana nywie kwa nywie? 2 Inga nee yeivyo, mwendamnitende niwe na nyemi muno, inga nywie mwendamuwe na mamaakhanyi mwenga, na ukundiso umwe, na moyo umwe na nia mwenga. 3 Mwesekugosoa chochose kwa nia ya kuoneka na wantu na kwa kwevunia bue. Muwe na unyenyekevu nywie kwa nywie kiya yumwe amkauwe mweziwe kuwa ni yedi kusima yee mwenye. 4 Kiya yumwe wenu asekugosoa mbui za kumwambiiza mwenye du, iya kiya mntu na amamakhanye mbui ambazo zendaziwaambiize watuhu. 5 Mwakundigwa kumamaakhanya mbui inga viya Yesu Klistu ekuwavyo amamaakhanya, 6 nekawa inga Muungu mwe namna zose, akini khekumamakhanya kuwa inga Muungu ni kintu cha kushuutiza.

7 Kwaivyo kwa kukundisa kwakwe mwenye akabada ayo yose,

akawa inga mndima,

akavyaigwa inga mntu avyaigwavyo

na akaoneka inga mntu eivyo.

8 Nee kazumiia na kutegeeza adi kuuya na nyuma

adi kuuya na nyuma he mhamba.

9 Kwaajii iyo, Muungu akamwenua na kuwa mkuu kusima watuhu wose,

na akamwekha zina kuu kusima mazina yose.

10 Ili kwa zina la Yesu kiya vindi dikintwe da vintu vya uwanga kwa Muungu,

vya inusi na kwa si ya wantu wekuyao na nyuma,

11 na kiya mntu agombeke kuwa Yesu Klistu ni Zumbe kwa Ukuu wa Muungu Tate.

12 Ndugu zangu niwakundisao, nekuwaho na nywie nee mwamtegeeza Muungu misi zose, isasa niwaho hae na nywie endeeani kunitegeeza. Gosoani ndima kwa kuogoha na kuzingiza kwaajii ya uohozi wenu, 13 kwaviya Muungu nee agosoae ndima umo mwenu, ili muwe mwakundisa kugosoa mbui zimtamiazo.

14 Gosoani kiya kintu kwesaho kung’ung’uzika na kwesaho mahigano, 15 ili mdahe kuwa wantu wedi hemeso ya Muungu, wesao kuwa na waa dodose na muwe wana wa Muungu wesao kugombekwa ufyaimi kisingi mwekaa mwe inusi isasa. Mwendamng’ae gatigati yao inga ntoondo zimuikazo uwanga. 16 Mkawabiikia wantu Mbui ya Muungu iwawekhayo wantu ugima wa misi yose, mkagosoa ivyo neaho na miye nendaho niwe na nyemi muno, mwe msi uda endahoauye Klistu, kwaviya yendaiyoneke kuwa ndima nekuwayo nikagosoa kia nidahado kwaajii yenu khayekuwa ya bue.

17 Naho ata inga nikauya na nyuma na phome yangu ikalavigwa inga lavyo da kidomeo na ugosoaji ndima ilawayo mwe kuzumiiya kwenu Muungu, miye nendaniwe na nyemi nahodu nendaniwe na nyemi hamwe na nywie nyose. 18 Ivyo na nywie mwakundigwa kuwa na nyemi naho kuwani na nyemi hamwe na miye.

19 Zumbe Yesu akakunda nakauwiiya kumwagiiya Timoseo aze kwenu hanu hehi ili endahoauye hangu nigewe moyo kwa kutegeeza mbui zenu. 20 Khina mntu mtuhu inga yee Timoseo ambae endaeawakauwe hali yenu kwei kwei. 21 Watuhu wagosoa du mbui zao wenye, bada ya kugosoa mbui za Yesu Klistu. 22 Nywie wenye mwamanya viya Timoseo ekuwavyo mntu yedi. Kagosoa ndima ya kubiikia Mbui Yedi hamwe na miye inga mwana na Tati yakwe. 23 Kwaivyo nakauwiiya kumwegaa kwenu kwesiho kucheewa, akini navoka kumanya nikintu chani chendachokinilawiiye hanu. 24 Nami nazumiiya kuwa Zumbe Yesu endaaniambiize kweza kwenu ivi hehi.

25 Khiona nimuagiiye kwenu ndugu yetu Epafulodito, ambae ni mwezwangu mwe ndima na mwekhondo na ambae mumuagiiya kwangu kuniambiiza kwa viya vintu nekuwavyo khina. 26 Ana hovu khuu ya kuwavuiya nywie nyose, na kasininika muno kwaviya nywie mwekhigwa mbui kuwa nee ni mtamu. 27 Ehe nee kawa mtamu wa hehi na kuuya na nyuma. Akini Muungu akamwonea mbazi na khie yee ukedu, iya na miye kanionea mbazi ili nisekupata usungu muno. 28 Naho, nakunda muno kumwagiiya kwenu, ili mwendaho mmuwone muwe na nyemi vituhu, na miye ili moyo wangu utuiye. 29 Mhokeeni, kwa nyemi yose inga ndugu mwe Zumbe. Mwakundigwa muwatunye wantu wekuwao inga wowo, 30 kwaajii ya ndima ya Klistu nee kawa hehi na kuuya na nyuma, akahosa ugima wakwe. Kwaajii ya kunietea uwambiizi ambao nywie wenye khamkudaha kunietea.

15 Kauwani mntu asekumwihiza mweziwe fyaimi kwa fyaimi, iya mamakhanyi zenu ziwe kugosoeana yedi misi yose na kuwagosoea yekuwayo yedi wantu wose.