Maria

Kuwelekwa kwa Yesu kungutangaswa

26 Ndumbu gha Elizabeti paihikili miehi isita, Sapanga akamyegha mtumikila wa kundumba wa Sapanga lihina lyaki wangumkema Gabulieli ayendi mmbwani Nazaleti, kumlima wa Galilaya. 27 Akimlaghila kwa mhinja mmonga kayingilwa ng’ogha na mlumi na alongelilwi na Yusufu, wa ukolo wa Daudi yiwa ateposwa nayu. Lihina lyaki angukemwa Malia. 28 Mtumikila wa kundumba wa Sapanga akamyendela, akamjambusa, "Habale, wenga uhighililwi na Sapanga! Bambu ka pamonga na wenga!"

30 Mtumikila wa kundumba wa Sapanga akamlongela, "Ukotoho kuwela na holu Malia, kwaikiva Sapanga anguyendelesa kukula kwa luhala ghaki. 31 Utewela na ndumbu, utelela mwana mlumi, na utemkema lihina lyaki Yesu. 32 Mweni atewela mkulu na atekemwa Mwana wa Sapanga mweni kuwela kunani gha hyogha. Bambu Sapanga atemghola aweli Nkosi handa amgholili mbuyi ghaki Daudi. 33 Hayu atelongosa wandu wa Yakobu yaani Izilaeli hata machuwa hyogha bila mwihu, na unkosi ghaki utewela ng’ogha na mwihu."

Kuwelekwa kwa Yesu Kilisito

18 Hinu, kuwelekwa kwa Yesu kilisito kuwelili nagha, Malia nyongo ghaki paawelili kumalongelelo gha kuhetwa na Yusufu, ila pambila gha weni kuwonja handa mngwana na mhumbu, Malia akawoneka yiwa kana ndumbu kwa uwesa wa Mpumulo wa Sapanga.

Uyimbo wa Malia

46 Hinu Malia akalonga, "Mpumulo ghangu ungumyinula Bambu, 47 Mpumulo ghangu ungumhekelelela Sapanga, Mkombola wa nenga. 48 Sapanga akumbukwile nenga mtumikila wa Bambu, hinu kanihighila hinaa wandu wogha watenikema mhighilwa. 49 Kwaikiva Sapanga mweni kuwela na makakala, kanigholela makulunga. Lihina lya Sapanga ni lya mweni weka ghaki. 50 Umaha lyaki kwa wandu weni kumyitikila lunguyendelela uweleka hata uweleka. 51 Kaghola mighalu mikulunga kwa liwoko lyaki, kawatimula weni kuwela na makwinakwina kumawachilo gha mioyu ghao, 52 kawahulusa wogha weni kuwela na makakala kuhuma vikalilo vyao vya kinkosi na kuwavika wala weni kumuyitikila. 53 Wogha weni njala kawayukutisa vindu maha, ila wala wanaisa kawaleka mawoko lipala. 54 Kamtanga Izilaeli mtumikila ghaki, kwa kumbukwike kumuwonela umaha, 55 Akumbwikile kuwagholela umaha kwa Ibulahimu na wawelekwa ghaki hata machuwa hyogha bila mwihu."

4 Yusufu hilahila atumbulili mwanja kuhuma mumbwani Nazaleti mlima wa Galilaya, na kwaikiva awelili mlongo wa uweleka wa Daudi, akayenda mumbwani Betilehemu kumlima Yudasia, kula awelekili nkosi Daudi. 5 Akayenda kuvalangiwa pamonga na Malia, yula alaghililwi kuposwa na mweni, Malia akiwela na ndumbu. 6 Pawawelili kula Betilehemu, lipindi lya Malia lya kuliwopola likahika, 7 na mweni akajiwopola mwana ghaki wa utumbula mlumi, akamvika nguu zya kiuwana, akamwonjesa kukindu kya kuliyila ng’ombi kwaikiva wapatili ng’ogha lighuta lya kuwawonjesa wahenja.

19 Malia akavika milando hila hyogha kumoyu ghaki na kuliwachilila nesu.

34 Simeoni akawahighila na kumlongela Malia, nyongo ghaki, "Mwana hayu kawelekwa kwaikiva gha kuwaguwisa na kangi kuwagholokesa wandu watangala ku Izilaeli. Na mweni atewela kilangihi kya kuhindulilwa ivile wandu watemlongela mweni, 35 Lukasini mawachilo gha mioyu gha wandu watangala yeni kuhighwa yapati kuvikwa lipala. Na kwa wenga utungu utekuhoma kumpumulo handa lipanga."

48 Walela ghaki pawamlolili wakakangaswa. Malia, nyongo ghaki, akamkonya, "Mwana wa nenga, kwa kyani kutugholela hagha? Tati ghako na nenga tuwelili tukikuhaka kwa utungu." 49 Yesu akawayanga, "Kwa kyani munihakulili mmanyili ng’ogha yiwa ningupalwa kulikala Kulighuta lya Tati wa nenga?" 50 Ila walela ghaki wamanyili ng’ogha lilando lila awalongelili. 51 Hinu akahuya pamonga na weni mbaka Nazaleti, akiwela anguwayitikila. Nyongo ghaki ayendilelile kukumbwike milando kumoyu ghaki.

3 Divai paipelili, nyongo ghaki Yesu akamlongela, "Wandu wawela ng’ogha na divai."

4 Yesu akamyanga, "Nyongo, ukotoho kunilongela lila lya kughola. Lisaa lyangu lya kughola lihengu lyambila."

5 Pala nyongo ghaki akawalongela watumikila, "Chochosi atewalongela, mgholi."

25 Pabehi na lipingika lya Yesu wawelili wagholoka nyongu ghaki, na nyongu mnung’una wa Yesu, Malia mdala wa Kileopa na Malia kuhuma Magidala. 26 Yesu pamwonili nyongo ghaki mahala pala pamonga na yula mvulwa ampalili wagholoka pabehi, akamlongela nyongo ghaki, "Nyongu, uloli, hayu ndiwa mwana ghako."

27 Hinu akamlongela yula mvulwa, "Uloli, hayu ndiwa nyongu ghako." Na kuhumila lipindi lila yula mvulwa akamtola nyongo ghaki Yesu akayenda nayu ukaya ghaki.

Nyongo na walongu wa Yesu

31 Nyongo ghake Yesu na walongu ghake wafikili pala. Wakawoloka panji, wamtumili mundu wa kumkema. 32 Lipinga lya wandu wavile walikala pala wakamtindila. Hinu, wandu wakamlongela, "Nyongo ghako na walongu ghako wakiva panji, wangukukema."

33 Yesu akawayanga, "Nyongo ghangu na walongu ghangu ni ghani?" 34 Hinu akawalola wandu wavile wamtindila, akalonga, "Hagha ndiwa nyongo ghangu na walongu ghangu. 35 Mundu yoyosi mweni aghola yampalili Sapanga, hayu ndiwa mhaja ghangu na mhacha ghangu na nyongo ghangu."

55 Ghuli, hayu ng’ogha yula mwana wa mhongola mibau? Ghuli, nyongo ghaki ng’ogha yula angukemwa Maria, na walongo ghaki ng’ogha wala kina Yakobu,Yusufu, Simoni na Yudasi? 56 Ghuli, wahaja ghaki, wabaha ng’ogha wakilikala na twenga? Hinu, apatili kugha hagha hyogha?"

14 Hagha wogha wayendelelili kukongine na kuyupa pamonga na wadala, na Malia nyongo ghaki Yesu, na walongu zyaki.