Maria

Mwatsɨ w’erɨbʉthwa lya Yesʉ

26 Ko mʉgʉlʉ obʉkʉle bwa Lisabeti bwabere bwahika ko mwetsɨ w’endathʉ, Gongo mwathʉma malaɨka Ngabulieri mo muyi w’iNasareti, mo kɨhʉgo ky’iNgalilaya, 27 ko mʉnyere mʉgʉma agenda ahʉlwamo Marɨa. Marɨa oyo agenda athahibwa na muyira mʉgʉma nɨ yo Yosefʉ, w’omo lʉganda lw’omwamɨ Tawiti. 28 Malaɨka oyo mwahika ho Marɨa abyaga n’ɨmʉketsya athɨ: «Bwakyere he Marɨa! Moga! Nyinya-kowethʉ mwakʉha lʉkogo kandɨ alɨ hagʉma nawe.»

30 He malaɨka mwamʉbwɨra athɨ: «Marɨa ʉthʉbahaga kʉshangwa Gongo amakʉha lʉkogo. 31 Waheka bʉkʉle, wandabʉtha mwana wa bʉtsana, wandamʉlʉkamo Yesʉ. 32 Andabya mʉkʉlʉ na andahʉlwamo Mʉgala wa Gongo yo ʉlɨ elʉgʉlʉ w’ebyoshi. Na Nyinya-kowethʉ Gongo andamʉha obwamɨ bwa Tawiti ishe-kʉlʉ ʉwe. 33 Andathegeka aBaisiraeli bo kera na kera, n’obuthegeki bʉwe bʉthɨndahwe.»

Erɨbʉthwa lya Yesʉ Kirisito

18 Erɨbʉthwa lya Yesʉ Kirisito lithya ko lyabyaga. Marɨa nyinya ʉwe agenda athahibwa na Yosefʉ, hewethuwe embere bikale hagʉma, mwayeya nɨ mʉkʉle ko kagala k’oMʉthɨma Mwerʉ.

Olwimbo lwa Marɨa

46 Aho Marɨa mwanegena athɨ:

«Omʉthɨma aye asingya Nyinya-kowethʉ yo kʉtsɨbʉ,

47 kandɨ omʉthɨma aye amogera Gongo yo kʉtsɨbʉ, yo Mushabuli aye;

48 kʉshangwa mwashʉnga obʉlonvʉ bwaye ingye mʉgombe ʉwe.

Ega! Ɨthanga lɨno-lɨno abandʉ boshi bandagenda abanyahʉlamo mʉgashanɨrwa,

49 kʉshangwa Gongo w’amaka woshi mwanyɨkolera kɨndʉ kɨnene.

Erɨtsɨna lɨwe lɨsha lyo libuyirire.

50 Ko bɨro byoshi andagenda afwɨra shashi bobamukengire.

51 Mwakola kɨndʉ kɨnene mo maka w’okʉboko kʉwe.

Mwapanzire abandʉ bo babyaga n’emɨthɨma y’emɨfʉma.

52 Mwathoyitsye abamɨ b’oko ndebe sabo,

n’abalonvʉ mwirukitsyebo.*

53 Ababyaga nibawirire mwayirirebo mo bashoki,

hewethuwe abashoki mwafulukitsyebo minwe mɨsha.

54 Mwangirire Isiraeli mʉgombe ʉwe,

mwathibirirwe imukangya obʉbʉya bʉwe,

55 ng’oko alagaga bo thatha-kʉlʉ,

Abʉrahamʉ n’olʉbʉtho lʉwe kera na kera.»

4 Yosefʉ naye mwathoka mo kɨhʉgo ky’iNgalilaya, ko muyi w’iNasareti. Mwɨrʉkɨra mo kɨhʉgo ky’iYuteya mo muyi w’ɨBetelehemʉ w’omwamɨ Tawiti abʉthɨrawamo; kʉshangwa naye abyaga w’omo lʉganda lwa Tawiti. 5 Mw’ɨya ko fishi mwagenda na Marɨa oyo agenda ahikya; naye abyaga mʉkʉle. 6 Mo mʉgʉlʉ babyaga ɨBetelehemʉ, Marɨa ebɨro bɨwe by’erɨbʉtha mobyahika. 7 Naye mwabʉtha mwana ʉwe mʉmbere wa bʉtsana. Amamuhira mo bɨralɨyo, amamʉlambɨka mo kiringa kʉshangwa mobathabona bʉgonzero mo nyʉmba y’abageni.

19 Hewethuwe Marɨa mwabɨka ebyoshi ebyo mo mʉthɨma ʉwe na agenda aganɨkɨrabyo kʉtsɨbʉ.

34 Honyuma kw’aho, Simioni mwagashanɨrabo. He mwabwɨra Marɨa nyinya w’omwana athɨ: «Shʉnga! Omwana ono athabʉthwa bʉshana athoye bandʉ bangɨ mo Isiraeli n’imania bangɨ mʉbo. Kandɨ andabya kɨmɨnyɨkalo kyo kɨthoka kʉ Gongo kyo bandʉ bangɨ bandathɨnda. 35 Kʉshangwa emɨganɨtsye ya bandʉ bangɨ yo yibishire yandamɨnyɨkala. Nawe wowene Marɨa wandagalwa nga mʉndʉ bathathobola mʉthɨma mu muyali.»

48 Ababuthi bʉwe babere bamʉshʉnga mobashweka kʉtsɨbʉ. Nɨmo nyinya amʉbwɨra athɨ: «Mbe mwanaye! Bʉshana na ki wamathʉkolera ebi? Lola ingye na sho thwamakushondya emɨthɨma nɨyɨthalɨ mo nda!» 49 Naye mwashʉbɨtsyabo athɨ: «Mʉthanyɨshondetsya ki? Muthetsi ko lɨtholere ninyabya mo Nyʉmba ya Thatha?» 50 Hewethuwe eby’agenda abwɨrabo mobathonvwabyo.

51 Ko nduli y’ebyoshi ebyo, Yesʉ mwandagala hagʉma n’ababuthi bʉwe mw’ɨshʉba iNasareti, abyaga niashikitsyebo. Ebɨnwa byoshi ebyo nyinya nɨanabɨkabyo mo mʉthɨma ʉwe.

3 Etifayi yabere yahwa, nyinya wa Yesʉ mwabwɨra Mʉgala athɨ: «Bathakiwithe kʉ tifayi.»

4 Hewethuwe Yesʉ mwamʉshʉbɨtsya athɨ: «Mbe malɨ, unyishondyako ki? Endambi aye ithetsi yahika.» 5 Nyinya mwabwɨra abakoli bo bagenda abathenga etifai athɨ: «Ebyoshi ababwɨra, mʉkolebyo.»

25 Hofɨ n’omʉsalaba habyaga nihimene Marɨa nyinya wa Yesʉ hagʉma na mwalɨ wabo, na Marɨa mʉka Kiliopa na Marɨa w’ɨMangɨndala. 26 Yesʉ abere ashʉnga nyinya n’omwɨga ʉwe yo abyaga atsiire imene hofɨ naye, mwabwɨra nyinya athɨ: «Malɨ, shʉnga mʉgala awe.» 27 Honyuma kw’aho, Yesʉ mwabwɨra omwɨga ʉwe oyo athɨ: «Shʉnga nyoko.» Ɨthoka ko ndambi eyo omwɨga mwathwala Marɨa y’ewe.

Ɨndɨ yo malɨ na bahɨ bo bagala bethʉ?

31 Bagala babo Yesʉ na nyinya ʉwe mobahika, mobimana embʉga, mobathʉma mʉndʉ ayamʉbɨrɨkɨre. 32 Mo nyʉmba eyo mwabyaga muhindano mʉnene wa bandʉ, nibikere, nibathimbire kʉ Yesʉ. Aho mobamʉbwɨra bathɨ: «Lola, nyoko na bagala benyu balɨ embʉga, abakushondya.»

33 Yesʉ mwashʉbɨtsyabo athɨ: «Ɨndɨ yo malɨ na bahe bo bagala bethʉ?» 34 Honyuma kw’aho Yesʉ mwathimbya kw’abo babyaga bamuthimbireko kw’amesho n’ɨnegena athɨ: «Abo bikere hano aba, bo malɨ na bagala bethʉ. 35 Kʉshangwa omʉndʉ woshi-woshi yo ʉkola erɨshasha lya Gongo, oyo yo mʉgala ethʉ, na mwalɨ wethʉ na malɨ.»

55 Oyu athalɨ omʉgala w’omʉsapate? Na nyinya ʉwe athalɨ anahʉlwamo Marɨa? Na bagala babo bathalɨ Yakobo na Yosefʉ na Simoni na Yuta? 56 Na balɨ babo boshi bathalɨ kowethʉ? Ebyoshi ebi athokyabyo hayi?»

14 Aboshi hagʉma bagenda abahindana kangɨ kangɨ bʉshana n’ɨshaba, hagʉma na bakatsɨ balebe na hagʉma na Marɨa nyinya wa Yesʉ na hagʉma n’abagala babo Yesʉ.