Milagres de Jesus

Pinagaling ni Hesus ang Bulag at ang Pipi

27 Pagkaalis ni Hesus sa lugar na iyon, sumunod sa kanya ang dalawang bulag na sumisigaw, "Anak ni David,* maawa po kayo sa amin!"

28 Pagdating ni Hesus sa bahay na kanyang tutuluyan, lumapit sa kanya ang mga bulag na lalaki. Tinanong niya sila, "Naniniwala ba kayo na kaya ko kayong pagalingin?"

Sumagot sila, "Opo, Panginoon."

29 At hinipo niya ang mga mata nila, at sinabi, "Mangyari sa inyo ang ayon sa inyong pananampalataya." 30 At nakakita nga ang dalawa. Mahigpit silang pinagbilinan ni Hesus na huwag nila itong sasabihin kaninuman. 31 Ngunit umalis sila at ipinamalita nila sa buong lugar na iyon ang tungkol kay Hesus.

Pinagaling ni Hesus ang Dalawang Bulag

29 Nang papaalis na sa Jerico si Hesus at ang kanyang mga alagad, sinundan sila ng napakaraming tao. 30 Samantala, may dalawang bulag doon na nakaupo sa tabi ng daan. Nang marinig nilang dumaraan si Hesus, sumigaw sila, "Panginoon, Anak ni David, maawa po kayo sa amin!"

31 Ngunit sinaway sila ng mga tao at pinagsabihang manahimik. Ngunit lalo pa nilang nilakasan ang kanilang pagsigaw, "Panginoon, Anak ni David, maawa po kayo sa amin!"

32 Tumigil si Hesus, tinawag sila, at tinanong, "Ano ang gusto ninyong gawin ko sa inyo?"

33 Sumagot sila, "Panginoon, gusto po naming makakita."

34 Naawa si Hesus sa kanila, kaya hinipo niya ang kanilang mga mata. Agad silang nakakita at sumunod kay Hesus.

Pinagaling ni Hesus ang Isang Lalaking Bulag

22 Pagdating nila sa Betsaida, may mga taong nagdala ng isang lalaking bulag kay Hesus. Nagmakaawa sila na hipuin niya ang taong ito. 23 Kaya inakay ni Hesus ang bulag at dinala sa labas ng bayan. Pagkatapos, dinuraan niya ang mga mata ng bulag, ipinatong ang kanyang kamay rito at saka nagtanong, "May nakikita ka na ba?"

24 Tumingala ang lalaki at sinabi, "Nakakakita na po ako ng mga tao, pero para silang mga punongkahoy na lumalakad."

25 Kaya muling ipinatong ni Hesus ang mga kamay niya sa mata ng bulag. Pagkatapos, tumingin ulit ang lalaki at lumiwanag ang kanyang paningin. At nakakakita na siya. 26 Bago siya pinauwi ni Hesus ay binilinan siya, "Huwag ka nang bumalik sa Betsaida."

Pinagaling ni Hesus ang Lalaking Pipi at Bingi

31 Umalis si Hesus sa lupain ng Tiro, at dumaan sa Sidon. Nagtuloy siya sa lawa ng Galilea, at tinahak niya ang lupain ng Decapolis. 32 Dinala ng mga tao kay Hesus ang isang lalaking pipi at bingi. Nakiusap sila na ipatong niya ang kanyang mga kamay sa lalaki upang gumaling ito.

33 Inilayo muna ni Hesus ang lalaki sa mga tao. Nang sila na lang, ipinasok niya ang kanyang mga daliri sa mga tainga ng lalaki, at pagkatapos ay dumura siya at hinipo ang dila ng lalaki. 34 Tumingala si Hesus sa langit, nagbuntong-hininga, at sinabi sa lalaki, "Effata!" (na ang ibig sabihin ay "Mabuksan ka!") 35 Agad na nakarinig ang lalaki at nakapagsalita nang maayos.

36 Binilinan naman ni Hesus ang mga tao na huwag ipamalita ang nangyari. Ngunit habang pinagbabawalan niya ang mga tao ay lalo naman nila itong ipinamamalita. 37 Labis na namangha ang mga tao, at sinabi nila, "Napakahusay ng lahat ng ginawa niya! Kahit ang mga pipi ay nakakapagsalita at ang mga bingi ay nakakarinig."

Pinagaling ni Hesus ang Bulag na si Bartimeo

46 Dumating sina Hesus sa Jerico. At nang paalis na siya roon kasama ang mga alagad niya, sumunod sa kanila ang napakaraming tao. Sa tabi ng daan, may isang bulag na nakaupo at namamalimos. Siyaʼy si Bartimeo (na ang ibig sabihin ay "anak ni Timeo"). 47 Nang marinig niyang dumadaan si Hesus na taga-Nazaret, sumigaw siya, "Hesus, Anak ni David,* maawa po kayo sa akin!"

48 Pinagsabihan siya ng maraming tao na tumahimik, ngunit lalo pa niyang nilakasan ang pagsigaw, "Anak ni David, maawa po kayo sa akin!"

49 Tumigil si Hesus at sinabi, "Tawagin ninyo siya."

Kaya tinawag nila si Bartimeo at sinabi, "Lakasan mo ang loob mo. Tumayo ka, dahil ipinapatawag ka ni Hesus." 50 Inihagis ni Bartimeo ang balabal niya at dali-daling tumayo at lumapit kay Hesus.

51 Tinanong siya ni Hesus, "Ano ang gusto mong gawin ko sa iyo?"

Sumagot ang bulag, "Rabbi, gusto ko pong makakita."

52 Sinabi ni Hesus sa kanya, "Umuwi ka na; pinagaling* ka ng iyong pananampalataya." Nakakita siya agad, at sumunod siya kay Hesus sa daan.

Pinagaling ni Hesus ang Isang Bulag

35 Nang malapit na sina Hesus sa Jerico, may isang lalaking bulag na nakaupo sa tabi ng daan at namamalimos. 36 Nang marinig niya ang maraming taong dumadaan, nagtanong siya kung ano ang nangyayari. 37 Sinabi sa kanya ng mga tao, "Dumadaan si Hesus na taga-Nazaret."

38 Sumigaw ang bulag, "Hesus, Anak ni David,* maawa po kayo sa akin!"

39 Sinaway siya ng mga taong nasa unahan, pero lalo pa niyang nilakasan ang pagsigaw, "Anak ni David, maawa po kayo sa akin!"

40 Tumigil si Hesus at iniutos na dalhin sa kanya ang bulag. Nang makalapit ang bulag, tinanong niya ito, 41 "Ano ang gusto mong gawin ko sa iyo?"

Sumagot ang bulag, "Panginoon, gusto ko pong makakita!"

42 Sinabi sa kanya ni Hesus, "Makakita ka na! Pinagaling ka ng iyong pananampalataya." 43 Nakakita siya agad, at sumunod siya kay Hesus nang nagpupuri sa Diyos. Nang makita ng mga tao ang nangyari, nagpuri rin sila sa Diyos.

Pinagaling ni Hesus ang Isang Bulag

1 Habang naglalakad si Hesus, may nakita siyang isang lalaki. Ang lalaking ito ay ipinanganak na bulag. 2 Tinanong si Hesus ng mga alagad niya, "Rabbi, sino po ba ang nagkasala at ipinanganak siyang bulag? Siya po ba o ang mga magulang niya?"

3 Sumagot si Hesus, "Hindi dahil sa kasalanan niya o ng mga magulang niya kaya ipinanganak siyang bulag. Nangyari ito upang maipakita ang kapangyarihan ng Diyos sa pamamagitan ng pagpapagaling sa kanya. 4 Dapat na nating gawin ang mga ipinapagawa ng Diyos na siyang nagsugo sa akin habang araw pa, dahil pagsapit ng gabi ay wala nang makakapagtrabaho. 5 Habang akoʼy nasa mundo, ako ang ilaw ng mundo."

6 Pagkasabi niya nito, dumura siya sa lupa, gumawa ng putik mula sa dura at ipinahid niya sa mata ng bulag. 7 Sinabi ni Hesus sa bulag, "Pumunta ka sa paliguan ng Shiloam at maghilamos ka roon." (Ang ibig sabihin ng Siloam ay "Sinugo".) Pumunta nga roon ang bulag at naghilamos. Nang bumalik siya ay nakakakita na siya.

2 Lumapit sa kanya ang isang lalaking may malubhang sakit sa balat* at lumuhod sa harap niya, at sinabi, "Panginoon, kung gugustuhin po ninyo, mapapagaling nʼyo ako upang maituring akong malinis."

3 Hinawakan siya ni Hesus at sinabi, "Gusto ko. Gumaling ka!" At agad na nawala ang kanyang sakit sa balat. 4 At sinabi sa kanya ni Hesus, "Huwag mo itong ipagsasabi kahit kanino. Sa halip, pumunta ka sa pari at magpasuri. Dalhin mo ang handog na hinihiling ng Kautusan ni Moises bilang patunay sa mga tao na magaling ka na."

2 May mga lalaking nagdala sa kanya ng isang paralitikong nakahiga sa banig. Nakita ni Hesus ang kanilang pananampalataya, kaya sinabi niya sa lalaki, "Lakasan mo ang iyong loob, anak. Pinatawad na ang iyong mga kasalanan."

3 Nang marinig ito ng ilang tagapagturo ng Kautusan na naroon, sinabi nila sa kanilang sarili, "Nilalapastangan ng taong ito ang Diyos."

4 Ngunit alam ni Hesus ang iniisip nila, kaya sinabi niya, "Bakit kayo nag-iisip ng masama? 5 Alin ba ang mas madaling sabihin: ‘Pinatawad na ang mga kasalanan mo,’ o ‘Tumayo ka at lumakad’? 6 Ngayon, papatunayan ko sa inyo na ang Anak ng Tao ay may kapangyarihan dito sa lupa na magpatawad ng kasalanan."

Kayaʼt sinabi niya sa paralitiko, "Tumayo ka, buhatin mo ang iyong higaan at umuwi ka!" 7 Tumayo nga ang paralitiko at umuwi.

10 at may lalaki roon na paralisado ang isang kamay. Naroroon din ang mga Pariseo na naghahanap ng maipaparatang kay Hesus, kaya tinanong nila si Hesus, "Ipinapahintulot ba sa Kautusan ang magpagaling sa Araw ng Pamamahinga?"

11 Sinabi ni Hesus sa kanila, "Halimbawa, may tupa kayong nahulog sa balon sa Araw ng Pamamahinga, pababayaan na lang ba ninyo? Hindi ba ninyo iaahon? 12 Higit pang mahalaga ang tao kaysa sa tupa! Kaya nga ipinapahintulot sa Kautusan ang paggawa ng mabuti sa Araw ng Pamamahinga."

13 Pagkatapos, sinabi ni Hesus sa lalaking paralisado ang kamay, "Iunat mo ang iyong kamay!" Iniunat nga niya ang kanyang kamay at gumaling ito.

30 Nadatnan nilang nakahiga ang biyenang babae ni Simon dahil nilalagnat ito. Sinabi nila agad ito kay Hesus. 31 Kaya nilapitan ni Hesus ang may sakit, hinawakan ang kamay nito at ibinangon. Biglang nawala ang lagnat niya, at pinagsilbihan niya sina Hesus.

Pinagaling ni Hesus ang Lalaking May Sakit sa Balat

40 Lumapit kay Hesus ang isang lalaking may malubhang sakit sa balat.* Lumuhod ito sa harap niya at nagmakaawa. Sinabi niya, "Kung gugustuhin po ninyo, mapapagaling nʼyo ako upang maituring akong malinis.*"

41 Naawa si Hesus sa kanya, kaya hinawakan niya ito at sinabi, "Gusto ko. Gumaling ka!" 42 Agad na nawala ang kanyang sakit sa balat, at siyaʼy naging malinis.

3 may mga taong dumating kasama ang isang paralitikong buhat-buhat ng apat na lalaki. 4 Dahil sa dami ng tao, hindi sila makalapit kay Hesus. Kaya binaklas nila ang bahagi ng bubong sa tapat ni Hesus at saka ibinaba ang paralitikong nasa kanyang higaan. 5 Nang makita ni Hesus ang kanilang pananampalataya, sinabi niya sa paralitiko, "Anak, pinatawad na ang iyong mga kasalanan."

6 Narinig ito ng ilang mga tagapagturo ng Kautusan na nakaupo roon. Sinabi nila sa kanilang sarili, 7 "Bakit siya nagbitaw ng ganyang mga salita? Kalapastanganan ʼyan sa Diyos! Tanging Diyos lamang ang nakakapagpatawad ng kasalanan!"

8 Alam ni Hesus ang kanilang iniisip, kaya sinabi niya sa kanila, "Bakit kayo nag-iisip ng ganyan? 9 Alin ba ang mas madaling sabihin sa paralitiko: ‘Pinatawad na ang iyong mga kasalanan,’ o ‘Tumayo ka, buhatin mo ang iyong higaan at lumakad’? 10 Ngayon, patutunayan ko sa inyo na ang Anak ng Tao* ay may kapangyarihan dito sa lupa na magpatawad ng kasalanan." At sinabi niya sa paralitiko, 11 "Tumayo ka, buhatin mo ang iyong higaan at umuwi!"

12 Tumayo nga ang paralitiko, agad na binuhat ang kanyang higaan at lumabas habang nakatingin ang lahat. Namangha ang lahat at pinuri nila ang Diyos. Sinabi nila, "Ngayon lang kami nakakita ng ganito."

Nagpagaling si Hesus sa Araw ng Pamamahinga

1 Pagdating ng isa pang Araw ng Pamamahinga, muling pumunta si Hesus sa sinagoga, at dooʼy may isang lalaking paralisado ang isang kamay. 2 May mga taong naroon na nagmamatyag kung pagagalingin ni Hesus ang lalaking iyon sa Araw ng Pamamahinga, upang may maiparatang sila laban sa kanya. 3 Sinabi ni Hesus sa lalaking paralisado ang kamay, "Halika rito sa harapan."

4 Pagkatapos, tinanong niya ang mga tao roon, "Alin ba ang ipinapahintulot sa Kautusan sa Araw ng Pamamahinga: Ang gumawa ng mabuti o ang gumawa ng masama? Ang magligtas ng buhay o ang pumatay?" Ngunit hindi sila umimik.

5 Galit na tiningnan ni Hesus ang mga nakapaligid sa kanya, ngunit nalungkot din siya sa katigasan ng kanilang mga puso. Bumaling siya sa lalaki at sinabi, "Iunat mo ang iyong kamay!" Iniunat nga ng lalaki ang kanyang kamay at gumaling ito.

Pinagaling ni Hesus ang Isang Lalaking May Sakit sa Balat

12 Minsan, habang nasa isang bayan si Hesus, may isang lalaking may malubhang sakit sa balat na lumapit sa kanya. Lumuhod ito sa harap niya at nagmakaawa. Sinabi niya, "Panginoon, kung gugustuhin po ninyo, mapapagaling nʼyo ako upang maituring akong malinis."

13 Hinawakan siya ni Hesus at sinabi, "Gusto ko. Gumaling ka!" At agad na nawala ang kanyang sakit sa balat.

18 Noon din ay may mga taong dumating na buhat-buhat ang isang lalaking paralitiko na nasa higaan. Sinikap nilang ipasok ito sa bahay upang mailagay sa harap ni Hesus. 19 Ngunit hindi sila makapasok dahil sa dami ng tao, kaya umakyat sila sa bubong at bumaklas ng bahagi nito. Pagkatapos, ibinaba nila sa harap ni Hesus ang paralitikong nasa kanyang higaan.

20 Nang makita ni Hesus ang kanilang pananampalataya, sinabi niya sa paralitiko, "Kaibigan,* pinatawad na ang iyong mga kasalanan."

21 Sinabi ng mga Pariseo at ng mga tagapagturo ng Kautusan sa kanilang sarili: "Sino ba ang taong ito na lumalapastangan sa Diyos? Tanging Diyos lamang ang nakakapagpatawad ng kasalanan!"

22 Alam ni Hesus ang iniisip nila, kaya tinanong niya ang mga ito, "Bakit ganyan ang iniisip ninyo? 23 Alin ba ang mas madaling sabihin: ‘Pinatawad na ang mga kasalanan mo,’ o ‘Tumayo ka at lumakad’? 24 Ngunit upang malaman ninyo na may kapangyarihan ang Anak ng Tao* dito sa lupa na magpatawad ng kasalanan, papatunayan ko ngayon sa inyo." At sinabi niya sa paralitiko, "Bumangon ka, buhatin mo ang iyong higaan at umuwi!" 25 Bumangon nga agad ang paralitiko sa harap ng lahat, binuhat ang kanyang higaan, at umuwing nagpupuri sa Diyos.

Ang Lalaking Paralisado ang Isang Kamay

6 Noong isa pang Araw ng Pamamahinga, pumasok si Hesus sa sinagoga at nagturo. May isang lalaki roon na paralisado ang kanang kamay. 7 Binantayang mabuti ng mga tagapagturo ng Kautusan at ng mga Pariseo si Hesus kung magpapagaling siya sa Araw ng Pamamahinga, upang may maiparatang sila laban sa kanya. 8 Ngunit alam niya ang iniisip nila, kaya sinabi niya sa lalaking paralisado ang kamay, "Halika, tumayo ka rito sa harapan." Lumapit nga ito at tumayo roon.

9 Pagkatapos, sinabi ni Hesus sa kanila, "Tatanungin ko kayo. Alin ba ang ipinapahintulot sa Kautusan sa Araw ng Pamamahinga: ang gumawa ng mabuti o ang gumawa ng masama? Ang magligtas ng buhay o ang pumatay?"

10 Tiningnan niya silang lahat, at sinabi sa lalaki, "Iunat mo ang iyong kamay." Iniunat nga ng lalaki ang kanyang kamay at gumaling ito.

Ang Pananampalataya ng Kapitan

1 Pagkatapos ipangaral ni Hesus sa mga tao ang mga bagay na ito, pumunta siya sa Capernaum. 2 May isang kapitan doon ng hukbong Romano na may katiwalang malubha ang sakit at nag-aagaw-buhay na. Mahal niya ang katiwalang ito. 3 Kaya nang mabalitaan ng kapitan ang tungkol kay Hesus, nagsugo siya ng ilang pinuno ng mga Hudyo upang pakiusapan si Hesus na puntahan at pagalingin ang kanyang katiwala. 4 Pagdating nila kay Hesus, nakiusap silang mabuti sa kanya, "Karapat-dapat po siyang tulungan ninyo, 5 dahil mahal niya tayong mga Hudyo at ipinagpatayo pa niya tayo ng isang sinagoga." 6 Kaya sumáma sa kanila si Hesus.

Nang malapit na sila sa bahay ng kapitan, nagsugo ito ng ilang kaibigan niya para salubungin si Hesus at sabihin, "Panginoon, huwag na po kayong mag-abala, dahil hindi ako karapat-dapat na puntahan nʼyo sa aking tahanan. 7 At hindi rin po ako karapat-dapat na humarap sa inyo. Sa halip, iutos nʼyo lamang na gumaling ang aking katiwala at siyaʼy gagaling. 8 Alam ko po ito dahil nasa ilalim ako ng nakakataas na opisyal, at may mga sundalo ring nasa ilalim ko. Kapag sinabi ko sa isa, ‘Pumunta ka roon,’ pumupunta siya. Kapag sinabi ko naman sa isa pa, ‘Halika,’ lumalapit siya. At kapag sinabi ko sa aking alipin, ‘Gawin mo ito,’ ginagawa niya."

9 Nang marinig ito ni Hesus, namangha siya sa kapitan. Humarap siya sa napakaraming taong sumusunod sa kanya at sinabi, "Sinasabi ko sa inyo ang totoo, kahit na sa Israel ay hindi pa ako nakakakita ng ganito kalalim na pananampalataya." 10 Nang makabalik na sa bahay ang mga sinugo ng kapitan, nakita nilang magaling na ang katiwala.

11 may isang babae roon na labingwalong taon nang may karamdaman dahil sa ginawa sa kanya ng masamang espiritu. Baluktot ang katawan niya at hindi siya makatayo nang tuwid. 12 Nang makita siya ni Hesus, tinawag siya at sinabi, "Babae, malaya ka na sa sakit mo." 13 Pagkatapos, ipinatong niya ang kanyang mga kamay sa babae, at noon din ay naituwid ng babae ang kanyang katawan at nagpuri siya sa Diyos.

Pinagaling ni Hesus ang Lalaking Minamanas

1 Isang Araw ng Pamamahinga, inanyayahan si Hesus na kumain sa bahay ng isang pinuno ng mga Pariseo. Binabantayan siyang mabuti ng mga taong kumokontra sa kanya. 2 Doon ay may isang lalaking minamanas. 3 Tinanong ni Hesus ang mga tagapagturo ng Kautusan at mga Pariseo, "Ipinapahintulot ba sa Kautusan ang magpagaling ng maysakit sa Araw ng Pamamahinga o hindi?" 4 Ngunit wala ni isa ang nakasagot, kaya hinawakan ni Hesus ang maysakit, pinagaling ito at saka pinauwi.

Pinagaling ang Sampung Lalaking May Sakit sa Balat

11 Sa paglalakbay ni Hesus papuntang Jerusalem, dumaan siya sa hangganan ng Galilea at Samaria. 12 Nang papasok na siya sa isang nayon, sinalubong siya ng sampung lalaking may malubhang sakit sa balat. Tumayo lang sila sa malayo 13 at sumigaw kay Hesus, "Panginoong Hesus, maawa po kayo sa amin!"

14 Nang makita sila ni Hesus, sinabi niya sa kanila, "Pumunta kayo sa mga pari at magpatingin sa kanila." At habang naglalakad pa lang sila, luminis na ang kanilang balat.

15 Nang makita ng isa sa kanila na magaling na siya, bumalik siya kay Hesus at nagsisigaw ng papuri sa Diyos. 16 Lumuhod siya sa harap ni Hesus at nagpasalamat sa kanya. Isa siyang Samaritano.

17 Sinabi ni Hesus, "Hindi baʼt sampu ang pinagaling ko? Nasaan na ang siyam? 18 Bakit hindi bumalik ang iba upang magpuri sa Diyos maliban sa dayuhang ito?" 19 Sinabi niya sa lalaki, "Tumayo ka at umuwi na. Pinagaling ka ng pananampalataya mo."

Ang Pagpapagaling sa Betsata

1 Pagkaraan nitoʼy pumunta si Hesus sa Jerusalem upang dumalo sa isang pista ng mga Hudyo. 2 Malapit sa isang pintuan ng Jerusalem na tinatawag na Pintuan ng Tupa ay may paliguan na ang tawag sa wikang Arameo ay Betsata*. Sa paligid nito ay may limang silungan, 3 kung saan nakahiga ang maraming maysakit; mga bulag, pilay, at mga paralitiko. [ 4 Naroon sila dahil paminsan-minsan, may isang anghel ng Diyos na bumababa at kinakalawkaw ang tubig. Ang unang makalusong sa tubig pagkatapos makalawkaw ay gumagaling, kahit ano pa ang kanyang sakit.]* 5 May isang lalaki roon na tatlumpuʼt walong taon nang may sakit. 6 Nakita siya ni Hesus na nakahiga roon at napagtanto niyang matagal na itong may sakit. Kaya tinanong siya ni Hesus, "Gusto mo bang gumaling?"

7 Sumagot ang may sakit, "Gusto ko po sana, ngunit walang tumutulong sa aking lumusong sa tubig kapag kinakalawkaw na ito. Sa tuwing papunta pa lang ako ay nauunahan na ako ng iba."

8 Sinabi ni Hesus sa kanya, "Tumayo ka, buhatin mo ang higaan mo at lumakad!" 9 Agad na gumaling ang lalaki. Binuhat niya ang kanyang higaan at lumakad.

Nangyari ito sa Araw ng Pamamahinga,

46 At dooʼy bumisita siyang muli sa Cana na sakop ng Galilea, sa bayan kung saan ginawa niyang alak ang tubig. Sa kalapit na bayang Capernaum ay may isang opisyal ng pamahalaan na mayroong anak na lalaking may sakit. 47 Nang mabalitaan niyang bumalik si Hesus sa Galilea mula sa Judea, pinuntahan niya si Hesus at nakiusap na kung maaari ay pumunta siya sa Capernaum at pagalingin ang anak nitong nag-aagaw-buhay.

48 Sinabi ni Hesus sa kanya, "Hanggaʼt hindi kayo nakakakita ng mga tanda at kababalaghan, hindi kayo maniniwala sa akin."

49 Sumagot ang opisyal, "Panginoon, sumáma na po kayo sa akin bago mamatay ang anak ko."

50 Sinabi ni Hesus sa kanya, "Puwede ka nang umuwi. Mabubuhay ang iyong anak."

Naniwala ang opisyal sa sinabi ni Hesus at umuwi siya. 51 Sa daan pa lang ay sinalubong na siya ng mga alipin niya at sinabi sa kanya na magaling na ang kanyang anak. 52 Kaya tinanong niya kung anong oras ito gumaling. Sumagot sila, "Ala-una ng hapon po kahapon nang biglang mawala ang lagnat niya."

53 Naalala ng opisyal na sa oras ding iyon ay sinabi sa kanya ni Hesus, "Mabubuhay ang iyong anak." Kaya siya at ang kanyang buong sambahayan ay sumampalataya kay Hesus.

54 Ito ang ikalawang himala at tanda na ginawa ni Hesus sa Galilea pagkagaling niya sa Judea.

20 Habang papunta sila, may isang babae roon na labindalawang taon nang dinudugo. Lumapit siya sa likuran ni Hesus at hinipo ang laylayan ng damit niya. 21 Sapagkat naisip ng babae, "Mahawakan ko lang ang damit niya ay gagaling na ako."

22 Lumingon si Hesus at nakita siya. Sabi niya, "Lakasan mo ang iyong loob, anak. Pinagaling ka ng iyong pananampalataya." At gumaling nga ang babae sa sandaling iyon.

25 May isang babae roon na labindalawang taon nang dinudugo. 26 Maraming hirap na ang dinanas niya sa kamay ng ibaʼt ibang manggagamot. Naubos na rin ang lahat ng ari-arian niya sa pagpapagamot, pero sa halip na gumaling ay lalo pang lumala ang kanyang sakit. 27 Nabalitaan niya ang tungkol kay Hesus, kaya nakipagsiksikan siya sa mga tao upang mahipo man lang ang damit ni Hesus. 28 Naisip kasi niya, "Mahawakan ko lamang ang damit niya ay gagaling na ako." 29 Biglang tumigil ang kanyang pagdurugo nang mahipo niya ang damit ni Hesus, at naramdaman niyang magaling na siya.

43 May isang babae roon na labindalawang taon nang dinudugo* at hindi mapagaling ng kahit sino. 44 Nang makalapit siya sa likuran ni Hesus, hinipo niya ang laylayan ng damit ni Hesus, at biglang tumigil ang kanyang pagdurugo.

45 Nagtanong si Hesus, "Sino ang humawak sa akin?"

Nang walang umamin, sinabi ni Pedro, "Guro, alam nʼyo naman po na napapaligiran kayo ng maraming taong nagsisiksikan papalapit sa inyo."

46 Ngunit sinabi ni Hesus, "May humawak sa akin, dahil naramdaman kong may kapangyarihang lumabas sa akin."

47 Nang mapagtanto ng babae na hindi niya maililihim ang ginawa niya, lumapit siyang nanginginig sa takot at lumuhod sa harap ni Hesus. Pagkatapos, sinabi niya sa harapan ng lahat kung bakit niya hinipo si Hesus, at kung paanong gumaling siya kaagad. 48 Sinabi sa kanya ni Hesus, "Anak, pinagaling ka ng iyong pananampalataya. Umuwi kang mapayapa."

Ang Anak ng Namumuno at ang Babaeng Dinudugo

18 Habang sinasabi niya ang mga ito, dumating ang isang namumuno sa sinagoga. Lumuhod ito sa kanyang harapan at sinabi, "Kamamatay lang po ng anak kong babae, ngunit kung pupuntahan nʼyo siya at ipapatong ang inyong kamay sa kanya, siyaʼy mabubuhay." 19 Kaya tumayo si Hesus at sumáma sa kanya, pati na rin ang mga alagad niya.

23 Nang dumating na si Hesus sa bahay ng namumuno sa sinagoga, nakita niya ang mga manunugtog ng plauta sa libing at ang maraming taong nagkakagulo. 24 Sinabi niya, "Magsilabas kayo! Hindi patay ang bata kundi natutulog lang." Ngunit pinagtawanan lamang siya ng mga ito. 25 Nang mapalabas na ang mga tao, pumasok siya at hinawakan sa kamay ang bata, at bumangon ito.

22 Isa sa mga namumuno sa sinagoga na nagngangalang Jairo ang dumating doon. Pagkakita niya kay Hesus, lumuhod siya sa paanan ni Hesus 23 at nagsumamo, "Nag-aagaw-buhay po ang anak kong dalagita, kaya kung maaari, sumáma po kayo sa akin at ipatong ninyo ang inyong kamay sa kanya, upang gumaling siya at mabuhay!" 24 Kaya sumáma sa kanya si Hesus.

Sinundan siya ng napakaraming tao na nagsisiksikan sa kanya.

38 Pagdating nila roon, nakita ni Hesus ang kaguluhan, may mga umiiyak at humahagulgol. 39 Pumasok siya sa bahay at sinabi niya sa kanila, "Bakit kayo nagkakagulo at nag-iiyakan? Hindi patay ang bata kundi natutulog lang!" 40 Ngunit pinagtawanan lamang siya ng mga ito.

Pinalabas niya silang lahat maliban sa amaʼt ina ng bata at sa tatlo niyang alagad. Pagkatapos, pumasok sila sa kuwartong kinaroroonan ng bata. 41 Hinawakan niya ito sa kamay at sinabi, "Talitha koum!" (na ang ibig sabihin ay "Ineng, bumangon ka"). 42 Bumangon naman agad ang bata at naglakad-lakad (siyaʼy labindalawang taóng gulang). Labis ang pagkamangha ng mga nakasaksi sa nangyari.

31 Sinabi pa ni Hesus, "Sa anong bagay ko maihahambing ang mga tao ngayon? Kanino ko sila maihahalintulad? 32 Katulad sila ng mga batang nakaupo sa palengke at sinasabi sa kanilang kalaro:

‘Tinugtugan namin kayo ng masayang tugtugin,

pero hindi kayo sumayaw!

Umawit kami ng awit ng pagluluksa

pero hindi kayo umiyak!’

33 Sapagkat noong dumating si Juan na Tagapagbautismo ay nag-aayuno siya at hindi umiinom ng alak, at ang sabi ninyo, ‘Sinasapian siya ng demonyo.’ 34 Nang dumating naman ang Anak ng Tao, at nakita ninyo siyang kumakain at umiinom, ang sabi naman ninyo, ‘Ang taong iyan ay matakaw at lasenggo, at kaibigan ng mga maniningil ng buwis at ng iba pang makasalanan.’ 35 Ganoon pa man, ang karunungan ng Diyos ay napatutunayang tama sa buhay ng mga sumusunod rito."*

Binuhusan ng Pabango si Hesus

36 Inanyayahan si Hesus ng isang Pariseo na kumain sa bahay niya. Pumunta nga si Hesus at umupo para kumain. 37 Sa bayang iyon ay may isang babaeng kilala sa pagiging makasalanan. Nabalitaan niyang kumakain si Hesus sa bahay ng Pariseo, kaya pumunta siya roon at nagdala ng pabangong nasa sisidlang alabastro.

41 May dumating naman na isang namumuno sa sinagoga, na ang pangalan ay Jairo. Lumuhod ito sa paanan ni Hesus at nakiusap na kung maaari ay pumunta siya sa bahay niya, 42 dahil ang kaisa-isa niyang anak na babae, na mga labindalawang taóng gulang, ay naghihingalo na.

Habang papunta si Hesus sa bahay ni Jairo, nagsisiksikan sa kanya ang mga tao.

49 Habang kausap pa ni Hesus ang babae, dumating ang isang lalaki galing sa bahay ni Jairo na namumuno sa sinagoga. Sinabi niya kay Jairo, "Patay na po ang anak ninyo. Huwag nʼyo nang abalahin ang guro."

50 Nang marinig iyon ni Hesus, sinabi niya kay Jairo, "Huwag kang matakot. Manampalataya ka lang at mabubuhay siyang muli."

51 Pagdating nila sa bahay, wala siyang pinayagang sumama sa loob, maliban kina Pedro, Santiago at Juan, at sa mga magulang ng bata. 52 Nag-iiyakan at humagulgol ang mga taong naroroon, kaya sinabi ni Hesus sa kanila, "Huwag kayong umiyak. Hindi patay ang bata kundi natutulog lang."

53 Ngunit pinagtawanan nila si Hesus dahil alam nilang patay na ang bata. 54 Hinawakan ni Hesus ang kamay ng bata at sinabi sa kanya, "Ineng, bumangon ka." 55 At noon din ay bumalik ang kanyang espiritu at bumangon siya agad. At iniutos ni Hesus na pakainin ang bata. 56 Labis na namangha ang mga magulang ng bata. Ngunit pinagbilinan sila ni Hesus na huwag sabihin kaninuman ang nangyari.

Ang Pagkamatay ni Lazaro

1 Ngayon, may isang lalaking maysakit na nakatira doon sa Betania na sakop ng Judea. Siya si Lazaro na kapatid ng dalawang babaeng nagngangalang Maria at Marta. 2 (Si Maria ang babaeng kalaunaʼy magbubuhos ng pabango sa paa ng Panginoon at pagkatapos ay pupunasan niya ng kanyang buhok.) Nagkasakit si Lazaro, 3 kaya nagpasabi ang magkapatid na Maria at Marta kay Hesus, "Panginoon, may sakit po ang minamahal ninyong kaibigan."

4 Nang mabalitaan ito ni Hesus, sinabi niya, "Hindi hahantong sa kamatayan ang sakit na ito. Nagkasakit siya upang maparangalan ang Diyos, nang sa gayoʼy maparangalan din ang Anak ng Diyos." 5 Mahal ni Hesus ang magkakapatid na Marta, Maria at Lazaro. 6 Ngunit nang mabalitaan niyang may sakit si Lazaro, nanatili pa siya nang dalawang araw sa kinaroroonan niya. 7 Pagkalipas ng dalawang araw, sinabi niya sa mga alagad niya, "Bumalik na tayo sa Judea."

8 Sumagot sila, "Rabbi, kamakailan lang ay tinangka kayong batuhin ng mga Hudyo roon. Bakit pa kayo babalik doon?"

9 Sumagot si Hesus, "Hindi baʼt may labindalawang oras sa maghapon? Kaya ang naglalakad sa araw ay hindi natitisod, dahil maliwanag pa. 10 Ngunit ang naglalakad sa gabi ay natitisod, dahil wala na sa kanya ang liwanag."

11 Pagkatapos, sinabi pa ni Hesus, "Ang kaibigan nating si Lazaro ay natutulog. Pupunta ako roon upang gisingin siya."

12 Sinabi ng mga alagad niya, "Panginoon, kung natutulog siya, nangangahulugan ito na gumagaling na siya." 13 Ang akala nilaʼy natutulog lang si Lazaro, pero ang ibig sabihin ni Hesus ay patay na ito.

14 Kaya tinapat sila ni Hesus, "Patay na si Lazaro.

Pinatigil ni Hesus ang Bagyo

23 Pagkatapos, sumakay sa bangka si Hesus, at sumáma ang mga alagad niya. 24 At habang naglalayag sila, biglang dumating ang malakas na bagyo at halos matabunan na ng malalaking alon ang kanilang bangka. Samantala, si Hesus naman ay natutulog. 25 Kaya nilapitan siya ng mga alagad niya at ginising. Sumigaw sila, "Panginoon, iligtas nʼyo kami! Malulunod na tayo!"

26 Sumagot si Hesus, "Bakit kayo natatakot? Kay liit ng inyong pananampalataya." Bumangon si Hesus, pinatigil ang hangin at ang mga alon, at naging payapa ang lahat.

27 Namangha ang mga alagad niya at sinabi, "Anong klaseng tao ito? Kahit ang hangin at mga alon ay napapasunod niya!"

15 Nang magdapit-hapon na, lumapit kay Hesus ang mga alagad niya at sinabi, "Liblib ang lugar na ito at gumagabi na. Paalisin nʼyo na po ang mga tao nang makapunta sila sa mga karatig-nayon at bayan upang makabili ng pagkain."

16 Ngunit sinabi ni Hesus sa kanila, "Hindi na nila kailangang umalis. Kayo ang magpakain sa kanila."

17 Sumagot sila, "Mayroon lang po tayong limang tinapay at dalawang isda."

18 "Dalhin ninyo ang mga ito sa akin," ang sabi ni Hesus. 19 Inutusan niya ang mga tao na maupo sa damuhan. Kinuha ni Hesus ang limang tinapay at dalawang isda. Tumingala siya sa langit at nagpasalamat sa Diyos. Pagkatapos, pinagpira-piraso niya ang tinapay at ibinigay sa mga alagad niya para ipamigay sa mga tao. 20 Kumain silang lahat at nabusog. Pagkatapos, tinipon nila ang natirang pagkain, at nakapuno sila ng labindalawang kaing. 21 Ang bilang ng mga lalaking kumain ay mga limang libo, maliban pa sa mga babae at mga bata.

25 Nang madaling-araw na, sumunod sa kanila si Hesus na naglalakad sa ibabaw ng tubig.

32 Tinawag ni Hesus ang kanyang mga alagad at sinabi, "Naaawa ako sa mga taong ito. Tatlong araw ko na silang kasama at wala na silang makain. Ayaw kong pauwiin sila nang gutom at mahihilo sila sa daan."

33 Sumagot ang kanyang mga alagad, "Saan po tayo kukuha ng sapat na pagkain dito sa ilang para sa ganito karaming tao?"

34 Tinanong sila ni Hesus, "Ilan ang tinapay nʼyo diyan?"

Sinabi nila, "Pito po, at ilang maliliit na isda."

35 Pinaupo ni Hesus ang mga tao. 36 Kinuha niya ang pitong tinapay at ang mga isda at nagpasalamat sa Diyos. Pagkatapos, hinati-hati niya ang pagkain at ibinigay sa kanyang mga alagad, at ipinamigay naman nila ito sa mga tao. 37 Kumain silang lahat at nabusog. Pagkatapos, inipon nila ang mga natirang pagkain at nakapuno sila ng pitong basket. 38 Ang bilang ng mga lalaking kumain ay mga apat na libo maliban pa sa mga babae at mga bata.

Pagbabayad ng Buwis para sa Templo

24 Pagdating nila sa Capernaum, lumapit kay Pedro ang mga maniningil ng buwis at nagtanong, "Nagbabayad ba ng buwis para sa Templo ang inyong guro?"

25 Sumagot si Pedro, "Oo, nagbabayad siya."

Nang makabalik si Pedro sa tinutuluyan nila, tinanong siya ni Hesus, "Ano sa palagay mo, Pedro? Kanino nangongolekta ng mga buwis ang mga hari, sa mga anak nila o sa ibang tao?"

26 Sumagot si Pedro, "Sa ibang tao po."

Sinabi ni Hesus, "Kung ganoon, nangangahulugan na hindi kailangang magbayad ng buwis ang mga anak. 27 Ngunit kung hindi tayo magbabayad, baka sumama ang loob nila sa atin. Kaya pumunta ka sa lawa at mamingwit. Ibuka mo ang bibig ng unang isdang mahuhuli mo at makikita mo roon ang perang sapat na pambayad sa buwis nating dalawa. Kunin mo ito at ibayad sa mga nangongolekta ng buwis para sa Templo."

Ang Natuyong Puno ng Igos

18 Kinaumagahan, habang pabalik na sina Hesus sa lungsod ng Jerusalem, nagutom siya. 19 May nakita siyang puno ng igos sa tabi ng daan, kaya nilapitan niya ito. Ngunit wala siyang nakitang bunga kundi puro mga dahon. Kaya sinabi niya sa puno, "Hindi ka na mamumunga kailanman!" At agad na natuyo ang puno.

20 Namangha ang mga alagad ni Hesus nang makita nila iyon. Sinabi nila, "Paanong natuyo kaagad ang puno?"

21 Sumagot si Hesus, "Sinasabi ko sa inyo ang totoo, kung may pananampalataya kayo at walang pag-aalinlangan, magagawa rin ninyo ang ginawa ko sa puno ng igos. At hindi lang iyan, maaari rin ninyong sabihin sa bundok na ito, ‘Lumipat ka sa dagat!’ at lilipat nga ito. 22 Anumang hilingin ninyo sa Diyos sa panalangin ay matatanggap ninyo kung may pananampalataya kayo."

37 Habang naglalayag sila, biglang bumagyo nang napakalakas. Hinampas ng malalaking alon ang bangka nila at halos mapuno na ito ng tubig. 38 Si Hesus ay nasa hulihan ng bangka at natutulog nang nakaunan. Ginising siya ng mga alagad niya at sinabi sa kanya, "Guro, malulunod na tayo! Balewala lang ba ito sa inyo?"

39 Kaya bumangon siya at inutusan ang hangin, "Tigil!" at sinabihan ang lawa, "Kumalma ka!" Tumigil nga ang hangin at kumalma ang mga alon.

40 Tinanong niya ang mga alagad niya, "Bakit kayo natatakot? Wala pa rin ba kayong pananampalataya sa akin?"

41 Takot na takot silang nag-usap-usap, "Sino ang taong ito? Kahit ang hangin at mga alon ay sumusunod sa kanya!"

35 Nang dapit-hapon na, lumapit kay Hesus ang mga alagad niya at sinabi, "Liblib ang lugar na ito at gumagabi na. 36 Paalisin nʼyo na po ang mga tao nang makapunta sila sa mga karatig-nayon at bayan upang makabili ng pagkain."

37 Ngunit sinabi ni Hesus sa kanila, "Kayo ang magpakain sa kanila."

Sumagot sila, "Ibig po ba ninyong sabihin ay gagastos kami ng higit kalahating taóng sahod sa tinapay para may makain sila?"

38 Tinanong sila ni Hesus, "Ilan ba ang dala ninyong tinapay? Tingnan nga ninyo."

Tiningnan nga nila, at sinabi kay Hesus, "Mayroon po tayong limang tinapay at dalawang isda."

39 Pagkatapos, inutusan sila ni Hesus na paupuin nang pangkat-pangkat ang mga tao sa damuhan. 40 Kaya umupo nga sila nang pangkatan, may tig-iisang daan at may tiglilimampu. 41 Kinuha ni Hesus ang limang tinapay at dalawang isda; tumingala sa langit at nagpasalamat sa Diyos. Pagkatapos, pinagpira-piraso niya ang tinapay at ibinigay sa mga alagad niya para ipamahagi sa mga tao. Pinagpira-piraso niya rin ang dalawang isda at ipinamahagi rin nila. 42 Kumain silang lahat at nabusog, 43 at nang tipunin ng mga alagad ang natirang tinapay at isda ay nakapuno sila ng labindalawang kaing. 44 Ang bilang ng mga lalaking kumain ay limang libo.

48 Nakita niyang hirap sa pagsagwan ang mga alagad niya, dahil salungat sila sa hangin. Nang madaling-araw na, sumunod sa kanila si Hesus na naglalakad sa ibabaw ng tubig. Lalampasan na lang sana niya sila, 49 ngunit nang makita siya ng mga alagad niya na lumalakad sa ibabaw ng tubig, inisip nilang multo siya kayaʼt nagsigawan sila. 50 Takot na takot silang lahat sa nakita nila.