Misericórdia

18 Nang kenzwa cau Tinggwang bam no,

kemau keugi beu kela

bang kebam n mapwame hezai gikah kedime mau gibeu kela?

Pa pe rata kelungta kainzeu la ma,

kedanemene pa pe samkakkelu kesamsang pesui la.

A mlung keheci ge damgailo, O Tinggwang

1 Acu ngaunggia lo, Tinggwang, n samkak kenlum de ziemne;

n ngaugia tadung kedi de zi gade, a maudung de tei ngga beulo.*

2 A zai kesiabedung gade acu hui cangsiak beu

nah a mau gade acu teimci beu.

6 Nsung gailo, RAMPAUBO, n ngaugia ta nah n samkakkelu samsang;

kedanemene cidungde ndaa de bamdi delu.

7 A rehangdau kemau tei kedidung nah Ih renia kegaidung de nsung helo;

Samkakkelu samsang dele acu nsung gailo n keyi de ziemne, RAMPAUBO!

A rabe RAMPAUBE de kwabam

1 Ih keherei kwaki gade ncu qugai, Oh RAMPAUBO.

2 Rampaube, a kwa kingnei gailo;

ngaugia ziemne a nggia mra kebamde

kingnei teune gailo.

11 N ngaugia tadung de a da gwang cangta kedi tei diso, RAMPAUBO;

n samkakkelu samsang nah ncu nlumlukebui dene peu acu gum kwaklu.

6 Ma keyi nah samkakkelu kesamsang a teilung pelane suila mui zie;

nah Ih RAMPAUBE ki ga a teilung kelungta lungh dizie.

13 Mipei ge pe namedung dade pezai keyi nzwa,

RAMPAUBE au pecu rüt kelamedung de cinzwa eh ngaunggia la.

15 Dede Tinggwang mapeu au Adam kemau teikedi kenzwage ma. Kedanemene mige hezai gikah kegai ziemne kekieege tsaidi liecai, Tinggwang ngaugia de daihia gede kieeki ziebi mi hange, Jisu Khrista, ngaugia mapeu de, mi kekieege ziemne kepui teilu kera!

Makesangbe kilamedung

15 Iciucai dainzwalai? Anui hezaibe kangga mene, ngaugia kangga la kedine kemau teizie ni? Peu madaude cinzwadi helo.

4 Dede Tinggwang pe keku kedi ziemne anuide ngaugia süt eh pa anuide hungla, 5 cine anui kemaudung gade tsaidi liede, pa anuide peu Khrista de ngngwa ring dailu—ngaugia gade nnuide kelilu—

9 Dede pa a dage ranggai, "A ngaugia de nang teumai kesia pelane da, kedanemene kemnei gade a kengkieng tei mmi canglu lalu." Cine Ih a kemnei de ziemne a suiyi eh ngangki zie, iciu eh Khrista kengkieng de a da bamlu kerane.

13 Pe mau kebai kedibe de yipet gailak,

dede pe mau pet kelube nah cidungde gi kelube de au ngaugia keulia zie.✝

7 Peu kesiaketei de pe lampui putdi, nah kemau ketei minabe de pe kecetdung.

Pecu peu RAMPAUBE da cailigwang lu, nah pa pecu ngaunggia zie, nah pe mau gi cangsiak beu kerabe anui Tinggwang da.

18 Dede RAMPAUBE au nnuide hung eh kwabam, cine pa au nnuide ngaugia keulia kera mtei pwabam.

Kedanemene RAMPAUBE au kemzui Tinggwang; pecu kwa kebamme samlam pungtu.

13 Dede nnui mie delwe aipau kiede ci lulo: ‘Ih ratak swade kekube luuneu lie.’ Kedanemene Ih samsang kelamede qu zielie gwang ma, dede kemaume de qu zielie gwang."✝

21 Cipaucai Peter Jisu da gwang delwe rangdi, "Rampaubo, a sinabe a dage pia daikiee ge kemau tei eh Ih pe mau gibeu maisia no? Pia hena zieni?" 22 Ge Jisu pe dage rangdi, "Ih n dade pia hena de rang ma, dede pia riakhena kecu hena kieege lo.

14 Nnui mina nnui dage teimaukedi maugi beucai, tinggim ga kebam nnui Pei de nnui teimau kedi maugi beuzie.

31 Dede, n ngaugia kedi gade, nang penuide ngkapdi ma, nah nang penuide gi dima. Kedanemene nang au mide ngaungia nah mide hungkela Tinggwang kecune.

5 Pe zaiyi eh mide nggia kelame nah mide rangkang releu beu kelame da au kezuyi lala,

pe bata masang eh tei kelabe.

17 Peu Rampaube anui Tinggwang zai keyi de anui gu kelube tei lulo;

anui badung le teikegai lungh yilu;

kesang, anui badung le teikegai lungh yilu.

16 Anui kuu eh ngaugia Tinggwang hegwangbam ga tetgai cugo, iciu eh anui ngaugia ngaulu kerane nah ngaugia peeilu eh anui teu maikesia tingdau nghalu kerane.

Kering ratakdung

1 Ih nnui dage rangsünne gaila, sinamedung, Tinggwang ngaugia gade, nnui pumdung pwa kering ratak, mci, nah Tinggwang luulu kebui ge tei lulo. Aide nnui tei siaktelu kebui ta ge.

16 Tinggwang kideube de hungzu kecune, pe Na kepumlibe de pa kaibeu, iciu eh pecu nlum kelu keheibe de kap eh gah dilak dede kelungta kering ngaulu kerane.

29 Kedanemene nnuide Khrista ziemne pecu nlumkelu rünne ma, dede peu pe ziemne keherei si kera peu pwabam,

Kahkegwang ngyi ziemne kerengei

1 Hezekiah Israel nah Judah pelane ga samgwame langgai, nah Ephraim nah Manasseh dage de Jerusalem ga RAMPAUBE ki ga gwang maisia lie laisiu raugai, RAMPAUBE Israel Tinggwang de twa eh kahkegwang ngyi hengyi kerane.* 2 Kedanemene hegwangpei, pe muiteumedung, nah Jerusalem ga hemaa pelane, keina bekei gage kahkegwangngyi de hengyi kera kesamdau kelune. 3 Penui tingdane hengyi kela tingdau hengyi luma, kedanemene cingkume kekieege hengyi de ziemne penuide teimcilu ma nah minadung Jerusalem ga ngkwalu kemakne. 4 Riem kelu aide hegwangpei nah hemaa pelane penui suilu. 5 Cine penui Israel pelane ga, Beersheba namdi gade Dan namdi kecang, Jerusalem gade RAMPAUBE, Israel Tinggwang de twa eh kahkegwangngyi de hengyi kera ziemne minadung gwang maisia lie kecu sahgai kera samteilu. Kedanemene penui hengyi de hezai laisiukwak gage raupwa kela de nzwa mina kiee süt eh mneilu ta kedine. 6 Cine hegwangpei aja gade samgwamedung hegwangpei nah pe muiteumedung dade laisiudung teu eh Israel nah Judah pelane ga miedi. Penui rangdi, "Nnui Israelmedung, RAMPAUBE, Abraham, Isaac nah Israel Tinggwang da nreu cailigwang lulo, iciu lude pa nnui bangh kelumedung Assyria gwangdung ba gade pak kelume da cailigwang dailu zie. 7 Nnui paume mede nnui siname RAMPAUBE, penui paume Tinggwang sam gikah kedime nzwa diso, penuide au nnui kengau de nzwa kehing ge tei di. 8 Nnui paume nzwa nnui helungtak diso; meliene, nnui katei nnuide RAMPAUBE de peulu nah pe kemci ni ga, pa kelunghta teimci pwa kebam ga gwanglu, nah RAMPAUBE nnui Tinggwang de recalu, iciulude pe rata de nnui dade mbailu zie. 9 Kedanemene nnui RAMPAUBE da cailigwang dai lucai, nnui caireiswacing nah nnui namedung nnuide lang pwa hebaangme ge tei kedime dwa gade ngaugia ngau luzie, nah penui aipau deu ga cailigwang dai luzie. Kedanemene RAMPAUBE nnui Tinggwang au pezai yi nah ngaunggia la, nah nnui pe da cailigwanglu cai, pa nnui dade nreu tet dilak."

10 Cine samgwame namdi ket cai ket eh Ephraim nah Manasseh cuikui ga, nah Zebulun deu ga kecang kahgwang, dede Ephraim, Manasseh, nah keda tingpeule leuhme Hezekiah samgwame de nuidi. 11 Iciuliede, Asher leuhme, naimiak kenlütle Manasseh nah Zebulun leuhme kangge penuide tei henalu eh Jerusalem ga gwanglu. 12 Tinggwang Judah gade heta tei gai, peu penuide lung ge tei eh hegwangpei Hezekiah nah muiteume aja de RAMPAUBE sam gade teilu kerane.

13 Mina kekieege, hemaa maadi, Cehikaikemak Tangku Ngyi hengyi kerane keina bekei Jerusalem ga ngkwalu.* 14 Penui cuhlu delwe Jerusalem ga recabamdung kebam de nah perim kehengui keru recabamdung pelane keu gidi; penui cidungde Kidron reuceuna gage kelien gaidi. 15 Pecai penui keina bekei ziangreiehmdai benai Kahkegwang ngyi meuründung teitsetlu. Cingkume nah Levime ngngamdi, cine penui penuide teimcilu delwe keru recadung RAMPAUBE kiga pwa gwanglu. 16 Penui, Tinggwang minabe Moses zaidung de mzai eh, penui mzi ga penui sap ga saplu. Cingkume Levime ba gade penui ngaukelu hejai de kezingai. 17 Kedanemene hemaa ga mina kekieege penuikatei de teimcilu kemakme kebamne. Ciziemne Levime mci kemakme leune nah penui ratakdung RAMPAUBE dage teimci gailu kemakme ziemne Kahkegwang meuründung gilu.✝ 18 Kedanemene mina kekieege, Ephraim, Manasseh, Issachar nah Zebulun leuh gade kekieege, penuide teimci mene bam, dede penui raupwa kebam zai de gikah di eh Kahkegwang taktyei tyeilu. Kedanemene Hezekiah penui ziemne kiebeu eh ranggai, "Peu pezai keyi RAMPAUBE de nnui pelane mau gibeu lo, 19 RAMPAUBE Tinggwang, penui paume Tinggwang de helung kai eh peei kelame de, renet zai gade penuide teimcilu meliede." 20 Cine RAMPAUBE Hezekiah sam kingneilu nah minadung de teingkei beu. 21 Israelme Jerusalem ga kebammedung Cehikaikemak Tangku Ngyi de penui sui yisüt eh lang henane hengyilu. Levime nah cingkumedung, langnai ge cai langnai ge RAMPAUBE de twa eh leibungdung kwa nah RAMPAUBE dage lei teigai. 22 Hezekiah Levime pelane RAMPAUBE de kereca lamlui kecime dage sam rang kecungsüt gai. Cine penui hengyi kecu ting lang henane kecang matyei, kekangbau reca ratakdung teigai, nah RAMPAUBE, penui paume Tinggwang dage penui mau petgai.

23 Hemaabe pelane cidau lang henane hengyi sidai kera kesamteilu, nah penui penui sui yisüt eh hengyilu. 24 Kedanemene Judah gwangpei Hezekiah ketumseu cang ge nah meurün cang hena hemaabe de pwapeu; nah muiteumedung hemaabe de ketumseu cang ge nah meurün, nah hemeu cangkerei kaibeu. Cingkume kekieege penuide teimcilu. 25 Judahme ngkwa kelu pelane, cingkume nah Levime, nah Israel gade gwang kelume pelane, Israelme deu gade sangme gwang kecume nah Judah ga kelunghme de si eh, pelane penui sui yisüt lu. 26 Cine Jerusalem ga suiyi le puidi, kedanemene, Israel gwangpei David napei Solomon tingdau gwale Jerusalem ga cikenzwa tei mede kecune. 27 Pecai cingkume, nah Levime, cuhlu eh minadung de samlam beu. Penui rang kegai kwa siulu, nah Tinggwang pe kemci ni gade penui kekie luulu.

1 "Mige pe nau de tadi, nah pa tetdi eh mi kedame nau dicai,

pa cipau pui da cailigwang zie ni? Cipau deu de hera cangsiak dilak ni?

Israel nang helipui ge pe nraime kekiee ge kebam nzwa lungh dida; nah nang a da cailigwang dai zie ni?—aide RAMPAUBE ne ndu kegai.*

2 Lamlwatwang ga pie gailo! Cika nang kemmha ta tei kemak heni gede bam ni?

Nang puidiki kuung ga n nraime de kwa gwang, Arabme ge hetaideu ga kwa kebam nzwa.

Nang helipui zai reli kesiabe hangdeu de tei hera dida.

3 Cine tingruidung de kaam dida nah heriak tingrui gwang beu ma;

dede nang au helipui ge nzwa da; nang au hengam gah lie.

4 Nang cu a dage rang meni: ‘A pei! A hena dau gade a zangna yitube!

5 Pa perata lamui zieni? Kekam kecangde pa deiga bam mui zieni?’

Pielo! Aide nang ne ranggai da, dede nang teilu kebui kemau leune teila!"

Israel Masangkemak

6 Josiah hegwang tei kebamdau RAMPAUBE a dage ranggai, "Nang Israel masang kemak tei kedi ngau mi? Pa lamlwa kecehu leune ga hang delwe tsingbang kendiak bang kang leune gade helipui ta nzwa tei dida. 7 Ih ranggai, ‘Pa ma aidungde pelane tei kedi cai, pa a da cailigwang kerabe,’ dede pa cailigwang ma. Masang kemak pe tipui Judah hegwangram ma aidungde ngau da. 8 Cine Ih masang kemak Israel kemmha ta tei kedine pecu ta kedi laisiu ge pwa peu eh ngau da, cinzwa eh Ih pecu lang gidi. Judah masang kemak sinapui, hing ma. Pa de mie delwe helipui ge nzwa teidi. 9 Pa de ngngam mezing. Pa hangdeu be tei hera di, nah pa tangtsukangdung nah tsingbangdung de reca eh kemmha ta teidi. 10 Pecai aidungde pelane cai, Judah, masang kemak sinapui, a da caili kegwang ciem tei kebam rünne, pa masang ma—aide RAMPAUBE ne ndu kegai."

11 Pecai RAMPAUBE a dage ranggai, "Masang kemak Israel au masang kemak Judah swa masang ki! 12 Mie eh sam aidungde Israel tingtün lebie da ranglia beulo,

‘Cailigwanglu, Masang kemak Israel!—aide RAMPAUBE ndu kegai—Ih nnuide a rata bammui lak.

Kedanemene Ih masang lu—aide RAMPAUBE ndu kegai—Ih kelungta a rata dilak.

13 Nang mau di delie de ranglu, kedanemene nang RAMPAUBE n Tinggwang de renia kecune;

nang tsingbang kendiak pelane kang gade sangme de n lampuidung ngngwa mzi!

Nang a kwa kingnei luma!—aide RAMPAUBE ndu kegai.’"

14 A da cailigwanglo, masang kemak minadung!—aide RAMPAUBE ne ndu kegai—Ih n nahpei!

Ih nnuide renam ramsang gade hangge nah paupak ramsang gade hangna de ngngwa luzie, nah Ih nnuide Zion deutu gage ngngwa cailigwang zie! 15 Ih nnuide a samzai ketei hegwangme peu zie, nah penui maci nah kecikecet teu eh nnuide teu zie. 16 Cidau nnui lungh hing luzie nah hangdeu be ga petsi bui luzie—aide RAMPAUBE ne ndu kegai, mina "RAMPAUBE samkak bung!" ha de rang silak. ‘Ma aide penui mlung ga gwang silak mede penui nsungta dizie; cide teu maisia ta kedi kecang dizie mede penui keda gede tei lak.’ 17 Cipau tingdau, Jerusalem de, ‘Aide RAMPAUBE hegwangbam,’ lie de eh qu zie, Jerusalem ga RAMPAUBE zi gade heleuh pelane cika acu reca kera gwang ngkwa zie. Penui mlung ketak nah kesia penuide rang kebeu be tei lak.

18 Cipau tingdau, Israel au Judah de ngngwa ncüt luzie, nah penai ngngwa tingtünle nam langgi kedi gade Ih nnui paume de penui gum lai eh kebam kepeu deu de ga cailigwang dai luzie.

19 "Ih rang kegai au, ‘Ih ncu a napei nzwa ngngwa luneu la nah ncu hangdeu keyi ge peu neula,

heleuh keda leune ga kebam swade mapwa hezuyitube!’ Ih aide rang lubui, ‘Nang acu "A pei" de eh qu zie.’

Nang a cai sui kera gade nreu tetdi lak delie de eh Ih rang lubui.✝

20 Dede pe nahpei dage masang kemak nau ge nzwa,

nang a dade masang luma, Israel leuhme—aide RAMPAUBE ne ndu kegai."

21 Makwa ge hangdeu langkie gade siu da, Israelme hap kebam nah penui nggia kie kebam!

Kedanemene penui kemau teilung lungh kedine; penui RAMPAUBE penui Tinggwang de nsung tadi.

22 RAMPAUBE rangzeu "Cailigwanglu, masang kemak minadung! Ih nnuide tei masang eh ngkei beuzie!"

Minadung keligai "Ainie! Anui n da gwang zie, kedanemene nang au RAMPAUBE anui Tinggwang! 23 Kideutudung gade kenret gwang kesang, lamlwatudung gade cilu kemak kwa ge;

RAMPAUBE anui Tinggwang au Israel de rikebeu be kesang.

24 Dede Baal hengam rabedung de kereca ziemne anui paume tei kegaidung de ngkap dida,

penui kaunedung nah meurün haudung, penui napeidung nah napuidung!

25 Anui ngngam ga kauzeu digo. Anui ngngam de peu anuide halu, kedanemene anui RAMPAUBE anui Tinggwang dage kemau tei gai delu!

Anui nah anui paumedung, anui hena ting gade cu kecang, RAMPAUBE anui Tinggwang kwa kingnei luma!"