1 Ma aidungde cai, hegwangpei Ahasuerus, Agagme pei Hammedatha napei Haman* de tei ndu gaibeu. Pa pecu teucuh gaibeu delwe pe kengkieng bam peda kebamme kedimedung leune reu gage kaibeu. 2 Pecai hegwangpei kirie ga kebam hegwangpei kilamedung leune Haman dwa keumie nah koktungmie bam, kedanemene hegwangpei aja kai kegai ziemne. Dede Mordecai keumie mede pa koktungmie ma. 3 Pecai hegwangpei kirie ga kebam hegwangpei kilamedung Mordecai dage rangdi, "Daitei lie nang hegwangpei gu aja de gikah zeu nau?" 4 Penui tingba ge cai tingba ge eh pecu mpau kegai dau de, pa penui kwa kingnei ma. Cine penui Haman dage rangbeu di Mordecai samdung de liagai di lak mi de, kedanemene pa au Jewme liede eh penui dage rangbeu di kecune. * 5 Pecai Haman Mordecai pedwa keumie kemak mede koktungmie kemak ngaulu. Nah Haman da rata le puidi. 6 Nah Mordecai rünne de saja peu kera pa nnung lu tadi, kedanemene penui Mordecai leuhme de pecu rang kebeu ne. Cine Haman Jewme leune de tei ngkapdi kera heciem peei cuhdi, Mordecai leuhme, Ahasuerus hegwangram ga kebam leune de.

7 Kei raitube kei, cide au Nisan bekei, hegwangpei Ahasuerus hegwang tei kelu mmi kereiekena bekum, Pur (cide "dacak") tingba ge cai tingba ge nah keige cai keige Haman dwa gade teilu; kereiekena kecang, cide au Adar bekei. 8 Pecai Haman hegwangpei Ahasuerus dage rang, "N hegwangram deuceu leune ga mina kangge zangra la nah minadung kakgade tsamla. Nah penui gu hezaidung au mileune dade tsamsütla, nah hegwangpei gu hezaidung penui mzai lama. Nah penuide saja peu mene pütdi kera au hegwangpei ziemne pe kemmi gah." 9 Magade hegwangpei ziemne keyi ge lie cai, penuide ngkapdi kera rau gai beu lulo, nah Ih rangkanggeu talent 10,000* mata keteime ba gage kaigai beuzie, hegwangpei gu mabamdung ga nlütlu kerane. 10 Cipaucai hegwangpei pe ba gade pegu kaugiak bakap* keu mpetlu, delwe pa cide Agagme pei Hammedatha napei Haman, Jewme ngaurabe de peudi. 11 Nah hegwangpei Haman dage rang, "Rangkanggeu ncu; nah minadung de peu dida, cidungde teu n suibe teilu kerane."

12 Nah hegwangpei gu laisiukecimedung de qu kelu raitu bekei*, 13 tingba benai, nah Haman ne raulu lo aja kai kegai ria gade cide rau lu; hegwangpei gu kedimedung dage; nah deuceu ge cai deuceu ge reu kebam deuceudidung dage; nah mina ge cai mina ge gu kedimedung dage; deuceu ge cai deuceu ge kerau ria gade, nah mina ge cai mina ge heled ria gade. Cide hegwangpei Ahasuerus zi gade raulu, nah cide hegwangpei kaugiak bakap le giakdi. 13 Nah laisiudung de hegwangpei gu deuceudung leune ga teukengwame ba gage langgai beudi, ngkap zing kera, gi tset kera, nah Jewme hena gade hecing kecang leune de ngkapdi kerane, henamedung nah mipuidung, tingnai ge gage, kei 12 bekei ziangreikecum benai (cide Adar bekei), nah penui gu tui kelu mabamdung luu teudi kera. 14 Rau pwa kenzeu kwak ge, deuceu ge cai deuceu pelane ga hezai ge lie peu kera de, minadung leune de peu cigai aipau tingba de ziemne mteilu kerane. 15 Teukengwame mzet eh miedi hegwangpei aja de ne, nah hezai de Susa kengkieng reketbam gage peugai. Nah hegwangpei penai Haman sak kerane ntum bamlu, dede Susa namdi kebwak bamdi.