1 Ma aidungde cai, hegwangpei Ahasuerus rata ngkung mie di ge, pa Vashti de nsung gwangdi nah pa daipai tei gai bi kecu, nah pe dage teigai kera pesam kai kebeu de mning bam di. 2 Pecai hegwangpei gu rehangme pegwa keteimedung ne ranggai, "Peu penuide hegwangpei ziemne relei kemcimedung nah hezu keyidung ge de peeilo. 3 Nah peu hegwangpei de pe hegwangram ga deuceu leune ga kerengeime de kedetlu. Pecai peu penuide relei kemcipui nah hezu keyi leude Susa kengking reketbam ga, mipui ki ga Hegai (hegwangpei gu eunuch mipuidung kerengeibe) ba gage ngngwa gwang gai beulu. Delwe penuide tei hezu keyi maca peulu. 4 Pecai hegwangpei ngau pe suitube releipui de peu Vashti bam leu eh hegwangpui teilu." Nah sam cide hegwangpei dade yi di, cine pa cide mzui lu.

5 Mipei ge, Jewme ge, Susa kengking reketbam ga bam, nah pe zi cai Mordecai, Jair napei, Shimei napei, Kish napei (Benjamin leuhme pei ge, 6 Babylon gwangpei Nebuchadnezzar ne Jerusalem gade Judah gwangpei Jeconiah de langgi kedi, hebaangme de si eh langgi kedimedung kakga pa de si). 7 Nah pa Hadassah (pa au Esther) de pe pui pe pei keku teu pecu nküt cuhlu, pe pau napui de, kedanemene pe ziemne pe pei mede pe pui gede kegah dene. Releipui de au pe rehi yi nah ngau yi. Nah pe pei penai pe pui tsaidi ge, Mordecai ne pecu pe napui ge nzwa ngngwa lu. 8 Cinzwa eh, hegwangpei pe sam kai kebeudung nah pe hezaidung siu kelu dau, nah relei puidung kekiee gede Susa kengking reketbam ga Hegai ba gage ngngwa gwang kebam dau, Esther de de hegwangpei ki ga ngngwa gwang Hegai (mipuidung de kerengeibe) ba gage kaibeu. 9 Nah releipui de ngau pesui yilu, nah pa pe suiyi teilu. Cine pa zette pecu maca peu nah pecu taktyei peugai, nah mipui kehena hang hena de hegwangpei ki gade kedet mpet pecu peu gai. Nah pa mipuidung ki yitube ga pecu nah pegwa tei kera releimedung de ngngwa mie gai beudi. 10 Esther pa daipai leuhme mede pa dai gade gwang bi kecu rang ndu ma, kedanemene Mordecai ne pa ma aidung de rang lak kera kampwa kebamne. 11 Nah tingba ramsang Mordecai mipui ki kigu dwaga tet nlüt mpet bammuila, Esther da kezuyi nah peda daipai tei bam bi kecu cilu kerane.

12 Releime hangge ge kecu hegwangpei Ahasuerus da ngngwalia kera penlia gwang keludau, cide cai kei kereiekena caine, mipuimedung de tei hezuyi kecu zai ria gade. Kedanemene ainzwa eh penuide tei hezuyi kecu ting de teicang kerabe: kei herok ge Myrrh ca le püt, pecai kei herok ge perim kehenguidung nah mipuimedung de tei hezuyi kecu ca le pütla. 13 Pecai cinzwa eh, mipui kehena hegwangpei da mie zie. Pa rang kegai leune pecu peula, pecu ngngwa le mipuidung ki gade hegwangpei ki ga kemie dau. 14 Pa tinghegi miela, nah tingcang pa mipuiki keda ga cailigwang dila, Shaashgaz (hegwangpei nauseupuidung de kerengeibe eunuch) ba ga gwang dila. Pa hegwangpei da mie dailak, hegwangpei pecu pesui eh pecu pe zi qu gai kemaktane.

15 Cu au Esther (Abihail napui, Mordecai pau, pa pecu luu pwa pe napui teilu) hegwangpei da mie kera penlia di ge, pa magede teu mai kesia peei si ma, Hegai (hegwangpei gu eunuch mipuidung de kerengeibe) ne kerang de gwale. Nah Esther de kengau leune pecu penui suidi. 16 Cine Esther de hegwangpei Ahasuerus da ngngwa gwang, pe hegwang ki ga, kei kerei bekei (cide au Tebeth bekei), pa hegwang tei kelu mmi hena bekum. 17 Nah hegwangpei mipuidung leune swa Esther de pesui yiki di nah pa relei kemci leune swade pesui yi nah pe keku ngau kieelu. Cine pa pe peu reu gage hegwang peurwa rwa gai, nah pa Vashti de mene pecu be peu hegwangpui teidi. 18 Cipaucai hegwangpei pe kang kedimedung nah pe kilamedung ziemne ketaktyei kedi ge teigai, Esther gu ketaktyei de kecude. Nah pa deuceudung ziemne kemtak tingba ge kaibeu, nah pa hegwangpei nsam gade mta mapeudung zibeu.*

19 Cu relei kemcidung pia pekenabe gwang hekwa dai kebam dau, Mordecai de hegwangpei rieki ga ntum bam*. 20 Esther pa pe leuh pe hiak (cide cai, pe minadung) ndu lia di mene bam, Mordecai ne pecu kam pwa kebam nzwa eh. Nah Esther Mordecai sam mzai jüja eh teigwang, ndaa pane pema pie kela dau nzwa eh. 21 Cipau tingdau, Mordecai hegwangpei rieki ga ntum bam ge, Bigthan nah Teresh (hegwangpei gu eunuch hegwangbam reket bam kelabe kena) penai rata di; nah penai hegwangpei Ahasuerus de renia eh penai ba kai kera heciem riemlu. 22 Dede Mordecai cide ha ci teu di, cine hegwangpui Esther da cide ndu lia beudi; ge Esther Mordecai zi gade hegwangpei dage paubeu. 23 Cipaucai cide ha peei hecung eh cide ngau mpet lu, nah cipau kena de de tsingbang ge gage gwak di. Nah cide hegwangpei dwa gade bata laisiukwak gage raulu.