1 Cu Mordecai aidungde tei kedi leune ha cilu ge, Mordecai pesui sia eh pe painidung hietdi* delwe rosopai teu lwe mimüt le pecu pütlu. Nah pa namdi kakga tetkah mie, nah pa pesui siasüt eh sahbak eh hap gai. 2 Nah pa hegwangpei kirie dwaga kecang gwale lüt sima, kedanemene migede rosopai bahlwe hegwangpei kirie ga lütla kemakne. 3 Nah deuceu ge eh deuceu ge leune ga, keheibe bam ga hegwangpei aja nah pe hezai gwang cang kelu ga, Jewmedung penui suisia sütdi, nah mmwang, nah heei eh hap bamdi; mina kekieege rosopai bah nah mimüt ga zeu bamdi.* 4 Esther kila releimedung pegu eunuchme de ngngwa lwe gwang pecu Mordecai ha ranglia kecudau, hegwangpui pe lung kehereisütdi. Nah pa Mordecai de pa bah kebam rosopai keu mpetdi delwe paidung bah lulo langgai beu, dede Mordecai cidungde luu ma.

5 Cine Esther Hathak de qugai, pa au hegwangpei eunuchmedung kakga hegwang ne peu pecu pe kila tei zie lie kedet kelube. Esther pe dage aja kaibeu, Mordecai daipai tei au bi nah daiziemne ciciu bambi kecu cilu kerane. 6 Cine Hathak Mordecai da mie, namdi heni kemza ga hegwangpei kirie dwaga kebam de ga. 7 Nah Mordecai pe dage tei kedibe leune pecu paubeu, nah hegwangpei mabamdung gage Haman rangkanggeu* dai kieege kaibeu zie lie rang beubi paubeu, Jewmedung de mmau eh penuide ngkapdi kerane. 8 Mordecai pecu penuide tei ngkap zing di kera hezai laisiu Susa hegwang ki gade kekai de de peugai, Esther de keu lialu kerane, nah pecu reci gaibeu lu kera, nah peu pecu mie hegwangpei dade pe nggia kie kera nah pe dwade pe minadung de ngau nggia lo de kielu kerane. 9 Cine Hathak mie delwe Esther da Mordecai samdung de rangbeu.

10 Pecai Esther Hathak de Mordecai dage aide rang beulo de aja kaigai: 11 "Hegwangpei kilamedung leune nah hegwangpei gu deuceudung ga minadung penui ci bam kap cide au keheibe mipei mede mipui de pecu qugai mene helungle kigu ga kelütme ziemne au hezaibe ket ta: penuide peu tsai kera; dede magade hegwangpei pe kecak tuitie le cipaude dage hetwa gai cai, pa ring luzie. Dede acu au hegwangpei da gwang lulo qu kemak zie camrei dida." 12 Cine Esther samdung Mordecai dage Hathach pau beu. 13 Pecai Mordecai Esther da sam lang cailigai: "Nang hegwangpei ki gade pak kera cet so, Jewme pelane dade. 14 Kedanemene nang aikenzwa tingdau mlei mene bam dicai, Jewmedung ziemne tei kengkei nah kelikebeu kera keda gade gwang dizie, dede nang nah n pei kilungme gah dizie. Nah aikenzwa tingdau ziemne ncu peu hegwangpui tei pwabam lubui?"

15 Pecai Esther Mordecai dage sam keligai kera rangdi: 16 "Miecu, Susa ga Jewmedung kebam pelane de hekwalu. Nah a ziemne mmwang lulo, matyei mede sak mene, tingmui tingba lang cumne ziemne. Ih nah a kila nküt releipuidung liede cinzwa mmwang luzie. Pecai ciciu kecudau, Ih hegwangpei da mie zie, cide hezai rehi gade meliede; nah Ih tsai maisia cai, Ih tsai de luzie." 17 Cine Mordecai mie delwe Esther pecu tei lulo rang kebeu leune nzwa eh teilu.