1 Cipau nai, hegwangpei Ahasuerus, Hegwangpui Esther de Jewme ngauraube, Haman mabam pelane pwa peudi. Nah Mordecai hegwangpei dwaga gwang kelu teilu, kedanemene Esther pa au pe kibaume lie kecu ranglia kebeune. 2 Pecai hegwangpei pe kaugiak bakap keu mpetlu, pa Haman dade keukeli kelu de, delwe Mordecai de cide peudi. Nah Esther Mordecai de peu Haman mabam de rengeilu.

3 Pecai Esther pa tei kedibe tei dai, nah pa hegwangpei dwa gade marang. Pa pe pi ga zeu mie delwe hap eh nah pe dade Agagme pei, Haman kesia de nah pe ciem pa Jewme ziemne riem pwa kebam de keudi beulo pe nggia kie gai. 4 Nah hegwangpei Esther de kecak tuitie de hwagai beu, cine Esther cuhlu delwe hegwangpei dwa ga saplu. 5 Nah pa pe nggia kie, "Magade hegwangpei ziemne cide petau lie cai, nah Ih pe dwa de pe suibe teilu lie cai, nah hegwangpei dwa gade sambe petau lie cai, nah Ih pe dwa de yi lie cai, laisiudung de pung cailigwang dailu kera raudi lulo, Agagme pei Hammedatha napei, Haman ciem de, hegwangpei deuceu leune ga Jewme kebamme de tei ngkapdi kerane pa rau kegaide. 6 Kedanemene Ih dainzwa eh lialu lai no kemau a minadung ngau kera de? Nah Ih dainzwa a kibaume de tei kengkap ngau eh lialu laino?"

7 Nah hegwangpei Ahasuerus hegwangpui Esther nah Jewme pei Mordecai dage rangdi, "Ainie, Ih Haman ki Esther de peu dida, nah penui pecu tsingbang gage gwak dida, aipau de ziemne, pa Jewme de mmau eh pe ba kai kegai ziemne. 8 Cine nnai Jewme ziemne nnai dwade petaube hegwangpei zi gade raulu, nah cide hegwangpei kaugiak bakap le dap gaidi. Kedanemene hegwangpei zi gade nah hegwangpei kaugiak bakap le dap kedi laisiu rau kelu migede keu caili kera gahlu."

9 Cine keicum bekei, cide Sivan* bekei, zie ngkaiekecum benai, cipau tingdau hegwangpei gu laisiukecimedung de qulu. Nah Mordecai ne aja leune kai kebeu rehi gade Jewme dage, nah kedime dage, nah deuceudidung nah deuceudung kedime India gade Cush* kemdei ga kecang dage laisiu raugai: 127 deuceudung, deuceu ge cai deuceu ge kerau zai rehi gade, nah mina ge cai mina ge let rehi gade, nah Jewme dage penui kerau zai rehi gade nah penui let rehi gade. 10 Nah pa hegwangpei Ahasuerus zi gade raulu, nah pa hegwangpei kaugiak bakap le dapdi. Nah pa laisiudung de (hegwangki kündung, hekwenleina, hekwen pak kecibedung reu ga cwa kelame ba gage langgai) 11 hegwangpei ne Jewme de namdi ge cai namdi leune ga kebamme dage kepeu: ngkwalu kera nah penui teilung ziemne sap kera, nah ngkap zingdi kera, gitset kera, nah mina keheibe de mede deuceube penuide gwaketang lu kebuime de ngkap kera, hename nah mipuidung, nah penui gu tui kelu mabamdung luu teudi kera; 12 hegwangpei Ahasuerus deuceudung leune ga, langnaige gage, cide kei kereiekena zie kereiekecumbe nai, cide Adar bekei. 13 Raupwa kebam laisiu de hezai lie eh deuceu leune ga pwa peu kera teidi. Cide mina leune de peu cilu kerane, nah peu Jewme de cipaunai ziemne mtei lu eh, penui ngauraume dade hekum peeilu kerane. 14 Teukengwame, hegwangki gu hekwendung keteume, hegwangpei sam de ne kelwa eh nah mzet süt eh mie di. Nah hezai de Susa kengking reketbam gade peugai.

15 Pecai Mordecai hegwangpei dwa de tetdi, hegwang paini kemhei nah keha ge bah eh, kecak peurwa kedi ge nah langcimpai keyi nah gieremang pai ge teulu eh, nah Susa namdi de mlwa nah suiyi sütdi. 16 Jewme ziemne kebaa nah suiyi, nah misuikeyi nah hetwaherüt bamlu. 17 Deuceu leune ga nah namdi leune ga, hegwangpei sam de nah pe hezai de kegwang leune ga, Jewme ziemne suiyi nah kemlwa, taktyei ngyi nah tingba keyi ge bamlu. Nah cipau deu ga minadung kedame kekiee ge de Jewme teidi, kedanemene Jewme de kehing penui da gwang kedine.