1 Esther mmwang kebam langcumne benai, pe hegwang paini kailu nah hegwangki kigu lungga saplu, hegwangpei ki de ketsapreu eh. Cidau hegwangpei hegwangki ga pe hegwangbam ga bam, hegwangki kimuiki ketsapreu kebam ga. 2 Nah cinzwa eh, hegwangpei hegwangpui Esther kigu ga sap kebam ngaulu herizi, pa pecu ngau pesui lu. Nah hegwangpei pe ba ga kebam kecak tuitie de Esther dage ketwa gai, cine Esther gwang nna delwe tuitie tün tunggai. 3 Nah hegwangpei pe dage rangdi, "Dai ne ncu kebwak lano hegwangpui Esther? Nah nang dai kie neu lano? Hegwangram pempie kieege liede, ncu cide peu beuzie." 4 Nah Esther keligai, "Hegwangpei pesui lie cai, peu henai hegwangpei ziemne mtei pwa kebam taktyei bam ga Haman de ngngwa gwang lulo." 5 Pecai hegwangpei rangdi, "Haman de zette ngngwa gwanglo, Esther kie kela de teilu kerane. Nah Hegwangpei Haman de Esther ne mtei kenzeu taktyei bam ga ngngwa gwanglu."

6 Pecai hegwangpei zau sak kebam dau Esther dage rangdi, "Nang dai luu neu lano? Nah cide ncu peu beuzie. Nang dai kie neu lano? Hegwangram pempie kieege liede, cide teibeu zie."✝ 7 Pecai Esther samkeli eh rangdi, "Ih tei beulo kie kela nah a kekie de au: 8 magade Ih hegwangpei dwa gade pesuibe teilu liecai, nah Ih tei beulo kie kelade peubeu kera nah a kekie tei beu kerade hegwangpei ziemne keyi ge liecai, peu hegwangpei de Ih nnai ziemne mtei beula kebam taktyei bam ga Haman de ngngwa gwanglu, nah Ih cidau ne luu neu kelabe ncu ranglia zie."

9 Nah Haman cipaunai pesui yi eh tetdi. Dede Haman Mordecai hegwangpei rieki ga kebam, pa cuh sap ma mede pecu kerüt peu kemak ngaulu herizi, Haman Mordecai de pe rata sütdi. 10 Dede Haman pekatei pecu kezeulu delwe peki ga gwangdi. Pecai pa pe zangmedung nah pe nau Zeresh de qugai. 11 Pecai Haman penui dade pe mahei ndulia gai, nah pe napeidung dai kieege bambi, nah dainzwa hegwangpei pecu peu kedi teilu dibi nah pa dainzwa pecu hegwangpei gu kerengeime nah kedimedung reu teu cuh beu bi kecu pe gie ranggai. 12 Nah Haman rangdi, "Cide peu reu si eh, hegwangpui Esther pa taktyei mtei kebeu ga peu hegwangpei de ngngwa acu gwale migede ngngwa gwang ma. Nah ncünne liede, pa acu nah hegwangpei de qu bam." 13 Dede Jewme pei Mordecai hegwangpei rieki ga ntum kebam Ih kengau tane aidungde a dade magede ma. 14 Pecai pe nau Zeresh, pe zangmedung pelane si eh pe da rangdi, "Peu penuide tsingbang 50 cubit* hu ge teilo. Nah tingcang hegwangpei dage rangbeu, nah peu penuide cika ge Mordecai de gwakdi. Ciciu eh nang n sui yi eh hegwangpei de ngngwa taktyei bam ga mie lulo." Nah sam cide Haman dwa gade keyi mariem ge di, nah pa tsingbang de teilu.