1 Cipau ziu de hegwangpei zip gailak di. Nah pa ma kenlang be tei kedidung rau kenzeu laisiukwak de keu gwanglo pe kedime de aja kaigai iciu eh cide pe dage pei lialu kerane. 2 Nah cika Mordecai ne Bigthana penai Teresh ha rang kebeu, penai au hegwangpei gu eunuch kikam kenlüt ga kekwabe kena, penai hegwangpei Ahasuerus de renia eh penai ba kai di kera ciem de rau kenzeu ngaulu. 3 Pecai hegwangpei rangdi, "Aide ziemne Mordecai de dai kenzwa herüt mede ma keyi kedi peu gai no?" Nah rehangme hegwangpei gwa keteime keligai, "Pe ziemne magede tei gai melie." 4 Pecai hegwangpei keteu eh, "Kigu ga cau bam no?" Haman cidau hegwangpei ki hegwale kigu ga nlütlu delwe Mordecai de pa pe ziemne mteipwa kebam tsingbang de gage gwak dilo de eh hegwangpei dage rangbeu kera gwang bam. 5 Nah hegwangpei minadung ne pe dage rangdi, "Ainie, Haman au kigu ga sap bam." Nah hegwangpei rangbeu, "Peu pecu lütlu."

6 Pecai Haman lüt, hegwangpei pe dage rangdi, "Hegwangpei herüt peu gai neu kebam peide ziemne daipai tei lai no?" Pecai Haman pelung gade rangdi, "Hegwangpei acu swa cau de herüt peu neu bam lai?" 7 Cine Haman hegwangpei sam keligai, "Hegwangpei herüt peu gai neu kelabe de ziemne: 8 Peu penuide hegwangpei teu kelabe hegwang paini ge nah hegwangpei hekwen teu kelabe nah hegwangme gu peurwa ge pe peu gage kai kebeu de teugwang beulu. 9 Ciciu eh paini cide nah hekwen cide hegwangpei gu kedime mina hutumedung ba gage kai beu. Nah peu penuide hegwangpei pesui yi eh herüt peula kebam mina de bah beu, nah peu pecu hekwen reu gage bamlwe namdi sum ga heni kenza bam ga mielu, nah pe dwade reci gailo, ‘Hegwangpei pesui yi eh herüt peu kegaime de ainzwa tei gai lalie!’" 10 Cine hegwangpei Haman dage rangdi, "Zette, paini penai hekwen keulu, nang kerang de nzwa, nah cide Jewme pei Mordecai ziemne hegwangpei rieki ga ntum kebambe dage teilu. Sam tie gede nang kerang leune gade peu tei mene ta diso."

11 Cine Haman paini nah hekwen keulu, nah pa Mordecai de bah beu nah pecu peu hekwen reu ga bamlwe namdi heni kenza ga mie, nah pe dwa gade reci kegai tei, "Hegwangpei pesui yi eh herüt peu gai keneube de au ainzwa tei gai la lie!" 12 Cipaucai Mordecai hegwangpei rieki ga cailigwang, dede Haman pesui sia süt eh pe peu kezui punglu eh pe ki ga mzet gwang di. 13 Pecai Haman pe dage teikegai leune pe nau Zeresh de nah pe zangmedung pelane dage paulia beu. Pecai pe mina makecime nah pe nau Zeresh pe dage rangdi, "Magade Mordecai, nang pe dwa de kau kedi pei de, au Jewme leuh ge liecai, iciucai nang pe dade ngkieng gailak, dede nang pedwa gade kau bizie." 14 Penui pecu ngngwa marang bam reu kecu dau hegwangpei gu eunuchme gwang cangdi. Nah penui mzet eh Haman de Esther ne mtei kenzeu taktyei bam ga ngngwa gwangdi.