1 Cine hegwangpei Haman de ngngwa lwe hegwangpui Esther de ngngwa tyei sak kera gwang. 2 Nah hegwangpei Esther dage tingba pekena benai zau sak kebam dau rangdai, "Nang dai luu neu lano, Hegwangpui Esther? Nah cide ncu peu beuzie. Nah nang dai kie lano? Hegwangram pempie kieege liede, nah cide teibeu zie."✝ 3 Ge Hegwangpui Esther sam keli eh rangdi, "Magade Ih n dwa gade nsui teilu lie cai, O hegwangpei, nah hegwangpei ziemne cide keyige lie cai, Ih teibeulo kie kela de au a teilung de nah a kekie de au a minadung de de peu ringlu kera deda. 4 Kedanemene a mina nah acu tei ngkap zingdi kera, gitset di kera nah tei msia di kerane anuide zwa dida. Cu magade anuide hebaangme nzwa nah kila puidung tei kera zwagai lie cai, Ih nlei mene bam dizie nage, kedanemene ci kenzwa rei le au hegwangpei de tei kebwak cu petau ma."

5 Pecai Hegwangpei Ahasuerus Hegwangpui Esther dade rangdi, "Pa cauno, cipau mina de? Mina cipaude daiga bam no, ci kenzwa ta teigai kera pelung ga kepui tei kebam de?" 6 Esther sam keligai, "Mipei ge, mide tei keherei kelabe, nah mi ngauraube de au mina kesia Haman aide lie!" Pecai Haman hegwangpei nah hegwangpui dwa gade ngngi sütdi. 7 Pecai hegwangpei perata süt eh zau sak kebam bam gade cuh sapdi delwe hegwale hegwangki gurie ga miedi. Dede Haman au cika bamdi iciu eh pa hegwangpui Esther dade pe teilung ziemne pe nggia kie kerane, kedanemene hegwangpei pecu mcau eh makesia ge tei gai kera pa ngau kedine. 8 Cu hegwangpei hegwangki gurie gade zau kesak bam ga cailigwang kecudau, Haman Esther kebam bamtie ga zeu miedi. Nah hegwangpei ranggai, "Ih a hegwangki ga bam eh de pa hegwangpui de teu lau ni?" Hegwangpei sam aide rang bam kegai dau penui Haman zu kezuidi.*

9 Pecai Harbona, hegwangpei dwa gade eunuchmedung kakgade hangge, rangdi, "Delwe, ainie, Haman Mordecai ziemne tsingbang ge mtei pwa kela, hegwangpei ziemne keyige rang kebeu be, Haman ki ga 50 cubit* hu ge sap bam." Nah hegwangpei rang eh, "Pecu cikage gwakdi." 10 Cine Mordecai ziemne pane mtei kenzeu bam gage penui Haman de tsingbang gage gwakdi, nah hegwangpei rata ngkung miedi.