18 Zane ɗa A̱sula̱ tsa̱ wu,

na tsu yuwan gafura vu unusu

na̱ matawa mo unusu

va akapi a ama agadu a̱ yi?

Vu tsu guza̱ upan wa̱ wu hali hali shi,

adama a na vu ta uwwusa uyo'o

vu roco icigi i na i tsu vadala shi.

1 A̱sula̱, vee ene iliyali i va̱,

adama e icigi ya̱ wu i na i tsu vadala shi.

Vu tasa nusu va̱,

adama a̱bunda̱ e iliyali ya̱ wu.

2 Vu za̱'wa̱ nusu va̱ suru,

vu ka̱mba̱to mu cece

diga o unusu u va̱!

6 A̱sulazuva vu cuwan ni iliyali ya̱ wu

ni icigi ya̱ wu i na i tsu vadala shi,

aza a na vu yuwain ɗe.

7 She vu cuwan na̱ nusu

tsulolobo tsa̱ va̱

na̱ re va aciyogbamu a̱ va̱ wan,

vu cuwan na̱ a̱mu,

o una̱ wi icigi ya̱ wu i na i tsu vadala shi,

adama a na a̱vu za vi isa'ani ɗa.

1 A̱sulazuva, a̱tsuma̱ o usa̱n wa̱ a̱tsuma̱lima̱ a̱ va̱

n ta̱ a̱ mesun uba̱ta̱ wa̱ wu.

2 A̱sulazuva, vu uwwa mesun ma̱ va̱!

Vu polo atsuvu

a̱ mesun ma na ma yuwusan

me izami yi ikambishi!

11 A̱sulazuva n reve ta̱ vu kuɗa̱

e ene iliyali i va̱ shi!

Amma icigi ya̱ wu i na i tsu vadala shi

na̱ a̱ɓula̱ a̱ wu

a ta yuwaan mu mapari

mantsa suru.

6 Na amayun, isa'ani ya̱ wu

ni icigi ya̱ wu i na i tsu vadala shi

i to toni mu,

a rana wuma u va̱ suru.

N ta̱ da̱nu o u'wa̱ wa̱ A̱sulazuva,

hali hali.

13 Cine dada tse ene iliyali i mawun ma̱ yi,

ne ɗa A̱sulazuva e enishe iliyali

ya aza a na a uwwusa wovon wa̱ yi.

7 Lyawa za vi iwuya lyawa ure wa̱ yi, za vu ulambu wa̱ a̱ɓula̱ waru u lyawa majiyan ma̱ yi. Lyawa u ka̱mba̱ uba̱ta̱ wa̱ A̱sulazuva, a̱yi waru u ta yuwaan yi gafura. Lyawa u ka̱mba̱ uba̱ta̱ wa̱ A̱sula̱ a̱ tsu, adama a na u tsu yuwan ta̱ gafura pere.

18 Suru na̱ ne A̱sulazuva a ta pura u yuwaan ɗu isa'ani, u tu ufoɓu na woo roco ɗu isa'ani. Adama a na A̱sulazuva A̱sula̱ a̱ a̱ɓula̱ a ɗa, za va aba'un a ɗa suru za na puro niyi.>>

31 Agba hali n gogo adama a̱ a̱bunda̱ e iliyali ya̱ wu,

vu lyawa le ko vu kototo le shi.

Adama a na a̱vu A̱sula̱ e isa'ani ni iliyali i ɗa!

5 Za ma̱za̱nga̱ ɗa vuma na tsu ca une'e

no okopu no okolo a̱ ta̱,

za na a yuwusan wuma wa̱ yi

a̱tsuma̱ e mejege.

17 Lyawa isa'ani yi Zagbain A̱sula̱ a̱ tsu

u da̱nu oɓolo na̱ a̱tsu.

Vu zuwaa linga ve ekere a̱ tsu aba'un.

Amayun, vu zuwaa linga ve ekere a̱ tsu aba'un.

1 A̱vu mogono Hezekiya lyungu na adanshi a̱ 'ya̱wa̱ a̱tsuma̱ aza a Isra'ila na̱ aza a Yahuda suru, a̱vu waru u ɗana mepepelime a̱ tyo uba̱ta̱ wa aza a Ifiramu na aza a Manase. A̱vu u banu suru nle a̱ ta̱wa̱ a̱tsuma̱ A̱a̱'isamapaɗa A̱sulazuva a̱tsuma̱ a̱ Urishelima na a yuwan A̱buki a Mapasa a̱ A̱sulazuva A̱sula̱ a Isra'ila. 2 Reve mogono na azagbain a̱yi oɓolo no oɓolo ama a̱tsuma̱ a̱ Urishelima suru a paɗa a̱sa̱la̱ na a yuwan A̱buki a Mapasa o woto wa̱ ire. 3 A gura yuwan A̱buki a mantsa ma na u lobonoi na a yuwan a̱buki'i shi, adama a na nan ganu na ri na akiza a̱da̱na̱ ta̱ uka̱la̱mu, waru ama o oɓoloto a̱tsuma̱ a Urishelima shi. 4 Ifoɓi'i i da̱na̱ ta̱ ulobonu uba̱ta̱ u mogono oɓolo no oɓolo ama'a suru. 5 A̱vu a paɗa a̱sa̱la̱ na a ca udammu a̱tsuma̱ a Isra'ila suru, diga a̱ lyuci va Biyasheba a̱ tyo Dan, a̱ ɗesu a ama na a̱ ta̱wa̱ Urishelima na a yuwan ma̱za̱nga̱ ma̱ A̱buki a Mapasa a̱ A̱sulazuva a̱ A̱sula̱ a Isra'ila. Koto shi a̱da̱shi yuwan ma̱za̱nga̱ na̱ a̱bunda̱ ama ununa u ri uɗanu shi.

6 O una̱ wu udammu u mogono ma ɗa a cayi aza a na a tsu yuwan uro shi suru a̱tsuma̱ a Isra'ila na̱ Yahuda na̱ mepepelime maa na ma adansa, <<A̱ɗu ama a Isra'ila, i ka̱mba̱ uba̱ta̱ wa̱ A̱sulazuva A̱sula̱ a Ibrahim na̱ Ishiyaku na̱ Isra'ila, adama a na a̱yi fo wa̱ ka̱mba̱ uba̱ta̱ uɗu, a̱ɗu na i buwai, a̱ɗu naa i la'ai e ekere o mogono ma Asuriya. 7 She yo o'wo cine nkaya nɗu n ri na̱ a̱za̱ a̱ɗu wan, aza a na a yuwain ulambu wa̱ a̱ɓula̱ e ekere A̱sulazuva A̱sula̱ a nkaya nɗu wan. Adama o ndolo ɗa u ka̱mbuwa̱ nle ili i wovon, cine yenishe ne esu a̱ɗu ana'an. 8 She i yuwan aciyogbamu cine nkaya nɗu yuwain wan, amma i ca aciya̱ɗu uba̱ta̱ wa̱ A̱sulazuva. I ta̱wa̱ a̱tsuma̱ A̱a̱'isamapaɗa a̱ A̱sulazuva, uba̱ta̱ u na u tawai na u ri na akiza hali hali. Yuwayin A̱sulazuva A̱sula̱ a̱ɗu a̱ga̱nda̱, adama upan wu usuɗu wa̱ a̱yi u tawa aciya̱ɗu. 9 N na̱ i ka̱mba̱ uba̱ta̱ wa̱ A̱sulazuva, a̱za̱ a̱ɗu na̱ muwun nɗu a̱ ta̱ roco le iliyali e ekere aza a na e reme nle waru a̱ ka̱mba̱ le e iɗa i nda, adama a na A̱sulazuva A̱sula̱ za vi icigi i ɗa, waru za na o rocosu iliyali i ɗa. Waru wa vadala urewesu wa̱ a̱yi diga uba̱ta̱ uɗu shi, hali ni i ka̱mba̱ uba̱ta̱ wa̱ a̱yi.>>

10 A̱vu aza a na a tsu yuwan uro'o shi a̱ ka̱ra̱ diga a̱ lyuci a̱ tyo lyuci ya Ifiramu na̱ Manase hali acina Zebulun, amma a̱vu ama'a o zo'oso le waru a tara le i ili i ro shi. 11 Amma suru na̱ ne a̱da̱na̱ ta̱ na ama diga o upasu wa Asha na̱ Manase na̱ Zebulun aza na a tarai aciyele ili i ro shi, a̱vu a̱ ta̱wa̱ Urishelima. 12 A̱tsuma̱ a Yahuda waru ukere wa̱ A̱sulazuva u da̱na̱ ta̱ oɓolo na ama adama a na wa ca le uɓolu wo okolo a̱ta̱ na a yuwan tsutoni nu udammu u mogono Hezekiya oɓolo na azagbain a̱yi, a yuwusan tsutoni na adanshi a̱ A̱sulazuva.

13 O woto wa̱ ire, ama na̱ a̱bunda̱ oɓoloto ta̱ a̱tsuma̱ a̱ Urishelima adama a na a yuwan A̱buki o opopofu a na a̱ ri na̱ wolilo shi. 14 A̱vu ama 'yon o kototo omoci a musa'a n kucci na a̱ ri a̱tsuma̱ a̱ Urishelima, na̱ akapi omoci a̱ musa'a n na a yuwusan ukula̱tosu wi ili i ma̱guru, a̱vu a̱ pura̱ le a̱ tyo o Uka̱ri wa̱ Kidron.

15 A paɗa ta̱ kyon va̱ A̱buki a Mapasa a̱tsuma̱ o rana wa kupa na̱ a̱za̱ na̱shi u woto wa̱ ire. Amma nan ganu na̱ nan Levi a uwwa ta̱ wono, reve wo o'woto aciyele aza akiza a̱vu a̱ ta̱wa̱ na̱ kucci vu ukula̱tosu a̱tsuma̱ A̱a̱'isamapaɗa a̱ A̱sulazuva. 16 A̱vu a tara tsugbain tsa le cine a dammai o uritosu wa Musa vuma va̱ A̱sula̱. A̱vu nan ganu o kyo'onu mpasa n na a̱ ushiyi diga e ekere a nan Levi. 17 Na wo o'woi ama na̱ a̱bunda̱ a̱tsuma̱ oɓolo'o a̱ da̱na̱ na akiza shi, a̱yi ɗa i zuwai na̱ nan Levi a paɗa nle ikyon ya̱ A̱buki a Mapasa'a. Ne ɗa a tawai ama'a o'woi na akiza e ekere A̱sulazuva. 18 Amma ko na wo o'woi ama na̱ a̱bunda̱ na o uta̱i diga o ugundo wa Ifiramu na aza a Manase na aza a Isaka na̱ a̱za̱ a̱ Zebulun a̱ ka̱mba̱to aciyele cece shi. Suru na̱ ne a lyuwa ta̱ ilyalya ya̱ A̱buki a Mapasa, ununa u ri uɗanu a̱ wila̱ shi. Amma Hezekiya yuwaan le ta̱ avasa, u damma, <<Lyawa A̱sulazuva za vi isa'ani yuwan ko yaa gafura, 19 za na zuwai okolo a̱yi suru uba̱ta̱ wa̱ A̱sulazuva A̱sula̱ a nkaya ntsu, ko na̱ shi uri cece shi o una̱ u wila̱ u na a̱a̱'isa̱ a dammai.>> 20 Amma reve A̱sulazuva a uwwa avasa a Hezekiya, a̱vu wo o'woto ama'a gbaga.

21 Ama a Isra'ila na a̱da̱na̱i a̱tsuma̱ Urishelima a yuwan ta̱ A̱buki o Opopofu a na a̱ ri na̱ wolilo shi hali rana cindere na̱ ma̱za̱nga̱ lon, a̱vu nan Levi na̱ nan ganu a canasa ishipa a̱ tyo uba̱ta̱ wa̱ A̱sulazuva urana suru, ni itana i tsuwe'e wi ica.

22 Hezekiya ca ta̱ nan Levi a̱sa̱la̱ aza a na a yuwain ulinga babu uro uba̱ta̱ wa̱ a̱ga̱nda̱ a̱ A̱sulazuva. Adama a na a rana cindere ndolo a lyuwa ta̱ upasu u na a ca nle, waru a ca ta̱ kucci muwwulai reve a ca A̱sulazuva ica, A̱sula̱ a nkaya nle. 23 Reve oɓolo a ama'a a̱da̱shi usu a yuwisan a̱ga̱nda̱ A̱buki a Mapasa'a hali acina rana cindere waru. A̱tsuma̱ a rana cindere'e a yuwan ta̱ A̱buki na̱ ma̱za̱nga̱ lon. 24 Mogono Hezekiya va Yahuda ta̱wa̱ ta̱ no ogono e inan ukpakukupa (1,000) ni ikyo na̱ mgbele ukpakukupa kupocindere (7,000) adama oɓolo ama'a, reve azagbain fo a̱ ta̱wa̱a̱ le no ogono e inan ukpakukupa (1,000) ni ikyon na̱ mgbele ukpakukupa kupa (10,000). Waru nan ganu na̱ a̱bunda̱ a̱da̱na̱ ta̱ na akiza. 25 Oɓolo a ama a Yahuda suru a yuwan ta̱ ma̱za̱nga̱, oɓolo na̱ nan ganu na̱ nan Levi, na aza a na o ɓolotoi suru diga o upasu wa Isra'ila, oɓolo no omocin a na a̱ ri na̱ nden a̱tsuma̱ a Isra'ila na̱ Yahuda. 26 A yuwan ta̱ ma̱za̱nga̱ lon a̱tsuma̱ a̱ Urishelima, adama a na diga a mantsa ma Sulemanu ulobo wa̱ Da̱wuda mogono ma Isra'ila na a yuwain cu'un vi iɓolo i ndolo she a̱da̱shi yuwisan cu'un va̱ yi waru a̱tsuma̱ a̱ Urishelima shi. 27 A̱vu nan ganu oɓolo na̱ nan Levi a̱ 'yon mishin adama a zuwaa ama'a aba'un, a̱vu A̱sula̱ a̱ usu le, adama a na avasa ele a rawai zuva, uba̱ta̱ wu nden wa akiza a̱yi.

1 A̱sula̱ a damma ta̱,

<<Na̱ vuma kakasa na̱ ka va̱ yi,

reve u ka̱ra̱ wo olo vuma ro,

vuma'a u ta̱ gura

ka̱mbuwisa̱ yi ɗa?✝

Ashe iɗa'a ya̱a̱ la̱nga̱ suru suru shi?

Amma i yuwan ta̱ wuma tsa ashakala a na a̱ ri

na̱ a̱za̱ e icigi a̱bunda̱ lon,

gogo gba a̱vu vu ka̱mba̱ ya̱'a̱ va̱?

Ne ɗa A̱sulazuva a dammai.

2 <<'Ya̱sa̱n esu a̱ wu zuva

vu ka̱lyuwa̱ agaɗi vee ene!

Uba̱ta̱ u ro u tu lo

a na a̱ kuɗa̱i o voyin na̱ a̱vu?

Vu da̱nu ta̱ a̱ nge'en mu ure

a pura macigata ma̱ wu,

vu da̱nu ta̱ she damma za va aguɓa a̱ a̱tsumona.

Vu lungusa̱ ta̱ iɗa'a,

na̱ tsushakala tsa̱ wu ni iwuya ya̱ wu.

3 Adama o ndolo ɗa a̱ kuɗa̱i o ro'o mini,

waru lyushi da̱nu shi.

Na̱ ne suru, vu ta̱ ni iroci ya aashakala,

reve vu kuɗa̱ a uwwa wono.

4 Ashe gogo ɗa vu ɗe numu,

<Dada va̱, ni i utsa̱ i va̱

diga a̱mu a̱ tsulolobo,

5 vu ta̱ da̱na̱ o upan kuci ɗa?

Upan wa̱ wu u ta lyuwa elime hali hali?>

Ne ɗa vu tsu yuwusan adanshi,

amma vu tsu yuwusan ta̱

iwuya i na vu cigai suru.>>

6 A mantsa mo tsugono tso Mogono Josaya, A̱sulazuva a yuwan ta̱ adanshi na̱ mu u damma, <<Vee ene ta̱ ili i na za vu ulambu wa̱ a̱ɓula̱ a nda, Isra'ila vu upasu wu ugana yuwain? U lapa ta̱ agawan aagaɗi o uga'an biti na̱ za̱la̱ vu ɗanga kpa̱la̱m suru adama u yuwan tsushakala ɗe.✝ 7 N yuwan ta̱ majiyan ma na nu u koto ili i nda suru, u ta̱ ka̱mba̱ uba̱ta̱ u va̱, agba u yuwan ne shi, waru Yahuda na ri upasu wu uyagi mawun ma̱ a̱na̱wun ma̱ yi mo o ulambu wa̱ a̱ɓula̱ mee ene ta̱. 8 N ca ta̱ Isra'ila za vu ulambu wa̱ a̱ɓula̱ a nda a aatagada a wukasu, a̱vu n lyawai u ka̱ra̱ adama a tsushakala tsa̱ yi suru. Na̱ ne suru mee ene ta̱ mawun ma̱ a̱na̱wun ma̱ yi Yahuda vu ulambu wa̱ a̱ɓula̱ uwwa wovon shi, reve fo u ka̱ra̱ o uta̱ u yuwan tsushakala. 9 Adama a na tsushakala tsa Isra'ila tsa rawai shi, reve wo o'woto iɗa'a idaba a̱vu u yuwan tsushakala na atali oɓolo na̱ ɗanga. 10 Na̱ ne suru, mawun ma̱ a̱na̱wun ma̱ yi Yahuda za vu ulambu wa̱ a̱ɓula̱ o ndolo, u ka̱mba̱ ya̱'a̱ va̱ no okolo a̱ ta̱ shi, amma she a̱tsuma̱ o ulambu wa amayun, ne ɗa A̱sulazuva a dammai.>>

11 A̱vu A̱sulazuva a damma mu, <<Isra'ila vu ulambu wa̱ a̱ɓula̱, u ta̱ na̱ a̱ɓula̱ a na a la'ai ulambu wa̱ a̱ɓula̱ a Yahuda. 12 'Ya̱wa̱, vu damma adanshi a nda upasu wu ugana, vu damma,

<<Vu ka̱mba̱, a̱vu Isra'ila vu ulambu wa̱ a̱ɓula̱,

ne ɗa A̱sulazuva a dammai,

ma̱a̱ da̱shi yuwan upan na̱ a̱vu shi,

adama a na a̱mu za vi iliyali ɗa,

maa yuwan upan na̱ a̱vu hali hali shi,

ne ɗa A̱sulazuva a dammai.

13 A̱vu de vu usu unusu wa̱ wu,

vu 'ya̱sa̱a̱n ta̱ A̱sulazuva A̱sula̱ a̱ wu aci,

voo oco ta̱ a̱ɓula̱ a̱ wu uba̱ta̱ u musula̱ n ro,

za̱la̱ vu uɗanga kpa̱la̱m suru.

Agba vu yuwaan mu tsutoni shi,

ne ɗa A̱sulazuva a dammai.

14 Reve A̱sulazuva a damma,

i vadala a̱ɗu ama o ulambu wa̱ a̱ɓula̱,

adama a na a̱mu ɗa vali ɗu.

N ta tara ɗu a̱za̱ ta̱ ta̱

diga a̱tsuma̱ e ilyuci i ɗu

ne ejere re diga a̱tsuma̱ o gundo ɗu

reve n ta̱wa̱to ɗu Sihiyona.>>

15 <<Reve n ca ɗu aza aguɓa a na aa yuwusan ili i na okolo a̱ va̱ a cigai, aza a na o ronoo ɗu aaɗanga nu ugbozu nu urevu. 16 A rana ndolo na i da̱shiyi a̱bunda̱ a̱tsuma̱ e iɗa'a, ne ɗa A̱sulazuva a dammai, ama a̱ da̱shi yuwisan adanshi adama Akpati a nzuwulai a̱ A̱sula̱ shi.>> Wa̱a̱ da̱shi uwisa okolo e le, ko a̱ da̱shi cuwan na̱ yi shi, wa̱a̱ puwa̱a̱n shi, ko a̱ da̱shi yuwisan cu'un va̱ yi shi. 17 <<A mantsa ma ɗaɗa e ɗe Urishelima Ootogu o Tsugono a̱ A̱sulazuva. Waru nɗa suru n to ɓoloto a̱tsuma̱ a̱ Urishelima a ca Ala a̱ A̱sulazuva tsugbain. A̱a̱ da̱shi kuru aciyogbamu o okolo e le shi. 18 A rana ndolo u'wa wa Yahuda u to ɓolo ukere nu u'wa wa Isra'ila, waru oɓolo a ɗa a̱ ka̱mba̱ diga e iɗa yu ugana a̱ tyo e iɗa i na n cayi nkaya nle wa agadu.>>

19 << <A̱mu na aciya̱va̱ n damma ta̱,

na̱ ma̱za̱nga̱ ma ɗa ma tara wu

tsa̱ muwun mo olobo n va̱,

a̱vu n ca wu iɗa i sa'ani,

agadu a na a la'ai ulobonu suru

a̱tsuma̱ a nɗa mu uvaɗi.

N shi ta̱ n yuwan majiyan

ma na vee ɗe mu Dada

waru va̱a̱ da̱shi kakasa na̱ mu shi.

20 Amma cine ka tsu da̱na̱

nu ulambu wa̱ a̱ɓula̱ e ekere a vali va̱ yi,

ne ɗa i yuwaan numu ulambu wa̱ a̱ɓula̱,

a̱vu u'wa wa Isra'ila,

ne ɗa A̱sulazuva a dammai.> >>

21 <<A uwwa ta̱ uɗyo u mesun a agalaci agaɗi,

uɗyo u mesun ni ipati ya ama a Isra'ila,

adama a na a̱ lungusa̱ ta̱ re le,

waru e icina ta̱ na̱ A̱sulazuva A̱sula̱ e le.

22 Ka̱mba̱ yi, a̱ɗu ama o ulambu wa̱ a̱ɓula̱,

n ta̱ ka̱mbuwa̱ ulambu wa̱ a̱ɓula̱ a̱ ɗu gbaga!>>

<<Amayun, tsu ta̱ ka̱mba̱ uba̱ta̱ wa̱ wu,

adama a na a̱vu ɗa A̱sulazuva A̱sula̱ a̱ tsu.

23 Amayun a̱ga̱nda̱ e itoni i musula̱

a agaɗi na atali ili i wulumu i ɗa.

Amayun uba̱ta̱ wa̱ A̱sulazuva A̱sula̱ a̱ tsu a ɗa goon,

iwawi ya Isra'ila i ri.

24 Diga a̱ tsulolobo tsa̱ tsu,

musula̱ n wono nda n lyuwa ntsu iliyinkapa,

ya̱a̱ a̱tsuma̱lima̱ a nkaya n tsu

yo oɓolo e ikyon i le na̱ mgbele

olobo e le ne esheli.

25 Lyawa tsu von e iɗa na̱ wono u tsu,

waru lyawa ili i wono i tsu i kpoto tsu.

Adama a na tsu yuwaan ta̱

A̱sulazuva A̱sula̱ a̱ tsu unusu,

a̱tsu na̱ nkaya ntsu.

Diga a̱ tsulolobo tsa̱ tsu,

acina ana'an,

tsu yuwaan A̱sulazuva

A̱sula̱ a̱ tsu tsutoni shi.>>