1 A̱tsuma̱ a aa'wan o ufaru u Sayiru mogono ma Pashiya, reve A̱sulazuva o shiton adanshi a na u yuwain o una̱ u vumava̱sula̱ Irimiya, a na u ju'wa̱in okolo o mogono Sayiru a̱vu u ca udammu adama aza a Yahuda a̱ ka̱mba̱. Reve mogono'o ma zuwa a lapa ulingi wu udammu u na u cayi waru a ɗanai a̱tsuma̱ e iɗa i tsugono tsa̱ a̱yi. 2 Apa nda ili i na Sayiru mogono ma Pashiya ma dammai,

A̱sulazuva A̱sula̱ a zuva, a ca mu ta̱ tsugono tsu uvaɗi suru, waru u zuwa mu ta̱ n suwaa yi u'wa a Urishelima a̱tsuma̱ a Yahuda. 3 Za ne ɗa a̱tsuma̱ a̱ ɗu za na a̱ ri diga ama A̱sula̱ a Isra'ila? Lyawa u ka̱mba̱ a̱ tyo Urishelima za na ri e iɗa ya Yahuda, u suwisa U'wa wa̱ A̱sulazuva A̱sula̱ a Isra'ila, A̱sula̱ a na a̱ ri Urishelima. Lyawa A̱sula̱ a̱ yi a̱ da̱na̱ oɓolo na̱ yi.* 4 Lyawa vuma va Yahuda na la'ai biti, a̱vu ama o uba̱ta̱'a̱ a kamba yi na̱ azurufa na̱ zinariya ni itana ni iliyamunga na̱ ucasu wu ucigu wo okolo adama a̱ A̱a̱'isamapaɗa a̱ A̱sula̱ a na a̱ ri Urishelima.

5 Reve azagbain a 'wa vu nkaya ma Yahuza na̱ Banyami na̱ nan ganu na̱ nan Levi, na̱ za na A̱sula̱ a̱ ju'wa̱in okolo a̱ yi suru, u gawan a suwa U'wa wa̱ A̱sulazuva u na u ri Urishelima. 6 Reve aza a na suru a̱ ri nden zuzu ne ele a kamba le ni itana i na a yuwain na̱ azurufa na̱ zinariya ni itana ni iliyamunga na̱ ne'e sa'ani oɓolo na̱ ne'e vu ucigu wo okolo.

7 Mogono Sayiru waru mo uta̱a̱ ta̱ itana yu U'wa ya̱ A̱sulazuva i na Nebukanaza shi pura̱i diga Urishelima reve u zuwa le a 'wa musula̱ ma̱ yi. 8 Reve Sayiru mogono ma Pashiya ma zuwa Mitireda za vi izuwa wu uta̱a̱ ni itana'a u kecee Sheshibaza, zagbain va aza a Yahuda.

9 Apa nda a̱bunda̱ e le,

akwanu a gbagbain a zinariya mata'atsu,

aza a azurufa ukpakukupa (1,000)

na̱ mutsun ushin na̱ kucci,

10 na asa'atsu a zinariya mata'atsu

na asa'atsu a azurufa o ro ukpakuna̱shi na̱ kupa (410)

ni itana i ro ukpakukupa (1,000).

11 Suru itana i zinariya na̱ azurufa'a, e reme ta̱ ukpakukupa uton nu ukpakuna̱shi (5,400). Sheshibaza gawan ta̱ ni ili ya nda suru a mantsa ma na aza a na a̱ pura̱i diga uba̱ta̱ u tsugbashi a gawain diga Babila a̱ ka̱mba̱ Urishelima.