1 Ana woto we cindere wi isawain, reve aza a Isra'ila a na a̱ shi nden e ilyuci i le, o ɓoloto she damma vuma ta̱ a̱tsuma̱ a̱ Urishelima. 2 Reve Jesuwa ulobo wa Jozada oɓolo na̱ a̱za̱ a̱ yi nan ganu na̱ Zerubabe ulobo wa Sheyatiye na̱ a̱za̱ a̱ yi, e teme usaa u masa'a ma̱ A̱sula̱ a Isra'ila. Reve a suwa masa'a adama a na a ca kucci vu ukula̱tosu cine u ri uɗanu a̱ wila̱ wa Musa vuma va̱ A̱sula̱.* 3 Reve a suwisa masa'a'a uba̱ta̱ u na u da̱na̱i adama a na a uwwusa ta̱ wovon wa ama e iɗa'a. A̱vu a ca A̱sulazuva kucci vu ukula̱tosu ɗe, kucci vu ukula̱tosu vu usana nu ulivu.* 4 Reve waru a yuwan A̱buki o Ogodo cine u ri uɗanu. Reve a ca kucci vu ukula̱tosu vu urana suru o una̱ wa̱ a̱bunda̱ a̱ kucci cine a zuwai.* 5 Ana a̱yi ndolo kotoi, a̱vu a lyuwa elime nu ucasu u kucci vu ukula̱tosu wa na'an na̱ nfa'an, na̱ Kucci va̱ A̱buki o Woto u Sa'avu na̱ A̱buki A̱sulazuva a na a zuwai suru, nu ucasu wu ucigu wo okolo e ekere a̱ A̱sulazuva. 6 O urana wu ufaru u woto we cindere reve a fara a casu kucci vu ukula̱tosu e ekere a̱ A̱sulazuva. Agba koto a̱ shi a vara ikyun yu usaa ya̱ A̱a̱'isamapaɗa a̱ A̱sulazuva shi.

7 Reve a ca ikebe adama a ca asuwi na̱ a̱za̱ o ulinga wa akpata. Reve a ca aza a Sidon na aza a Taya ilyalya ni ili yo oso na̱ mani'in ma̱ zetun a̱ ta̱wa̱a̱ na̱ ɗanga Sida diga Lebanon a mala a̱ tyo Japa, a̱bunda̱ cine Sayiru mogono ma Pashiya ma zuwai.

8 O woto we ire wa aa'wan e ire a na a̱ ka̱mba̱i o U'wa wa̱ A̱sula̱ a̱ Urishelima, reve Zerubabe ulobo wa Sheyatiye na̱ Jesuwa ulobo wa Jozada na akapi a̱ a̱za̱ e le nan ganu na̱ nan Levi na aza a na suru a̱ ka̱mba̱i Urishelima diga o uba̱ta̱ u tsugbashi a fara ulingaꞌa. A̱vu a zuwa nan Levi diga aa'wan ushin a gawan a̱ ka̱lyuwusa̱ ulinga wu usaa wu U'wa wa̱ A̱sulazuva. 9 Jesuwa no olobo a̱ yi na̱ a̱za̱ a̱ yi na̱ Kadimiye no olobo a̱ yi na̱ limatan va Hodaviya no olobo a Henada, suru n le nan Levi ɗa, reve e idanasa ulinga wu usaa wu U'wa wa̱ A̱sula̱.

10 Ana asuwi a varai ikyun yu usaa wa̱ A̱a̱'isamapaɗa a̱ A̱sulazuva, a̱vu nan ganu a̱ da̱na̱ lo mishin wotowu na̱ a̱tugu a tsuganu waru uguzu na avana. Ne ɗa waru nan Levi limatan va Asaf o uta̱i za su uguzu ni nyangi, adama a cuwa A̱sulazuva cine Da̱wuda mogono ma Isra'ila ma zuwai.* 11 Reve a cana a cuwusa o godyushoo A̱sulazuva a dansa,

<<A̱sulazuva za vi isa'ani ɗa,

icigi ya̱ yi a̱ tyo ya aza a Isra'ila u ri na̱ a̱tyo shi.>>

Reve ama suru a̱ 'ya̱sa̱n uɗyo nu ucira a cuwa A̱sulazuva, adama a na a varai ikyun yu usa yu U'wa wa̱ A̱sulazuva.* 12 Agba nan ganu na̱ a̱bunda̱ na̱ nan Levi na azagbain a 'wa na̱ mbara n na mee enei o U'wa wa̱ A̱sulazuva wu ufaru, reve e shon o uta̱a̱ uɗyo a na e enei a varai ikyun yu usaa ya̱ A̱a̱'isamapaɗa a nda, ko a na wo o'woi ozo o ro a yuwan ta̱ yisali i ma̱za̱nga̱. 13 Hali ko za gura kasa uɗyo u ma̱za̱nga̱ na̱ za mesun shi adama a na ama o oruwo ta̱ lon. Hali a uwwa ɗyo le diga alanga.