1 A mantsa'a ama̱sula̱ Hagai na̱ Zakariya ulobo wa̱ Ido a yuwan ta̱ adanshi e ikaka ya̱ A̱sula̱ a̱ tyo ya aza Isra'ila a na a̱ ri na̱ nden a̱tsuma̱ a Yahuda na̱ Urishelima, na ala a̱ A̱sula̱ a Isra'ila a na a̱ ri o tsugono a aci e le.* 2 Reve Zerubabe ulobo wa Shiyatiyel na̱ Jesuwa ulobo wa Jozada a̱ 'yon a̱vu e teme usaa wu U'wa wa̱ A̱sula̱ a na a̱ ri Urishelima. Ama̱sula̱ a nda a̱ shi ta̱ oɓolo ne ele a kambusa le.*

3 A mantsa'a a̱vu Tatenai gwamna Mavada mo Uɗolu wa̱ Yufireti na̱ Sheta Bozenai na aza a na a̱ ri a muwwulai a̱ ta̱wa̱ ya̱'a̱ le a̱tsuma̱ Urishelima a̱vu a yuwan yeci a damma, <<Zane ɗa ca nɗu ucira i suwa U'wa u nda, reve waru i ɓoloto wi itana i nda?>> 4 Reve waru e ece le a damma, <<A te ɗa ala aza a na a zama a̱ 'ya̱sa̱n usaa u nda?>> 5 Amma ucira wa̱ A̱sula̱ u ta aci a mbara ma aza a Yahuda, adama o ndolo aa gura isawaton wu usa'a shi, hali she na a̱ 'ya̱wa̱ yi Dariyu na alabari, waru she na a̱ tsura̱i usuwu uɗanu.

6 Apa nda ili i na i ri e mepepelime ma na Tatenai gwamna vu upasu u Mavada mo Uɗolu wa̱ Yufireti na̱ Sheta Bozenai na aza a na a̱ ri a muwwulai ne ele a na a̱ ri mbara o upasu u Mavada mo Uɗolu wa̱ Yufireti a̱ lyunguwa̱i Dariyu mogono.

7 Reve a̱ lyungu wa̱ yi nu ucuɗuwu uɗanu adansa.

<<A̱ tyo ya Mogono Dariyu, Vu da̱na̱ na asuvu nden! 8 Tsu ciga ta̱ mogono me reve a na tsu 'ya̱wa̱i upasu wi iɗa ya Yahuda, o U'wa wa̱ A̱sula̱, A̱sula̱ a gbain o ndolo. A ta suwusa yi na atali a gbagbain a na e she'ein, waru a zuwa ta̱ akpata o uɓaɓu'u. A ta lyuwusa elime nu ulinga'a waru a ta yuwusan ulinga'a babu uro. 9 Tse ece ta̱ fo azagbain ama tsu damma, <Zane ca nɗu ucira i suwisa U'wa u nda, hali na i ɓolotoi itana i nda?> 10 Waru tse ece le ta̱ ala e le, adama tsu ɗanaa wu tsu revetyo wu azagbain a̱tsuma̱ e le. 11 Reve a̱ usu tsu a damma. <A̱tsu agbashi a̱ A̱sula̱ a ɗa a na a yuwain zuva ni iɗa, waru tsu ta suwusa A̱a̱'isamapaɗa a na a̱ shi a suwai ɗe a'wan na̱ a̱bunda̱ a na a̱ ka̱ra̱i, U'wa u na mogono ma gbain mo ro ma Isra'ila ma̱ shi ma suwai hali gba u koto. 12 Amma a na wo o'woi nkaya n tsu n ca ta̱ A̱sula̱ a zuva upan, a̱vu u ca le e ekere a Nebukanaza mogono ma Babila vuma va Kaldiya. A̱yi ɗa za na lungusa̱i U'wa u nda, a̱vu u pura̱ ama'a a̱ tyo tsugbashi e iɗa ya Babila.* 13 Amma a̱tsuma̱ aa'wan o ufaru u tsugono mo mogono Sayiru ma Babila, Sayiru Mogono ma ca ta̱ udammu a na a suwisa U'wa wa̱ A̱sula̱.* 14 Suru na̱ ne, Mogono Sayiru ɗa ka̱mbuwa̱i itana i zinariya na̱ azurufa ya̱ A̱a̱'isamapaɗa wa̱ A̱sulazuva a na Nebukanaza shi pura̱i diga a̱ A̱a̱'isamapaɗa a na a̱ ri Urishelima a̱vu u 'ya̱wa̱ ne ele a masa'a a̱tsuma̱ a Babila. Reve u zuwa le ekere a vuma na a̱ tsu ɗe Sheshibaza, za na a zuwai gwamna va Yahuda. 15 Reve Sayiru da̱shi damma yi, <<Vu pura̱ itana i nda vu ka̱mbuwa̱ le a̱ A̱a̱'isamapaɗa a na a̱ ri Urishelima, reve a suwa U'wa wa̱ A̱sula̱ a̱ wira̱ wa̱ yi.>> 16 A̱vu Sheshibaza ta̱wa̱ u vara ikyun yu usaa yu U'wa wa̱ A̱sula̱ a na a̱ ri Urishelima. Diga a mantsa mo ndolo hali n gogo a ta lyuwusa elime nu ulinga'a, agba o koto shi.> 17 Adama o ndolo, nu u yo'ono ta̱ mogono, lyawa a̱ ka̱lyuwa̱ a̱tsuma̱ aasula a aatagada alabari o tsugono a Babila, ko a̱ ta̱ tsura̱ u dammu u na mogono Sayiru ma ɗanai a na u ca yi udammu a na a suwisa U'wa wa̱ A̱sula̱ a na a̱ ri Urishelima, ko babu. Waru lyawa mogono ma̱ lyunguwa̱ tsu na̱ a̱sa̱la̱ a̱ yi adama aɗa a nda.>>