1 Reve Mogono Dariyu ca udammu, reve a̱ bunga̱ a̱tsuma̱ aasula a atagada alabari o tsugono za na ri a Babila uba̱ta̱ u na a̱ shi a zuwai atagada alabari o tsugono tse le. 2 Agba a̱vu a̱ tsura̱ a aatagada'a a̱tsuma̱ a Ekibatana lyuci gbain vu upasu wi iɗa ya Midiya a na a ɗanai,

Ili yu ucuwusan.

3 <<A̱tsuma̱ aa'wan o ufaru u tsugono tsa Mogono Sayiru, u ca ta̱ udammu adama o U'wa wa̱ A̱sula̱ a na a̱ ri Urishelima. U ca ta̱ udammu u na a suwisa U'wa'a, uba̱ta̱ u na a ca kucci. Lyawa a vara ikyun yu usa'a, waru a zuwa uga'an wa̱ yi mishin ana kupakucci, washin wa̱ yi waru ana kupakucci. 4 Waru apa cine a suwa uɓaɓu wa̱ yi. O ukuruwu wa atali a ta'atsu a gbagbain a na e she'ein biti, a ta zuwa ukuruwu uta̱ wa aakpata. Diga e izuwa yu ukobu u mogono ma ɗa aa tsupa ikebe yu ulinga'a. 5 Waru lyawa a̱ ka̱mbuwa̱ ni itana i zinariya na̱ azurufa yu U'wa wa̱ A̱sula̱ aza a na Nebukanaza pura̱i diga a̱ A̱a̱'isamapaɗa a na a̱ ri Urishelima a̱ ta̱wa̱ Babila. A̱ ka̱mbuwa̱ le suru uba̱ta̱ u na a̱ da̱na̱i a̱ A̱a̱'isamapaɗa a̱tsuma̱ a̱ Urishelima. A̱vu a zuwa le o U'wa wa̱ A̱sula̱.>>

6 <<Reve Mogono Dariyu lyungu nu usuwu u nda u damma, a̱ tyo ya Tatenai gwamna vu upasu u Mavada mo Uɗolu wa̱ Yufireti na̱ Sheta Bozenai na̱ a̱ɗu aza a na i ri ya muwwulai na̱ ne le mbara mu upasu u Mavada mo Uɗolu wa̱ Yufiriti, i lyawa uba̱ta̱'a̱. 7 I tawa ekere a̱ ɗu diga o ulinga wa̱ A̱a̱'isamapaɗa a̱ A̱sula̱ a nda adama u lyuwa elime. Waru i lyawa gwamna va aza a Yahuda oɓolo na̱ mbara nle a suwisa U'wa wa̱ A̱sula̱ a̱ wira̱ wa̱ yi. 8 Waru, n ta casu udammu adama e ili i na ko i ciga i 'yuwan i na ya yuwan adama i kamba mbara ma aza a Yahuda adama a suwisa U'wa wa̱ A̱sula̱. Waru a tsupa ikebe yu ulinga ya ama'a diga e izuwa yu ukobu wu u'wa u mogono, ikebe yu utafa yu upasu u Mavada mo Uɗolu wa̱ Yufireti. Waru a tsupa menle me le babu usa̱n. 9 Waru i ca nan ganu a na a̱ ri Urishelima ili i na a cigai vu urana suru babu bula̱. I ca le ogono e inan na̱ a̱giri'i ko mugiri'i adama a̱ kucci vu ukula̱tosu a̱ tyo ekere a̱ A̱sula̱ a Zuva. Ko akpaɗi ko masayan ma̱ ina̱bi ko mani'in ma̱ zetun. 10 A ta yuwan tsun nda adama a gura ca kucci na yo'onoto A̱sula̱ a zuva okolo, waru a yuwan avasa adama a wuma u mogono no olobo a̱ yi. 11 Waru n ca ta̱ udammu ana, suru za na vadalai wila̱ u nda, a ta tara a̱a̱gba̱la̱ o u'wa wa̱ yi reve e cembeɗe a̱a̱gba̱la̱'a̱ a̱vu a sapa vuma'a na̱ a̱yi she nu u tusulai lipu va̱ yi. Waru o to kototo wu u'wa wa̱ yi kpa̱ra̱. 12 Lyawa A̱sulazuva na zuwai ala a̱ yi a̱ da̱nu a̱ a̱tsuma̱ a̱ Urishelima, u foɗo suru mogono ko ama a na a zama a vadala wila̱ u nda, ko a zama a̱ lungusa̱ A̱a̱'isamapaɗa a̱ A̱sula̱ a Urishelima. A̱mu Mogono Dariyu n zuwa ta̱ wila̱ u nda, lyawa a̱ kuru yi mejege.>>

13 Reve Tatenai gwamna vu upasu u Mavada mo Uɗolu wa̱ Yufireti na̱ Sheta Bozenai na aza a na a̱ ri a muwwulai o toni wila̱ u na Dariyu zuwai mejege. 14 Ne ɗa mbara ma Yahuda a lyuwai elime nu usa'a waru a̱ ta̱ tsura̱sa̱ ulyuwu wa aci adama a alajiya a a̱ma̱sula̱ Hagai na̱ Zakariya ulobo wa Ido. Reve o koto usa'a ununa A̱sula̱ a Isra'ila a dammai Sayiru na̱ Dariyu na̱ Atazeze ngono ma Pashiya.* 15 Reve o koto usaa wu Uwa'a o urana wa ta'atsu u woto wa Ada*, a̱tsuma̱ aa'wan a̱ ta̱li o tsugono tsa Dariyu Mogono.

16 Reve ama a Isra'ila, nan ganu na̱ nan Levi, na akapi a aza na a̱ ka̱mba̱i diga uba̱ta̱ tsugbashi, a yuwan a̱buki o ucasu wu U'wa wa̱ A̱sula̱ na̱ ma̱za̱nga̱. 17 O ucasu wu U'wa wa̱ A̱sula̱'a̱ ama a ca ta̱ ogono e inan ukpaku (100) na̱ a̱giri'i ukpakure (200) na̱ mugiri'i ukpakuna̱shi (400). Waru a ca ta̱ nga̱ji kupa ne ejere adama a̱ kucci a̱ wuza̱'u wu unusu adama o ugundo wa̱ Isra'ila suru. 18 Reve e ne'eshen nan ganu ba̱ta̱ ba̱ta̱, nan Levi waru ba̱ta̱ ba̱ta̱ adama a̱ a̱ga̱nda̱ a̱ A̱sula̱ a̱tsuma̱ a̱ Urishelima, cine a ɗanai a aatagada a Musa.

19 Reve ama a na a̱ ka̱mba̱i diga uba̱ta̱ u tsugbashi a yuwan A̱buki a Mapasa o urana wa kupa na̱ a̱za̱ a̱ na̱shi u woto wu ufaru.* 20 Adama a na nan ganu na̱ nan Levi a̱ ka̱mbuwa̱ ta̱ ɗe aciyele na akiza suru nle a̱ ri idaba shi. Reve nan Levi a paɗa a̱a̱giri'i A̱buki a Mapasa adama a aza a na a̱ ka̱mba̱i diga uba̱ta̱ u tsugbashi suru, na adama a nan ganu a̱za̱ e le na adama a aciyele. 21 Reve aza a Isra'ila a na a̱ ka̱mba̱i na aza a na a tawai aciyele e ili yi idaba ya atakpaci yi nron mu nden n le, adama a cuwa A̱sulazuva A̱sula̱ a Isra'ila a tama a̱a̱giri'i a̱ A̱buki a Mapasa'a. 22 Reve a yuwan A̱buki o Opopofu a na a̱ ri na̱ Wolilo shi rana cindere a̱ ma̱za̱nga̱, adama a na A̱sulazuva o shiton le ta̱ na̱ ma̱za̱nga̱, waru u vadala ta̱ majiyan mo mogono ma Asuriya a̱ tyo ya̱'a̱ le, adama a na u kamba le ta̱ o ulinga wu U'wa wa̱ A̱sula̱, A̱sula̱ a Isra'ila.