1 Ana a yuwain ili i ndolo o kotoi, reve azagbain a Isra'ila o ro a̱ ta̱wa̱ uba̱ta̱ u va̱ a damma mu cu'un wuma u na ama a Isra'ila na̱ nan ganu na̱ na̱ nan Levi a yuwusan. Reve waru a damma mu cine aza a Isra'ila a̱ kuɗa̱i a kasa na atakpaci, aza a wuma wi idaba, ele ɗa aza a Ka'ana na aza a Hitiya na aza a Periziya na aza a Jebusiya na aza a Amon na̱ a̱za̱ a̱ Mowa na aza a Masar na aza a Amoriya. 2 Adama a na ali a Isra'ila a taraa ta̱ aciyele atakpaci a̱ a̱ma̱ci, hali fo a taraa olobo e le esheli diga a̱tsuma̱ e le. Ne ɗa a̱ ja̱mba̱ra̱i ugundo wa akiza na atakpaci'i. Waru azagbain na̱ mbara a̱ zungu ta̱ aciyele a mayan me ili i wono i nda.

3 A mantsa ma na mu uwwai a ɗa a nda reve mu kara a̱tugu a̱ va̱, a̱vu mumula̱ a̱nji a aaci a̱ va̱ na̱ ntsuka̱ n va̱, a̱vu n da̱nu n lamba ili i na ma damma. 4 Ɗaɗa aza a na e je'ein lipu adama e idanshi ya̱ A̱sula̱ a Isra'ila adama o ulambu wa̱ a̱ɓula̱ wa aza a na a̱ ka̱mba̱i diga e iɗa i tsugbashi, a̱vu o ɓoloto u ka̱nda̱ruwu na̱ a̱mu a mantsa ma na n da̱na̱i n nden ulukutu, hali she a mantsa ma̱ kucci vu ulivu.

5 A mantsa ma na kucci vu ulivu yuwain, reve n yon a̱tsuma̱ a̱tsuma̱la̱ngu a na n ri wotowu na̱ a̱tugu a na mu karai. Reve n kingyo n 'ya̱sa̱n ekere a̱ va̱ a̱ tyo ya̱ A̱sulazuva A̱sula̱ a̱ va̱.

6 Reve n damma, <<A̱sula̱ a̱ va̱, wono u ɓa̱ru mu ta̱ hali n gura gaɗuwa urewesu u va̱ elime a̱ wu shi. Adama a na unusu u tsu u la'a ta̱ ucira u tsu waru u yuwan ta̱ uga'an hali u rawa zuva. 7 Diga a mantsa ma nkaya n tsu hali acina ana'an, tsu yuwan ta̱ unusu u gbain. Adama a̱ nusu tsu a̱tsu na̱ ngono n tsu na̱ nan ganu a̱ tsu, ɗaɗa tsu uwai e ekere o ngono mu nɗa'a. Reve o una tsu na̱ matsun me pe'eni, a̱vu a̱ pura̱ a̱tsu a̱ tyo e iɗa i tsugbashi, a̱vu fo a̱ pura̱ itana i tsu, reve oto tsu a̱tsuma̱ o wono cine tsu ri ana'an. 8 Gogo gba a mantsa wa'a, A̱sulazuva A̱sula̱ a̱ tsu o roco tsu ta̱ isa'ani a na u lyawaa ntsu akapi a ama wuma, waru a na u ca ntsu nda̱na̱ta̱ n sa'ani uba̱ta̱ wu nden wu za va akiza, adama u ta̱wa̱a̱ tsu na̱ wivuwun wa'a a̱tsuma̱ a tsugbashi tsa̱ a̱tsu waru u zuwa urewesu u tsu u yuwan ma̱za̱nga̱. 9 Ko a na tsu ri agbashi, A̱sula̱ a̱ tsu a vari tsu a̱tsuma̱ a̱ tsugbashi tsa̱ tsu shi. Amma u zuwa ta̱ ngono ma Pashiya o roco tsu isa'ani waru a yuwan tsu ili i na tsu cigai biti adama a na tsa suwisa U'wa wa̱ A̱sula̱, waru tsu leɓenu ba̱ta̱ na o ocoi adama tsu tsura̱ ukari u na wa yuwan tsu mapari a̱tsuma̱ a Yahuda na̱ Urishelima.

10 <<To, gogo A̱sulazuva a̱ tsu, nye ɗa tsaa damma adama e ili i nda? Adama a na tsu 'yuwan ta̱ a̱ kuru wila̱ wa̱ wu, 11 za na vu ca ntsu e ekere a agbashi a̱ wu ama̱sula̱ a na vu damma ntsu, <Iɗa i na yaa zama i usa adama wo o'wo agadu a̱ ɗu, iɗa i ɗa yi idaba. Elentsu e iɗa'a o shiton ta̱ uba̱ta̱ suru na̱ linga n le vi idaba na̱ tsugya. 12 Adama o ndolo she tsu lyawa esheli a̱ tsu o olo ali e iɗa'a wan ko olobo a̱ tsu a zuwa esheli e le wan. Waru she tsu kamba le ko tsu zami nden lafiya na̱ e le wan. Ne ɗa tsa yuwan ucira waru tsu uwwa uyo'o wi iɗa'a, waru tsu lyawaa muwun ntsu iɗa'a yo o'o agadu e le hali hali.>* 13 Ana ili i ndolo suru i cina ntsu adama a linga tsu vi iwuya na̱ nusu va̱ a̱bunda̱ ɗa, waru tsu gura ta̱ reve suru na̱ ne a̱vu A̱sula̱ a̱ tsu a ɗa, vu ca tsu oforo o usuɗuwu o una̱ wu unusu shi, hali na vu lyawaa ntsu akapi ama wuma tsunda. 14 To, gogo cine tsa̱ da̱shi kuɗa wila̱ wa̱ wu a na tsa zuwulai a̱ma̱ci na ama a nda aza a na a yuwusan cu'un vi ili yi idaba i nda? N na̱ tsu yuwan ne, vu ta yuwan upan na̱ a̱tsu hali vu kototo tsu suru suru, babu aza a na a buwa waru babu aza a na a la'a. 15 A̱sulazuva A̱sula̱ a Isra'ila, a̱vu za va̱ a̱ɓula̱ a ɗa! Adama a na vu lyawaa tsu ta̱ ozo o ro a na a la'ai cine u ri ana'an. A̱tsu ɗa nda a̱ ma̱ka̱ka̱n ma̱ wu na̱ nusu tsu, adama a na ko vuma ta̱ a̱tsuma̱ a̱ tsu aa gura isawan a̱ ma̱ka̱ka̱n ma̱ wu adama e ili i nda shi.>>