1 A mantsa ma na Ezura da̱na̱i a yuwusan avasa u kingyo wu elime o U'wa wa̱ A̱sula̱ a dansa nusu le waru e mesun, a̱vu iɓolo i gbain ya ama a Isra'ila, ali na̱ a̱ma̱ci na̱ muwun a̱ ka̱nda̱ruwa̱i, a̱vu ele fo a̱ shon lon. 2 A̱vu Shekaniya ulobo wa Jehiye limatan va Elam, damma Ezura, <<Tsu yuwaan ta̱ A̱sula̱ a̱ tsu ulambu wa̱ a̱ɓula̱ na tsu zuwai atakpaci a̱ a̱ma̱ci e iɗa'a, amma suru na̱ ne Isra'ila buwa ta̱ nu uzuwu wo okolo. 3 Gogo lyawa tsu yuwain nzuwulai na̱ A̱sula̱ a̱ tsu, tsu gba̱ra̱i a̱ma̱ci a nda na̱ muwun n le o una̱ wa̱ a̱sa̱la̱ a na a̱vu na akapi azagbain a na a casu wila̱ wa̱ A̱sula̱ tsugbain a ca n tsu. Waru tsu yuwan ili i na uritosu wa̱ A̱sula̱ a dammai. 4 'Yon, adama a na addama a nda a̱ ta̱ e ekere a̱ wu. A̱tsu waru tsu ta̱ o ucina̱ wa̱ wu. Gogo vu kaɓa asuvu vu yuwan ne.>>

5 Ɗaɗa Ezura 'yoyin a̱vu u zuwa azagbain a nan ganu na̱ nan Levi oɓolo na aza a Isra'ila suru a tara akucunu a na a ta yuwan ili i na Shekaniya dammai. Reve gba a tara akucunu'u. 6 Reve Ezura 'yon u lyawa uba̱ta̱ u na u shi elime U'wa wa̱ A̱sula̱'a̱, a̱vu u ka̱ra̱ a̱ tyo a aasula a Jehohana ulobo wa Eliyashi, agba u lyuwa ɗe ilyalya ko u sowo mini shi, adama a na u shi a̱tsumola̱ngu o ulambu wa̱ a̱ɓula̱ wa aza a na a̱ ka̱mba̱i diga e iɗa i tsugbashi.

7 Reve a lapa ulingi uba̱ta̱ suru a̱tsuma̱ a̱ Urishelima na̱ Yahuda a na aza a na a̱ ka̱mba̱i diga e iɗa i tsugbashi o ɓoloto Urishelima. 8 Waru za na suru ta̱wa̱i a̱tsuma̱ a rana ta'atsu o udammu wu mbara na azagbain shi, o una̱ wi itana ya̱ yi, waru a ta takatsuwai diga a̱tsuma̱ e iɓolo ya ama a na a̱ ka̱mba̱i diga e iɗa i tsugbashi.

9 Reve gba ali o upasu wa Yahuza na Banyami o ɓoloto a̱tsuma̱ a̱ Urishelima a rana ta'atsu'u. O urana wu ushin o woto wa̱ kucci, reve ama suru a̱ da̱nu a alanga e eteshe a na a̱ ri U'wa wa̱ A̱sula̱. A̱da̱na̱ ta̱ e meje'en ma̱ lipu adama a ɗa a nda waru a yuwusan ta̱ iro'i yu ucira.

10 Reve Ezura ganu 'yon u yuwan adanshi ne e le, u damma, <<I yuwan ta̱ ulambu wa̱ a̱ɓula̱ a na i zuwai atakpaci a̱ a̱ma̱ci. Ne ɗa i da̱shi yi unusu wa aza a Isra'ila. 11 Gogo she i damma A̱sulazuva, A̱sula̱ a nkaya n ɗu nusu ɗu. A̱vu i yuwan ili i na u cigai. Yi kasa aciya̱ɗu na ama e iɗa'a na atakpaci a̱ a̱ma̱ci.>>

12 Ɗaɗa oɓolo ama'a suru a̱ usuyi nu uɗyo zuva, <<Ne ɗa u ri, na̱ tsu ciga tsu 'yuwan tsu yuwan cine vu dammai. 13 Amma ama a̱ ta̱ a̱bunda̱ waru mantsa me iro'i mo ucira ma ɗa, adama o ndolo tsaa gura isawan a alanga e eteshe shi. Waru ulinga u nda za vu uranu u ta̱ ko vu rana re ɗa shi, adama a na na̱ a̱bunda̱ a̱tsuma̱ a̱ tsu a yuwan ta̱ unusu lon a̱tsuma̱ a adanshi a nda. 14 Lyawa azagbain a̱ tsu e isawan a̱tsuma̱ a̱ Urishelima a na e petelyuwe adanshi a nda o una̱ u tsu. Lyawa vuma suru a̱tsuma̱ e ilyuci i tsu i na a zuwai takpaci vu ka u ta̱wa̱ a mantsa ma na a zuwai, oɓolo na̱ mbara na̱ a̱za̱ o uge'etosu u lyuci suru. Tsu ta yuwan ne adama A̱sula̱ a̱ tsu a̱ fa̱la̱ diga a̱tsuma̱ o upan wu usuɗuwu wa̱ yi adama a ɗa a nda.>> 15 Babu za na 'ya̱sa̱in a aci adama e ifoɓi i nda, she Jonata ulobo wa Asahe na̱ Jazeya ulobo wa Tikiva. Reve Meshulam na̱ Shabeta limatan va̱ Levi o wo'o le ucina̱.

16 Reve aza a na a̱ ka̱mba̱i diga e iɗa i tsugbashi a yuwan ili i na a dammai. Reve Ezura ganu ɗangula ali aza a na e le ɗa azagbain a 'wa le, o una̱ u limatan le, za suru na ala a̱ yi. A̱vu a ga'an o urana wu ufaru u woto wa kupa adama e petelyuwe adanshi'i. 17 Ɗaɗa o kotoi u petelyuwushe wa a ɗa ali a na a zuwai atakpaci a̱ a̱ma̱ci o urana wu ufaru u woto wu ufaru.

18 Apa ala a nan ganu a na a̱ ri pe a̱tsuma̱ aza a na a zuwai atakpaci a̱ a̱ma̱ci.

Limatan va Jesuwa ulobo wa Jozada na̱ a̱za̱ a̱ yi,

Maseya na̱ Eliyeza na̱ Jari na̱ Gedaliya. 19 A̱vu a yuwan akucunu a na a̱ gba̱ra̱ a̱ma̱ci e le. Za suru a̱tsuma̱ e le ca ta a̱a̱giri'i adama a̱ kucci vu unusu.

20 Diga a limatan va Ima,

Hanani na̱ Zebadiya.

21 Limatan va Harim,

Maseya na̱ Iliya na̱ Shemaya na̱ Jehiye na̱ Uziya.

22 Limatan va Pashihu,

Eliyonai na̱ Maseya na̱ Isma'ila na̱ Nataniya na̱ Jozaba na̱ Elasa.

23 Diga a nan Levi,

Jozaba na̱ Shimeyi na̱ Kelaya za na a̱yi ɗa Kelita, na̱ Petahiya na̱ Yahuza na̱ Eliyeza.

24 Diga e iɓolo ya̱ a̱za̱ e ishipa,

Eliyashi ɗa.

Diga uba̱ta̱ wa̱ a̱za̱ e ipiri yu una̱ntsu,

Shalum na̱ Telem na̱ Uri.

25 Apa akapi ala a aza a Isra'ila a na a̱ ri na̱ cu'un vu unusu u nda.

Limatan va Parosh,

Ramiya na̱ Iziya na̱ Malkiya na̱ Miyamin na̱ Eliyaza na̱ Malkiya na̱ Benaya.

26 Limatan va Elam,

Mataniya na̱ Zakariya na̱ Jehiye na̱ Abidi na̱ Yeremo na̱ Iliya.

27 Limatan va Zatu,

Eliyonai na̱ Eliyashi na̱ Mataniya na̱ Yeremo na̱ Zabad na̱ Aziza.

28 Limatan va Bebai,

Jehohana na̱ Hananiya na̱ Zabai na̱ Atilai.

29 Limatan va Bani,

Meshulam na̱ Maluk na̱ Adaya na̱ Jashu na̱ Sheya na̱ Yeremo.

30 Limatan va Paha Mowa,

Adina na̱ Kela na̱ Benaya Maseya na̱ Mataniya na̱ Bezale na̱ Binuyi na̱ Manase.

31 Limatan va Harim,

Eliyeza na̱ Ishiya na̱ Malkiya na̱ Shemaya na̱ Shimeyon, 32 na̱ Banyami na̱ Maluk na̱ Shemariya.

33 Limatan va Hashum,

Matenai na̱ Matata na̱ Zabad na̱ Elifele na̱ Jeremai na̱ Manase na̱ Shimeyi.

34 Limatan va Bani,

Madai na̱ Amuram na̱ Uwe, 35 na̱ Benaya na̱ Bedeyiya na̱ Keluhi, 36 na̱ Vaniya na̱ Meremo na̱ Eliyashi, 37 na̱ Mataniya na̱ Matenai na̱ Ja'asu.

38 Limatan va Binuyi,

Shimeyi, 39 na̱ Shelemiya na̱ Natan na̱ Adaya, 40 na̱ Makinadebai na̱ Shashai na̱ Sharai, 41 na̱ Azare na̱ Shelemiya na̱ Shemariya, 42 na̱ Shalum na̱ Amariya na̱ Isuhu.

43 Limatan va Nebo,

Yeyiyel na̱ Matitiya na̱ Zabad na̱ Zebina na̱ Jadai na̱ Juwe na̱ Benaya.

44 Ele nda suru a̱ shi ta̱ a zuwa atakpaci a̱ a̱ma̱ci. Reve a̱ gba̱ra̱ a̱ma̱ci'i suru na̱ muwun n le.