1 Apa ala a limatan vu 'wa nu ugeru wa ala aza a na a̱ ka̱mba̱i diga e iɗa i tsugbashi a Babila oɓolo na̱ Ezura a̱ tyo Urishelima a mantsa mo tsugono tsa Atazeze Mogono.

2 Diga a Limatan va Finiha, Gashon ɗa da̱na̱i zagbain.

Limatan va Itama, Daniya ɗa da̱na̱i zagbain.

3 Limatan va̱ Da̱wuda, Hatush ulobo wa Shekaniya ɗa da̱na̱i zagbain.

Limatan va Parosh, Zakariya ɗa zagbain. U ka̱mba̱ ta̱ na ali ukpaku na̱ kupoton (150) diga a limatan va̱ yi. A̱tsura̱ ta̱ ala e le a̱tsuma̱ alabari a nkaya n le.

4 Limatan va Paha Mowa, Eliyehona ulobo wa Zerahiya ɗa zagbain. U ka̱mba̱ ta̱ na ali ukpakure (200).

5 Limatan va Zatu, Shekaniya ulobo wa Yahaziyel ɗa da̱na̱i zagbain. U ka̱mba̱ ta̱ na ali ukpakuta'atsu (300).

6 Limatan va Adin, Ebe ulobo wa Jonata ɗa da̱na̱i zagbain. U ka̱mba̱ ta̱ na ali kupoton.

7 Limatan va Elam, Yeshaya ulobo wa Ataliya ɗa da̱na̱i zagbain. U ka̱mba̱ ta̱ na ali kupocindere.

8 Limatan va Shefatiya, Zebadiya ulobo wa Mika'ilu ɗa da̱na̱i zagbain. U ka̱mba̱ ta̱ na ali kupakunla̱.

9 Limatan va Yowab, Obadiya ulobo wa Jehiye ɗa da̱na̱i zagbain. U ka̱mba̱ ta̱ na ali ukpakure na̱ kupa na̱ kunla̱ (218).

10 Limatan va Bani, Shelomi ulobo wa Josifiya ɗa da̱na̱i zagbain. U ka̱mba̱ ta̱ na ali ukpaku na̱ kupota̱li (160).

11 Limatan va Bebai, Zakariya ulobo wa Bebai ɗa da̱na̱i zagbain. U ka̱mba̱ ta̱ na ali ushin na̱ kunla̱.

12 Limatan va Aziga, Johanan ulobo wa Hakatan ɗa da̱na̱i zagbain. U ka̱mba̱ ta̱ na ali ukpaku na̱ kupa (110).

13 Limatan va Adonikam, aza a na a̱ ta̱wa̱i na̱ a̱ca̱pa̱, e le a ɗa Elifele na̱ Yeyiyel na̱ Shemaya ele ɗa a̱ da̱na̱i azagbain. A̱ ka̱mba̱ ta̱ na ali kupota̱li.

14 Limatan va Bigivai, Utai na̱ Zaku ɗa a̱ da̱na̱i azagbain. A̱ ka̱mba̱ ta̱ na ali kupocindere.

15 M ɓoloto ta̱ ama a nda suru o uɗolu u na wee yeneshe a̱ cipa̱ a̱ tyo a̱ lyuci va Ahava, lo ɗa tsu da̱nuyi hali rana ta'atsu. Reve n petelyuwe ama'a na̱ nan ganu, agba n tsura̱ nan Levi a̱tsuma̱ e le shi. 16 Reve n zuwa e ɗewe a̱mu Eliyeza na̱ Ariye na̱ Shemaya na̱ Elinatan na̱ Jari na̱ Elinatan na̱ Natan na̱ Zakariya na̱ Meshulam azagbain. A̱vu n zuwa e ɗewe a̱mu Joyari na̱ Elinatan, adama a na e le a̱za̱ o urevu u ɗa. 17 Waru n lyungu le ta̱ ya̱ Ido zagbain a̱tsuma̱ a Kasifiya. A̱vu n damma le ili i na aa damma Ido na̱ a̱za̱ a̱ yi na aza a na a yuwusan ulinga o U'wa wa̱ A̱sulazuva aza a na a̱ ri na̱ nden a̱tsuma̱ a Kasifiya, adama a̱ lyunguwa̱ tsu na̱ ozo o ulinga o U'wa wa̱ A̱sula̱ a̱ tsu a̱tsuma̱ a̱ Urishelima. 18 Ana wo o'woi ukere wi isa'ani ya̱ A̱sula̱ a̱ tsu a̱ ta̱ oɓolo na̱ a̱tsu, a̱vu a̱ lyunguwa̱ tsu na̱ Sherebiya vuma vu urevu, diga a limatan va Mali ulobo wa̱ Levi ulobo wa Isra'ila. U ta̱wa̱ ta̱ oɓolo no olobo a̱ yi na̱ a̱za̱ a̱ yi ama kupa na̱ kunla̱. 19 Reve a̱ lyunguwisa̱ a̱tsu na̱ Hashabiya oɓolo na̱ Yeshaya diga a limatan va Merari oɓolo na̱ a̱za̱ a̱ yi no olobo e le. Ele ɗa a̱ da̱na̱i ali ushin. 20 Na̱ ne suru, a̱ lyungu wa̱ a̱tsu ta̱ na ama ukpakure nu ushin (220) aza a na a yuwusan ulinga o U'wa wa̱ A̱sulazuva, aza a na Mogono Da̱wuda na azagbain a tawai adama a kamba nan Levi. E kece le ta̱ o una̱ wa ala e le suru.

21 Lo a̱ nge'en mu uɗolu ma Ahava, n lapa ta̱ ulingi adama a tara akuli, adama tsu ka̱ɗa̱to aciya̱tsu a̱ ma̱ka̱ka̱n ma̱ A̱sula̱ a̱ tsu, waru a mmalu n tsu u yuwaan tsu mapari, na̱ a̱tsu na̱ muwun n tsu, oɓolo ni itana i tsu. 22 Adama a na mu uwwa ta̱ wono u na ma pati mogono u ca tsu a̱soja ana na akumbi e ido, adama a na ee geshe tsu e ekere a n'yuwatan a̱tsuma̱ o ure. Adama a na n damma ta̱ ɗe mogono, <<Ukere wi isa'ani wa̱ A̱sula̱ a̱ tsu u to oɓolo na̱ za na suru zuwai ucira wa̱ yi ya̱ a̱ yi, amma usuɗuwu wu upan wa̱ yi u ta a aci a za na suru vadalaa niyi ucina̱.>> 23 Adama o ndolo a ɗa tsu yuwain akuli, a̱vu tsu pati A̱sula̱ a̱ tsu adama u yuwan tsu mapari. Waru usu ta̱ avasa a̱ tsu.

24 A̱vu n tawa ama kupa ne ejere diga a̱tsuma̱ azagbain a nan ganu, Sherebiya na̱ Hashabiya oɓolo na̱ a̱za̱ e le ama kupa. 25 Reve n kunzuwa̱ le azurufa na̱ zinariya ni itana i na mogono na aza a na aa casu yi a̱sa̱la̱ na azagbain a̱ yi na aza a Isra'ila a na a̱ ri lo a cayi adama o u'wa wa̱ A̱sula̱ a̱ tsu.

26 Apa ili i na n kunzu yi n ca yi nan ganu o ukere.

Makundatsu ma azurufa ma na ma rawai ume ushin ne ejere.

Ni itana i azurufa ukpaku (100) aza a na ukunzuwu wu ume u le u rawai kupocindere.

Nu ukunzuwu wu ume u zinariya u na u rawai ukpakukupa uta'atsu nu ukpakuna̱shi (3,400).

27 Akwanu a zinariya ushin aza a na ukunzuwu wu ume u le u rawai ukpakukupa (1,000).*

Na akwanu e re a̱ rumushili, ulobonu u le una̱ta̱ u ɗa a̱ ri na̱ aza a zinariya.

28 A̱vu n damma le, <<A̱ɗu ni itana i nda a tawa ɗu ta̱ yo o'wo na akiza e ekere a̱ A̱sulazuva. Waru Azurufa na̱ zinariya'a ucasu wu ucigu wo okolo ɗa uba̱ta̱ wa̱ A̱sulazuva A̱sula̱ a nkaya n ɗu. 29 I Yuwan ipiri i le waru yi idana le, hali she ni i 'ya̱wa̱ i rito le a asula o U'wa wa̱ A̱sulazuva a na a̱ ri Urishelima a̱ ma̱ka̱ka̱n ma nan ganu a gbagbain na̱ nan Levi na azagbain a 'wa va Isra'ila suru.>> 30 Reve nan ganu na̱ nan Levi a̱ ushi azurufa na̱ zinariya ni itana i na a̱ kunzuyi ume u le, adama a̱ 'ya̱wa̱ ne ele o U'wa wa̱ A̱sula̱ a̱ tsu a̱ Urishelima.

31 Reve tsu 'yon diga e ikyun yu uɗolu wa Ahava o urana wa kupa ne ejere u woto wu ufaru, adama tsu ka̱ra̱ a̱ tyo Urishelima. Ukere wa̱ A̱sula̱ a̱ tsu a̱ shi ta̱ oɓolo na̱ a̱tsu, reve u wawa tsu e ekere a n'yuwatan ne e ekere a̱ a̱za̱ a̱ nga̱la̱la̱i a̱tsuma̱ o ure. 32 Ne ɗa tsu rawai Urishelima, reve tsi ivuwan pe rana ta'atsu.

33 O urana wa̱ na̱shi a̱vu tsu ka̱ra̱ a̱ tyo o U'wa wa̱ A̱sula̱ a̱tsu, lo ɗa tsu ritoyi ume u azurufa na̱ zinariya ni itana, reve tsu zuwa le e ekere a Meremo ulobo wa Uriya ganu. Oɓolo na̱ a̱ yi a̱ da̱na̱ ta̱ na̱ Eliyaza ulobo wa Finiha, na̱ nan Levi o ro Jozaba ulobo wa Jesuwa na̱ Nowadiya ulobo wa Binuyi. 34 A̱vu e kece ili'i biti reve a̱ rito ume u le, reve a ɗana a̱bunda̱ o ume u le.

35 Aza a na a̱ ka̱mba̱i diga e iɗa i tsugbashi suru a ca ta̱ kucci vu ukula̱tosu u le uba̱ta̱ wa̱ A̱sula̱ a Isra'ila. Reve a ca kucci vo ogono e inan kupa ne ejere adama a aza a Isra'ila suru na̱ a̱giri'i kupakucci na̱ a̱za̱ a̱ ta̱li na̱ mugiri'i kupocindere na̱ a̱za̱ e cindere. Reve waru a ca kucci matara mo ume mo unusu na̱ nga̱ji kupa ne ejere. Reve a ca kucci vu ukula̱tosu u nda suru a̱ tyo e ekere a̱ A̱sulazuva. 36 Reve a ca mepepelime ma nda wu udammu u Mogono Atazeze uba̱ta̱ wa azagbain e iɗa na̱ nan gwamna vu upasu u Mavada mo Uɗolu wa̱ Yufireti. Reve a ca ikambishi i le ekere ama'a oɓolo nu U'wa wa̱ A̱sula̱.