1 Ana n'yuwatan ma Yahuza na̱ Banyami uwwai a na aza a tsugbashi a na a̱ ka̱mba̱i a ta suwusaa A̱sulazuva A̱sula̱ a Isra'ila A̱a̱'isamapaɗa, 2 a̱vu a̱ 'ya̱wa̱ ya Zerubabe na azagbain a 'wa a̱vu a damma le, <<Lyawa tsu ɓolo aci tsu yuwan yi usa'a oɓolo, adama a na tsu ta yuwusaan fo A̱sula̱ a̱ ɗu a̱ga̱nda̱ cine yaa yuwusan. Tsu jima ta̱ a casu yi kucci diga a mantsa ma Esahadon mogono ma Asuriya za na ta̱wa̱i na̱ a̱tsu pa na̱ nde.>>*

3 Amma Zerubabe na̱ Jesuwa na akapi a azagbain a 'wa va aza a Isra'ila a damma le ta̱, <<Babu i mini i ɗu a na yaa kamba tsu nu ulinga wu usaa wa̱ A̱a̱'isamapaɗa A̱sula̱ a̱ tsu. A̱tsu ɗa goon tsa suwaa A̱sulazuva A̱sula̱ a Isra'ila usaa, cine Mogono Sayiru mogono ma Pashiya ma damma n tsu.>>

4 Reve ama e iɗa'a a yuwan cine biti a yuwan adama a putsaa a ama a Yahuda, reve waru a ca le wovon adama a yuwan usa'a wan. 5 Reve a ca aza a na aa casu mogono a̱sa̱la̱ utowusu wu una̱ adama a̱ lungusa̱ ifoɓi i le a mantsa ma tsugono tsa Sayiru mogono ma Pashiya hali a̱ tyo a mantsa mo tsugono tso Mogono Dariyu va Pashiya.

6 O ufaru u tsugono tsa Mogono Ahasuweru* n'yuwatan n ɗana ta̱ adanshi a aci a̱ ama a Yahuda na̱ Urishelima.*

7 A rana tsugono tsa Atazeze mogono ma Pashiya, Bishlam na̱ Mitireda na̱ Tabe na akapi a aza a na a̱ ri a muwwulai a ɗanaa ta̱ Atazeze mepepelime. Ne elentsu a Tsu'arama tsa ɗa a ɗana niyi reve a cuɗuwa yi adama o mogono.

8 Reve Rehum yali ya̱ a̱soja na̱ Shimshai za vi iɗana a ɗana mepepelime a̱ tyo uba̱ta̱ u Mogono Atazeze a aci a̱ Urishelima.

9 A̱vu Rehum yali ya̱ a̱soja na̱ Shimshai za vi iɗana, oɓolo na aza a na a̱ ri a muwwulai, a̱za̱ o uge'etosu na̱ mbara na azagbain a na e idanasa pasu, diga o upasu wi iɗa ya Pashiya na̱ Ere na̱ Babila na̱ Susa na̱ Elam, 10 na akapi a ama a na Asanapa zagbain pura̱i reve u ta̱wa̱ to le u zuwa le a̱ da̱nu a̱tsuma̱ a Samariya na akapi a pasu vi iɗa na ri mavada mo Uɗolu wa̱ Yufireti.

11 Apa nda ili i na a ɗanai a̱tsuma̱ e mepepelime'e.

<<Ica̱su a̱ tyo yo Mogono Atazeze diga uba̱ta̱ wa aza a na a yuwusan wu tsugbashi, ama a na a̱ ri mavada mo Uɗolu wa̱ Yufireti.>>

12 <<Tsu ciga ta̱ mogono me reve aza a Yahuda o ndolo aza a na a lyawai uba̱ta̱ wa̱ wu a̱ tyo uba̱ta̱ u tsu a̱ ka̱ra̱ ta̱ a̱ tyo Urishelima. A̱ da̱shi ta̱ suwisa lyuci vu u'ya̱susa̱n wa̱ a aci ni iwuya. O to kosuso usaa wu ukari'i waru a ta lapulusa ikyun yu usa'a. 13 Gogo lyawa mogono me reve na a suwisa lyuci ndolo nu ukari o koto, a̱ da̱shi tsupa utafa shi, ko ikebe i ma'uwaa na̱ mota̱a̱ me e itana shi, ni ikebe yu ure shi, o ukosu ikebe yi izuwa i tsugono i ta̱ jebe. 14 Gogo a na tsu peɗei uyo'o wu ukobu u tsugono, wo lobono tse ene a̱ kuɗa̱ tara mogono ili i ro shi. Adama o ndolo a ɗa tsa ɗanasa tsu revetyo mogono, 15 adama a̱ bunga̱ a̱tsuma̱ a aatagada a alabari a nkaya. Vu te ene a̱tsuma̱ a aatagada a alabari a nkaya'a a na lyuci nda lyuci vu u'ya̱susa̱n wu ugbozu u ɗa. Diga ɗe a mantsa mo ufaru lyuci nda u ta casu ngono na̱ pasu a aci ya̱ a̱ mɓa̱la̱. Mantsa suru ama'a a̱ ta̱ 'ya̱susa̱n ugbozu. Adama o ndolo a ɗa a̱ lungusa̱i lyuci'i. 16 Tsu te revetyosu mogono a na, na a suwisa lyuci nda reve waru o koto usaa wu ukari wa̱ yi, vaa buwa ni ili a mavada mo Uɗolu wa̱ Yufireti shi.>>

17 Reve mogono ma̱ lyunguwa̱ le u usu u damma,

<<Ica̱su a̱ tyo ya Rehum yali ya̱ a̱soja na̱ Shimshai za vi iɗana, na akapi aza a na i ri a muwwulai ne ele a na a̱ ri na̱ nden Samariya, oɓolo na akapi a na a̱ ri upasu u Mavada mo Uɗolu wa̱ Yufireti.

18 Mepepelime ma na i lyunguwa̱ ntsu e ɗe yi ta̱ nu una̱ reve a cuɗuwa mu a̱yi. 19 Reve n ca udammu, a̱vu a̱ bunga̱ reve e ene a na lyuci nda diga ɗe nu ujumu u ta̱ na ala a aciyogbamu e ekere o ngono, waru a̱ ta̱ na̱ a̱bunda̱ o 'ya̱susa̱n wu ugbozu na̱ nla̱ngi. 20 A yuwan ta̱ ngono m gbagbain a na a yuwain tsugono a̱tsuma̱ a̱ Urishelima nu upasu u na u ri a Mavada mo Uɗolu wa̱ Yufireti, a̱ ushishi ta̱ utafa, ni ikebe i ma'uwaa na̱ mota̱a̱ me itana, ni ikebe yu ure. 21 Adama o ndolo i ca udammu u na wa putsaa ama'a a lyawa usaa u lyuci'i, hali she mantsa ma na n ca yi udammu. 22 I ka̱mbuwa̱ ugbozu adama a ɗa a nda, she i lyungusa̱ mantsa wan adama a̱ da̱shi yuwan ulungusu u ro u na wa̱a̱ ta̱wa̱a̱ mogono nu ulambu wan.>>

23 Ana e ɗeweyi Rehum na̱ Shimshai za vi iɗana na aza a na a̱ ri a muwwulai ne ele mepepelime mo mogono Atazeze, reve a̱ jika̱ a̱ 'ya̱wushi uba̱ta̱ wa aza a Yahuda a̱tsuma̱ a̱ Urishelima, reve a zuwa le a lyawa ulinga'a nu ucira.

24 Ne ɗa e isawaton yi ulinga wu U'wa wa̱ A̱sula̱ a na ri Urishelima, hali she a aa'wan e ire o tsugono tsa Dariyu mogono ma Pashiya.*