1 Ana ili i ndolo i kotoi, a mantsa mo tsugono tsa Mogono Atazeze ma Pashiya, reve Ezura 'yon diga Babila. Waru Ezura reve ta̱ nu umatsun wa̱ yi a na a̱ yi ulobo wa Seraya limatan va Azariya ulobo wa Hilikiya, 2 ulobo wa Shalum ulobo wa Zadok ulobo wa Ahitu, 3 ulobo wa Amariya ulobo wa Azariya ulobo wa Merayo, 4 ulobo wa Zerahiya ulobo wa Uzi ulobo wa Buki, 5 ulobo wa Abishuwa ulobo wa Finiha ulobo wa Eliyaza, ulobo wa Haruna ganu gbain ɗa.

6 Ezura nda a̱yi ɗa u ta̱wa̱i diga Babila. A̱yi za vi iɗana i ɗa na ri nu urevu u wila̱ u na A̱sulazuva A̱sula̱ a Isra'ila a cayi Musa. Mogono ma ca yi ta̱ ili i na we ecei biti, adama a na ukere wa̱ A̱sulazuva A̱sula̱ a̱ yi a̱ shi ta̱ oɓolo na̱ a̱yi. 7 A̱tsuma̱ aa'wan e cindere o tsugono tsa Mogono Atazeze ɗa Ezura uta̱i diga e iɗa ya Babila a̱ tyo Urishelima oɓolo na ama a Isra'ila o ro, oɓolo na̱ nan ganu na̱ nan Levi na ashipi na̱ a̱za̱ e ipiri yi na̱ntsu na aza a na a yuwusan ulinga o U'wa wa̱ A̱sulazuva.

8 Ezura rawa ta̱ Urishelima o woto wa tawun a aa'wan e cindere o tsugono tso mogono Atazeze. 9 U fara ta̱ mmalu a̱ tyo Babila o woto wu ufaru, reve o urana wu ufaru u woto wa tawun u rawa Urishelima, adama a na ukere wi isa'ani wa̱ A̱sula̱ a̱ yi a̱ shi ta̱ oɓolo na̱ a̱yi. 10 Adama a na Ezura ca ta̱ aciya̱yi u reve wila̱ wa̱ A̱sulazuva, u kuru yi, waru u rito ama a Isra'ila wila̱ nu udammu wa̱ yi.

11 A̱yi nda a̱ yi ɗa mepepelime mo ucawusu wu una̱ u na Atazeze Mogono ma cayi Ezura ganu waru za vi iɗana. Za na ri nu urevu u wila̱ nu udammu wa̱ A̱sulazuva e ekere ama a Isra'ila.

12 U damma, <<Diga Atazeze mogono mo ngono, a̱ tyo ya Ezura ganu, za vi iɗana i wila̱ wa̱ A̱sula̱ a zuva. Vu da̱na̱ na asuvu nde. 13 N ca ta̱ udammu a na vuma va Isra'ila suru ko nan ganu ko nan Levi za na a̱ ri a̱tsuma̱ o upasu u tsugono tsa̱ va̱, za na suru cigai u ka̱mba̱ Urishelima oɓolo na̱ a̱vu, u ta gura ka̱ra̱. 14 Adama a na mogono na ama e cindere aza a na aa casu yi a̱sa̱la̱ ɗa a̱ lyungu nuwu, vu 'ya̱wa̱ vu reve cu'un vu nden n na aza a Yahuda na aza a Urishelima a yuwusan o una̱ wu Uritosu wa̱ A̱sula̱ a̱ wu za na ri o ukere wa̱ wu. 15 Waru vu tara zinariya na̱ azurufa aza a na mogono na aza a na aa casu yi a̱sa̱la̱ a cayi nu ucigu wo okolo e le e ekere A̱sula̱ a Isra'ila za na nda̱na̱ta̱ ma̱ yi n ri Urishelima. 16 Waru vu tara azurufa na̱ zinariya suru na vu ɓolotoi diga a pasu va̱ Babila, oɓolo nu ucasu wu ucigu wo okolo a na ama a Isra'ila na̱ nan ganu a cayi adama o U'wa wa̱ A̱sula̱ e le za na ri Urishelima. 17 Vu yuwan ulinga ni ikebe i nda adama vu tsula ogono e inan na̱ a̱giri'i na̱ mugiri'i, oɓolo nu ucasu wi ishina i le nu ucasu wi ili yo oso i le na wuntsa a̱ yi, adama vu ca le zuva masa'a vu U'wa wa̱ A̱sula̱ a na a̱ ri Urishelima. 18 A̱vu suru akapi a azurufa na̱ zinariya na buwai, reve a̱vu na̱ a̱za̱ a̱ wu i yuwan ili i na i lobono n ɗu ununa A̱sula̱ a̱ ɗu a cigai. 19 Itana i na a ca nuwu adama a̱ga̱nda̱ o U'wa wa̱ A̱sula̱ a̱ wu, vu 'ya̱wa̱ ne ele uba̱ta̱ wa̱ A̱sula̱ a̱tsuma̱ a̱ Urishelima. 20 Waru suru ili i na vu cigai adama o ulinga wu U'wa wa̱ A̱sula̱ a̱ wu, za na waru wo o'woi ume wa̱ wu u ɗa vu ca, vu uta̱a̱ diga e izuwa i mogono.

21 <<Waru a̱mu Mogono Atazeze, n ca ta̱ udammu e ekere e izuwa suru yu pasu u Mavada mo Uɗolu wa̱ Yufireti a na, ili i na suru Ezura za vi iɗana wu Uritosu wa̱ A̱sula̱ a zuva, a ciga biti diga o ukere u ɗu, i ca yi no okolo a̱ ta̱. 22 I ca yi makundatsu mo ume u azurufa ukpakukupa uta'atsu nu ukpakuna̱shi (3,400) ni ibufu i yitabo ukpaku (100) na̱ nden n masayan ma̱ ina̱bi ukpakukupa ure (2,000) na̱ nden n mani'in ma̱ zetun ukpakukupa ure (2,000) na akpaɗi a̱bunda̱ a na aa ciga. 23 Ili i na suru A̱sula̱ a zuva a dammai adama o U'wa wa̱ a̱yi, a̱vu a yuwain no okolo ta̱, adama she o rono upan wa̱ a̱ yi a aci o tsugono tso mogono oɓolo na̱ muwun ma̱ a̱ yi wan. 24 Waru tsu ta dansaa ɗu she i ushi ikebe yu utafa ko ikebe i ma'uwaa na̱ mota̱a̱ ko ikebe yu ure ekere a nan ganu na̱ nan Levi na̱ a̱za̱ e ishipa na̱ a̱za̱ e ipiri yu na̱ntsu oɓolo na akapi ozo ulinga o U'wa wa̱ A̱sula̱ a nda wan.

25 <<Waru a̱vu Ezura, o una̱ wu urevu u na A̱sula̱ a ca nuwu, vu zuwa ozo o uge'etosu na azagbain o ukobu adama a na o rito wa ama a na a̱ ri Mavada mo Uɗolu wa̱ Yufireti, aza a na suru e revei wila̱ wa̱ A̱sula̱ a̱ wu. Waru vu rito aza a na e revei wila̱'a̱ shi. 26 Suru za na 'yuwain a yuwan tsutoni na̱ wila̱ wa̱ A̱sula̱ a̱ wu, ko udammu u mogono, ili yi lo shi a ta paɗaa yi ugana, ko vu ukwisa̱, ko ma̱gba̱ra̱, ko ma'usa me itana ya̱ yi, ko u mazuwa o u'wa wa ali.>>

27 Reve Ezura damma, <<Ica za va̱ A̱sulazuva a ɗa, A̱sula̱ a nkaya n tsu! A̱yi ɗa za na zuwai cu'un majiyan ma nda okolo o mogono adama a na wa ca U'wa wa̱ A̱sulazuva tsugbain a na a̱ ri Urishelima waru a̱ da̱shi suwisa yi. 28 Waru a̱tsuma̱ e isa'ani ya̱ yi n tsura̱ ta̱ icigi uba̱ta̱ u mogono, na aza a na a casu yi a̱sa̱la̱ waru ne e ekere a azagbain o ucira u mogono. N kaɓa ta̱ asuvu, adama a na ukere wa̱ A̱sulazuva A̱sula̱ a̱ va̱ a̱ shi ta̱ oɓolo na̱ a̱mu. Hali na n gura ɓolotoi azagbain a Isra'ila adama a na a̱ ka̱mba̱ oɓolo na̱ a̱mu.>>