1 A̱yi nda a̱ yi ɗa alabari a Nehemiya ulobo wa Hakaliya. A̱tsuma̱ o woto wa Kislev za na a̱ yi ɗa woto wa̱ kucci aa'wan o ushin a na Atazeze da̱na̱i a̱ tsugono tsi iɗa ya Pashiya, a̱mu Nehemiya n da̱na̱ uba̱ta̱ wu ukari a̱tsuma̱ a Susa lyuci gbain vi iɗa'a, 2 reve Hanani vuma ta̱ a̱tsuma̱ a̱ muwun ma̱ a̱na̱wun n va̱, u ta̱wa̱ diga Yahuda oɓolo na ama o ro. Reve me ece le adama a akapi a aza Isra'ila a na a la'ai diga uba̱ta̱ u tsugbashi, na adama a Urishelima waru.

3 Reve a damma mu, <<Aza a na a la'ai diga uba̱ta̱ u tsugbashi'i, aza a na a̱ ri upasu wi iɗa wa Yahuda a̱ ta̱ a̱tsuma̱ a̱tsuma̱lima̱ na̱ wono lon. Waru Ukari wa̱ Urishelima wo oco ta̱, akina a̱ kula̱to ta̱ na̱ntsu va̱ yi fo.>>

4 Ana mu uwwai aɗa o ndolo, reve n da̱nu n shon. Reve n yuwan a̱tsumola̱ngu rana va̱ a̱bunda̱ a̱vu n yuwan akuli na avasa a̱ ma̱ka̱ka̱n ma̱ A̱sula̱ a zuva. 5 Reve n damma, <<A̱sulazuva, A̱sula̱ a zuva, A̱sula̱ a gbain ili i wovon za na tsu shiton nzuwulai ma̱ a̱yi ni icigi e ekere aza a na a ciga niyi waru oo tono ili i na u zuwai, 6 polo atsuvu a̱ wu, vu ka̱lyuwa̱ a̱mu vu uwwa avasa a na a̱mu aagbashi a̱ wu maa yuwusan ya̱'a̱ wu, urana na ayin adama a ama a̱ wu aza a Isra'ila. N ta dansa unusu u na a̱ tsu aza a Isra'ila tsu yuwaan nuwu, amayun a̱mu na̱ nkaya n va̱ tsu yuwan wu ta̱ unusu. 7 Tsu yuwaan wu ta̱ iwuya lon. Tsu kuru ili i na vu zuwai shi na̱ udammu na̱ wila̱ u na vu cayi aagbashi a̱ wu Musa shi.

8 <<Cuwan na adanshi a na vu dammai aagbashi a̱ wu Musa, a na, <Ni i yuwan ulambu wa̱ a̱ɓula̱, n ta̱ bete'we ɗu a̱tsuma̱ a nɗa,✝ 9 amma nni i vadala ya̱'a̱ va̱ a̱vu i kuru ili i na n zuwai, ko shi na ama a̱ ɗu aza a na a̱ pura̱i a̱ ri o ukosu wu uvaɗi, n to ɓoloto le diga ɗe reve n ta̱wa̱ ne ele uba̱ta̱ u na n ɗangwai a na aala a̱ va̱ a̱ da̱na̱.>

10 <<Ele agbashi a̱ wu a ɗa waru ama a̱ wu, aza a na vu tsupayi nu ucira u gbain wa̱ wu nu ukere wu ucira wa̱ wu. 11 A̱sulazuva lyawa vu polo atsuvu vu uwwa avasa aagbashi a̱ wu na avasa akapi agbashi a̱ wu a na a uwwusa uyo'o u tsugbain wa ala a̱ wu. Vu ca aagbashi a̱ wu ulyuwu wa aci ana'an, vu zuwa mogono mo roco yi isa'ani.>>

A mantsa'a a̱mu ɗa n shi a casu mogono ili yo oso.