1 Ana Sanbala uwwai tsu teme ta̱ ulapulu wu ukari'i, reve wu uwwa upan lon. Reve u reme a yuwusaan aza a Yahuda izo'oshi yu ulamu. 2 A̱vu u damma a̱ ma̱ka̱ka̱n ma̱ a̱za̱ a̱ yi na̱ a̱soja a Samariya, <<Nye i ɗa a̱ta̱ka̱lya̱ a aza a Yahuda a nda a yuwusan? A ta a zama a na a suwisa ukari u le ɗa? A ta zama a na a ca kucci ɗa? Waru a ta zama a na o koto ulinga u ɗaɗa o uranu uta̱? A ta gura ka̱mba̱to oɓolo a̱kwa̱kwa̱ atali a na kula̱toi usa'avu?>> 3 A̱vu Tobiya za va Amon na shi mishin e eɓele a̱ yi, u damma, <<Cu'un vu ukari u na a suwusa nda, ko na̱ shi musa̱n mo una ma ɗa ma kumba niyi u ta varu yi!>>

4 A̱vu a̱mu Nehemiya n yuwan avasa n damma, uwwa cine a yuwusan tsu ulamu, A̱sula̱ a̱ tsu! Lyawa wisulusa u na a yuwusan tsu u ka̱mba̱ aciyele. Vu zuwa a̱ pura̱ le a̱ tyo e iɗa i tsugbashi tsu u utsuru u na a̱ pura̱i diga uba̱ta̱ wu uvon. 5 She vu yuwaan le gafura vu unusu u na a yuwain wan, waru she vu tasa unusu u le a̱ ma̱ka̱ka̱n ma̱ wu wan, adama a na a zami tsu ta̱ adanshi, a̱tsu na tsa yuwusan ulinga wu usaa.

6 Reve tsu lyuwa elime nu usaa wu ukari'i a̱vu tsu goloɓo yi suru a̱ka̱nda̱ruwa̱ lyuci'i hali she na tsu rawai uɓatsulai wu uga'an wu usa'a, adama a na ama a yuwan ta̱ ulinga no okolo a̱ ta̱.

7 Amma a mantsa ma na Sanbala na̱ Tobiya na aza a Araba na aza a Amon na aza a Ashido a uwwai a na ulapulu wu ukari wa̱ Urishelima u lyuwa ta̱ elime, waru a̱ leɓenu ta̱ abala o ukari'i, reve a uwwa upan lon. 8 A̱vu suru nle o ɓolo aci adama a yuwan uvon na̱ Urishelima, waru a̱ ta̱wa̱a̱ nu urupulu pe. 9 Reve tsu yuwan avasa e ekere a̱ A̱sula̱ a̱ tsu, reve tsu zuwa a̱za̱ e ipiri adama e le urana na ayin.

10 Reve ama a Yahuda a damma,

<<Ucira wa̱ a̱za̱ e itana u ta̱ ka̱la̱musa̱,

agba oɓolo a̱ a̱kwa̱kwa̱ a atali a yuwan ta̱ a̱bunda̱!

Cine tsa gura suwa ukari'i?>>

11 N'yuwatan n tsu waru n damma ta̱, <<Kafu e reve ili i na ya fara ko e ene a̱ tsu, tsu ta uwa a̱tsuma̱ e le, reve tsu una le, a̱vu tsi isawaton ulinga u le.>>

12 Mantsa na̱ a̱bunda̱ aza a Yahuda a na a̱ ri nden zuzu na̱ n'yuwatan n tsu a̱ tsu ta̱wusa̱ ta̱ a damma tsu, uba̱ta̱ u na tsu vadalai suru a̱ ta̱ ta̱wa̱ a̱ riya̱a̱ a̱ tsu nu uvon.

13 Adama o ndolo n zuwa ta̱ ama o foɓo, reve n ne'eshen le umatsun umatsun a̱ ba̱ta̱ na koto shi o kotoi usaa wu ukari shi. Waru a̱ da̱na̱ ta̱ u ɓanu ni itana yu uvon i le, mutsun mu pe'eni na̱ mbata na̱ tan le.

14 Ana n ka̱lyuwa̱i cine ili biti i ri, reve n 'yon a̱vu n damma ama azagbain na̱ mbara na akapi a ama, <<She yu uwwa wovon u le wan. Cuwain A̱sulazuva za na ri na̱ tsugbain waru ili i wovon. I yuwan uvon adama a̱ a̱za̱ a̱ ɗu no olobo a̱ ɗu ne esheli a̱ ɗu na adama a̱ a̱ma̱ci a̱ ɗu na adama a 'wa ɗu.>>

15 Ana n'yuwatan n tsu n revei a na tsu uwwai ifoɓi i le waru A̱sula̱ a̱ lungusa̱ ta̱ ifoɓi'i, reve suru ntsu tsu ka̱mba̱ uba̱ta̱ wu usaa wu ukari'i, koyan nu ulinga wa̱ yi.

16 Diga o urana u ndolo a̱ 'ya̱wa̱, uɓatsulai wa ama a̱ va̱ a ta yuwusan ulinga wu ukari'i, uɓatsulai waru a̱ tu uguzu ni itana yu uvon i le, mbata na̱ a̱a̱ra̱ga̱ na̱ tan na̱ a̱tugu e irumu. Azagbai'in e ne'eshen ta̱ aciyele e isawan a̱ca̱pa̱ a ama a Yahuda. 17 Aza a na aa suwusa ukari'i na aza a na aa tanusu itana yu usa'a a yuwusan ta̱ ulinga u le nu ukere u ta̱, reve a̱ guza̱ itana yu uvon nu ukere we ire. 18 Suwi biti da̱na̱ ta̱ u wo'o wu na̱ matsun me pe'eni ma̱ yi a mantsa ma na u ri o usaa. Amma za wivulu wa aavana u da̱na̱ ta̱ oɓolo na̱ a̱mu.

19 Reve n damma azagbain na̱ mbara na akapi a ama a na a buwai, <<Ulinga'a u ta̱ a̱bunda̱ waru une'esun u ɗa u ri ba̱ta̱ ba̱ta̱. Waru tsu ta̱ une'esun ukasu ukasu o ulinga wu ukari'i. 20 Uba̱ta̱ u na suru yu uwwai mesun ma aavana i ɓoloto ɗe. A̱sula̱ a̱ tsu a ta yuwan uvon adama a̱ tsu!>>

21 Ne ɗa tsu lyuwai elime nu ulinga'a urana suru diga usana hali acina mo uta̱ italyo'o na ayin, uɓatsulai u tsu waru a yuwusan ulinga o ukari'i, uɓatsulai u tsu waru a yuwusan ipiri na̱ mabata.

22 A mantsa'a waru n damma ta̱ ama'a, <<Lyawa koyan na̱ za vi ikambishi yu ulinga va̱ yi aa asa a̱tsuma̱ a̱ Urishelima na ayin adama a yuwan ipiri i lyuci'i, nu urana waru a yuwan ulinga.>> 23 Ko a̱mu ko a̱za̱ a̱ va̱ ko agbashi a̱ va̱ ko a̱za̱ e ipiri a na a̱ ri oɓolo na̱ a̱mu ko za foɗo itana ya̱ yi shi, za suru da̱na̱ ta̱ uɓa̱nu ni itana yu uvon ya̱ yi.