1 O urana wu ushin na̱ a̱za̱ a̱ na̱shi u woto wa̱ cindere, aza a Isra'ila o ɓoloto ta̱, a yuwan akuli wotowu na akashi a̱vu a̱ tsun okomo a aaci e le. 2 Aza a na nkaya n le aza a Isra'ila a ɗa a kasa ta̱ aciyele na atakpaci suru. Reve e isawan mishin, a̱vu a damma nusu le na̱ za vu nkaya n le. 3 Ele mishin uba̱ta̱ u na a̱ ri, a yuwan ta̱ irumu ta'atsu e ɗesununa̱ a̱tsuma̱ a Aatagada a Wila̱ wa̱ A̱sulazuva A̱sula̱ e le, a̱vu a yuwisan irumu ta'atsu i ro a dansa nusu le waru a yuwusaan A̱sulazuva A̱sula̱ e le a̱ga̱nda̱.

4 Reve nan Levi e isawan a ndasata va akpata apada na a yuwain adama e le, Jesuwa na̱ Bani na̱ Kadimiye na̱ Shebaniya na̱ Buni na̱ Sherebiya na̱ Bani na̱ Kenani, ele ɗa e ɗeyi nu uɗyo zuva a̱ tyo a̱ A̱sulazuva A̱sula̱ e le. 5 Reve nan Levi a nda, Jesuwa na̱ Kadimiye na̱ Bani na̱ Hashabineya na̱ Sherebiya na̱ Hodiya na̱ Shebaniya oɓolo na̱ Petahiya a damma,

<<'Yoyin i cuwa A̱sulazuva A̱sula̱ a̱ ɗu,

za na ri nu ufaru shi agba u ri nu ukosu shi!>>

Aala a na a la'ai aba'un ni ica suru tsugbain.

Aala a na a la'ai aba'un ni ica!

6 A̱sulazuva a̱vu ɗa a̱ nde'en,

a̱vu ɗa vu yuwain zuva,

hali na̱ zuva va zuva.

A̱vu ɗa vu yuwain iɗa

oɓolo na̱ suru ili i na i ri pe a̱tsuma̱ a̱ yi.

A̱vu ɗa fo vu yuwain mala

oɓolo na̱ suru ili i na i ri pe a̱tsuma̱ a̱ yi.

A̱vu ɗa vu wawai wuma u le suru.

Yitele'o ya zuva a ta yuwusaan a̱ wu a̱ga̱nda̱.

7 <<A̱vu ɗa A̱sulazuva A̱sula̱, za na ɗangwai Aburam.✝

A̱vu ɗa vu uta̱a̱ niyi diga e iɗa ya Ur va aza a Kaldiya*,

reve vu vadala yi aala a̱ tyo Ibrahim.

8 Vu tarai ta̱ za va̱ a̱ɓula̱ e ekere a̱ wu,✝

reve vu yuwan nzuwulai na̱ yi

nzuwulai n na va ca yi iɗa ya aza a Ka'ana

na aza a Hitiya na aza a Amoriya,

na aza a Periziya na aza a Jebusiya na aza a Girigashiya.

Vu shiton ta̱ nzuwulai ma̱ wu,

adama a na a̱vu za va̱ a̱ɓula̱ ɗa.

9 <<Vee ene ta̱ a̱tsuma̱lima̱ a nkaya n tsu a̱tsuma̱ e iɗa ya Masar,✝

a̱vu vu uwwa mesun me le e ikyun i Mala ma̱ Shili.

10 Vu roco ta̱ iroci na̱ linga va asalama

e ekere o mogono Firi'awuna na̱ mbara ma̱ yi, oɓolo na ama e iɗa'a,✝

adama a na vu reve ta̱ cine a yuwain nkaya n tsu ule'e.

Ne ɗa vu yuwain aala,

aala a na vu ri na̱ yi hali acina ana'an.

11 Vu ɓatsalai ta̱ mala e esu a nkaya n tsu,

reve o toni na̱ memere ma mala e iɗa yu u'yewu.✝

reve vu vari aza a na aa saɓusa le a̱tsuma̱ a̱ a̱ru'un a mala'a,

reve a liɓa tsa aatali.

12 <<Nu urana vu wala ta̱ elime e le a̱tsuma̱ o oɓolo e eleshe,✝

na ayin waru oɓolo akina,

adama u ca le ekan o ure u na a̱ kuru.>>

13 <<Vu cipa̱ ta̱ a Masasan ma Sinai,

a̱vu vu yuwan adanshi na̱ nkaya n tsu diga zuva.✝

Vu ca le ta̱ uritosu na̱ wila̱ u na u ri mejege,

waru vu zuwaa le ta̱ ili i na o toni na̱ wila̱ u sa'ani.

14 Vu roco le ta̱ Urana wa Ashibi a akiza a̱ wu,

a na a tawai na akiza,

waru vu ca le ta̱ wila̱ wa̱ wu, nu udammu wa̱ wu, nu uritosu wa̱ wu

na̱ wila̱ o una̱ wa aagbashi a̱ wu Musa.

15 Ana a̱ da̱na̱i a uwwusa abulu vu ca le ta̱ ilyalya diga zuva,✝

ana a̱ da̱na̱i a uwwusa akuli a̱ mini, reve vu uta̱ mini diga aatali.

Reve vu damma le a usa agadu e iɗa'a,

iɗa ya agadu a na vu kucinai a na vaa ca le.

16 <<Agba a̱vu le nkaya n tsu o roco aciyogbamu,✝

a̱vu a 'yuwan a uwwa adanshi,

a̱vu a 'yuwan a yuwan tsutoni ni ili i na vu zuwai.

17 Linga va asalama a na vu yuwaan n le,✝

reve e icina na̱ le.

A yuwan aciyogbamu,

a 'yuwan na a uwwa adanshi.

A̱tsuma̱ aciyogbamu u le, reve a ɗangulaa aciya̱le zagbain

adama u ka̱mba̱to le a̱tsuma̱ a Masar e iɗa i tsugbashi i le.

Amma a̱vu A̱sula̱ a gafura a ɗa,

za vi isa'ani, waru ni iliyali,

za na tsu yuwan upan go'o shi, za vi icigi ya̱ a̱bunda̱ i na i tsu vadala shi.

Agba a̱vu A̱sula̱, vu lyawa le shi.

18 Ko a mantsa ma na a̱ zuɗa̱a̱ yi aciyele a̱ma̱li a̱ ma̱dindim a̱ rumushili,✝

a̱vu a damma, <Apa nda ma̱sula̱ ma̱ ɗu ma na mo uta̱a̱ nɗu a̱tsuma̱ a Masar,>

ne ɗa a yuwaan nuwu unusu u gbain.

19 Agba vu vari le a̱tsuma̱ o una shi,✝

adama a na iliyali ya̱ wu i ta̱ n mgbain.

Agba oɓolo e eleshe a lyawa o ronuso le aɗanga o ure nu urana shi,

waru oɓolo a akina a̱ kuɗa̱ a ca le ekan o ure u na a̱ kuru na ayin shi.

20 Vu ca ta̱ Ruhu sa'ani va̱ wu na voo roco le,

waru vu putsa le na̱ mana va̱ wu a na a lyuwa shi,

ko mini a mantsa ma na a uwwusa akuli shi.

21 A'wan amunga a̱vu e idanusan le a̱tsumona,

agba a lamba ili shi,

waru a̱tugu e le o kporo shi,

agba ana e le a tsutsa shi.>>

22 Vu ca le ta̱ tsugono na̱ nɗa,

waru vu ne'eshe le ta̱ nɗa.✝

Reve a usa iɗa ya Heshibon ya̱ Mogono Sihon nu uvon,

ni iɗa ya Bashan Mogono ma Og.

23 Vu zuwa ta̱ muwun n le m bala

tsa italyo'o ya zuva.

reve vu ta̱wa̱to le a̱tsuma̱ e iɗa'a,

iɗa i na vu shi vu dammai nkaya n le

a uwa a usa.

24 Muwun n le n uwa ta̱ a̱vu a usa iɗa ya Ka'ana wo o'wo za le,✝

a̱vu vu la'a ucira u le vu lyuwa iɗa'a nu uvon.

reve vu ca nda̱na̱ta̱ ma Babila e ekere e le,

na̱ nɗa na̱ ngono n le suru,

a yuwan ne le cine a cigai.

25 Ama a̱ wu e reme ta̱ ilyuci i na i ri na̱ kari✝

ni iɗa yu umili.

A usa ta̱ 'wa na ri tapu na̱ cu'un vi ili i sa'ani suru,

no oko'o a na a̱ ka̱pa̱i ɗe,

na̱ ɗanga ina̱bi na̱ ɗanga zetun,

na̱ ɗanga va̱ a̱bunda̱ aza a na a̱ ri umatsun.

Reve a lyuwa a̱ cuwa̱n a yuwan lipu,

reve a uwwa uyo'o wi isa'ani i na vu yuwan n le pere.

26 <<Agba suru na̱ ne, a̱vu a 'yuwan a yuwan tsutoni, reve a̱ 'ya̱sa̱a̱n wu a aci,✝

a̱vu a vadalaa wila̱ wa̱ wu ucina̱.

reve o una ama̱sula̱ a̱ wu,

aza a na a ɓara nle adama a̱ ka̱mba̱ ya̱'a̱ wu.

Ne ɗa a yuwan nuwu unusu u na u ka̱ra̱la̱i.

27 Adama o ndolo vu ca le ta̱ e ekere a n'yuwatan n le,

aza a na a ca le a̱tsuma̱lima̱.

A̱tsuma̱ a̱ nden ma̱ a̱tsuma̱lima̱ e le, n na ama a̱ wu a̱ showen wu,

vu tsu uwwa le ta̱ diga zuva.

Adama a̱ a̱bunda̱ e iliyali ya̱ wu vu lyunguwa̱ le ta̱ a̱za̱ e iwawi,

aza a na a wawa nle diga e ekere a n'yuwatan n le.>>

28 <<Agba na a̱ tsura̱i wivuwun,

reve a yuwisan iwuya a̱ ma̱ka̱ka̱n ma̱ wu.

a̱vu vu vari le e ekere a n'yuwatan n le

adama a yuwan tsugbain aci e le.

Suru na̱ ne, a na a vadalai a̱vu e showen wu,

vu uwwa le ta̱ diga zuva,

waru mantsa suru vu tsu wawusa le ta̱ adama a̱bunda̱ e iliyali ya̱ wu.

29 <<Vu rono le ta̱ atsuvu adama vu ka̱mba̱to le o uritosu wa̱ wu,✝

amma a̱ vu o roco aciyogbamu a 'yuwan a yuwan tsutoni na̱ wila̱ wa̱ wu.

Reve a yuwan unusu o goro udammu wa̱ wu,

ko na wo o'woi she na̱ vuma yuwan tsutoni ne ele ɗaɗa za a̱tsura̱ wuma.

30 Vu yuwan ta̱ ankuri ne ele a'wan a'wan,✝

Vu ɓara le ta̱ na̱ Ruhu va̱ wu o una̱ wa ama̱sula̱ a̱ wu.

Suru na̱ ne o polo atsuvu shi.

Adama o ndolo ɗaɗa vu ca nle

e ekere a ama a nɗa n na n ri lo uka̱nda̱ruwu ne e le.

31 Agba hali n gogo adama a̱ a̱bunda̱ e iliyali ya̱ wu,

vu lyawa le ko vu kototo le shi.

Adama a na a̱vu A̱sula̱ e isa'ani ni iliyali i ɗa!

32 <<Gogo gba, A̱sula̱ a̱ tsu, A̱sula̱ a gbain,✝

za vu ucira, ni ili i wovon,

za na tsu shiton nzuwulai, ni icigi i na i tsu vadala shi,

she vi i cina na̱ a̱tsuma̱lima̱ a̱ tsu o urewesu wa̱ wu wan!

A̱tsuma̱lima̱ a na a̱ ta̱wa̱i aci a̱ tsu, na̱ ngono n tsu na azagbain a̱ tsu,

na̱ nan ganu a̱ tsu, na ama̱sula̱ a̱ tsu,

na̱ akaya n tsu, na ama a̱ wu suru,

diga a mantsa mo ngono ma Asuriya hali a̱ tyo ana'an.

33 Amma vu yuwan ta̱ mejege

a̱tsuma̱ e ili i na i farai na̱ a̱tsu,

adama a na vu yuwan ta̱ a̱ɓula̱,

ko na wo o'woi tsu yuwan wu ta̱ iwuya.

34 Ngono n tsu na azagbain a̱ tsu na̱ nan ganu a̱ tsu na̱ nkaya n tsu

a yuwan tsutoni nu uritosu wa̱ wu shi.

waru o polo atsuvu a̱ wila̱ wa̱ wu shi,

ko a tsuɓari tsa̱ wu shi.

35 A yuwan a̱ wu a̱ga̱nda̱ a̱ shi

ko a lyawa iwuya i le shi.

Ko na wo o'woi a̱ ta̱ na̱ aza a na a yuwusan tsugono tse le,

waru a ta a uwwusa uyo'o wa̱ a̱bunda̱ e isa'ani ya̱ wu a aci e le,

ni iɗa i washin nu umili i na vu ca nle.

36 <<A̱tsu ɗa nda agbashi a ɗa ana'an,

waru iɗa i na vu ca yi nkaya n tsu

adama a lyuwa muwun mu ɗanga ma̱ yi na akapi e ili i sa'ani ya̱ yi,

agba a̱ tsu ɗa nda agbashi a ɗa a̱tsuma̱ a̱ yi.

37 Adama a̱ nusu tsu,

Ili isa'ani ya̱ a̱bunda̱ e iɗa'a a̱ ta̱ tyosu e ekere o ngono,

ngono n na vu zuwai aci a̱ tsu,

na̱ ekere a̱ muwun n tsukaya n tsu ni iliyamunga i tsu,

ngono n na a yuwusan cine a cigai.

Reve tsu uwa a̱tsumola̱ngu lon.>>

38 <<Adama e ili i nda suru, tsu ta yuwusan nzuwulai mu ucira uɗanu, waru azagbain a̱ tsu, na̱ nan Levi a̱ tsu na̱ nan ganu a̱ tsu a ta zuwusa ukere u le ɗe.>>