1 Ana a yuwain woto na̱shi, o woto wa Nisan a'wan o ushin o tsugono tso Mogono Atazeze. Ana a̱ ta̱wa̱a̱ niyi na̱ masayan, reve n tara masaya'an n ca mogono'o. Agba koto shi n roco a̱tsumola̱ngu a̱ ma̱ka̱ka̱n ma̱ yi shi. 2 Ɗaɗa mogono me ece numu, <<Nye i zuwai urewesu wa̱ wu u ri ulukutu agba vu ri ubanakun shi? Babu ili i na ya̱a̱ ta̱wa̱ na̱ tsu nda n na̱ vu ri na̱ a̱tsumola̱ngu shi.>>

Ɗaɗa mu uwwai wovon lon. 3 Agba a̱vu n damma mogono'o, <<Lyawa mogono ma̱ da̱na̱ wuma hali hali! Adama a̱ nye urewesu u va̱ wa̱a̱ da̱na̱ ulukutu shi, a na lyuci na a̱ ciɗoi nkaya n va̱ mo o'woi okongo suru, waru a̱ kula̱to yi na̱ntsu va̱ yi na akina?>>*

4 Reve mogono me ece mu, <<Nye i ɗa vu cigai?>>

Reve n yuwan avasa a̱ tyo e ekere a̱ A̱sula̱ a zuva, 5 reve n usu mogono, <<Nnu u yo'ono mogono waru na aagbashi a̱ wu a̱ tsura̱ ta̱ isa'ani e ekere a̱ wu, lyawa vu lyungu mu a̱ lyuci va Yahuda uba̱ta̱ u na a̱ ciɗoi nkaya n va̱ adama n suwisa yi.>>

6 A mantsa'a gba egbere da̱na̱ ta̱ nden e eɓele o mogono. Reve mogono me ece mu, <<Rana yan ɗa mmalu ma̱ wu maa tara, waru urana u ne u ɗa va̱a̱ ka̱mba̱?>> Reve n damma yi. Mogono ma̱ usu ta̱ u lyungu mu. Ɗaɗa n ca niyi mantsa ma a mmalu n va̱.

7 Waru n damma ta̱ mogono, <<Nu u yo'ono ta̱ mogono, lyawa a ca mu mpepelime a̱ tyo uba̱ta̱ u nan gwamna vu upasu u mavada mo uɗolu wa̱ Yufiriti,* adama a lyawa mu n ka̱ra̱ hali n rawa Yahuda gbaga. 8 Waru n tsura̱ mepepelime a̱ tyo ya Asaf, za vi ipiri ya̱ a̱a̱rumbu o mogono, adama u ca mu ɗanga adama n yuwan akpata a̱ nge'en a̱ na̱ntsu vu ukari wu U'wa wa̱ A̱sulazuva, na̱ za vu ukari u lyuci, na̱ waru za vu u'wa u na ma̱a̱ da̱nu.>> Reve mogono ma ca mu suru ili i na m pati niyi, adama a na ukere wa̱ A̱sula̱ a̱ va̱ za vi isa'ani da̱na̱ ta̱ oɓolo na̱ mu. 9 Mogono ma zuwa ta̱ nan yali ya̱ a̱soja oɓolo, no oɓolo a̱soja akumbi e ido a na a̱ ka̱ra̱ oɓolo na̱ a̱mu. Reve n ka̱ra̱ a̱ tyo upasu mavada mo Uɗolu wa̱ Yufiriti adama a na ma ca nan gwamna mpepelime n mogono'o.

10 Amma a mantsa ma na Sanbala vuma va Horon na̱ Tobiya zagbain lyuci va Amon a uwwai za ro ta̱wa̱ ta̱ a na wa ca ama a Isra'ila adanshi a̱ da̱nu lafiya, agba ili'i uyo'o no le shi.

11 N rawa ta̱ Urishelima reve n da̱nu pe rana ta'atsu. 12 Reve mu uta̱ na ayin oɓolo na ama wa'a. N shi n damma za ro ili i na A̱sula̱ a̱ va̱ a zuwai o okolo a̱ va̱ n yuwan adama a̱ Urishelima shi. N shi ni iliyamunga i ro shi she za na n kumbai.

13 Na a'yi'in reve mu uta̱ n kuru nu Una̱ntsu wu Uka̱ri o utula̱i na̱ Lyusu Mini va Agangu* na̱ Una̱ntsu we Edemu reve n ka̱lyuwa̱ ukari wa̱ Urishelima u na wo ocoi na̱ na̱ntsu va̱ yi na kula̱i. 14 Reve n ka̱ra̱ a tyo o Una̱ntsu u Lyusu Mini na Abata o Mogono, agba iliyamunga i na n kumbai u tsura̱ ure u na waa pasaa shi. 15 Ɗaɗa n kuruyi a gawan nu uka̱ri'i na a'yi'in a̱ ka̱lyuwusa̱ ukari'i. Reve n vadala n uwisa nu Una̱ntsu wu Uka̱ri'i.

16 Azagbai'in e reve uba̱ta̱ u na n shi n 'ya̱wa̱i shi ko ili i na maa yuwusan shi. Adama a na koto n shi n damma ne'e a̱za̱ a̱ va̱ aza a Yahuda shi, ko nan ganu ko azagbain ko mbara ko ozo o ro a̱tsuma̱ a aza a na aa yuwan ulinga'a shi. 17 Reve n damma le, <<Ye ene ta̱ addama a na tsu ri pe, cine Urishelima o'woi okongo akina waru a lyuwai na̱ntsu va̱ yi. Ta̱wa̱i, tsu suwisai ukari wa̱ Urishelima, adama tsu u ta̱ o wono.>> 18 Waru n damma le ta̱ adama o ukere wu ucira wa̱ A̱sula̱ a̱ va̱ a na a̱ ri a aci a̱ va̱, ni ili i na waru mogono ma damma numu.

Reve a̱ usu, <<Lyawa tsu temei ulinga wu usa'a!>> Ɗaɗa a̱ da̱shiyi aciyele asuvu adama o ulinga u sa'ani u nda.

19 Amma a mantsa ma na Sanbala vuma va Horon na̱ Tobiya zagbain vi iɗa ya Amon na̱ Geshem vuma va Araba a uwwai ili i na tsu foɓoi adama a na tsa yuwan, reve a yuwaan tsu ulamu reve o zo'oso tsu a damma, <<Nye i ɗa nda'a i na yaa yuwusan? I ciga ta̱ i 'ya̱sa̱a̱n mogono aci?>>

20 Reve n usu le n damma, <<A̱sula̱ a zuva a ta ca tsu ulyuwu wa aci. A̱tsu agbashi a̱ yi tsu ta̱ 'yon tsu teme ulinga wu usaa. Amma a̱ ɗu i ri na akunda shi, ko agadu, ko ili i ro i na a̱ da̱na̱ a cuwusan na̱ yi a̱tsuma̱ a̱ Urishelima shi!>>