1 Ana Sanbala na̱ Tobiya na̱ Geshem vuma va Araba na akapi a n'yuwatan n tsu mu uwwai a na tsu suwisa ta̱ ukari'i waru tsu koto ta̱ u leɓenusu wa abala a na a̱ shi a buwai. Ko no wo o'woi koto shi tsu shuwa̱ na̱ntsu n le shi, 2 reve Sanbala na̱ Geshem a̱ lyunguwa̱ mu adansa, <<Ta̱wa̱ tsu ga'asan a̱ ma̱lyuci mo ro ma Agalaci a Ono.>> Agba a̱ shi ta̱ a yuwusan ifoɓi i na aa amaton mu. 3 Ɗaɗa gba n lyunguwa̱ nle na̱ nlingata a damma le, <<N ta yuwusan ulinga u gbain u ro u ɗa, u na maa gura cipa̱ a̱ 'ya̱wa̱ ya̱'a̱ ɗu shi. Adama a̱ nye ma lyawa ulinga'a n ka̱ra̱ a̱ cipa̱ ya̱'a̱ ɗu?>>

4 Reve a̱ lyungusa̱a̱ mu ni ikaka i nda hali toto una̱shi, waru mantsa suru n ta ca su le u usuwu u ta̱.

5 Za va tawun a̱vu Sanbala lyungu vuma ta̱ diga a̱tsuma̱ agbashi a̱ yi uba̱ta̱ u va̱. Malingata a gba u da̱na̱ ta̱ na̱ mepepelime ukpa̱tu'u o ukere wa̱ yi na̱ cu'un vi ikaka i ta̱. 6 A̱tsuma̱ a̱ yi a ɗana ta̱, <<Tsu ta̱ tsura̱sa̱ alabari diga uba̱ta̱ wa ama a na a̱ ri na̱ nden uka̱nda̱ruwu na̱ a̱tsu adansa a̱vu na ama a Yahuda i ta̱ e ifoɓi i na ya̱ 'ya̱sa̱n aci. A̱yi ɗa i zuwai yaa suwusa ukari'i. Waru Geshem gura ta̱ roco tsu a na ne ɗa u ri na aa amayun. Suru na̱ ne, o una̱ wa alabari a nda tsu uwwa ta̱ a na vu ri e ifoɓi i na va katala aciya̱wu mogono me le. 7 Waru vu foɓo ta̱ ɗe ama̱sula̱ o ro a na a lapa ulingi adama a̱ wu a̱tsuma̱ a̱ Urishelima adansa a na, <A̱ ta̱ na̱ mogono a̱tsuma̱ a Yahuda!> Amayun mogono Atazeze ta uwwa adama a alabari a nda. A̱yi ɗa i zuwai ma casu a̱sa̱la̱ tsu ga'asan tsu yuwan adanshi adama a ɗa a nda.>>

8 Reve n lyunguwa̱ yi nu usu n damma, <<Ili i na vu ri nda adansa suru amayun a ɗa shi. A̱vu ɗa vu foɓoi ili ya nda okolo a̱ wu suru.>>

9 Suru n le a ta zama ure u na aa ca tsu wovon. A ta a majiyan ekere o una̱ wu cu'un va adanshi a nda a ɗa a zuwa obolu a̱ tsu a̱ kuwa̱, waru ulinga'a wi isawan. Reve n yuwan avasa n damma, <<Gogo A̱sula̱, vu ca obolu a̱ va̱ ucira!>>

10 Urana u ro a na n 'ya̱wa̱i o u'wa wa Shemaya ulobo wa Delaya, mawun ma tsukaya ma Mehetabe, Shemaya gba da̱na̱ ta̱ uɓa̱ruwu o u'wa wa̱ yi. Reve u damma a̱mu, <<Lyawa tsu ka̱ra̱ tsu pa'an o u'wa wa̱ A̱sula̱, a̱tsuma̱ a̱ A̱a̱'isa̱mapaɗa, waru tsu ɓa̱ru na̱ntsu va̱ yi, adama a na a̱ ta̱ lo a̱ ta̱wa̱ a na o una a̱ wu. Amayun na ayin a̱ ta̱ ta̱wa̱ o una wu.>>

11 Agba a̱vu n usu n damma, <<Vuma tsa̱ va̱ ta suma? Ko gba vuma tsa̱ va̱ ta uwa a̱tsuma̱ a̱ A̱a̱'isa̱mapaɗa adama u wawa wuma wa̱ yi? Ma̱a̱ 'ya̱wa̱ shi!>> 12 A̱vu n reve a na A̱sula̱ a̱ lyungu yi uba̱ta̱ u va̱ shi, amma u yuwan ta̱ adanshi a nda adama a na Tobiya na̱ Sanbala a tsula a yi ta̱. 13 A tsula yi ta̱ adama u ca mu wovon tsa̱ra̱ n yuwan unusu na̱ n yuwan ne. A̱ shi ta̱ a̱ lungusa̱ mu aala adama a̱ tsura̱ ili ya adanshi.

14 Reve n yuwan avasa n damma, <<A̱sula̱ a̱ va̱ vu cuwan ni iwuya i na Sanbala na̱ Tobiya a yuwaan n tsu. Waru vu cuwan na̱ vumava̱sula̱ ka Nowadiya na akapi a ama̱sula̱ a na a buwai aza a na a yuwain mpolo n na a ca mu wovon.>>

15 A̱tsuma̱ a rana kupoton ne ejere ɗaɗa o kotoi ulinga wu ukari'i o urana wu ushin no ozo o ton o woto wa Elu.* 16 A mantsa ma na n'yuwatan n tsu suru mu uwwai ne, oɓolo na̱ nɗa n na n ri uka̱nda̱ruwu na̱ tsu suru, reve a uwwa wovon, waru lipu le kuwa̱. Adama a na a gura ta̱ reve ulinga u nda ni ikambi ya̱ A̱sula̱ a̱ tsu a ɗa tsu yuwan niyi.

17 A rana ndolo waru, reve azagbain a Yahuda a̱ lyunguwa̱ Tobiya na̱ mpepelime, reve Tobiya lyungusa̱ le fo. 18 Adama a na ama na̱ a̱bunda̱ a̱tsuma̱ a Yahuda a̱ shi ta̱ a taraa Tobiya akucunu a na a kamba yi, adama a na toto va Shekaniya ulobo wa Ara vuma va Yahuda ɗa. Na̱ ne suru Jehohana ulobo wa Tobiya u zuwa ta̱ usheli wa Meshulam ulobo wa Berekiya. 19 Waru ama'a a yuwusan ta̱ adanshi a linga sa'ani na Tobiya yuwain elime a̱ va̱, reve waru a dansa yi ili i na n dammai. Reve a̱ yi u lyungusa̱ a̱mu na̱ mpepelime adama u ca mu wovon.