1 O urana u ndolo e ɗe ta̱ nu una̱ diga a̱tsuma̱ Aatagada a̱ wila̱ wa Musa a atsuvu a ama. Reve a cina pe uɗanu a na she a lyawa ko za va Amon ko za va Mowa u uwa a̱tsuma̱ e iɓolo ya ama a̱ A̱sula̱ wan ko ke'en.✝ 2 Adama a na ama a Amon na aza a Mowa a ca aza a Isra'ila ilyalya ko mini mo oso a mantsa ma na o uta̱i diga e iɗa ya Masar shi. Reve a ca Balam ikebe adama u yuwaan ama A̱sula̱ una̱. Reve A̱sula̱ a̱ tsu a vadala una̱'a̱ wo o'wo aba'un.✝ 3 A mantsa ma na ama a Isra'ila'a a uwwai wila̱ wa Musa'a, reve a ɓatsuwa aza a na suru a̱ ri omocin diga a̱tsuma̱ e le.

4 Kafu mantsa ma nda, a̱ shi ta̱ a zuwa Eliyashi ganu za vu uka̱lyusa̱ wa asula e izuwa yu U'wa wa̱ A̱sula̱ a̱ tsu, adama a na a̱ yi imaci ya Tobiya ɗa. 5 Reve u ca Tobiya aasula a gbain a na a̱ shi a tsu zuwa ucasu wi ishina, na̱ mani'in ma̱ ma̱guru, na̱ za vi itana i na a yuwusaan ulinga a̱tsuma̱ A̱a̱'isa̱mapaɗa, na̱ za ta̱ a̱tsuma̱ a kupa vi ishina na̱ za masayan ma̱ inabi na̱ za mani'in ma zetun, a na a dammai adama a na nan Levi na ashipi na̱ a̱za̱ e ipiri yu una̱ntsu wa̱ A̱a̱'isa̱mapaɗa, oɓolo nu ucasu adama a na nan ganu.

6 Agba ana ili i nda suru i da̱na̱i a mmalu, n shi a̱tsuma̱ a̱ Urishelima shi, adama a na a̱tsuma̱ a aa'wan mata'atsu ne ejere o tsugono tsa Atazeze mogono ma Babila n shi ta̱ n 'ya̱wa̱ uba̱ta̱ wa̱ yi adama a na ma cuɗuwa yi. Ana a tarai mantsa a̱vu m pati yi adama n ka̱mba̱ Urishelima. 7 Ana n ka̱mba̱i Urishelima, ɗaɗa n cinai iwuya i na Eliyashi yuwain na u foɓoyi Tobiya aasula a asula agalaci o U'wa wa̱ A̱sula̱. 8 Reve n yuwan upan lon, reve mo oco itana ya Tobiya suru a alanga. 9 Reve n zuwa a̱ ka̱mba̱to asula'a cece o una̱ u wila̱, a̱vu n ka̱mbuwa̱ pe itana yu U'wa wa̱ A̱sula̱, oɓolo na̱ kucci vi ishina ni ili i ma̱guru.

10 Reve waru mu uwwa a na akunda a na a zuwai adama a nan Levi a ca le a̱yi shi, ɗaɗa gba suru nle oɓolo na ashipi a na a yuwusan ulinga wa̱ a̱ga̱nda̱'a̱ a sumai a̱ ka̱mba̱ a̱ɗuma̱ e le.✝ 11 Ɗaɗa m ɓarai azagbai'in a̱vu me ece le, <<Adama a̱ nye a variyi U'wa wa̱ A̱sula̱ tsunda?>> Reve m ɓoloto nan Levi'i na ashipi'i, a̱vu n ka̱mba̱to le ba̱ta̱ a linga le.

12 Reve aza a Yahuda suru a̱ ta̱wa̱a̱ na̱ za ta̱ a̱tsuma̱ a kupa vi ishina na̱ masayan ma inabi na̱ mani'in ma̱ zetun a asula e izuwa. 13 Reve n zuwa Shelemiya ganu na̱ Zadok za vi iɗana na̱ Pedaya umatsun wa̱ Levi tsugbain tsa asula e izuwa'a, a̱vu n zuwa Hanan ulobo wa Zaku mawun ma tsukaya ma Mataniya wo o'wo kambi le, adama a na a tara ta̱ ama a nda a̱za̱ a̱ a̱ɓula̱. Ulinga u le u ɗa ee ne'eshen a̱za̱ e le ili i na o ɓolotoi.

14 Vu cuwan na̱ a̱mu A̱sula̱ a̱ va̱ adama e ili i nda. She vu tasa ili i isa'ani i na n yuwain adama o U'wa wa̱ A̱sula̱ a̱ va̱ na̱ a̱ga̱nda̱ a̱ yi wan.

15 A̱tsuma̱ a rana ndolo a̱vu me ene ama a̱tsuma̱ a Yahuda uba̱ta̱ u mokpoko ma masayan, a tanusaa nloli n le ibufu yi ishina na̱ masayan ma̱ ina̱bi na̱ ubiri ni itana icu'un icu'un a̱ ta̱wusa̱ na̱ le a̱tsuma̱ a̱ Urishelima o urana wa Ashibi. Ɗaɗa m ɓara nle adama a awina e ilyalya urana wa Ashibi.✝ 16 Ama a Taya fo aza a na a̱ ri nden a̱tsuma̱ a̱ Urishelima a̱ ta̱wa̱sa̱ ta̱ na̱ mugula na̱ cu'un vi itana ya awina suru a winisaa ama a Yahuda a̱tsuma̱ a̱ Urishelima urana wa Ashibi. 17 Reve m ɓara azagbain a Yahuda n damma le, <<Ili i wuya i ne ɗa yaa yuwusan ne tsunda a̱ lungususa̱ urana wa Ashibi? 18 Ne ɗa fo nkaya n ɗu n yuwain shi, ɗaɗa gba A̱sula̱ a̱ tsu a̱ ta̱wa̱a̱ ntsu oɓolo na̱ lyuci nda na̱ a̱tsuma̱lima̱ a nda shi? Gogo i ta̱ da̱shi 'ya̱susa̱n upan wa̱ A̱sulazuva a̱ tyo e ekere a aza a Isra'ila nu u lungususa̱ wu urana wa Ashibi.>>

19 Reve n ca udammu adama a na a̱ ɓa̱ru na̱ntsu va Urishelima o ufaru wu urana wa Ashibi, a mantsa ma na urana u riya̱i. Waru n ca ta̱ udammu adama a na na̱ntsu a̱ da̱na̱ u ɓa̱ru kuci, hali she nu urana wa Ashibi u ka̱ra̱. N zuwa ta̱ agbashi a̱ va̱ o ro a na aa yuwusaan mu a̱ga̱nda̱ a̱ na̱ntsu adama a uwa ko ni itana a̱tsuma̱ a̱ Urishelima o urana wa Ashibi wan. 20 O uta̱ u ɗa ko ure shi aza a atsulu na aza a awina a̱ cu'un vi ili suru a asai a alanga a̱ Urishelima shi. 21 Agba m ɓara le ta̱ n damma, <<Adama a̱ nye ya asai o ucina̱ wu ukari'i? Nni i da̱shi yuwan ne, n te reme ɗu.>> Diga a mantsa mo ndolo a̱ 'ya̱wa̱ a̱ da̱shi ta̱wa̱ urana wa Ashibi shi. 22 Reve n zuwa nan Levi a̱ ka̱mba̱to aciyele cece a̱vu a̱ 'ya̱wa̱ a̱ piri na̱ntsu adama a̱ guza̱ urana wa Ashibi na akiza.

A̱sula̱ a̱ va̱, vu cuwan na̱ a̱mu adama e ili i nda fo, ve ene iliyali i va̱ a̱tsuma̱ e icigi ya̱ wu i na i tsu vadala shi.

23 Waru a̱tsuma̱ a rana ndolo, me ene ta̱ ama a Yahuda aza a na a̱ shi a zuwai a̱ma̱ci a Ashido na̱ Amon na̱ Mowa. 24 Muwun n le n ro n yuwusan ta̱ adanshi ne elentsu a aza a Ashido ozo o ro ne elentsu a ama o ro ko'o, agba a gura yuwan adanshi ne elentsu a̱tsu a Yahuda shi. 25 A̱vu m ɓara le a̱vu n yuwaan le una̱. A̱vu mu ru'wa̱ ozo o ro e le, avu mu mumula̱ le a̱nji. Reve n zuwa le a tara akucunu na ala a̱ A̱sula̱ a damma, <<Yaa ca esheli a̱ ɗu oo olo olobo e le shi, waru yaa tara esheli e le oo olo olobo a̱ ɗu shi, ko a̱ɗu na aciya̱ɗu shi. 26 Adama a̱ cu'un lolo nda ɗa Sulemanu mogono ma Isra'ila ma yuwain unusu shi? A̱tsuma̱ a nɗa suru a̱ shi a yuwan mogono tsa̱ yi shi. A̱sula̱ a̱ yi a̱ shi ta̱ a ciga yi, reve A̱sula̱ a zuwa yi mogono ma Isra'ila suru. Agba a̱vu omocin a̱ a̱ma̱ci a zuwa a̱yi u yuwan unusu. 27 Tsa̱ usu ili i na yaa yuwusan shi, hali na tsa yuwan iwuya i nda wu ulambu wa̱ a̱ɓula̱ e ekere A̱sula̱ a̱ tsu, na tsa zuwa omocin a̱ a̱ma̱ci.>>

28 Za ta̱ a̱tsuma̱ olobo a Joyada, ulobo wa Eliyashi abara ganu, u zuwa ta̱ usheli wa Sanbala vuma va Bet Horon. Adama o ndolo a ɗa m gba̱ra̱ niyi diga uba̱ta̱ u va̱.✝

29 A̱sula̱ a̱ va̱ cuwan ne ele, adama a na a̱ lungusa̱ ta̱ ulinga u tsuganu na akucunu a tsuganu na̱ aza a nan Levi.

30 Ne ɗa n ka̱mbuwa̱i nan ganu na̱ nan Levi cece e ekere e ili i na i ri ya atakpaci suru. Reve n ca koyan ɗa ulinga wa̱ yi. 31 Reve waru n zuwa mantsa la̱nga̱ ma na a̱a̱ ri n ta̱wusa̱a̱ na̱ ɗanga vu ukula̱tosu u kucci a mantsa ma na wuntsa yi, waru a̱ ta̱wa̱a̱ nu umatsun wu ufaru a mantsa ma na a zuwai.

A̱sula̱ a̱ va̱, vu cuwan vu yuwaan mu isa'ani.