1 Apa ala a nan ganu na̱ nan Levi a na a̱ ka̱mba̱i diga e iɗa i tsugbashi oɓolo na̱ Zerubabe ulobo wa Sheyatiye na̱ Jesuwa.

A̱tsuma̱ a nan ganu ele ɗa,

Seraya na̱ Irimiya na̱ Ezura,

2 na̱ Amariya na̱ Maluk na̱ Hatush,

3 na̱ Shekaniya na̱ Rehum na̱ Meremo,

4 na̱ Ido na̱ Ginetoyi na̱ Abiya,

5 na̱ Mijamin na̱ Madiya na̱ Bilga,

6 na̱ Shemaya na̱ Joyari na̱ Jedaya,

7 na̱ Salu na̱ Amok na̱ Hilikiya na̱ Jedaya.

Ele nda ele ɗa a̱ shi azagbain a nan ganu na̱ a̱za̱ e le a mantsa ma̱ Jesuwa.

8 Nan Levi waru ele ɗa,

Jesuwa na̱ Binuyi na̱ Kadimiye,

na̱ Sherebiya na̱ Yahuza oɓolo na̱ Mataniya za na a̱yi na̱ a̱za̱ a̱ yi a̱ shi azagbain e ishipa yu ugodyusho.

9 na̱ Bukubukiya na̱ Uni na̱ a̱za̱ e le aza a na a̱ ususu ishipa.

10 Jesuwa ɗa matsain Joyakim, Joyakim waru a̱yi ɗa u matsain Eliyashi, Eliyashi waru u matsan Joyada, 11 Joyada ɗa matsain Jonata, Jonata ɗa matsain Jaduwa.

12 Apa ala azagbain a 'wa vu nkaya n limatan n nan ganu a mantsa ma na Joyakim da̱na̱i Abara a ganu.

Meraya ɗa da̱na̱i zagbain vu umatsun wa Seraya.

Hananiya waru zagbain vu umatsun wa Irimiya.

13 Meshulam zagbain vu umatsun wa Ezura.

Jehohana zagbain vu umatsun wa Amariya.

14 Jonata zagbain vu umatsun wa Malu.

Isuhu zagbain vu umatsun wa Shebaniya.

15 Adna zagbain vu umatsun wa Harim.

Helikai zagbain vu umatsun wa Meremo.

16 Zakariya zagbain vu umatsun wa Ido.

Meshulam zagbain vu umatsun wa Gineton.

17 Zikiri zagbain vu umatsun wa Abiya.

Akwai zagbain vu umatsun wa Miniyamin.

Pilitai zagbain vu umatsun wa Mowadiya.

18 Shamuya zagbain vu umatsun wa Bilga.

Jonata zagbain vu umatsun wa Shemaya.

19 Matenai zagbain vu umatsun wa Joyari.

Uzi zagbain vu umatsun wa Jedaya.

20 Kalai zagbain vu umatsun wa Salu.

Eba zagbain vu umatsun wa Amok.

21 Hashabiya zagbain vu umatsun wa Hilikiya.

Nataniya zagbain vu umatsun wa Jedaya.

22 A mantsa ma na Dariyu da̱na̱i o tsugono tsa Pashiya ɗa, a ɗanai ala azagbain a 'wa vu nkaya n nan Levi na̱ nan ganu a mantsa ma Eliyashi na̱ Joyada na̱ Johanan na̱ Jaduwa.

23 Reve waru a ɗana ala azagbain vu 'wa vu nkaya n nan Levi a̱tsuma̱ aatagada alabari a mantsa mo ufaru hali acina a mantsa ma Johanan ulobo wa Eliyashi.

24 Apa ala azagbain o umatsun u nan Levi. Hashabiya na̱ Sherebiya na̱ Jesuwa ulobo wa Kadimiye. A̱za̱ e le a̱ tsi isawan ta̱ a̱ nka̱la̱la̱i na̱ a̱za̱ le adama a na a cana ishipa yi ica na̱ za vu ugodyusho, upasu u ta̱ a tarasa ishipa, upasu u ta̱ waru o ususu, o una̱ wi ili i na Da̱wuda vuma va̱ A̱sula̱ dammai.

25 Apa ala aza a na a yuwusan ipiri yu una̱ntsu wa̱ A̱a̱'isa̱mapaɗa asula e izuwa, Mataniya na̱ Bukubukiya na̱ Obadiya na̱ Meshulam na̱ Talmon oɓolo na̱ Akub.

26 Ele ama a nda a yuwan ta̱ a̱ga̱nda̱ a mantsa ma Joyakim ulobo wa Jesuwa mawun ma tsukaya ma Jozada a mantsa ma na Nehemiya da̱na̱i gwamna. A mantsa mo ndolo gba Ezura za vi iɗana ɗa da̱na̱i ganu.

27 A mantsa ma na aa ca ukari wa̱ Urishelima, a̱ bunga̱ ta̱ nan Levi uba̱ta̱ u na a̱ ri na̱ nden suru a̱vu a̱ ta̱wa̱ ne le a̱tsuma̱ a̱ Urishelima adama a yuwan a̱buki o ucasu na̱ ma̱za̱nga̱ nu ugodyusho ni ishipa na̱ tsuwe'e yi ikumburu ni igoge na̱ igaraya. 28 A̱ ta̱wa̱ ta̱ waru na ashipi diga a̱ mulyuci n na a̱ ri uka̱nda̱ruwu na̱ Urishelima na̱ mulyuci ma aza a Netofa, 29 na̱ diga Bet Gilga na̱ diga upasu wa Geba na̱ Azumave, adama a na ashipi'i a̱ shi ta̱ a suwaa aciyele mulyuci uka̱nda̱ruwu na̱ Urishelima. 30 Reve nan ganu na̱ nan Levi a̱ ka̱mba̱to aciyele cece, a̱vu waru a̱ ka̱mba̱to ama na̱ na̱ntsu nu ukari'i cece.

31 Reve a̱mu Nehemiya n zuwa azagbain a Yahuda a kumba zuva vu ukari'i. A̱vu waru n foɓo oɓolo azagbain ashipi e re a̱ kuru ukari'i. Oɓolo a̱ ta̱ a̱ kuru zuva vu ukari'i upasu wu uyagi a̱ tyo o Una̱ntsu we Edemu. 32 Reve Hoshaya oɓolo na akapi azagbain a Yahuda o toni ucina̱ wa ashipi'i, 33 na̱ Azariya na̱ Ezura na̱ Meshulam, 34 na̱ Yahuza na̱ Banyami na̱ Shemaya na̱ Irimiya, 35 nan ganu o ro aza a na e ivulusa̱ avana o toni le ta̱, na̱ Zakariya ulobo wa Jonata mawun ma tsukaya ma Shemaya diga o u'wa wa Mataniya ulobo wa Mikaya, ulobo wa Zaku vu umatsun wa Asa. 36 Akapi a̱za̱ a̱ yi a ɗa, Shemaya na̱ Azare na̱ Milalai na̱ Gilalai na̱ Mai na̱ Nataniya na̱ Yahuza na̱ Hanani. Suru n le gba a̱ da̱na̱ ta̱ uguzu ni itana i tsuwe'e cu'un va̱ Mogono Da̱wuda, vuma va̱ A̱sula̱. Ezura za vi iɗana a̱yi ɗa u uwai elime e le. 37 A lyuwa ta̱ elime na̱ mmalu diga o Una̱ntsu u Lyusu Mini o udasata u Lyuci va̱ Da̱wuda na̱ zuva vu ukari a pasalai nu u'wa wa̱ Da̱wuda a̱ tyo o Una̱ntsu u Mini u na ri ya asana a̱ Urishelima.

38 Reve oɓolo e ire wa̱ a̱za̱ e ishipa'a a̱ kuru upasu wu ugana wu ukari'i. A̱vu n kuru le zuva vu ukari oɓolo na akapi a ama'a. Reve tsu kuru nu uba̱ta̱ wu usaa wu ga'an wu Uzusun wo Opopofu, hali a̱ tyo o Ukari u Washin. 39 Diga lo reve tsu kuru nu Una̱ntsu wa Ifiramu nu Una̱ntsu wa Jeshana nu Una̱ntsu u Mugula na Aatsura a Hanane na Aatsura o Ukpaku, hali a rawa o Una̱ntsu wi Ikyon. Reve tsi ivuwan o Una̱ntsu wa̱ A̱za̱ e Ipiri.

40 Ne ɗa oɓolo a ashipi e re'e e isawain uba̱ta̱ u le o U'wa wa̱ A̱sula̱. A̱vu a̱mu na akapi azagbain tsu da̱na̱ oɓolo ne le, 41 a̱tsuma̱ a na nan ganu aza a na e ivulusa̱i avana ele ɗa Eliyakim na̱ Maseya na̱ Miniyamin na̱ Mikaya na̱ Eliyonai na̱ Zakariya oɓolo na̱ Hananiya. 42 na̱ Maseya na̱ Shemaya na̱ Eliyaza na̱ Uzi na̱ Jehohana na̱ Malkiya na̱ Elam na̱ Eza. Jezirahiya ɗa da̱na̱i zagbain vo oɓolo ashipi na a canai ishipa yu ugodyusho, reve a cana ishipa'a nu ucira lon.

43 O urana u ndolo reve a ca kucci va̱ a̱bunda̱, a yuwusan ma̱za̱nga̱ adama a na A̱sula̱ o yo'onoto le ta̱ okolo lon. A̱ma̱ci na̱ muwun fo n yuwan ta̱ ma̱za̱nga̱. A uwwa ta̱ uɗyo u ma̱za̱nga̱ wa ama a̱tsuma̱ a̱ Urishelima diga alanga.

44 O urana u ndolo u ɗa a zuwai ama a̱ ka̱lyuwusa̱ asula e izuwa uba̱ta̱ u na a zuwusa ucasu, umatsun wu ufaru na̱ za ta̱ a̱tsuma̱ a kupa a na a̱ ta̱wusa̱a̱. O to ɓoloto pe akunda e itana ya̱ a̱ɗuma̱ a na a̱ ri uka̱nda̱ruwu ni ilyuci cine Wila̱ u zuwai adama a nan ganu na̱ nan Levi. Ununa Wila̱ wa Musa u dammai. Reve ama a Yahuda a lyuwa elime a yuwusan ne adama a na a uwwa ta̱ uyo'o u nan ganu na̱ nan Levi aza a na a yuwusan a̱ga̱nda̱. 45 Nan ganu oɓolo na̱ nan Levi a yuwan ta̱ tsutoni ni ili i na a zuwai adama a̱ga̱nda̱ a̱ A̱sula̱ e le na̱ wila̱ wu uka̱mba̱tosu u cece, cine Mogono Da̱wuda nu ulobo wa̱ yi Sulemanu a dammai. Ne ɗa fo a̱za̱ e ishipa na̱ a̱za̱ e ipiri ya̱ A̱a̱'isa̱mapaɗa a yuwain.✝ 46 Ɗe na̱ a̱ca̱pa̱ a mantsa ma̱ Mogono Da̱wuda na̱ Asa, a̱ da̱na̱ ta̱ na azagbain a ashipi, a̱ da̱na̱ ta̱ waru ni ishipa yi ica na̱ za vu ugodyusho a̱ tyo uba̱ta̱ wa̱ A̱sula̱. 47 A mantsa ma Zerubabe na̱ Nehemiya, ama a Isra'ila suru a ca ta̱ a ashipi na̱ a̱za̱ e ipiri yu una̱ntsu wa̱ A̱a̱'isa̱mapaɗa utafa u na a zuwai wu urana biti. A̱vu waru a tawa akunda a nan Levi, reve nan Levi fo a tawaa nan ganu o umatsun wa Haruna akunda le.