1 Reve ali na̱ a̱ma̱ci e le a uwa adanshi awuya a aci a̱ a̱za̱ e le aza a Yahuda. 2 Ozo o ro a ta dansa, <<A̱tsu no olobo a̱ tsu ne esheli a̱ tsu tsu ta̱ a̱bunda̱, tsu ciga ta̱ ishina adama tsu lyuwa na tsa̱a̱ da̱na̱ wuma.>>

3 Ozo o ro waru a ta dansa, <<Tsu ta ca a̱ɗuma̱ a̱ tsu na̱ a̱ɗuma̱ a̱ ina̱bi na̱ 'wa tsu adama tsu tsura̱ ishina adama tsu yuwan ambulu wan.>>

4 Ozo o ro waru a ta dansa, <<Tsu kopo ta̱ ikebe adama tsu tsupa ugana u mogono o una̱ wa̱ a̱ɗuma̱ a̱ tsu na̱ a̱ɗuma̱ a ina̱bi a̱ tsu. 5 Ko na wo o'woi a̱tsu mpasa n ta̱ ɗa, waru muwun n tsu na̱ muwun n le ili i ta̱ i ɗa, suru na̱ ne a zuwa tsu ta̱ tsu zuwa muwun n tsu mo o'wo agbashi. Waru muwun me esheli n tsu n ro mo o'wo ta̱ ɗe agbashi, agba tsu ri nu ucira u na tsaa yuwan ili i ro shi, adama a na a usa ta̱ ɗe a̱ɗuma̱ a̱ tsu na̱ a̱ɗuma̱ a ina̱bi a̱ tsu.>>

6 Ana mu uwwai adanshi awuya e le na̱ mesun me le, mu uwwa ta̱ upan lon. 7 N yuwan ta̱ majiyan me le okolo a̱ va̱, ɗaɗa n cayi azagbain na̱ mbara unusu. A̱vu n damma le, <<I ta palusa a̱za̱ a̱ ɗu adama o kopo a na ya ca su le, i ta̱ ushishi ula'awu ni ili i na yaa ca su le!>>✝

Ɗaɗa n ɗeyi iɓolo i gbain adama aɗa'a. 8 Reve n damma le, <<Tsu yuwan ta̱ a̱ tyo o ucira u tsu, tsu tsupaa a̱za̱ a̱ tsu aza a Yahuda aza a na a̱ shi a winayi atakpaci. Agba a̱ yi ɗa nda hali gogo i ta winasa a̱za̱ a̱ ɗu, hali acina uyan ɗa tsa tsupusaa le?>> Reve a̱ rungwa̱ kuci kuci adama a na a̱ tsura̱ ili i na aa damma shi.

9 Reve a̱mu Nehemiya n damma le, <<Ili i na yaa yuwusan u ri ulobonu shi. U ta̱ da̱na̱ ulobonu i yuwan mmalu a̱tsuma̱ o wovon wa̱ A̱sula̱ a̱ tsu, adama tsu uta̱i o wono u wisulusa wa atakpaci. 10 Waru a̱mu na̱ a̱za̱ a̱ va̱ na̱ agbashi va̱ tsu ta casu ama okopu e ikebe ni ishina. Agba gogo she tsu lyawai a ɗa o ucasu wu utan reve tsu ushi utsuru wi idaba. 11 Ana'an ana'an i ka̱mbuwa̱a̱ le a̱ɗuma̱ e le, na̱ a̱ɗuma̱ a ina̱bi na̱ a̱ɗuma̱ a̱ zetun na̱ 'wa le, nu utsuru wi idaba i na i ushi yi e ekere e le. I ka̱mbuwa̱ upasu uta̱ a̱tsuma̱ o ukpaku uta̱ wi ikebe ni ishina oɓolo na̱ masayan ma̱ ina̱bi na̱ mani'in ma̱ zetun.>>

12 Reve azagbai'in a̱ usu a damma, <<Tsu ta̱ ka̱mbuwa̱a̱ le, waru tsa̱a̱ da̱shi ushi ili i ro e ekere e le shi. Tsu ta yuwan cine vu dammai.>>

Reve m ɓoloto nan ganu a̱vu n zuwa azagbain a tara akucunu a̱ ma̱ka̱ka̱n ma nan ganu a na o shiton ili i na a yuwain nzuwulai. 13 Reve gba n za̱ka̱tsa̱ utugu u va̱ a̱vu n damma, <<Lyawa A̱sula̱ a̱ za̱ka̱tsa̱ ko zane ɗa ne tsunda diga o u'wa wa̱ yi ni itana ya̱ yi za na shiton yi nzuwulai nda shi. Lyawa a̱ za̱ka̱tsa̱ yi wo o'wo wa̱wa̱wa̱!>>

Reve oɓolo a ama suru a̱ usu, <<Lyawa wo o'wo ne,>> reve a cuwa A̱sulazuva. Reve azagbai'in o shiton nzuwulai n na aa yuwain.

14 Waru, diga a mantsa ma na a ɗangwa numu mo o'wo gwamna a̱tsuma̱ e iɗa ya Yahuda, a'wan kupa ne ejere a na a̱ ka̱ra̱i diga a̱tsuma̱ aa'wan o ushin o tsugono o Mogono Atazeze, hali a̱ tyo aa'wan mata'atsu ne ejere, ko a̱mu ko a̱za̱ a̱ va̱, ko za lo naa ushi yi akunda e ilyalya tsu za va gwamna shi. 15 Agba nan gwamna, a̱za̱ e elime a̱ va̱, a̱ shi ta̱ a zuwaa ama itana yu ume. Reve a̱ ushi e ekere e le makundatsu ma̱ shekel azurufa amunga ni ilyalya na̱ masayan. Agbashi e le fo e le'eshe ta̱ ama. Amma a̱mu n yuwan ne shi adama a na ma uwwusa wovon wa̱ A̱sula̱. 16 O una̱ u ndolo, n ka̱mbuwa̱ ta̱ ugbozu u va̱ o ulinga wu ukari u nda. Agbashi a̱ va̱ suru o ɓoloto ta̱ adama o ulinga'a, suru ntsu ko za tsula iɗa shi.

17 Waru aza a Yahuda na azagbain a ama ukpaku na̱ kupoton (150) a lyuwusa ta̱ oɓolo na̱ a̱mu, babu na aza a na a̱ ta̱wa̱i ya̱'a̱ tsu diga a nɗa n na n ri uka̱nda̱ruwu na̱ a̱tsu. 18 Apa cine a̱ tsu foɓoo a̱mu ilyalya urana suru. A tsu paɗa ta̱ a̱ba̱jini a nan a̱ ta̱ ni ikyon i ta̱li a na a la'ai ulobonu na̱ nton ma̱ a̱bunda̱. Uranu u ta̱ biti a̱tsuma̱ a rana kupa, a tsu ca ta̱ masayan ma̱ ina̱bi ma sa'avu pere. Amma suru na̱ ne n ushin akunda e ilyalya i na a tsu ca gwamna shi, adama a na a̱tsuma̱lima̱ a yuwan ta̱ ama a̱bunda̱.

19 A̱sula̱ a̱ va̱, vu cuwan vu roco a̱mu isa'ani, adama e ili i na n yuwayin ama a nda suru.