1 O urana wu ufaru a̱tsuma̱ o woto wa̱ cindere, reve ama suru o ɓoloto uba̱ta̱ uta̱ a̱tsuma̱ a̱ Urishelima uba̱ta̱ wa agalaci a na a̱ ri elime o Una̱ntsu u Mini. Reve a pati Ezura za vi iɗana u ta̱wa̱a̱ na Aatagada a̱ Wila̱ wa Musa, za na A̱sulazuva a zuwayi aza a Isra'ila.

2 Ɗaɗa Ezura ganu ta̱wa̱yi na Aatagada a̱ Wila̱ꞌa̱ elime o oɓolo ama'a, ali na̱ a̱ma̱ci na aza na suru a gura uwwa e reve ili i na aa dansa. 3 Reve Ezura isawan agalaci a na a̱ ri elime o Una̱ntsu u Mini. A̱vu u ɗe nu una̱ diga ili yu usana hali a̱ tyo urana a aci, elime ali na̱ a̱ma̱ci, na aza na suru a gura uwwa e reve ili i na aa dansa. Reve ama'a suru o polo atsuvu a̱ ɗesununa̱ va Aatagada a̱ Wila̱ꞌa̱ ulobonu.

4 Ezura za vi iɗana da̱na̱ ta̱ mishin a akpata o uga'an o ugbamu a na o foɓoi adama a̱ga̱nda̱ o ndolo. Reve ama a nda e isawan e eeɓele o usa'ani wa̱ yi, Matitiya na̱ Shema na̱ Anaya na̱ Uriya na̱ Hilikiya oɓolo na̱ Maseya. Pedaya na̱ Mishayel na̱ Malkiya na̱ Hashum na̱ Hashbadana na̱ Zakariya oɓolo na̱ Meshulam gba e isawan o ukere ugula̱.

5 Reve Ezura kpa̱tu'wa̱ aatagada'a elime ama'a suru adama a na u shi ta̱ mishin zuva ne ele, a na u kpa̱tu'wa̱ niyi, reve ama suru a̱ 'yon mishin. 6 Reve Ezura cuwa A̱sulazuva, A̱sula̱ a gbain.

Ɗaɗa ama'a suru a̱ usu, <<Amin! Amin!>> Waru a̱ 'ya̱sa̱n ekere e le zuva. Reve a̱ ka̱ɗa̱to urewesu u le a̱ tyo e iɗa, a yuwaan A̱sulazuva a̱ga̱nda̱.

7 Reve fo Jesuwa na̱ Bani na̱ Sherebiya na̱ Jamin na̱ Akub na̱ Shabeta na̱ Hodiya na̱ Maseya na̱ Kelita na̱ Azariya na̱ Jozaba na̱ Hanan oɓolo na̱ Pelaya nan Levi, reve a cuɗuwa ama wila̱'a̱. 8 E ɗe ta̱ a̱tsuma̱ a Aatagada a̱ Wila̱ wa̱ A̱sula̱, a alanga eteshe reve a ca urevu wa̱ yi adama ama a gura reve ili i na aa dansa.

9 Reve Nehemiya gwamna na̱ Ezura ganu za vi iɗana na̱ nan Levi aza a na a̱ shi a cuɗuwusa ama wila̱'a̱ a damma le, <<Urana u nda urana wa akiza u ɗa e ekere a̱ A̱sulazuva A̱sula̱ a̱ ɗu. She i yuwan a̱tsumola̱ngu ko gba i shon wan.>> Adama a na ama'a suru a̱ shon ta̱ a na a uwwai idanshi i Wila̱'a̱.

10 Reve Nehemiya damma le, <<Walai ili ya̱ ɗu i lyuwa ilyalya i sa'ani, i sowo ili yo oso i peme, a̱vu i lyunguwa̱ aza a na a̱ ri ni ili shi, adama a na ana'an urana wa akiza u ɗa e ekere a̱ A̱sulazuva a̱ tsu. She i yuwan a̱tsumola̱ngu wan, adama a na ma̱za̱nga̱ ma na i tsura̱i uba̱ta̱ wa̱ A̱sulazuva a̱ yi ɗa ucira u ɗu.>>

11 Reve nan Levi a uwa a̱tsuma̱ ama adama a na a ca le adanshi, a dansa, <<Votoyin ugbozu u ɗu, adama a na ana'an urana wa akiza u ɗa. She i yuwan a̱tsumola̱ngu wan.>>

12 Reve ama'a suru a̱ ka̱mba̱ a 'wa le a lyuwa o sowo na̱ ma̱za̱nga̱, reve fo e ne'eshe ilyalya e ekere aza a na a̱ ri ni i ɗa shi, adama a na a gura ta̱ reve ucuɗuwu wi ili i na e ɗewe nle nu una̱.

13 O urana we ire u woto'o, reve azagbain a 'wa suru, oɓolo na̱ nan ganu na̱ nan Levi o ɓoloto uba̱ta̱ wa Ezura za vi iɗana adama o rito idanshi i Wila̱'a̱. 14 Reve a cina uɗanu pe a̱ Wila̱'a̱ a na A̱sulazuva a zuwa ta̱ o una̱ wa Musa, a na aza a Isra'ila a̱ ta̱ da̱na̱ o ogodo a mantsa ma̱ A̱buki o woto we cindere. 15 Reve waru a zuwa a baza adanshi a nda a̱tsuma̱ e ilyuci i le suru na̱ a̱tsuma̱ a̱ Urishelima adansa, <<Uta̱i a̱ tyo e iɗa ya agaɗi reve i ta̱wa̱ ne eten a̱ zetun na̱ a̱za̱ a̱ zetun vu una na̱ a̱za̱ o uɗanga u murtil, na ashuwashuwa na̱ ɗanga va̱ a̱vu'un, na aa yuwan o ogodo, cine u ri uɗanu.>>

16 Ɗaɗa ama o uta̱i a̱ 'ya̱wa̱ a̱ ta̱wa̱a̱ ne ete'en reve a yuwaan aciyele ogodo, a̱ kwa̱'a̱ vu 'wa le na̱ a̱tsuma̱ agalaci a 'wa le na agalaci o u'wa wa̱ A̱sula̱, na agalaci a na a̱ ri elime o Una̱ntsu u Mini na̱ a̱tsuma̱ a agalaci a na a̱ ri elime o Una̱ntsu wa Ifiramu. 17 Reve oɓolo a aza a na suru a̱ ka̱mba̱i diga uba̱ta̱ u tsugbashi a yuwan ogodo a̱vu a̱ va̱la̱ pe. Diga a mantsa ma̱ Josuwa ulobo wa̱ Nun hali a̱ tyo a mantsa mo ndolo koto aza a Isra'ila a̱ shi a yuwan a̱buki a̱ yi ne tsundolo shi. A yuwan ta̱ ma̱za̱nga̱ lon.

18 Urana suru, diga o urana wu ufaru hali a̱ tyo o urana wu ukosu, Ezura ɗesu ta̱ nu una̱ a̱tsuma̱ a Aatagada a̱ Wila̱ wa̱ A̱sula̱. A yuwan ta̱ a̱buki'i hali rana cindere, reve o urana wa̱ kunla̱ a yuwan iɓolo i gbain cine a zuwai.