1 Apa nda ili i na i farai a mantsa ma Ahasuweru, za na yuwain tsugono vu pasu wu nɗa ukpaku nu ushin na̱ a̱za̱ e cindere (127) nna n remei diga Indiya a̱ tyo Kush. 2 A mantsa mo ndolo Mogono Ahasuweru yuwan ta̱ tsugono o ootogu o tsugono tsa̱ yi a̱tsuma̱ a ara'an a gbain a sa'ani va Susa, 3 a̱tsuma̱ a a'wan a ta'atsu o tsugono tsa̱ yi u yuwaan ta̱ azagbain a̱ yi oɓolo na agbashi a̱ yi a̱buki a gbain. Azagbain a̱ a̱soja a Pashiya na̱ Midiya na azagbain na̱ nan gwamna vu pasu vi iɗa a̱ shi ta̱ a̱ ma̱ka̱ka̱n ma̱ yi. 4 U yuwan ta̱ rana ukpaku na̱ kupakunla̱ (180) o rocosu a̱bunda̱ o utsuru u tsugono tsa̱ yi nu ulobonu u tsugbain tsa̱ yi. 5 Ana rana ndolo kotoi, a̱vu mogono ma yuwaan ama a na a̱ ri a̱tsuma̱ a ara'an a gbain a sa'ani va Susa suru, zagbain na̱ mawun a̱buki a rana cindere. A yuwan ta̱ a̱buki'i a̱ra̱ra̱ ukobu u mogono u na u ri na̱ yicu'wishin i yipa̱lu. 6 A̱ sa̱ga̱do ta̱ okoro a̱ u'ri no okoro a̱ sa'ani a̱ mini ma̱ bulu a̱ ka̱nda̱ruwa̱ a̱ra̱ra̱'a̱. A̱ nla̱ ta̱ amuna'a na amunga o okoro a sa'ani a̱ u'ri, a̱ nla̱ le ta̱ a atsura a na a yuwain na atali. Waru otogu a gbagbain a na a yuwain na̱ zinariya na̱ rumushili a̱ ta̱ lo o ukowo u na a̱ ru'wa̱i na atali a sa'ani e ikebe a na e she'ein na atali e ikebe o ro. 7 Reve a̱ ta̱wa̱a̱ ni ili yo oso masayan ma̱ ina̱bi o mukkoto n zinariya mu uruma icu'un icu'un. A̱vu a̱ ta̱wa̱ na̱ masayan ma̱ ina̱bi mo ngono a̱bunda̱ o una̱ wu utsuru u mogono. 8 O udammu u mogono a̱vu ko vuma a zuwaa a̱tyo a na woo sowo shi, adama a na mogono ma zuwa ta̱ azagbain o ukobu wa̱ yi a yuwaan koyan ɗa cine u cigai. 9 Egbere Vashiti fo u yuwaan ta̱ a̱ma̱ci o ukobu u tsugono wo Mogono Ahasuweru a̱buki. 10 O urana we cindere wa̱ a̱buki'i a mantsa ma na Mogono Ahasuweru maa uwwusa uyo'o u masayan ma̱ inabi, a̱vu u zuwa azagbain e cindere a na aa yuwusaan yi a̱ga̱nda̱, a̱yi Mehuma na̱ Bizita na̱ Habona na̱ Bigita na̱ Abagata na̱ Zeta na̱ Karka, 11 a̱ ta̱wa̱a̱ yi ne Egbere Vashiti no ookokolo a tsugbain wotowu a aaci a̱ yi. U ciga ta̱ u roco ama na azagbai'in ulobonu wa̱ yi, adama a na u tu ulobonu wa̱ a̱ka̱nla̱. 12 Agba ana a damma niyi ili i na mogono ma dammai, a̱vu Egbere Vashiti 'yuwan a̱ ta̱wa̱. Ɗaɗa mogono ma uwwai upan lon a̱vu okolo a̱ puna̱ yi lon. 13 Ɗaɗa u zamishi a̱sa̱la̱ a̱ a̱za̱ o urevu aza a na e revei mantsa, adama a na ne ɗa mogono ma tsu yuwan e ekere a za na suru e revei wila̱ lon nu uge'etosu. 14 Aza a na a̱ shi zuzu na̱ mogono ele ɗa, Karshena na̱ Sheta na̱ Adamata na̱ Tarshishi na̱ Meres na̱ Mashena na̱ Memukan. Ele ɗa azagbain e cindere a Pashiya na̱ Midiya aza a na a tsu gura ene mogono waru ele ɗa a̱ ri na̱ tsugbain tsa na tsa la'ai akapi a̱tsuma̱ o tsugono'o. 15 A̱vu mogono me ece, <<Cine aa yuwan na̱ Egbere Vashiti, cine wila̱ u dammai, a na u 'yuwain a yuwan tsutoni na̱ wila̱ u Mogono Ahasuweru u na azagbain o ulinga a̱ yi a damma niyi?>> 16 Reve Memukan usu a̱ ma̱ka̱ka̱n mo mogono na azagbain a̱ yi, <<Egbere Vashiti yuwan ta̱ unusu, waru mogono ma ɗa goon u yuwayin shi amma hali na azagbain suru na ama o upasu u tsugono u Mogono Ahasuweru suru. 17 Adama a na a̱ma̱ci suru a ta uwwa ili i na u yuwain, reve u zuwa le a tara ali e le ili ya̱ a̱ɓula̱ shi reve waru o goro le, adama a na a ta damma, <Mogono Ahasuweru ma zuwa ta̱ a̱ ta̱wa̱a̱ na̱ Egbere Vashiti a̱ ma̱ka̱ka̱n ma̱ yi, agba u 'yuwan ta̱.> 18 Ana'an nda a̱ma̱ci a azagbain a Pashiya na̱ Midiya a ta uwwa ili i na u yuwain a̱vu gba a̱ usu azagbain o mogono suru cine u yuwain. Ili i nda i ta̱ ta̱wa̱a̱ nu ulambu u tsutoni na̱ nla̱ngi lon. 19 Adama o ndolo na̱ mogono ma̱ usu, lyawa u zuwa wila̱, a̱vu a ɗana yi a̱tsuma̱ a̱ wila̱ wa Pashiya na̱ Midiya u na aa vadala shi, a na Vashiti a̱a̱ da̱shi rawa a̱ ma̱ka̱ka̱n mo Mogono Ahasuweru shi. Waru lyawa mogono ma ca za ro na la'a niyi uba̱ta̱ u tsugbain tsa̱ yi. 20 Ne ɗa na aa yuwan ulingi u wila̱ u mogono a̱tsuma̱ a washin wi iɗa i tsugono tsa̱ yi suru, a̱ma̱ci'i suru a ta ca ali e le tsugbain diga a za gbain a̱ tyo a za ke'en.>> 21 Mogono na azagbain a̱ yi a uwwa ta̱ uyo'o wa̱ a̱sa̱la̱ a nda, ɗaɗa mogono ma yuwain cine Memukan dammai. 22 A̱vu u lyungu ikaka a̱ tyo uba̱ta̱ u tsugono tsi iɗa'a suru, upasu suru na̱ cu'un vi iɗana va̱ yi na ama suru na̱ cu'un ve elentsu e le, a na vali suru wo o'wo zagbain vu u'wa va̱ yi.