1 O urana u ndolo Mogono Ahasuweru ma ca ta̱ Egbere Esta u'wa wa Haman, ma'yuwatan ma aza a Yahuda. A̱vu Modekaya ta̱wa̱ a̱ ma̱ka̱ka̱n mo mogono, adama a na Esta damma yi ta̱ ɗe cine a̱ ri. 2 Reve mogono mo foɗo makawani mo urotsu ma na ma̱ ri a aakatsu a̱ yi, za na u usai o ukere wa Haman, a̱vu u ca Modekaya. Reve Esta zuwa yi u da̱na̱ a̱ ka̱lyuwusa̱a̱ yi u'wa u gbain. 3 A̱vu Esta da̱shi pati mogono, u riya̱ a ana a̱ yi u da̱na̱ a̱ mesun. U pati yi ta̱ u zuwaa ifoɓi iwuya i na Haman vuma va Aga shi foɓoi utyo, ifoɓi i na u shi u yuwain a̱ tyo uba̱ta̱ wa aza a Yahuda. 4 A̱vu mogono ma cananaa Esta aɗanga a zinariya, ɗaɗa Esta 'yoyin wi isawain a̱ ma̱ka̱ka̱n ma̱ yi. 5 Reve u damma, <<Na̱ mogono ma̱ shi a̱ usu, n tsura̱ isa'ani e ekere a̱ wu, mogono na̱ ve ene wuntsaa ta̱, na̱ vaa uwwusa uyo'o u va̱, lyawa a ɗana mepepelime tsa̱ra̱ a̱ lungusa̱ ili i na Haman mawun ma Hamedata vuma va Aga ɗanai a̱vu u lyawa lo tsa̱ra̱ o una aza a Yahuda a̱tsuma̱ a pasu tsugono tso mogono suru. 6 Cine maa gura kaɓa asuvu me ene cu'un va̱ a̱tsuma̱lima̱ a na ama a̱ va̱ oo sowuso? Cine maa gura kaɓa asuvu me ene cine oo kototosu mmaci n va̱?>> 7 A̱vu mogono Ahasuweru damma Egbere Esta oɓolo na̱ Modekaya vuma va Yahuda, <<Amayun, n ca ta̱ Esta u'wa wa Haman, waru a̱ telyuwetyo ta̱ Haman ɗe o uɗanga wu uga'an, adama a na u da̱na̱ ta̱ ni ifoɓi i na woo kototo aza a Yahuda. 8 Gogo vu ɗana wila̱ u ro na ala o mogono o una̱ wa aza a Yahuda za na ve enei u la'ai ulobonu e ekere a̱ wu. Reve vu zuwaa yi urotsu na̱ makawani mo urotsu mo mogono, adama a na babu ili i na a ɗanai na ala o mogono a̱vu a̱ kpa̱to yi nu urotsu u makawani u mogono u na aa gura vadala.>> 9 A jima shi ɗaɗa e ɗeyi aza a na a yuwusaan mogono iɗana. Ili i ndolo i fara ta̱ o urana wu ushin na aza a ta'atsu o woto wa ta'atsu, a̱yi ɗa woto wa Sivan. A̱vu aza a na a yuwusan iɗana a ɗana ili i na Modekaya dammai suru a̱ tyo a aza a Yahuda. Reve waru a̱ lyungu wila̱ a̱ tyo ya azagbain a nɗa'a oɓolo na̱ nan gwamna, na azagbain a pasu pasu vu nɗa ukpaku nu ushin na̱ a̱za̱ e cindere (127), diga Indiya a̱ tyo Kush. Reve a vadala a̱ tyo e elentsu na̱ o ure wi iɗana i na a yuwusan ulinga na̱ a̱yi o tsugono tsi iɗa'a. Reve fo a ɗanaa aza a Yahuda o ure wi iɗana i le oɓolo ne elentsu e le. 10 Reve Modekaya zuwa a ɗana mepepelime na aala o mogono Ahasuweru, a̱vu a zuwaa mepepelime'e urotsu na̱ makawani mo urotsu mo mogono. A̱vu u lyungu mpepelime'e e ekere aza a na a̱ tsu tarasa ikaka akumbi e ido yi ilaɗi aza a na a matsain adama a̱ cu'un vu ulinga ndolo. 11 Adanshi o mogono a ca ta̱ aza a Yahuda ucira u na o ɓolo aci tsa̱ra̱ e geshe aciyele. A ca le ta̱ ucira u na aa gura una, a paɗa, o kototo iɗa ko upasu wi iɗa i na suru i ta̱wa̱a̱ nle nu uvon na̱ a̱ma̱ci e le na̱ muwun n le. A̱vu waru a ca le ucira u na a usa itana yi n'yuwatan n le. 12 Urana u na a zuwai na a yuwan ili i ndolo a nɗa n tsugono tsa Ahasuweru suru a̱yi ɗa o urana wa kupa na aza a ta'atsu o woto wa kupa ne ejere, woto wa Ada. 13 Ili i na a ɗanai a̱tsuma̱ a̱ mepepelime ma nda a zuwa yi ta̱ wo o'wo wila̱ a pasu vi iɗa suru waru a damma ama a nɗa suru. A yuwan yi ta̱ tsa̱ra̱ aza a Yahuda a yuwan ifoɓi a tsupa ili i na n'yuwatan n le n yuwaan nle. 14 Reve ele nlingata a kumba ido i mogono aza a na a gurai ilaɗi. Reve o uta̱ ni ilaɗi, adama a na wila̱ u mogono u zuwa le ta̱ a yuwan yi ni ilaɗi. Wila̱ꞌa̱ a saala yi ta̱ uba̱ta̱ u na u ri nu uɓaɓu wu ucira a̱ lyuci va Susa. 15 Modekaya uta̱ ta̱ uba̱ta̱ u mogono wotowu nu utugu nu uga'an u tsugono wo okoro u mini ma̱ bulu na̱ mini ma̱ uri, oɓolo na̱ a̱ba̱jini o ookokolo a zinariya, nu utugu wu uga'an u na a yuwain na̱ a̱punda̱ o okoro a sa'ani ushili da̱n da̱n. A̱vu a̱ba̱jini a̱ lyuci a̱ Susa o ɓoso na̱ ma̱za̱nga̱. 16 Uba̱ta̱ wa aza a Yahuda mantsa ma̱ ma̱za̱nga̱ ma ɗa, na̱ mere na̱ tsugbain. 17 A̱tsuma̱ o upasu wi iɗa biti na̱ a̱tsuma̱ a̱ lyuci gbain suru, uba̱ta̱ u na udammu na̱ wila̱ u mogono u rawai biti a yuwusan ta̱ ma̱za̱nga̱ na̱ mere a̱tsuma̱ aza a Yahuda, na̱ a̱buki na̱ wivuwun. Ama na̱ a̱bunda̱ a̱tsuma̱ a nɗa n ro o'wo aza a Yahuda adama a na wovon wa aza a Yahuda u reme le ta̱.