1 O urana wa ta'atsu a̱vu Esta oto a̱tugu a tsugbain tsa̱ yi, a̱vu wi isawan o ukowo wa̱ a̱tsuma̱ wu ukobu u mogono, elime o usaa u mogono. Mogono ma̱ shi ta̱ nden o ootogu o tsugono tsa̱ yi a̱tsuma̱ o usaa'a, a̱ nka̱la̱la̱i nu una̱ntsu wu ukobu u mogono'o. 2 Ana we enei Egbere Esta mishin a̱tsuma̱ o ukobu'u, wu uwwa ta̱ uyo'o wa̱ yi, reve u cananaa yi aaɗanga a zinariya va̱ yi a na a̱ ri o ukere wa̱ yi. Reve Esta rawa zuzu a̱vu u ju'wa̱n aaci a aaɗanga'a.

3 A̱vu mogono me ece yi, <<Nye vu cigai Egbere Esta? Nye i ɗa ipati ya̱ wu? A ta ca wu a̱yi ko nu u shi ta̱ u rawa uɓatsulai u tsugono a ta ca wu a̱yi.>>

4 A̱vu Esta usu, <<Nu u yo'ono mogono, lyawa mogono na̱ Haman a̱ ta̱wa̱ uba̱ta̱ wa̱ a̱buki a na n foɓoyi mogono ana'an.>>

5 A̱vu mogono ma damma, <<Jika̱i i ta̱wa̱ na̱ Haman, adama tsu yuwan ili i na Esta dammai.>> Ɗaɗa mogono na̱ Haman a̱ 'ya̱wa̱i uba̱ta̱ wa̱ a̱buki a na Esta foɓoi.

6 Reve a mantsa ma na a̱ ri o oso a masayan ma̱ inabi, a̱vu mogono me ece Esta, <<Nye i ɗa vu cigai? A ta ca wu a̱yi. Waru nye i ɗa ipati ya̱ wu? Ko nu uɓatsulai u tsugono tsa ɗa, a ta ca wu a̱yi.>> 7 Reve Esta usu, <<Ili i na maa zama ni ipati i va̱ a̱yi ɗa: 8 Na̱ n tsura̱ isa'ani e ekere o mogono, waru nu u yo'ono mogono u yuwaan mu ili i na maa zama a̱vu waru u usu ipati i va̱, lyawa mogono na̱ Haman a̱ ta̱wa̱ nfa'an uba̱ta̱ wa̱ a̱buki a na moo foɓoo le, ɗaɗa ma̱a̱ usu yeci i mogono.>>

9 Urana u ndolo reve Haman uta̱ na̱ ma̱za̱nga̱ nu uyo'o wa asuvu. Amma a na we enei Modekaya lo o una̱ntsu u mogono, agba u 'yon mishin shi ko u je'en lipu a̱ ma̱ka̱ka̱n ma̱ yi shi, a̱vu u shiwan nu upan wa Modekaya. 10 Suru na̱ ne reve u kaɓa asuvu a̱ yi, a̱vu u ka̱ra̱ a̱ tyo o u'wa. Reve u lyunguwa̱ n'utsa̱ ma̱ yi na̱ ka va̱ yi Zeresh a̱ ta̱wa̱. 11 A̱vu u yuwaan le afalu a̱ a̱bunda̱ o utsuru wa̱ yi, na̱ muwun ma̱ a̱bunda̱ ma̱ yi, oɓolo na̱ tsugbain tsa na mogono ma ca niyi suru, na̱ cine mogono ma̱ 'ya̱sa̱n niyi zuva ula'awu na azagbain o mogono suru. 12 Reve waru u damma, <<Hali gba Egbere Esta u lyawa ko vuma 'ya̱wa̱ oɓolo na̱ mogono uba̱ta̱ wa̱ a̱buki a na u foɓoi shi, she a̱mu a̱ nde'en. Nfa'an waru u ba̱nuwisa mu ta̱ oɓolo na̱ mogono. 13 Agba ili i nda suru a rawa mu shi, nna̱ hali me inda Modekaya za va Yahuda ndolo nden o una̱ntsu u mogono.>>

14 Reve ka va̱ yi Zeresh na̱ n'utsa̱ ma̱ yi suru a damma yi, <<Zuwa a̱ 'ya̱sa̱n akpata a na a tsu vara za vu unusu e cembe cembe o uga'an ana kupocindere no ozo o ton, reve nu usana vu damma mogono u zuwa a̱ ta̱lyuwa̱to ɗe Modekaya. Reve vu ka̱ra̱ a̱ 'ya̱wa̱ oɓolo na̱ mogono uba̱ta̱ wa̱ a̱buki'i na̱ ma̱za̱nga̱.>> A̱sa̱la̱ a nda o yo'ono ta̱ Haman, ɗaɗa u zuwa a varai akpata'a.