1 Ɗaɗa mogono oɓolo na̱ Haman a uwai uba̱ta̱ wa̱ a̱buki oɓolo na̱ Egbere Esta. 2 Ele a̱tsuma̱ o oso a masayan o urana we ire, reve mogono me ecishe, <<Egbere Esta, nye i ɗa ipati ya̱ wu? A ta ca wu a̱yi. Nye i ɗa vu cigai? Ko nu u shi ta̱ u rawa uɓatsulai u tsugono a ta ca wu a̱yi.>> 3 Reve Egbere Esta usu, <<Na̱ n tsura̱ isa'ani ya̱'a̱ wu, mogono na̱ vu usu, nnu u yo'ono ta̱ mogono, vu lyawa mu wuma. A̱yi ɗa ipati i va̱. Vu lyawa ama a̱ va̱ wuma, a̱yi ɗa ipati i va̱. 4 Adama a na a wina mu ta̱ na ama a̱ va̱, tsa̱ra̱ o kototo tsu o una tsu e icina na̱ a̱tsu. A damma a wina tsu ta̱ tso o'wo agbashi ali na̱ a̱ma̱ci, n shi a yuwan adanshi shi, adama a na a̱tsuma̱lima̱'a̱ a rawa addama a na mogono maa uwa shi.>> 5 <<Zane ɗa aa yuwan cu'un ndolo?>> Ne ɗa Mogono Ahasuweru ecei Egbere Esta. <<Zane ɗa a kawan yuwan cu'un vi ili i ndolo?>> 6 Reve Esta usu, <<Apa ma'yuwatan ma̱ tsu Haman vi iwuya nda.>> Reve Haman uwwa wovon a̱ ma̱ka̱ka̱n mo mogono na̱ a̱ ma̱ka̱ka̱n me egbere. 7 Reve mogono ma̱ 'yon nu upan, u lyawa masayan ma̱ yi a̱vu u uwa uba̱ta̱ u na a̱ shuwa̱i a̱vu'un a̱ yipa̱lu. Amma ana Haman revei mogono mo koto ta̱ ɗe ifoɓi ya̱ yi e ili i na u cigai u yuwan, reve wi isawan a̱ca̱pa̱ tsa̱ra̱ u pati Egbere Esta tsa̱ra̱ a lyawa yi wuma. 8 Ana mogono ma̱ ka̱mba̱i uba̱ta̱ u na a̱ shuwa̱i a̱vu'un a̱ yipa̱lu, a̱ tyo uba̱ta̱ u na u tsu lyuwa ilyalya, reve we ene Haman riya̱ a̱ ma̱ka̱ka̱n mo ootogu o uga'an uba̱ta̱ u na Esta ri. Ana mogono me ene niyi a̱vu u damma, <<U ta yuwan ivama a̱ ma̱ka̱ka̱n ma̱ va̱ o u'wa u va̱?>> Mogono o koto adanshi, a̱vu a pala esu a Haman. 9 A̱vu Habona, za ta̱ a̱tsuma̱ a azagbain a na a yuwusaan mogono ulinga damma, <<Haman 'ya̱sa̱n ta̱ ɗe aɗanga o uga'an a na a rawai ana kupocindere no ozo o ton mishin zuzu nu u'wa wa̱ yi. U foɓo yi ta̱ adama a Modekaya, za na yuwain adanshi tsa̱ra̱ a kamba mogono.>> Ɗaɗa mogono ma dammai, <<Ta̱telyuwetyo niyi zuva va̱ yi a̱ tyo e iɗa!>> 10 Ɗaɗa a̱ telyuwetyo niyi o uɗanga wu uga'an u na u foɓoyi Modekaya. Ɗaɗa upan u mogono u voyin.