1 Ana ili i nda i kotoi, Mogono Ahasuweru ma ca ta̱ Haman ulobo wa Hamedata za va Agag tsugbain, a̱vu u 'ya̱sa̱n yi u ca yi tsugbain tsa na tsa la'ai za va koyan a̱tsuma̱ azagbain a̱ yi a na a buwai. 2 Azagbain o ukobu u tsugono a na a̱ ri o una̱ntsu u mogono suru a̱ kingyo a ca Haman tsugbain, adama a na ne ɗa mogono ma zuwai a yuwan adama a̱ yi. Agba Modekaya kingyo ko u ca yi tsugbain shi. 3 Reve azagbain o ukobu u tsugono a na a̱ ri o una̱ntsu'u e ece Modekaya, <<Adama a̱ nye vu 'yuwain a̱ kuru ili i na mogono ma dammai?>> 4 Reve e reme a yuwusaan yi adanshi usana wa̱ A̱sula̱ suru agba a̱vu u 'yuwan a uwwa le. Ɗaɗa a dammai Haman adama a̱ yi, adama e ene ko ili i na Modekaya aa yuwusan u ta shiwan, adama a na u damma le ta̱ a̱yi za va Yahuda ɗa. 5 Ana Haman e enei Modekaya tsu kingyo shi ko u ca yi tsugbain shi, u shiwan ta̱ nu upan. 6 Ana u ta̱wa̱ u revei vuma vi iɗa na Modekaya ri, reve u tara woo una Modekaya a̱ nde'en shi. A̱vu u zami ure u na woo kototo aza a Yahuda ama a Modekaya, a̱tsuma̱ e iɗa i tsugono tsa Ahasuweru suru. 7 A̱tsuma̱ o woto wu ufaru, woto wa Nisan a̱tsuma̱ a aa'wan a kupa ne ejere o tsugono tsa Mogono Ahasuweru, a zuwa ta̱ agita, (a yuwain anca'wa) a̱ ma̱ka̱ka̱n ma Haman adama a ɗangwa urana na̱ woto. Reve anca'wa'a a̱ riya̱ o woto wa kupa ne ejere, woto wa Ada. 8 Reve Haman damma Mogono Ahasuweru, <<Icu'un ya ama o ro a̱ ta̱ pa ubetu'wu waru uja̱mba̱ru a̱tsuma̱ a ama a̱tsuma̱ a pasu vi iɗa i tsugono tsa̱ wu suru. Agadu e le a tawa ta̱ ko'o na aza a akapi a ama a na a buwai agba a̱a̱ kurusu wila̱ u mogono shi. Adama o ndolo u ri nu urana e ekere o mogono ma yuwaan le ankuri shi. 9 Nu u lobono ta̱ mogono, lyawa a zuwa wila̱ u na oo kototo le, a̱mu gba n ta ca ukunzuwu u azurufa ukpakukupa kupa (10,000) e ekere a̱ a̱za̱ o ulinga wi ikebe i mogono a zuwa o uzuwata u mogono.>> 10 Adama o ndolo a̱vu mogono mo foɗo makawani mo urotsu wu ukere a aakatsu a̱ yi u ca Haman ulobo wa Hamedata za va Aga, ma'yuwatan ma aza a Yahuda. 11 <<A̱vu mogono ma damma Haman, <Ikebeꞌe na ama'a suru a ca wu ele ta̱ na vaa yuwan ne ele ili i na vu cigai.> >> 12 Reve e ɗe munlu m mogono o urana wa kupa na aza a ta'atsu u woto wu ufaru. Reve a ɗanaa azagbain e iɗa o mogono na̱ nan gwamna vu pasu vu uba̱ta̱ u tsugono suru na azagbain a ama koko'o ili i na Haman zuwai, a̱tsuma̱ e mepepelime mo upasu biti na̱ a̱tsuma̱ e elentsu a ama suru. A ɗana ta̱ ili'i na aala o Mogono Ahasuweru, a̱vu a zuwa urotsu na̱ makawani mo uzuwu wu ukere ma̱ yi. 13 A̱vu a ca aza a na a tsu yuwan uro shi mepepelime a̱ tyo pasu tsugono tso mogono nu udammu o kototo o una waru a tasa aza a Yahuda suru, zagbain na̱ mawun, na̱ a̱ma̱ci na̱ muwun, a̱tsuma̱ o urana u ta̱, urana wa kupa na aza a ta'atsu u woto wa kupa ne ejere, woto wa Ada, waru a̱ pura̱ itana i le. 14 Ili i na i ri pe uɗanu'u a ta zuwa yi wo o'wo wila̱ upasu wu uba̱ta̱ u tsugono suru a̱vu a yuwan ulingi wa̱ yi uba̱ta̱ wa ama suru, adama a̱ da̱na̱ ufoɓu adama o urana u ndolo. 15 O udammu u mogono reve aza a na a tsu yuwan uro shi o uta̱shi, reve e revetyo wila̱ꞌa̱ a̱tsuma̱ a̱ lyuci gbain va Susa fo. Reve Mogono na̱ Haman a̱ da̱nu e reme oso, lyuci va Susa gba riya̱ ta̱ a̱tsuma̱ o urupulu.