1 Ana ili i nda i kotoi ana upan u Mogono Ahasuweru u voyin, u cuwan ta̱ na̱ Vashiti ni ili i na u yuwain na̱ cu'un wila̱ u na u zuwai a aci a̱ yi. 2 Reve aza a na aa yuwusaan mogono a̱ga̱nda̱ a damma, <<Lyawa a zamiya mogono esheli a sa'ani a na koto e revei ali shi. 3 Lyawa mogono ma zuwa ajiya upasu wi iɗa suru wu uba̱ta̱ u tsugbain tsa̱ yi a̱ ta̱wa̱a̱ ne esheli a sa'ani a na koto e revei ali shi suru a̱tsuma̱ o u'wa u mogono a̱tsuma̱ a ara'an a gbain a sa'ani a̱ lyuci va Susa. Lyawa a zuwa le o ukere wa Hegai, zagbain vu ulinga vu u'wa u mogono za na tsu ka̱lyuwusa̱ a̱ma̱ci o mogono, reve a ca le itana i yisukumishi i na aa lapula lipu le. 4 Reve usheli u na mogono me enei u lobono ta̱ wo o'wo egbere o una̱ wa Vashiti.>> A̱sa̱la̱ a nda o yo'ono ta̱ mogono a̱vu gba u yuwan ne. 5 A mantsa mo ndolo, vuma va Yahuda ro da̱na̱ ta̱ a̱tsuma̱ a̱ lyuci gbain va Susa za na a̱ tsu ɗe Modekaya ulobo wa Jayir, ulobo wa Shimeyi, ulobo wa̱ Kish o ugundo wa Banyami. 6 Za na a̱ pura̱i diga Urishelima a̱ 'ya̱wa̱ ugana a̱tsuma̱ a aza a na a̱ pura̱i oɓolo na̱ Yekoniya mogono ma Yahuda, aza a na Mogono Nebukanaza pura̱i. 7 Modekaya shi ta̱ a̱ kungwatosu usheli u mawun ma a̱na̱wun ma dada va̱ yi, za na a̱ tsu ɗe Esta waru za na a̱ tsu ɗe Hadasa. U shi u buwa na̱ dada ko mma shi. Usheli u nda u shi ta̱ nu uruma u sa'ani waru u shi ta̱ ulobonu wa̱ a̱ka̱nla̱. Ana dada va̱ yi na̱ mma va̱ yi kuwa̱i, a̱vu Modekaya tara yi tso usheli wa̱ yi. 8 Ana a yuwain ulingi wi ili i na mogono ma zuwai, a̱ ta̱wa̱ ta̱ ne esheli a̱ a̱bunda̱ a̱tsuma̱ a̱ lyuci gbain va Susa a̱vu a zuwa le o ukere wa Hegai. A ta̱wa̱ ta̱ fo na̱ Esta o ukobu u mogono, a̱vu a zuwa yi o ukere wa Hegai, za na a̱a̱ ka̱lyuwusa̱ u'wa u na a̱ma̱ci o mogono a̱ ri. 9 A̱vu gba Esta yo'onoto yi a̱suvu a̱vu u tsura̱ isa'ani e ekere a̱ yi. A̱vu u cashi niyi itana i yisukumishi i na yaa zuwa lipu va̱ yi lobono ni ilyalya la̱nga̱. A̱vu u zuwaa yi esheli e cindere a na a ɗangwai la̱nga̱ diga o ukobu u mogono. A̱vu u tara yi oɓolo ne esheli'i a̱ tyo uba̱ta̱ u na u la'ai ulobonu a̱tsuma̱ o u'wa u mogono. 10 Esta koto shi pa̱lu'wa̱ iɗa ya̱ yi nu ugundo wa̱ yi shi, adama a na Modekaya rono yi ta̱ atsuvu she u damma wan. 11 Uranu suru Modekaya tsu garasa ta̱ zuzu nu ukobu u na a tsu zuwa a̱ma̱ci o mogono adama u reve cine Esta ri ni ili i na yaa farasa na̱ a̱yi. 12 Agba kafu usheli u uwa uba̱ta̱ u Mogono Ahasuweru, she nu u koto woto kupa ne ejere a lapulusa lipu va̱ yi ni itana i yisukumishi i lipu i na a tsu ca a̱ma̱ci, woto ta̱li na̱ mani'in ma mur, woto ta̱li waru na aturare ni itana i yisukumishi. 13 Mantsa ma na usheli waa uwa uba̱ta̱ u mogono, a tsu ca yi ta̱ ili i na u cigai biti na waa tara a uwa o ukobu u mogono diga o u'wa u na a tsu zuwa a̱ma̱ci'i. 14 Nu ulivu u tsu uwa ta̱ o u'wa u mogono reve nu usana u ka̱mba̱ upasu we ire u na a̱ma̱ci o mogono a̱ ri, uba̱ta̱ u na Sha'ashaga ri a̱ ka̱lyuwusa̱ le zagbain vu u'wa u mogono za na a̱a̱ ka̱lyuwusa̱ a̱ma̱ci a̱ nge'en o mogono. Usheli'i wa̱a̱ ka̱mba̱ uba̱ta̱ u mogono waru shi she de na̱ mogono ma uwwa uyo'o wa̱ yi a̱vu u ɗe yi na aala a̱ yi. 15 Ana mantsa ma rawai ana Esta (usheli wa Abihali usheli u mawun ma̱ a̱na̱wun ma dada va̱ yi u na Modekaya tarai wo o'woi tsa mawun ma̱ yi) wa̱a̱ 'ya̱wa̱ uba̱ta̱ u mogono, u pati ili i ro shi she ili i na Hegai zagbain vu ulinga vu u'wa u mogono za na a̱a̱ ka̱lyuwusa̱ uba̱ta̱ u na a̱ma̱ci o mogono a̱ ri dammai. A̱vu Esta tsura̱ ica e ekere a za na ene niyi suru. 16 A tara ta̱ Esta a̱ tyo uba̱ta̱ u Mogono Ahasuweru a uwa o ukobu u tsugono tsa̱ yi o woto wa kupa, woto wa Tebet, a̱tsuma̱ a aa'wan e cindere o tsugono tsa̱ yi. 17 A̱vu gba mogono ma la'a ciga Esta na akapi a̱ a̱ma̱ci a na a buwai. A̱vu u tsura̱ isa'ani ni icigi i na i la'ai akapi e esheli a na koto e reve ali shi a na a buwai. Adama o ndolo reve wo oto yi ookokolo o tsugono a aaci a̱vu wo o'woto yi egbere o una̱ wa Vashiti. 18 Reve mogono ma yuwaan azagbain na̱ mbara ma̱ yi suru a̱buki a gbain adama a Esta. A̱vu u zuwa wivuwun upasu wi iɗa u tsugbain tsa̱ yi suru, a̱vu u ca ne'e o una̱ wa̱ a̱bunda̱ o utsuru u tsugono tsa̱ yi. 19 Ana o ɓolotoi esheli'i we ire, Modekaya shi ta̱ a̱ da̱nusu o una̱ntsu u mogono. 20 Agba Esta koto shi pa̱lu'wa̱ ugundo wa̱ yi ni iɗa ya̱ shi cine Modekaya damma niyi u yuwan, adama a na u buwa ta̱ a̱ kurusu ili i na Modekaya dammai tsa mantsa ma na u da̱na̱i a kungwatosu yi. 21 A mantsa ma na Modekaya ri a̱ da̱nusu o una̱ntsu u mogono, a̱vu azagbain a̱ yi e re Bigitana na̱ Teresh aza a na a̱ pirishi una̱ntsu wu u'wa u mogono a yuwan upan na̱ Mogono Ahasuweru hali o foɓo cine o una yi. 22 Agba Modekaya uwwa ta̱ aɗa e ifoɓi'i a̱vu u damma Egbere Esta. A̱vu Esta gba'a damma mogono'o, waru u roco ta̱ a na Modekaya ɗa damma niyi. 23 Ana o toniyi adanshi'i a̱vu i cina adanshi'i amayun a ɗa, a̱ ta̱lyuwa̱to ta̱ azagbain e re'e a akpata a na a tsu una ama. Reve gba a ɗana ili i nda suru a̱tsuma̱ a aatagada o ucuwusan a̱ ma̱ka̱ka̱n mo mogono'o.