1 Ana Modekaya uwwai ili i na a yuwain suru, wu kara a̱tugu a̱ yi a̱vu wo oto akashi a̱vu u tsun okomo a aaci. Reve wu uta̱ u uwa a̱tsuma̱ a̱ lyuci a yisali na̱ yorori babu uyo'o. 2 Agba o una̱ntsu u mogono ma ɗa goon u gura rawai adama a na za na suru otoi akashi a tsu lyawa yi u uwa pe shi. 3 A̱tsuma̱ o upasu wi iɗa suru, uba̱ta̱ u na suru ili i na mogono ma zuwai na̱ wila̱ wa̱ yi u rawai, aza a Yahuda a yuwan ta̱ nden ma̱ a̱tsumola̱ngu, a yuwan ta̱ akuli e mesun na̱ yorori. Na̱ a̱bunda̱ o von ta̱ wotowu na akashi a̱tsuma̱ o okomo. 4 Ana esheli a na a yuwusaan Esta ulinga na azagbain a na a yuwusan ulinga o u'wa u mogono a̱ ta̱wa̱ a damma niyi aɗa a Modekaya u dama ta̱ lon. A̱vu u lyunguwa̱ yi na̱ a̱tugu a na woo oto o una̱ wa akashi, agba a̱vu u 'yuwan a ushi. 5 Ɗaɗa Esta ɗeyi Hatak, vuma ta̱ a̱tsuma̱ azagbai'in za na a zuwai u yuwusaan Esta ulinga. A̱vu u zuwa yi u 'ya̱wa̱ ya Modekaya u reve ili i na yaa damatosu yi ili i na i zuwai waa yuwusan ne. 6 Ɗaɗa Hatak 'ya̱wa̱i ya̱ Modekaya uba̱ta̱ u na o tsu ɓolotosu u lyuci elime o una̱ntsu wu ukobu u mogono. 7 A̱vu gba Modekaya damma yi ili i na suru i cina niyi, na̱ a̱bunda̱ e ikebe i na Haman yuwain nzuwulai n na waa tsupa a̱tsuma̱ o uzuwata u tsugono tsoyi adama o ukototosu wa aza a Yahuda. 8 Waru Modekaya ca ta̱ Hatak wila̱ wu uɗanu'u za na o uta̱yi a̱tsuma̱ a Susa adama o kototo aza a Yahuda. U damma yi ta̱ u roco Esta a̱vu waru u cuɗuwa yi ili i na i ri pe, a̱vu u zuwa yi u 'ya̱wa̱ uba̱ta̱ u mogono u pati isa'ani ya̱ yi adama a ama a̱ yi. 9 A̱vu Hatak ka̱mba̱ u damma Esta ili i na Modekaya dammai. 10 A̱vu gba Esta zuwa yi u damma Modekaya, 11 <<Azagbain o mogono suru hali gba na ama o upasu u tsugono e reve ta̱ a na vali ko ka na suru rawai a̱ ma̱ka̱ka̱n mo mogono a̱tsuma̱ o ukobu wa̱ a̱tsuma̱ agba koto mogono me ɗe yi shi wila̱ u ta̱ u ɗa u ri lo, a na a̱ to una yi. She de na̱ mogono ma cananaa yi aaɗanga a zinariya a̱ yi a̱vu u da̱na̱ wuma. Agba a̱yi ɗa nda a yuwan ta̱ ɗe ayin mata'atsu koto mogono ma̱ da̱shi ɗe mu n 'ya̱wa̱ uba̱ta̱ wa̱ yi shi.>> 12 Ana a dammai Modekaya ili i na Esta dammai, 13 A̱vu u damma a̱ ka̱mbuwa̱ Esta ni ikaka i nda, <<She vu yuwan majiyan o una̱ u na vu ri o u'wa u mogono a̱tsuma̱ a aza a Yahuda a̱vu a̱ nde'en ɗa vaa la'a wan. 14 Adama a na na̱ vo o'wo kpen a mantsa ma nda, ikambi ni iwawi adama a aza a Yahuda i ta gura ta̱wa̱ diga uba̱ta̱ u ro, reve a̱vu gba nu u'wa wa dada va̱ wu i koto. Waru zane revei vu tsura̱ ta̱ uba̱ta̱ u tsugbain o ukobu u mogono adama a̱ cu'un mantsa ma nda?>> 15 Reve Esta lyunguwa̱ Modekaya nu ususu u nda, 16 <<Ya̱wa̱ vu ɓoloto aza a Yahuda suru aza a na a̱ ri a̱tsuma̱ a Susa, a̱vu i yuwan akuli adama a̱ va̱. She i lyuwa ko i sowo wan rana ta'atsu ayin nu urana. A̱mu na agbashi a̱ va̱ esheli tsu ta yuwan ne fo. Na a yuwan, ko na wo o'woi makuɗa ma̱ wila̱, n ta uwa uba̱ta̱ u mogono, reve gba na̱ n kuwa̱ n kuwa̱ ma ɗa.>> 17 Ɗaɗa gba Modekaya 'ya̱wa̱ u yuwain cine Esta zuwai a yuwan.