1 A̱tsuma̱ a ayin o ndolo mogono ma gura lantsa shi. Reve u damma a̱ ta̱wa̱ na aatagada o ucuwusan, aatagada a na a ɗanai ili i na i farasai. A̱vu e ɗewe yi nu una̱. 2 A̱vu a cina pe a̱tsuma̱ a aatagada'a cine Modekaya uta̱yi ili yu usokowu wa Bigitana na̱ Teresh, azagbain o mogono e re aza a na a̱ pirishiyi una̱ntsu, aza a na o ɓoloi aci o una mogono Ahasuweru. 3 Reve mogono me ece, <<Cu'un tsugbain na atsupu a̱ ne a ɗa u tsura̱i adama a nda?>> Reve aza a na a yuwusaan yi ulinga a damma, <<Babu ili i na a yuwaan niyi ɗe.>> 4 Ɗaɗa mogono ma dammai, <<Zane ɗa ri o ukobu?>> Koto a̱ shi a jima shi a na Haman uwai o ukobu wa alanga u mogono tsa̱ra̱ u yuwaan mogono adanshi a̱ telewetyo Modekaya uɗanga wu uga'an u na o foɓoi adama a̱ yi. 5 Reve aza a na a yuwusaan yi ulinga a̱ usu, <<Haman ɗa ri pe mishin o ukobu.>> Reve mogono ma damma, <<Uwwai na̱ a̱yi.>> 6 Ana Haman uwwai, ɗaɗa mogono me ece niyi, <<Cine aa yuwan na̱ vuma na mogono maa yuwusan ma̱za̱nga̱ u ca yi tsugbain?>> Reve Haman yuwan majiyan o okolo a̱ yi, <<Zane ɗa mogono ma ciga u ca tsugbain u ka̱ra̱i a̱mu?>> 7 Ɗaɗa Haman dammai mogono'o, <<Za na mogono ma cigai u ca biti, 8 zuwa le a̱ ta̱wa̱a̱ nu utugu wu uga'an u tsugono ma na mogono mo otoyi ɗe na̱ do na mogono ma kumbai ɗe, za na ri na̱ wukalu u tsugono a aci a̱ a̱yi. 9 Lyawa a ca zagbain ta̱ na la'ai tsugbain a̱tsuma̱ a azagbain o mogono utugu'u oɓolo na̱ do'o. A̱vu o oto vuma na mogono ma cigai ma ca tsugbain, a̱vu a kumbato yi o do a̱ kuru na̱ a̱yi e re lyuci, a damma a̱ ma̱ka̱ka̱n ma̱ yi, <Apa ili i na a yuwayin vuma na mogono ma cigai ma ca tsugbain!> >> 10 Reve mogono ma damma Haman, <<Jika̱ gogo, vu tara utugu'u na̱ do'o a̱vu i yuwaan Modekaya za va Yahuda cine vu ta̱wa̱yi na̱ a̱sa̱la̱, za na a̱a̱ da̱nusu o una̱ntsu u mogono. She vu jiba ili i ro wan a̱tsuma̱ e ili i na vu dammai.>> 11 Ɗaɗa Haman tarai utugu'u oɓolo na̱ do'o. Reve wo oto Modekaya utugu'u, reve waru u kumbato yi o do'o a̱ ka̱nda̱ruwa̱ re lyuci'i, a yuwusan adanshi a aci a̱ yi, <<Apa ili i na a yuwayin vuma na mogono ma cigai ma ca tsugbain!>> 12 Ana a̱yi ndolo kotoi ɗaɗa Modekaya ka̱mba̱i o una̱ntsu u mogono, a̱vu Haman ka̱mba̱ o u'wa na̱ a̱tsumola̱ngu a̱ a̱bunda̱. Wono waru u shiton yi. 13 Ana Haman dammai ka va̱ yi, Zeresh, oɓolo na̱ n'utsa̱ ma̱ yi suru ili i na i cina niyi, a̱vu a̱za̱ a̱ a̱sa̱la̱ a amayun na̱ ka va̱ yi damma a yi, <<Ana wo o'woi Modekaya za na zuwa numu riya̱i a̱tsuma̱ o wono, umatsun wa aza a Yahuda u ɗa, vaa lyuwa aci a̱ yi shi, amayun vu ta̱ riya̱!>> 14 Ele pe a̱tsuma̱ a adanshi, ɗaɗa azagbain o ulinga o u'wa u mogono a rawai a̱vu a̱ jika̱ a rawato Haman uba̱ta̱ wa̱ a̱buki u na Esta foɓoi.