1 A̱tsuma̱ o woto wa kupa ne ejere, za na a̱yi ɗa woto wa Ada, o urana wa kupa u woto'o na aza a ta'atsu, urana u ndolo ɗa aa yuwan ili i na mogono ma dammai a yuwan. O urana u ndolo n'yuwatan ma aza a Yahuda a yuwusan ta̱ majiyan a ta lyuwa aci e le, agba gogo ili i vadala ta̱ reve aza a Yahuda a lyuwa aci aza a na a 'yuwan n le. 2 A̱vu aza a Yahuda o ɓoloto e ilyuci yi pasu tsugono tso mogono Ahasuweru suru, a yuwan uvon na aza a na a cigai o kototo le. Babu vuma na gura yuwain uvon ne ele adama a na ama a nɗa suru a uwwusa ta̱ wovon u le. 3 Suru azagbain a pasu tsugono'o, na̱ ngono mu pasu'u na̱ nan gwamna na azagbain o mogono a kamba aza a Yahuda adama a na wovon wa̱ Modekaya u reme nle. 4 Adama a na Modekaya o'wo ta̱ vuma gbain o u'wa u mogono. Ala a̱ yi rawa ta̱ uba̱ta̱ suru pasu tsugono'o suru, waru ucira wa̱ yi u da̱shishi ta̱. 5 Reve aza a Yahuda a̱ riya̱ n'yuwatan n le na̱ mutsun mu pe'eni, reve o una le, reve a yuwan cine a cigai na̱ n'yuwatan n le suru. 6 Uba̱ta̱ u na u ri nu uɓaɓu'u a̱ lyuci va Susa, aza a Yahuda o una ta̱ reve waru o kototo ama ukpakuton (500). 7 Babu na̱ a̱yi ndolo o una ta̱ Fahandata, na̱ Dalfon oɓolo na̱ Ashifata. 8 O una ta̱ waru Forata na̱ Adaliya na̱ Aridata, 9 na̱ Famashita, na̱ Arisa, na̱ Arida oɓolo na̱ Bayizata. 10 Ele nda ele ɗa muwun kupa ma Haman mawun ma Hamedata, ma'yuwatan ma aza a Yahuda. Amma a usa itana i le shi. 11 Urana u ndolo u ɗa a dammai mogono a̱bunda̱ a ama a na o unai uba̱ta̱ u na u ri nu uɓaɓu'u a̱ lyuci va Susa. 12 A̱vu mogono ma damma Egbere Esta, <<Aza a Yahuda o una ta̱ reve o kototo ama ukpakuton (500) no olobo kupa a Haman ɗe Susa. Na a yuwan cu'un ndolo ndeɗe, nye i ɗa i buwai a akapi e iɗa'a? Gogo nye i ɗa i ipati ya̱ wu? A ta yuwaan wu a̱yi. Nye i ɗa vu cigai? A ta ca wu a̱yi.>> 13 A̱vu Esta usu, <<Nu u yo'ono mogono vu lyawa aza a Yahuda a yuwan cine a yuwain ana'an nfa'an waru. Vu lyawa a̱ telyuwetyo olobo kupa a Haman a aaɗanga o uga'an.>> 14 Adama o ndolo reve mogono ma zuwa a yuwan ne. Reve a zuwa wila̱ a̱tsuma̱ a̱ Susa, reve a̱ telyuwetyo a̱kwa̱kwa̱ a̱ muwun kupa ma Haman. 15 Reve aza a Yahuda a na a̱ da̱na̱i Susa o ɓoloto uba̱ta̱ u ta̱ o urana wa kupa na̱ a̱za̱ a̱ na̱shi o woto wa Ada, ɗaɗa o unai ama ukpakuta'atsu (300) ɗe Susa, agba a usa itana i le shi. 16 Ele a̱tsuma̱ e ili i ndolo, a̱vu akapi aza a Yahuda a na a̱ ri upasu u tsugono tso mogono ele fo o ɓoloto uba̱ta̱ u ta̱ tsa̱ra̱ e geshe aciyele waru a̱ tsura̱ wivuwun e ekere a n'yuwatan n le. O una ta̱ ama ukpakukupa kupocindere nu ukpakukupa uton (75,000) a̱tsuma̱ aza a na a 'yuwan nle, agba a usu itana i le shi. 17 Ili i nda i fara ta̱ o urana wa kupa na aza a ta'atsu o woto wa Ada, reve o urana wa kupa na̱ a̱za̱ a̱ na̱shi e ivuwan a̱vu a̱ ka̱mba̱to yi urana wa̱ a̱buki nu urana u ma̱za̱nga̱. 18 Amma aza a Yahuda a na a̱ da̱na̱i Susa o ɓoloto ta̱ uba̱ta̱ u ta̱ o urana wa kupa na aza a ta'atsu nu urana wa kupa na̱ a̱za̱ a̱ na̱shi, reve e ivuwan o urana wa kupa no ozo o ton, a̱vu a̱ ka̱mba̱to yi urana wa̱ a̱buki nu urana u ma̱za̱nga̱. 19 A̱yi ɗa i zuwai aza a Yahuda a na a̱ ri na̱ nden a̱ mpulu na̱ a̱ mulyuci a tarai urana wa kupa na̱ a̱za̱ a̱ na̱shi o woto wa Ada wo o'wo nle urana wa̱ a̱buki na̱ ma̱za̱nga̱, urana u na aa calai ne'e. 20 Modekaya ɗana ta̱ ili i nda, reve waru u lyungu mpepelime nda a̱ tyo uba̱ta̱ wa aza a Yahuda suru aza a na a̱ ri zuzu na aza a na a̱ ri alanga aza a na a̱ ri na̱ nden upasu u tsugono tso Mogono Ahasuweru. 21 U damma le ta̱ a 'yuwan a ciga a yuwusan a̱buki o urana wa kupa na̱ a̱za̱ a̱ na̱shi oɓolo na̱ za kupa no ozo o ton o woto wa Ada, a̱yi ɗa woto wa Ada, o o'wo rana wivuwun a̱tsuma̱ a aa'wan suru. 22 U damma le ta̱ a yuwan a̱buki a rana nda na̱ ma̱za̱nga̱ na̱ mere nu ucasu wu uneꞌe wi ilyalya va̱ni le, reve waru a ca alambi uneꞌe. A̱yi nda u ta zuwa a cuwan mantsa ma na aza a Yahuda a̱ tsura̱i wivuwun e ekere a n'yuwatan n le, mantsa ma na a̱tsumola̱ngu e le a̱ ka̱mba̱i ma̱za̱nga̱ reve mesun me le ma̱ ka̱mba̱ mere. 23 Reve aza a Yahuda a̱ usu a lyuwa elime na̱ mayan ma̱ a̱buki a na a farai ɗe, a yuwusan ili i na Modekaya ɗanaa nle. 24 A yuwan ta̱ ne adama a na Haman mawun ma Hamedata vuma va Aga, ma'yuwatan ma aza a Yahuda suru, u yuwan ta̱ ifoɓi a aci aza a Yahuda tsa̱ra̱ wu una le reve waru o kototo le o urana'a, o ure wa anca'wa za na e ɗesu Purim. 25 Amma ana mogono ma uwwai ifoɓi i vama i na Haman foɓoi, a̱vu mogono ma damma uɗanu a na iwuya i na Haman foɓoi a aci aza a Yahuda biti u ka̱mba̱ a aci a̱ yi, a̱ telyuwetyo yi oɓolo na̱ muwun mo olobo ma̱ yi a aaɗanga a̱ wutelyuwetyosu wa ama. 26 (Adama o ndolo a ɗa e ɗeyi rana'a Purim, diga a danshi pur.) Adama e ili i na i ri uɗanu a̱tsuma̱ e mepepelime ma nda suru, waru adama e ili i na e enei na adama e ili i na i cina nle. 27 Reve aza a Yahuda e ene wo o'wo le ta̱ a ciga a 'yuwan a̱buki'i wo o'wo le agadu. Ele ugundo u le na aza a na a cigai o o'wo aza a Yahuda a̱ ta̱ da̱na̱ a yuwusan tsutoni na̱ rana re nda babu bula̱ a mantsa ma na o foɓo niyi a aa'wan suru. A̱ ta̱ da̱na̱ a yuwusan yi cine o foɓo niyi a mantsa ma na a zuwai. 28 A̱ ta̱ waru a̱ da̱na̱ a cuwusan na̱ rana'a a yuwan waru tsutoni ne ele diga mantsa a̱ tyo mantsa, a̱tsuma̱ a 'wa waru, nu upasuu tsugono suru waru suru na̱ a̱tsuma̱ a̱ lyuci. She aza a Yahuda a̱ kuɗa̱ mayan ma rana va̱ a̱buki a̱ Purim, ko a lyawa gundo le e icina na̱ rana re nda wan. 29 A̱vu Egbere Esta, usheli wa Abihayi, oɓolo na̱ Modekaya vuma va Yahuda, a ɗana nu ucira suru suru adama e isawaton mepepelime me ire ma nda adama a̱ a̱buki a nda. 30 A̱vu Modekaya lyunguwa̱ aza a Yahuda suru mpepelime a̱tsuma̱ a pasu u tsugono tsa Ahasuweru ukpaku nu ushin na̱ a̱za̱ e cindere (127). A̱tsuma̱ e mpepelime'e a yuwaan ta̱ aza a Yahuda avasa a̱ nden ma asuvu na̱ nden mu uyo'o. 31 Reve waru a dammisa le, na̱ gundo le, a yuwusan rana Purim nda a mantsa ma na a zuwa niyi. Reve waru a damma le a yuwan tsutoni na̱ rana na a tara akuli na̱ rana va̱ a̱tsumola̱ngu na a zuwayi aciyele, cine Modekaya vuma va Yahuda na̱ Egbere Esta a dammai. 32 Wila̱ we Esta u zuwa ta̱ ili i na o toni adama a̱ a̱buki a̱ Purim wi isawan, reve waru a ɗana le a aatagada o ucuwusan.