1 A̱vu ama a Yahuda a tara Jehowaha ulobo u mogono Josiya, a̱vu a katalai okokolo adama a na wo o'wo mogono a̱tsuma̱ a̱ Urishelima o una̱ wa dada va̱ yi.

2 Jehoha da̱na̱ ta̱ na a'wan ushin na aza a ta'atsu a mantsa ma na u temei tsugono. Waru u yuwan ta̱ tsugono tsa̱ Urishelima woto ta'atsu. 3 A̱vu mogono ma Masar ma̱ cipa̱to a̱yi a̱tsuma̱ a̱ Urishelima, a̱vu u zuwa aza a Yahuda na a tsupa utafa u azurufa na rawai kilo ukpakukupa uta'atsu nu ukpakuna̱shi (3,400), na̱ zinariya na rawai kilo mata'atsu na̱ a̱za̱ a̱ na̱shi. 4 A̱vu mogono ma Masar ma zuwa Eliyakim mawun ma̱ a̱na̱wun ma̱ Jehoha na o'woi mogono ma Yahuda na̱ Urishelima, reve u vadala ala a̱ Eliyakim a̱ tyo Yehoyakim. Amma a̱vu Neko tara Eliyakim mawun ma̱ a̱na̱wun ma Yehowaha a̱ tyo Masar.

5 Yehoyakim da̱na̱ ta̱ na a'wan ushin no ozo o ton a mantsa ma na u temei tsugono. Waru u yuwan ta̱ tsugono tsa̱ Urishelima a'wan kupa na̱ za ta̱. Amma u yuwan ta̱ iwuya elime A̱sulazuva A̱sula̱ a̱yi. 6 Amma a̱vu mogono Nebukanaza riya̱a̱ yi nu uvon a̱vu wu nla̱ yi na akani a̱ rumushili adama a na wa tarai a̱ tyo Babila. 7 Nebukanaza fo pura̱ ta̱ akapi e itana i na i ri pe a̱tsuma̱ A̱a̱'isamapaɗa a̱ A̱sulazuva a̱vu u zuwa le a̱tsuma̱ o ukobu u mogono a Babila.

8 Akapi o ulinga u tsugono tsa na Yehoyakim yuwain, ni ili yi idaba i na u yuwain, nu unusu u na e reme niyi biti, a̱da̱na̱ ta̱ pe uɗanu a̱tsuma̱ aatagada o ngono ma aza a Isra'ila na̱ Yahuda. A̱vu Yehoyakin ulobo wa̱ yi wo o'wo mogono o una̱ wa̱ yi.

9 Yehoyakin da̱na̱ ta̱ na a'wan kunla̱ a mantsa ma na u temei tsugono, waru u yuwan ta̱ tsugono tsa̱ Urishelima woto ta'atsu na̱ rana kupa. A̱yi fo u yuwan ta̱ iwuya elime a̱ A̱sulazuva. 10 Ana a'wan a̱ da̱shi ka̱nda̱ruwa̱i, a̱vu mogono Nebukanaza lyunguwisa̱ na a̱ ta̱wisa̱ na̱ yi a̱tsuma̱ a Babila, oɓolo ni itana i isa'ani ya̱ A̱a̱'isamapaɗa a̱ A̱sulazuva. A̱vu u katala Zedekiya dada ke'en va̱ Yehoyakin mogono ma Yahuda na̱ Urishelima.

11 Zedekiya da̱na̱ ta̱ na̱ aa'wan ushin na̱ za ta̱ a mantsa ma na u temei tsugono. U yuwa ta̱ tsugono a̱tsuma̱ a̱ Urishelima a'wan kupa na̱ za ta̱. 12 U yuwan ta̱ iwuya elime A̱sulazuva A̱sula̱ a̱yi, a̱vu u 'yuwan na wa̱ ka̱ɗa̱to aciya̱yi uba̱ta̱ u vumava̱sula̱ Irimiya za na tsu dansaa yi ili i na A̱sulazuva a dammai. 13 Zedekiya 'ya̱sa̱a̱n ta̱ mogono Nebukanaza a aci, za na zuwa niyi u yuwain akucunu a na ucigai shi na ala a̱ A̱sula̱. Amma a̱vu Zedekiya yuwan aciyogbamu no okolo o ugbamu, a̱vu u 'yuwan na wa vadala a̱ tyo wu uba̱ta̱ wa̱ A̱sulazuva a̱ A̱sula̱ aza a Isra'ila. 14 Suru na̱ ne, azagbain a nan ganu suru no oɓolo ama'a a̱da̱shishi ta̱ ulambu wa̱ a̱ɓula̱, e itoni yi ili yi idaba yi nɗa n ro, waru a̱ ka̱mba̱to ta̱ A̱a̱'isamapaɗa a̱ A̱sulazuva za na u tawai pe a̱tsuma̱ a̱ Urishelima idaba.

15 A̱sulazuva gba, A̱sula̱ a nkaya nle, u lyungusa̱a̱ le ta̱ nu udammu e ekere a nlingata ma̱ yi babu ukotu, adama a na we e nda iliyali ya ama a̱yi oɓolo nu uba̱ta̱ wu nden ma̱ a̱yi. 16 Amma a̱vu aa yuwusaan nlingata ma̱ A̱sula̱'a̱ ulamu ni idanshi i le suru a̱vu o zo'oso ama̱sula̱, hali upan wa̱ A̱sulazuva a yuwan a̱bunda̱ aciya ama a̱yi, hali na babu lo ili i na yaa wawa le. 17 Reve A̱sulazuva 'ya̱sa̱n mogono ma Babila na wa̱ 'ya̱wa̱ le nu uvon, za na unai olobo ele na̱ matsun me pe'eni a̱tsuma̱ a̱a̱'isa̱, wu uwwa iliyali yi nanza shi, ko zagbain ko ke'en ulobo ko vali ko usheli ko abara ko za na kutsai suru suru. A̱vu A̱sulazuva a ca suru nle e ekere Nebukanaza vuma va Kaldiya. 18 Mogono ma Babila ma̱ pura̱ ta̱ suru itana i na i ri pe a̱tsuma̱ A̱a̱'isamapaɗa A̱sula̱, aza gbain gbain na̱ a̱za̱ ke'en ke'en, na asula e izuwa ya̱ A̱a̱'isamapaɗa a̱ A̱sulazuva ni izuwa i mogono oɓolo na aza azagbain a̱yi. 19 Reve a zuwa A̱a̱'isamapaɗa A̱sula̱ akina, a̱vu o kototo ukari wu ucira wa̱ Urishelima, a̱vu a̱ kula̱to suru ukobu u tsugono oɓolo ni ili isa'ani i na i ri pe uba̱ta̱'a̱.

20 A̱vu mogono'o u pura̱ suru aza a na a̱ tsura̱i o unai na̱ matsun me pe'eni shi a̱ tyo Babila. Reve wo o'wo agbashi a̱yi oɓolo no olobo a̱yi hali acina a mantsa ma na a̱ tsura̱i tsugono tsa Pashiya. 21 Iɗa yu uwwa ta̱ uyo'o wu urana wa Ashibi a̱yi, a̱tsuma̱ a rana na u da̱na̱i okongo suru u tsura̱ ta̱ wivuwun, hali o shiton a'wan kupocindere cine A̱sulazuva a dammai o una̱ wa Irimiya.

22 A̱tsuma̱ a'wan o ufaru u Sayiru mogono ma Pashiya, adama a na o shiton adanshi A̱sulazuva na u yuwain o una̱ u vumava̱sula̱ Irimiya, a̱vu A̱sulazuva a̱ ju'wa̱n okolo o mogono Sayiru va Pashiya na a lapa ulingi suru upasu wa̱ yi waru a zuwai uɗanu:

23 <<Apa ili i na mogono Sayiru va Pashiya dammai:

<A̱sulazuva, A̱sula̱ a zuva, a ca mu ta̱ tsugono tsu uvaɗi suru waru u ɗangula mu ta̱ na maa suwaa yi A̱a̱'isamapaɗa a̱tsuma̱ a̱ Urishelima a Yahuda. Lyawa ama a̱yi suru a̱tsuma̱ a̱ɗu, A̱sulazuva A̱sula̱ a̱yi a̱da̱na̱ oɓolo na̱ a̱yi, waru u gawan a̱ tyo Urishelima.> >>