1 A mantsa ma na Rehobowam rawai Urishelima, a̱vu u ɓoloto a̱soja na a gurai uvon ukpakukupa ukpaku nu ukpakukupa kupakunla̱ (180,000) diga a̱tsuma̱ o u'wa wa Yahuda na̱ Banyami na a yuwan uvon na aza a Isra'ila, adama a na a̱ ka̱mbuwa̱ le za̱la̱ tsugono tsa Rehobowam.

2 Amma a̱vu A̱sulazuva a yuwan adanshi na̱ Shemaya vuma va̱ A̱sula̱ u damma, 3 <<Vu damma Rehobowam ulobo wa Sulemanu mogono ma a Yahuda na̱ suru aza a Isra'ila na a̱ ri a̱tsuma̱ a Yahuda na̱ Banyami, 4 <Apa ili i na A̱sulazuva a dammai, she i yuwan uvon na̱ mmaci n ɗu aza a Isra'ila wan. Ka̱mba̱i a 'wa ɗu, adama a na ili i na i farai u yuwun u va̱ u ɗa! Reve a yuwan tsutoni na adanshi A̱sulazuva gba a yuwan uvon na̱ Yerobowam waru shi.> >>

5 Rehobowam da̱nu ta̱ Urishelima, a̱vu u suwa ilyuci adama a na a yuwan mapari ma Yahuda. 6 Ilyuci i na u suwai ele ɗa: Batalami na̱ Etam na̱ Tekowa 7 na̱ Bet Zur na̱ Soko na̱ Adulam 8 na̱ Gat na̱ Maresha na̱ Zif 9 na̱ Adorayim na̱ Lakish na̱ Azeka 10 na̱ Zora na̱ Ajalon na̱ Heburon. Ele nda ele ɗa ilyuci vu kari vu ucira a̱tsuma̱ o upasu wa Yahuda na̱ Banyami. 11 A̱vu u zuwa na a suwa ukari wu ucira adama a na a yuwan mapari ma lyuci'i, adama o ndolo a̱vu u zuwa nan yali ya̱ a̱soja aciyele, ni ilyalya na̱ mani'in ma̱ zetun oɓolo na̱ masayan ma̱ inabi. 12 Rehobowam gba ɓoloto ta̱ a̱ra̱ga̱ ni ibata a̱tsuma̱ e ilyuci'i suru adama a̱ da̱shi le ucira lon. Na̱ tsundolo tsa a ɗa u guza̱i Yahuda na̱ Banyami.

13 Nan ganu na̱ nan Levi na̱ ri e iɗa ya Isra'ila suru a̱ ka̱mba̱ ta̱ uba̱ta̱ u mogono Rehobowam diga uba̱ta̱ u na a̱ ri na̱ nden suru. 14 Adama a na nan Levi a lyawa ta̱ a̱ɗuma̱ ele ni itana i le a̱vu a̱ ka̱mba̱ Yahuda na̱ Urishelima, adama a na Yerobowam no olobo a̱yi a putsaa ta̱ nan ganu na̱ nan Levi na a yuwan a̱ga̱nda̱ a tsuganu tsa̱ ele uba̱ta̱ wa̱ A̱sulazuva. 15 Yerobowam ɗangula ta̱ nan ganu a̱yi adama a̱ ba̱ta̱ va̱ a̱ga̱nda̱ na adama mgbele na̱ musula̱ m mudindim n na u zuɗa̱i. 16 Amma a̱tsuma̱ o ugundo wa Isra'ila suru a̱da̱na̱ ta̱ na ama na a zuwai okolo ele na a zami urewesu wa̱ A̱sulazuva A̱sula̱ a Isra'ila a̱vu o toni nan Levi a̱ tyo Urishelima na a ca kucci a̱ tyo uba̱ta̱ wa̱ A̱sulazuva A̱sula̱ a nkaya nle. 17 A̱vu a zuwa tsugono tsa a Yahuda yuwan ucira. A̱vu a yuwan a'wan ata'atsu a yuwusan tsutoni na̱ Rehobowam ulobo wa Sulemanu ulobo wa̱ Da̱wuda, a̱vu a yuwusan mmalu o ure wa Sulemanu na̱ Da̱wuda.

18 Rehobowam zuwa ta̱ Mahala, za na da̱na̱i usheli wa̱ Yerimo wu ulobo wa̱ Da̱wuda, waru aala a mma va̱ yi ɗa Abihayi usheli wa̱ Eliyabu mawun ma tsukaya ma̱ Yese. 19 A̱vu u matsaan yi olobo: Yewushe na̱ Shemariya na̱ Zaham. 20 Waru u zuwa ta̱ Ma'aka usheli wa Absalom, za na matsaan niyi: Abija na̱ Atai na̱ Ziza na̱ Shelomi. 21 Rehobowam gba ciga ta̱ Ma'aka lon usheli wa Absalom hali u la'a akapi a̱ma̱ci a̱yi na̱ a̱ma̱ci a̱ nge'en, adama a na u zuwa ta̱ a̱ma̱ci kupa na̱ kunla̱, u da̱na̱ ta̱ na̱ a̱ma̱ci a̱ nge'en kupota̱li. U ta̱ na̱ muwun mo olobo ushin na̱ kunla̱ na̱ muwun me esheli kupota̱li.

22 A̱vu Rehobowam zuwa Abija ulobo wa Ma'aka na wo o'wo zagbain a̱tsuma̱ a̱za̱ a̱yi, na̱ majiyan ma na a katala yi okokolo na wo o'wo mogono. 23 Rehobowam yuwan ta̱ ugbozu na u tarai muwun mo olobo ma̱ a̱yi a̱ tyo upasu wa a Yahuda na̱ Banyami a̱tsuma̱ e ilyuci yu ukari vu ucira u na u suwai. A̱vu u lyunguwa̱a̱ le ni ilyalya ya̱ a̱bunda̱. A̱vu waru u taraa le a̱ma̱ci na̱ a̱bunda̱.