1 Mogono Sulemanu ulobo wa̱ Da̱wuda shuwa̱ ta̱ tsugono tsa̱ yi nu ucira lon, adama a na A̱sulazuva A̱sula̱ a̱yi a̱da̱na̱ ta̱ oɓolo na̱ a̱yi waru u zuwai ta̱ u tsura̱ tsugbain lon.

2 A̱vu Sulemanu ɗe aza a Isra'ila suru: Azagbain a nan yali ya̱ a̱soja vu ukpakukupa kupa na̱ a̱za̱ o ukpaku ukpaku, no ozo o uge'etosu na̱ azagbain a̱tsuma̱ a Isra'ila suru, na azagbain a 'wa. 3 Reve Sulemanu oɓolo ni iɓolo ya ama'a suru a̱ ka̱ra̱ a gawan uba̱ta̱ wa̱ a̱ga̱nda̱ a̱tsuma̱ a Gibiyon, adama a na ɗe ɗa Oogodo o Uga'asusan wa̱ A̱sula̱ a̱ da̱na̱i, za na Musa aagbashi a̱ A̱sulazuva a yuwain a̱tsumona. 4 Amma Da̱wuda tara ta̱ ɗe Akpati a Nzuwulai a̱ A̱sula̱ diga a̱ lyuci va Kiriyat Jeyarim a̱ tyo uba̱ta̱ u na u foɓoo niyi, adama a na u shuwa̱ ta̱ ɗe oogodo adama a̱yi ɗe Urishelima. 5 Amma masa'a ma̱ rumushili ma na Bezale ulobo wa̱ Uri ulobo wa̱ Huru yuwain, u shi ta̱ ɗe a Gibiyon elime o Oogodo o Uga'asusan, reve Sulemanu ni iɓolo ya ama'a a yuwan a̱ga̱nda̱ ɗe uba̱ta̱'a̱. 6 Sulemanu kumba ta̱ a̱ tyo uba̱ta̱ u masa'a ma̱ rumushili'i a̱ ma̱ka̱ka̱n ma̱ A̱sulazuva a̱tsuma̱ o Oogodo o Uga'asusan, a̱vu u ca kucci vu ukula̱tosu ukpakukupa (1,000) zuva va̱ yi.

7 Na ayin o ndolo reve A̱sulazuva o roco aciya̱yi uba̱ta̱ wa̱ Sulemanu, a̱vu u damma yi, <<Pati ili i na vu cigai n ca wu biti.>>

8 A̱vu Sulemanu damma, vu roco ta̱ dada va̱ Da̱wuda isa'ani, na vu zuwai mo o'woi mogono o una̱ wa̱ yi. 9 <<Gogo, A̱sulazuva A̱sula̱ a̱ va̱, lyawa nzuwulai n na vu yuwayin dada va̱ Da̱wuda wo o'wo amayun, na vo o'woto numu mogono e ekere ama a̱bunda̱ na a̱ ri tsa̱ ma̱buta̱ mo o uvaɗi. 10 Adama o ndolo vu ca mu ugbozu nu urevu u na ma gura yuwan tsugbain ulobonu, adama a na zane ɗa aa gura yuwan tsugbain tsa ama a̱ a̱bunda̱ a̱ wu a nda?>>

11 A̱vu A̱sula̱ a̱ usu Sulemanu, <<Ana wo o'woi ili i nda i ɗa okolo a̱ wu a cigai, agba vu pati utsuru ko ili yu ukere shi, ko tsugbain shi, ko vu zami ukwa̱ wu n'yuwatan ma̱ wu shi, agba ko vu pati ujumu u wuma shi, amma she ugbozu nu urevu cine vaa yuwan tsugbain tsa ama a̱ va̱ aza a na n zuwa nuwu vo o'wo mogono me le, 12 adama o ndolo a ta ca wu ugbozu nu urevu. Agba waru n ta ca wu utsuru, ni ili yu ukere, na̱ tsugbain, aza a na babu mogono kafu a̱vu ma na ma̱ da̱na̱i na̱ cu'un le, na̱ waru a̱ca̱pa̱ babu mogono ma na ma̱a̱ da̱na̱ na̱ a̱yi.>>

13 A̱vu Sulemanu ka̱ra̱ a̱ tyo Urishelima diga uba̱ta̱ wa̱ a̱ga̱nda̱ a̱tsuma̱ a Gibiyon, diga uba̱ta̱ wo Oogodo o Uga'asusan. Reve u yuwan tsugono aciya aza a Isra'ila suru.

14 Sulemanu ɓoloto ta̱ ikeke yi ido ni ido ukpakukupa nu ukpakuna̱shi (1,400), ni ikeke yi ido ukpakukupa kupa nu ukpakukupa ure (12,000), aza a na u zuwai e ilyuci yi ikeke yi ido i na o foɓoi ozo o ro waru oɓolo na̱ a̱yi a̱tsuma̱ a̱ Urishelima. 15 Mogono ma zuwa ta̱ azurufa na̱ zinariya mo o'wo pere a̱tsuma̱ a̱ Urishelima tsa atali. Ne ɗa waru wu shuwa̱i ɗanga sida, reve a bala ununa vu revei ɗanga vu ubiri a̱tsuma̱ e iɗa i mugaɗi ma Yahuda. 16 A̱vu Sulemanu zuwa a̱ ta̱wa̱ ni ido diga e iɗa ya Masar a̱ tyo Kuwe. A̱vu azagbain o ukobu u mogono a tsulusa le diga Kuwe✝. 17 Agba waru u zuwa ta̱ a̱ ta̱wa̱ ni ikeke yi ido diga e iɗa ya Masar, za ta̱ suru azurufa ukpaku kupota̱li (600), ni ido azurufa ukpaku uta̱ na̱ kupoton (150). Agba waru a̱ tsu winasa le ta̱ e ekere a̱za̱ a̱ tsugono tsa̱ a̱za̱ a̱ Hitiya na aza a Suriya.