1 Hezekiya da̱na̱ ta̱ na a'wan ushin no ozo o ton a mantsa ma na wo o'woi mogono, u yuwan ta̱ tsugono tsa̱ Urishelima a'wan ushin na̱ kuci. Aala a mma va̱ a̱yi ɗa Abija usheli wa Zakariya. 2 U yuwan ta̱ ili i na i ri mejege uba̱ta̱ wa̱ A̱sulazuva, cine dada va̱ a̱yi Da̱wuda yuwain.

3 A̱tsuma̱ o woto wu ufaru wa a'wan o ufaru u tsugono tsa̱ a̱yi, reve u kpa̱tu'wa̱ na̱ntsu va̱ A̱a̱'isamapaɗa A̱sulazuva a̱vu u lapula le. 4 A̱vu u ta̱wa̱ na̱ nan ganu na̱ nan Levi, u ɓoloto le upasu wa asana, 5 a̱vu u damma: <<Uwwa nu mu, a̱ɗu nan Levi! Yoo o'woto aciya̱ɗu na akiza, a̱vu waru i zuwa A̱a̱'isamapaɗa a̱ A̱sulazuva a̱ A̱sula̱ a nkaya nɗu u da̱na̱ na̱ akiza. A̱vu yi uta̱a̱ suru ili i na i ri tsugya diga pe a̱a̱'isa̱'a̱. 6 Nkaya n tsu n da̱na̱ ta̱ nu ulambu wa̱ a̱ɓula̱, a yuwan ta̱ iwuya uba̱ta̱ wa̱ A̱sulazuva a̱ A̱sula̱ a̱tsu a̱vu a vari yi. A vadala ta̱ urewesu u le diga uba̱ta̱ wu nda̱na̱ta̱ ma̱ A̱sulazuva a̱vu a vadala yi ucina̱. 7 A̱vu waru a̱ ɓa̱ru na̱ntsu vu ukobu waru a̱ kimusa̱ ifitila. Agba a̱ kuloto ili i ma̱guru shi, ko waru na a ca kucci vu ukula̱tosu a̱ a̱a̱'isa̱ uba̱ta̱ wa̱ A̱sula̱ a Isra'ila shi. 8 Adama o ndolo ɗa A̱sulazuva a yuwain upan na aza a Yahuda na̱ Urishelima. A̱vu u zuwa le o o'wo ili i wovon, ni iliya ya asalama, ni ili ya adanshi, cine ye enei ne e esu a̱ɗu a na'an. 9 Adama o ndolo a ɗa o unai nkaya ntsu na̱ matsun me pe'eni ɗaɗa olobo a̱tsu ne esheli oɓolo na̱ a̱ma̱ci a̱tsu a tara nle a̱ 'ya̱wa̱ tsugbashi. 10 Gogo gba n zuwa ta̱ okolo a̱ va̱ n ta yuwan nzuwulai na̱ A̱sulazuva A̱sula̱ a Isra'ila, adama o upan wu usuɗu wa̱ yi aciya̱tsu u von. 11 Olobo a̱ va̱, she i yuwan uro gogo wan, adama a na A̱sulazuva a ɗangula ɗu ta̱ adama yi isawan a̱ ma̱ka̱ka̱n ma̱ yi i yuwan yi a̱ga̱nda̱, waru i kuloto ili i ma̱guru. >>

12 A̱vu nan Levi a fara ulinga:

Diga o ugundo wa̱ a̱za̱ a̱ Koha,

Maha ulobo wa Amasai na̱ Juwe ulobo wa Azariya,

diga o ugundo wa Merari,

Kish ulobo wa Abidi na̱ Azariya ulobo wa Yehalele,

diga o ugundo wa Gashon, Yowa ulobo wa Zima na̱ Adini ulobo wa Yowa,

13 diga o ugundo wa Elizafan,

Shimri na̱ Jeyiye,

diga o ugundo wa Asaf,

Zakariya na̱ Mataniya,

14 diga o ugundo wa Heman,

Yehiyel na̱ Shimeyi,

diga o ugundo wa Yedutun,

Shemaya na̱ Uziyel.

15 Ana o ɓolotoi a̱za̱ ele reve a̱ ka̱mbuwa̱ aciyele na akiza, a̱vu a̱ ka̱ra̱ a̱ 'ya̱wa̱ na a̱ ka̱mba̱to A̱a̱'isamapaɗa a̱ A̱sulazuva cece, cine mogono ma damma nle, ununa A̱sulazuva a dammai. 16 A̱vu nan ganu a uwa pe a̱tsuma̱ a̱a̱'isa̱ a̱ A̱sulazuva adama a na a zuwai wo o'wo na akiza. Reve o uta̱a̱ suru ili i na i ri idaba i na a cinai a̱tsuma̱ A̱a̱'isamapaɗa A̱sulazuva o ukowo. A̱vu nan Levi a̱ pura̱ le a tara le a̱ tyo o Uka̱ri wa̱ Kidron. 17 E teme ta̱ uka̱mba̱tosu wa akiza'a o urana wu ufaru u woto wu ufaru, acina urana wa̱ kunla̱ u woto'o reve a rawa o ukobu wu u'uwata wa̱ A̱a̱'isamapaɗa. Waru a tarisa ta̱ rana kunla̱ o uka̱mba̱tosu u cece wa̱ A̱a̱'isamapaɗa a̱ A̱sulazuva, reve o koto o rana u kupa na̱ a̱za̱ a̱ ta̱li u woto wu ufaru.

18 A̱vu nan ganu a̱ ka̱ra̱ 'ya̱wa̱ uba̱ta̱ wa̱ Hezekiya Mogono, a̱vu a dammai, <<Tsu ka̱mba̱to ta̱ A̱a̱'isamapaɗa a̱ A̱sulazuva suru cece, na̱ masa'a mo casu u kucci vu ukula̱tosu oɓolo na̱ itana yu ulinga ya̱ yi suru, na̱ apada a mazuwa ma̱ opopofu a na a tawai, oɓolo ni itana yu ulinga ya̱ yi. 19 Itana i na Mogono Ahaz tawai a mantsa ma wuma wu ulambu wa̱ a̱ɓula̱ a̱yi, tsu foɓo le ta̱ waru tso o o'woto le ta̱ akiza. Gogo a̱ ta̱ lo elime a masa'a ma̱ A̱sulazuva.>>

20 Nu usana a̱vu Hezekiya Mogono ɓoloto azagbain a lyuci uba̱ta̱ uta̱ a̱vu a̱ ka̱ra̱ a̱ tyo A̱a̱'isamapaɗa a̱ A̱sulazuva. 21 A̱vu a̱ ta̱wa̱ na̱ ogono e inan a̱ cindere na̱ a̱giri'i a̱ cindere na̱ mukyokyon n cindere na̱ nga̱ji n cindere tsa̱ kucci vu unusu u tsugono na adama a̱ a̱a̱'isa̱ na ama a Yahuda. A̱vu Hezekiya mogono ma damma nan ganu a̱za̱ o ugundo wa Haruna, na a ca kucci a masa'a ma̱ A̱sulazuva. 22 A̱vu a paɗa ogono e inan, a̱vu nan ganu a tara mpasa'a a̱vu a̱ kyo'onu le zuva masa'a. A̱vu waru a paɗa a̱giri'i a̱vu a̱ kyo'onu mpasa zuva va masa'a. A̱vu waru a paɗa mukyokyon a̱vu a̱ kyo'onu mpasa zuva va masa'a. 23 A̱vu a̱ ta̱wa̱ na̱ nga̱ji na a yuwaan kucci vu unusu adama a na a yuwan le gafura vu unusu u le elime o mogono ne eleme o oɓolo a ama reve a̱ kuruwa̱ le ekere. 24 A̱vu nan ganu a paɗa nga̱ji'i, a̱vu a zuwa mpasa'a zuva masa'a tsa kucci vu unusu, adama a na a yuwaan aza a Isra'ila gafura vu unusu le. Mogono ma ca ta̱ udammu na a ca kucci vu ukula̱tosu na a yuwan gafura vu unusu wa aza a Isra'ila suru.

25 A̱vu mogono Hezekiya zuwa nan Levi a̱tsuma̱ A̱a̱'isamapaɗa a̱ A̱sulazuva na̱ mupalu m malapa ni igaraya ni ikumburu, o una̱ wu udammu wa̱ Da̱wuda na̱ Gadu za yindi i mogono na̱ Natan vumava̱sula̱, ununa A̱sulazuva a zuwai a yuwan o una̱ wa ama̱sula̱ a̱yi. 26 A̱vu nan Levi e isawan ufoɓu ni itana i tsuwe'e ya̱ Da̱wuda, a̱vu nan ganu waru e isawan na avana ele.

27 A̱vu Hezekiya ca udammu na a ca kucci vu ukula̱tosu u le a masa'a. A mantsa ma na a farai ukula̱tosu'u, a̱vu a fara a canasa ishipa yi ica e ekere A̱sulazuva, a̱vu o toni na̱ wivulu wa avana ni itana i tsuwe'e ya̱ Da̱wuda mogono ma Isra'ila. 28 A̱vu suru oɓolo ama a̱ ka̱ɗa̱to a yuwan a̱ga̱nda̱, a̱za̱ e ishipa waru a yuwusan ishipa aza a avana waru e ivulusa̱ avana. A lyuwusa ta̱ elime suru hali acina mantsa ma na o kotoi ucasu u kucci vu ukula̱tosu'u.

29 A mantsa ma na o koto kucci'i, a̱vu mogono na̱ suru aza a na a̱ ri oɓolo na̱ a̱yi a̱ kingyo nu urewesu u le a̱ tyo e iɗa a yuwan a̱ga̱nda̱. 30 A̱vu mogono Hezekiya na azagbain a̱yi a damma nan Levi a yuwan ica ya̱ A̱sulazuva ni ishipa ya̱ Da̱wuda na̱ Asaf za yindi. Reve a cana ishipa yi ica na̱ ma̱za̱nga̱, a̱vu a̱ kingyo nu urewesu u le a̱ tyo e iɗa a yuwan a̱ga̱nda̱. 31 Hezekiya gba damma ta̱, <<Gogo i tawa ta̱ aciya̱ɗu uba̱ta̱ wa̱ A̱sulazuva. Ta̱wa̱i i ca kucci na̱ kucci vu ugodyusho a̱tsuma̱ A̱a̱'isamapaɗa a̱ A̱sulazuva.>>Reve oɓolo'o a̱ ta̱wa̱ na̱ kucci oɓolo na̱ kucci vu ugodyusho'o, oɓolo na aza a na okolo le a ca nle na a̱ ta̱wa̱a̱ na̱ kucci vu ukula̱tosu ule. 32 A̱bunda̱ o ukula̱tosu u na ama'a a̱ ta̱wa̱yi a rawa ta̱ inan kupocindere ni ikyon ukpaku (100) na̱ mukyokyon ukpaku ure (200) suru nle adama a̱ kucci vu ukula̱tosu a̱ tyo uba̱ta̱ wa̱ A̱sulazuva. 33 Iliyamunga i na a tawai adama a̱ kucci a rawa ta̱ ogono e inan ukpakukupa uta̱li (600) ni ikyon na̱ mgbele ukpakukupa uta'atsu (3,000). 34 Amma nan ganu a̱da̱na̱ a̱bunda̱ shi, na a yuwan suru ucasu u kucci vu ukula̱tosu, a̱vu a̱za̱ e le nan Levi a kamba le hali acina ukosu wu ulinga'a, na̱ hali she na nan ganu'u fo a tawai aciyele, adama a na nan Levi a la'a ta̱ ca aciyele na wo o'wo na akiza ula'awu na̱ cine nan ganu a ciga nle na wo o'wo. 35 A̱ da̱na̱ ta̱ lo na̱ kucci va̱ a̱bunda̱, oɓolo na abaji a mani'in adama a̱ kucci muwwulai na̱ za vi ili yo oso za na a cayi oɓolo na̱ kucci vu ukula̱tosu.

Na̱ ne tsundolo tsa a ɗa o kotoi uka̱mba̱tosu wa̱ a̱ga̱nda̱ a̱tsuma̱ A̱a̱'isamapaɗa a̱ A̱sulazuva. 36 Hezekiya na̱ akapi ama suru a yuwan ta̱ ma̱za̱nga̱ lon, adama e ili i na A̱sulazuva a yuwayin ama a̱yi. Adama a na ili i na a cigai u yuwan ta̱ go'o.