1 Yowash da̱na̱ ta̱ na̱ a'wan e cindere a na wo o'woi mogono. U yuwan ta̱ tsugono tsa̱ Urishelima a'wan amunga. Aala a mma va yi ɗa Zibiya diga lyuci va Biyasheba. 2 Yowash yuwan ta̱ ili i na i ri mejege e ekere a̱ A̱sulazuva suru a̱tsuma̱ a'wan a na Yehoyida ganu da̱na̱i wuma. 3 Yehoyida ganu zuwa ta̱ a̱ma̱ci e re, waru a matsaan yi ta̱ olobo na̱ esheli.

4 Ana a tarai mantsa, a̱vu Yowash yuwan majiyan ma na wa lapula A̱a̱'isamapaɗa a̱ A̱sulazuva. 5 A̱vu u ɓoloto nan ganu na̱ nan Levi a̱vu u damma le, <<Ka̱ra̱i a̱ tyo a̱tsuma̱ e ilyuci ya Yahuda na ya̱ ushin ikebe ya a'wan diga e ekere aza a Isra'ila suru, adama o ulapulu wa̱ A̱a̱'isamapaɗa a̱ A̱sulazuva A̱sula̱ a̱ɗu. I jika̱!>> Amma nan Levi a yuwan kazukazu shi.

6 Adama o ndolo a̱vu mogono ma̱ ɗe Yehoyida zagbain nan ganu a̱vu u damma yi, <<Adama nye vu kuɗa̱i a zuwa nan Levi a̱ 'ya̱wa̱ Yahuda na̱ Urishelima a̱ ta̱wa̱ nu utafa u na aagbashi a̱ A̱sulazuva Musa zuwai, diga e iɓolo ya aza a Isra'ila adama a na tsa lapula Oogodo o Uga'asusan shi?>>

7 Adama a na ɗe na̱ a̱ca̱pa̱ olobo a ka vama ndolo a Ataliya a uwa ta̱ A̱a̱'isamapaɗa a̱ A̱sula̱, reve a̱ pura̱ itana ya akiza adama o ulinga wa Ba'al. 8 Adama o ndolo a̱vu mogono ma zuwa a yuwan akpati, a̱vu a zuwayi alanga o una̱ntsu wa̱ A̱a̱'isamapaɗa a̱ A̱sulazuva. 9 Reve a sala e iɗa ya Yahuda na̱ Urishelima a na a̱ ta̱wa̱ nu utafa u le na Musa aagbashi A̱sulazuva a dammai aza a Isra'ila a̱ ta̱wa̱a̱ a mantsa ma na a̱ da̱na̱i ɗe a̱tsumona. 10 Azagbain suru na̱ ama suru a̱ ta̱wa̱ ta̱ nu utafa u le na̱ ma̱za̱nga̱, aa zuwusa le pe a̱tsuma̱ akpati'i hali u shunwa. 11 Suru mantsa ma na nan Levi a̱ ta̱wa̱i na akpati'i u ba̱ta̱ wa azagbain o mogono reve e ene u shiwan ta̱, reve za vi iɗana i mogono na azagbain a nan ganu a̱ ta̱wa̱ o ko'o ili na i ri pe, a̱vu a̱ ka̱mbuwa̱ yi uba̱ta̱ u na u tsu da̱na̱. A yuwusan ta̱ ne kuci hali a̱ tsa̱ra̱ ikebe ya̱ a̱bunda̱. 12 Mogono na̱ Yehoyida a ca ta̱ ikebe'e uba̱ta̱ wa aza a na e idanasa ulinga wa̱ A̱a̱'isamapaɗa a̱ A̱sulazuva'a. A̱vu a tara aza a na a yuwusan usaa na aza a mavara makpata adama a lapula A̱a̱'isamapaɗa a̱ A̱sulazuva, no ozo o ulinga wu rumu na̱ rumushili adama a lapula A̱a̱'isamapaɗa'a.

13 Ama a na a zuwai ulinga'a a̱ ka̱mbuwa̱ ta̱ ugbozu lon, ulinga'a waru u lyuwa ta̱ elime e ekere le. A lapula ta̱ A̱a̱'isamapaɗa a̱ A̱sula̱'a̱ cine u da̱na̱i nu ufaru reve a̱ da̱shi yi ucira. 14 A mantsa ma na o kotoi ulapulu'u suru, a̱vu a̱ ka̱mbuwa̱a̱ mogono na akapi e ikebe i na i buwai na̱ Yehoyida, na akapi e ikebe i ɗaɗa a yuwayin itana yu ulinga wa̱ A̱a̱'isamapaɗa a̱ A̱sulazuva: Itana yu ulinga ni itana adama a̱ kucci vu ukula̱tosu na akwanu na akapi e itana i zinariya na̱ azurufa. A wuma wa̱ Yehoyida, a̱da̱na̱ ta̱ a casu kucci vu kula̱tosu kuci a̱tsuma̱ a̱ A̱a̱'isamapaɗa a̱ A̱sulazuva.

15 Gogo Yehoyida ganu gbain kutsa ta̱ lon, a̱vu u kuwa̱, u da̱na̱ ta̱ na̱ a'wan ukpaku na̱ mata'atsu (130). 16 A̱vu a̱ ciɗo yi oɓolo na̱ ngono a̱tsuma̱ a̱ Lyuci va̱ Da̱wuda, adama a̱ɓula̱ a na u yuwain a̱tsuma̱ a Isra'ila na̱ A̱sula̱ na̱ A̱a̱'isamapaɗa fo.

17 Ana Yehoyida ganu gbain kuwa̱i, a̱vu azagbain a Yahuda a̱ ta̱wa̱ a̱ kingyo elime o mogono Yowash, a̱vu akparai adama a na wa yuwan ili i na aa cigai. 18 A̱vu a vari A̱a̱'isamapaɗa a̱ A̱sulazuva A̱sula̱ a nkaya nle, a̱vu a yuwaan a̱shuwutsu a Ashera a̱ga̱nda̱. Adama o unusu le, a̱vu upan wa̱ A̱sulazuva a̱cipa̱a̱ ama a Yahuda na̱ Urishelima. 19 Suru na̱ ne A̱sulazuva a̱ lyunguwa̱a̱ le ta̱ ama̱sula̱ adama u rono le a̱ ka̱mba̱ ya̱ a̱yi, a damma le ta̱ unusu ule, agba a uwwa shi.

20 A̱vu Ruhu va̱ A̱sula̱ cipa̱a̱ Zakariya ulobo wa Yehoyida ganu. A̱vu wi isawan elime a ama a̱vu u damma le, <<Apa ili i na A̱sula̱ a dammai: <Adama nye ɗa i 'yuwain na ya yuwan tsutoni nu udammu wa̱ A̱sulazuva? Yaa lyuwa elime shi. Adama a na i lyawai A̱sulazuva, a̱yi fo u lyawa ɗu ta̱.> >>

21 Amma a̱vu Mogono Yowash na azagbai'in oɓolo aci a vara Zakariya o unai, o una̱ wu udammu u mogono o ukowo wa̱ A̱a̱'isamapaɗa a̱ A̱sulazuva. 22 Agba Mogono Yowash cuwan ni isa'ani i na Yehoyida ganu dada va Zakariya yuwan niyi shi, reve wu una ulobo wa Yehoyida. Za na dammai a mantsa ma na u cigai u kuwa̱, <<Lyawa A̱sulazuva ene ili i na yaa yuwusan a̱vu u tsupa.>>

23 O ukosu wa a'wan a̱vu a̱soja a Suriya a̱ riya̱a̱ Yowash nu uvon, a kandara ta̱ Yahuda na̱ Urishelima a̱vu o una azagbain a ama suru. A̱vu a̱ lyungu itana i na a̱ pura̱i suru a̱ tyo uba̱ta̱ u mogono me le a Dimaska. 24 Ko na wo o'woi a̱soja a Suriya a̱ ta̱wa̱ ta̱ na̱ a̱soja wa'a, A̱sulazuva a ca le ta̱ ulyuwu wa a aci e ekere a̱ a̱soja a̱ a̱bunda̱. Adama a na ama a Yahuda a lyawa ta̱ ure wa̱ A̱sulazuva A̱sula̱ a nkaya nle, uge'etosu u da̱na̱ ta̱ a aci a Yowash. 25 A mantsa ma na aza a Suriya a̱ ka̱ra̱i, a lyawa ta̱ Yowash na̱ wuntsu lon. A̱vu azagbain a̱yi oɓolo aci o unai adama na wu una ta̱ ulobo wa Yehoyida ganu, a̱vu o una a̱yi a̱ga̱da̱ a̱yi, a̱vu a̱ ciɗo yi a̱tsuma̱ lyuci va̱ Da̱wuda, amma a̱ ciɗo yi a̱tsuma̱ ason o ngono shi.

26 Aza a na o ɓoloi a aci o una niyi ele ɗa: Zabad ulobo wa Shimeya vu ka va aza a Amon na̱ Yehozaba ulobo wa Shimri vu ka va̱ a̱za̱ a̱ Mowa. 27 Alabari o olobo a̱ Yowash ni ikaka ya adanshi aciya̱yi, na alabari o ulinga wu ulapulu wa̱ A̱a̱'isamapaɗa a̱ A̱sula̱ a̱da̱na̱ ta̱ pe a̱tsuma̱ aatagada alabari o ngono. A̱vu Amaziya ulobo wa̱ yi wo o'wo mogono o una̱ wa̱ yi.