1 A̱vu Sulemanu damma, <<A̱sulazuva a damma ta̱ u ta̱ da̱nu a̱tsuma̱ e irumbu pici, 2 agba gogo n suwa ta̱ a̱ba̱jini A̱a̱'isamapaɗa adama a̱ wu, uba̱ta̱ u na va̱ da̱nu hali hali.>>

3 A mantsa ma na oɓolo a ama a Isra'ila a̱ da̱na̱i lo mishin uba̱ta̱'a̱, a̱vu mogono ma vadala a̱ ka̱lyuwusa̱ le a̱vu u zuwaa le una̱ wa aba'un.

4 A̱vu u damma, <<Ica za va̱ A̱sulazuva a ɗa, A̱sula̱ aza a Isra'ila, za na nu ukere wa̱ yi u ɗa u shitoyin nzuwulai na u yuwain nu una̱ wa̱ yi e ekere a dada va̱ Da̱wuda, adansa, 5 <Diga a mantsa ma na mu uta̱yi ama a̱ va̱ diga a Masar, n ɗangula lyuci diga a̱tsuma̱ o gundo va aza a Isra'ila adama a na a suwa A̱a̱'isamapaɗa adama a ala a̱ va̱ a̱da̱na̱ ɗe shi, ko n ɗangula zagbain na a yuwan tsugono tsa a ama va̱ Isra'ila shi. 6 Amma gogo n ɗangula ta̱ Urishelima uba̱ta̱ u na Aala a̱ va̱ a̱da̱na̱ ɗe, agba n ɗangula ta̱ Da̱wuda na wa yuwan tsugono tsa a ama a̱ va̱ aza a Isra'ila.>

7 <<Gogo gba dada va̱ Da̱wuda da̱na̱ ta̱ na̱ majiyan Ookolo a̱yi na wa suwa A̱a̱'isamapaɗa adama Aala A̱sulazuva A̱sula̱ aza a Isra'ila. 8 Amma a̱vu A̱sulazuva a damma dada va̱ Da̱wuda, <U tu ulobonu na vu foɓoi okolo a̱ wu na va suwaa mu A̱a̱'isamapaɗa adama a na a ca Aala a̱ va̱ tsugbain. 9 Suru na̱ ne, a̱vu ɗa za na a suwa A̱a̱'isamapaɗa'a shi, amma ulobo wa̱ wu u ɗa, za na ri mpasa na̱ lipu va̱ wu za na a suwa A̱a̱'isamapaɗa adama Aala a̱ va̱.>

10 <<Gogo A̱sulazuva o shiton ta̱ nzuwulai n na u yuwain. Ana'an mo o'wo ta̱ mogono o una̱ wa Da̱wuda dada va̱ waru gogo n da̱nu ta̱ ootogu o tsugono tsa aza a Isra'ila, ununa A̱sulazuva a yuwain nzuwulai, waru n suwa ta̱ A̱a̱'isamapaɗa adama Aala a̱ A̱sulazuva A̱sula̱ aza a Isra'ila. 11 Ɗe ɗa n zuwai Akpati nzuwulai za na A̱sulazuva a yuwain na ama a Isra'ila.>>

12 Reve Sulemanu isawan elime masa'a ma̱ A̱sulazuva elime ama a Isra'ila suru, a̱vu u canana ukere wa̱ yi zuva. 13 Adama a na Sulemanu yuwan ta̱ ɗe uba̱ta̱ u ro u na a̱ tsu isawusan na̱ rumushili, udasuwu uton uga'an, nu udasuwu uton washin, a̱vu u zuwai alanga e memere mo ukowo'o. Reve wi isawan aciya uba̱ta̱'a̱ a̱vu u kingyo elime ama a Isra'ila suru a̱vu u canana e ekere yi a̱ tyo zuva. 14 A̱vu u yuwan avasa u damma, <<A̱sulazuva A̱sula̱ a Isra'ila, babu lo A̱sula̱ tsa̱ wu ɗe zuva ko o uvaɗi, a̱vu za na tsu shitosun nzuwulai mi icigi ya̱ wu uba̱ta̱ wa agbashi a̱ wu za na yuwain mmalu o ure wa̱ wu no okolo a̱ ta̱. 15 Avu ɗa vu shitoyin nzuwulai n na vu yuwain na̱ dada va̱ Da̱wuda aagbashi a̱ wu, za na vu dammai nu una̱ wa̱ wu na vu shitoyin ne e ekere wu cine u ri ana'an.

16 <<Gogo A̱sulazuva A̱sula̱ a Isra'ila, lyawa vu shiton nzuwulai n na vu yuwain na̱ dada va̱ Da̱wuda na vu dammai, <Va lamba to vuma na aa yuwan tsugono elime wu o Ootogu aza a Isra'ila shi, n na̱ olobo wu a yuwan ugbozu a̱tsuma̱ ili i na a yuwusan na a yuwan mmalu elime a̱ va̱ ununa wila̱ u va̱ u dammai, ununa a̱vu vu yuwain.> 17 Amma gogo, A̱sulazuva A̱sula̱ a Isra'ila, lyawa nzuwulai n na vu yuwayin aagbashi a̱ wu Da̱wuda wo o'wo amayun.

18 <<Amma amayun a ɗa na A̱sula̱ a̱ da̱nu oɓolo na ama o uvaɗi? Agba waru zuva ɗe zuva rawa wu shi. Hali n na va dama adama A̱a̱'isamapaɗa a na n suwai nda! O'o u rawa ili i shi! 19 Na̱ ne suru, vu uwwa mesun na avasa a na agbashi a̱ wu a yuwan A̱sulazuva A̱sula̱, vu zuwa atsuvu a̱ wu uba̱ta̱ wa avasa a na aagbashi a̱ wu a yuwan elime a̱ wu. 20 Lyawa esu a̱ wu a̱da̱na̱ ukpa̱tu'u usana na ayin uba̱ta̱ wa̱ A̱a̱'isamapaɗa a nda, uba̱ta̱ u na vu zuwai na a yuwan a̱ga̱nda̱ adama Aala a̱ wu. Lyawa na va uwwa avasa a na aagbashi a̱ wu a yuwan uba̱ta̱ u nda. 21 Lyawa na va uwwa ipati ya aagbashi a̱ wu oɓolo na aza ama a̱ wu Isra'ila a mantsa ma na a yuwan avasa a̱ ka̱lyuwusa̱ uba̱ta̱ u nda. Vu uwwa diga zuva, uba̱ta̱ wu nden ma̱ wu, waru a mantsa ma na vu uwwai, a̱vu vu yuwan le gafura.

22 <<N na̱ vuma ro yuwaan moron ma̱ nden ma̱ yi unusu a̱vu a zuwai na wa tara akucunu reve u ta̱wa̱ u tara akucunu elime a masa'a ma̱ wu a̱tsuma̱ A̱a̱'isamapaɗa, 23 reve vu uwwa diga zuva vu ge'eto agbashi a̱ wu. Vu ge'eto za vu unusu, waru vu zuwa za vu unusu tara unusu adama aciya̱yi. Vu roco za va̱ a̱ɓula̱ a̱yi za babu unusu ɗa o una̱ wa amayun a̱yi.

24 <<A mantsa ma na ama a̱ wu Isra'ila n'yuwatan nle n lyuwa nle nu uvon, adama a na a yuwaan nuwu unusu a mantsa ma na a̱ ka̱mba̱i a̱vu a cuwa Aala a̱ wu, a yuwusan avasa ni ipati elime a̱ wu a̱tsuma̱ A̱a̱'isamapaɗa a nda, 25 reve vu uwwa le diga zuva a̱vu vu yuwaan ama a̱ wu Isra'ila gafura vu unusu u le reve vu ka̱mbuwa̱ le a̱tsuma̱ e iɗa i na vu ca nle, ele na̱ nkaya nle.

26 <<A mantsa ma na zuva ɓa̱ruyi agba a yuwan iro'i shi adama a na ama a̱ wu a yuwaan nuwu unusu, reve a yuwan avasa a̱ ka̱lyuwusa̱ uba̱ta̱ u nda a̱vu a cuwa Aala a̱ wu a̱vu a avadala diga uba̱ta̱ wu unusu u le adama a na vu ge'eto nle, 27 a̱vu vu uwwa diga zuva vu yuwaan agbashi wu ama a Isra'ila gafura vu unusu ule. Vu roco le u re u wuma u sa'ani u na otoni, vu lyungu na̱ mini e iɗa i na vu cayi ama a̱ wu adama a agadu.

28 <<Mantsa ma na ambulu ko mɓa̱la̱ n uwai e iɗa, ko mu upa̱luwusa̱ ko va akpala ko akyun ko apapari, ko gba shi mantsa ma na n'yuwatan n ka̱nda̱ruwa̱ nle nu uvon a̱tsuma̱ a̱ lyuci le, meleshe ko mɓa̱la̱ n ne n ɗa ma̱a̱ ta̱wa̱, 29 n na̱ vuma ta̱ ko ama suru a yuwan avasa ko ipati, ko adama a na a gura revei ili i na ya damatosun le hali na a̱ 'ya̱susa̱a̱n ekere le a̱ ka̱lyuwusa̱ A̱a̱'isamapaɗa'a, 30 a̱vu vu uwwa le diga zuva, uba̱ta̱ wu nden ma̱ wu. Vu yuwan gafura, a̱vu vu tsupa suru za o una̱ wi ili i na u yuwain, adama a na vu revei okolo a̱ yi na wo o'woi a̱vu ɗa goon vu revei okolo a ama, 31 ne ɗa a uwwa wovon wa̱ wu a̱vu a yuwan mmalu a̱tsuma̱ o ure wa̱ wu a̱tsuma̱ a wuma u le suru a̱tsuma̱ e iɗa i na vu cayi nkaya ntsu.

32 <<Ekere o mocin waru fo za na ri a̱tsuma̱ ama wu aza a Isra'ila shi, a̱vu u ta̱wa̱ diga e iɗa ya alanga adama a̱ba̱jini Aala a̱ wu nu ukere wu ucira wa̱ wu nnu u ta̱wa̱ ta̱ adama a na wa yuwan avasa a̱ ka̱lyuwusa̱ A̱a̱'isamapaɗa a nda, 33 Vu uwwa yi diga zuva, uba̱ta̱ wu nden wa̱ wu, a̱vu vu yuwan ili i na moci'in u pati nuwu, adama a na ama o uvaɗi suru e reve Aala a̱ wu a̱vu a cuwa wa̱ wu, ununa aza a Isra'ila a cuwa nuwu, ne ɗa e reve a na u'wa u nda n suwai ta̱ na Aala a̱ wu.

34 <<A mantsa ma na ama a̱ wu o uta̱i a̱ 'ya̱wa̱ uvon na̱ n'yuwatan nle, uba̱ta̱ u na suru vu lyungu nle, na aa yuwan avasa a̱ tyo e ekere a̱ A̱sulazuva a̱ ka̱lyuwusa̱ lyuci na vu ɗangulai na̱ A̱a̱'isamapaɗa a na n suwai adama Aala a̱ wu, 35 vu uwwa avasa ni ipati i le diga zuva, a̱vu vu yuwan le ili i na yintsayi.

36 <<A mantsa ma na a yuwaan nuwu unusu adama a na babu za na tsu yuwan wu unusu shi a̱vu vu yuwan upan ne le reve vu ca le ekere a n'yuwatan nle, aza a na atara nle a̱ tyo tsugbashi e iɗa ya alanga ko zuzu, 37 a mantsa ma na a yuwain majiyan a vadalai okolo ele a̱tsuma̱ e iɗa i na a tara nle a̱ tyo tsugbashi, a̱vu a vadala a pati wu a̱tsuma̱ e iɗa i na a yuwusan tsugbashi a damma, <Tsu yuwan ta̱ unusu, tsu yuwan wu mejege shi, tsu yuwan ta̱ iwuya,> 38 reve a vadala a̱ ka̱mba̱ ya̱'a̱ wu no okolo ele na asuvu ele suru suru pe e iɗa yi n'yuwatan nle n na m pura̱ nle a̱ 'ya̱wa̱ tsugbashi, reve gba a yuwan avasa a̱ tyo e ekere a̱ wu a̱ ka̱lyuwusa̱ iɗa i na vu cayi nkaya nle a̱ ka̱lyuwusa̱ lyuci na vu ɗangulai na̱ A̱a̱'isamapaɗa a na n suwai adama a Ala a̱ wu, 39 lyawa diga zuva uba̱ta̱ wu nden ma̱ wu vu uwwa avasa le ni ipati i le, a̱vu vu yuwan le ili i na yintsayi. A̱vu vu yuwaan ama a̱ wu gafura, aza a na a yuwaan nuwu unusu.

40 <<Gogo, A̱sula̱ a̱ va̱, lyawa esu a̱ wu a̱da̱na̱ ukpa̱tu'u a̱vu fo vu polo atsuvu a̱ wu uba̱ta̱ wa avasa a na a yuwusan uba̱ta̱ u nda.

41 <<Vu 'yon gogo, A̱sulazuva A̱sula̱,

vu ta̱wa̱ uba̱ta̱ u wivuwun wa̱ wu,

a̱vu na Akpati o ucira wa̱ wu.

A̱sulazuva A̱sula̱,

lyawa nan ganu a̱ wu,

a̱da̱na̱ ni iwawi ya̱ wu,

lyawa aza a na a̱ ri e icigi ya̱ wu a yuwan ma̱za̱nga̱

adama e isa'ani ya̱ wu.

42 A̱sulazuva A̱sula̱,

she vu vadalaa mogono ma na vu ɗangulai ucina̱ wan.

Vu cuwan ni icigi ya̱ wu i na i tsu vadala shi,

na vu yuwayin aagbashi a̱ wu Da̱wuda.>>