1 Reve Mogono Yehoshafat ka̱mba̱ o u'wa wa̱ yi a̱tsuma̱ a̱ Urishelima gbaga. 2 A̱vu Yehu za yindi, ulobo wa Hanani, uta̱ adama u ga'aton yi, a̱vu u damma mogono Yehoshafat, <<Vu ta kamba aza a na a yuwusan iwuya a̱vu vu ciga aza a na a 'yuwain A̱sulazuva? Adama ndolo, upan wa̱ A̱sulazuva uta̱ da̱na̱ aciya̱wu. 3 Suru na̱ ne, a̱ a̱tsura̱ ta̱ ili i sa'ani ya̱ wu, na vu tawai a̱shuwutsu a Ashera a̱vu vu ta̱wa̱ no okolo wu uba̱ta̱ wi izami ya̱ A̱sula̱. >>

4 Yehoshafat da̱na̱ ta̱ nden a̱tsuma̱ Urishelima, a̱vu u da̱na̱ a̱ 'ya̱wusa̱ uba̱ta̱ wa ama a̱yi, diga a̱ lyuci va Biyasheba a̱ tyo a̱ lyuci va agaɗi ya Ifiramu adama a na wa vadala le na a̱ ka̱mba̱ uba̱ta̱ wa̱ A̱sulazuva A̱sula̱ nkaya nle. 5 A̱vu u ɗangula a̱za̱ o uge'etosu a̱ lyuci, e ilyuci i na i ri na̱ ka̱ri vu ucira a̱tsuma̱ o upasu wa Yahuda. 6 A̱vu u damma le, <<I zuwa ugbozu e ili i na yaa yuwan, adama a na uge'etosu u na yaa yuwusan nda za vuma ɗa shi amma za va̱ A̱sulazuva ɗa. Za na ri oɓolo na̱ a̱ɗu a mantsa ma na yaa yuwusan uge'etosu. 7 Gogo lyawa wovon wa̱ A̱sulazuva a̱da̱na̱ oɓolo na̱ a̱ɗu. I da̱na̱ nu ugbozu o uge'etosu, adama a na uba̱ta̱ wa̱ A̱sulazuva A̱sula̱ a̱tsu babu ɗe ulambu wa̱ a̱ɓula̱ ko tsuzo'o ko utosu wu una̱.>>

8 A̱tsuma̱ e iɗa ya Urishelima waru, Yehoshafat ɗangula ta̱ ozo o ro a̱za̱ a̱ Levi na̱ nan ganu na azagbain a 'wa va aza a Isra'ila, na a yuwan uge'etosu u wila̱ wa̱ A̱sulazuva adama a̱ ta̱wa̱ na̱ mejege uba̱ta̱ wa̱ a̱za̱ o nronuloi. Reve a̱ da̱nu a̱tsuma̱ a Urishelima. 9 A̱vu u ca le udammu u nda, i yuwan ulinga a̱tsuma̱ amayun na̱ wovon wa̱ A̱sulazuva no okolo a̱ɗu suru. 10 A̱tsuma̱ adanshi a na biti ama a̱ɗu a̱a̱ ta̱wa̱yi a̱ ma̱ka̱ka̱n ma̱ ɗu aza a na a̱ ri na̱ nden e ilyuci yi iɗa'a, u ta gura o'wo ili i na i burai wocosu wu mpasa ɗa, ko makuɗa ma̱ wila̱ wa Musa, ko ili i na a zuwai, ko ili i na ya̱a̱ kuru, ko udammu, mantsa ma na a̱ ta̱wa̱i na aɗa'a suru i rono le atsuvu adama she ronoo aciyele unusu uba̱ta̱ A̱sulazuva wan. Na̱ ne shi upan wa̱ A̱sulazuva u ta̱ cipa̱ aciya̱ɗu oɓolo na̱ a̱za̱ a̱ɗu. N ni i yuwan tsutoni na̱ a̱yi ndolo, yo ronoo aciya̱ɗu unusu shi. 11 <<A̱yi ɗa nda, Amariya ganu gbain ɗa a yuwan tsugbain tsa a̱ɗu a̱tsuma̱ e ili i na i ri za va̱ A̱sulazuva, a̱vu Zebadiya ulobo wa Isma'ila zagbain vu ugundo wa Yahuda yuwan tsugbain tsa̱ a̱ɗu o una̱ wi ili i na i burai tsugono. Nan Levi oto o'wo aza a na a̱da̱na̱ kambusa ɗu. I gbama asuvu a̱tsuma̱ o ulinga u ɗu. Lyawa A̱sulazuva a̱da̱na̱ oɓolo na aza a na a yuwusan ulinga u na u ri mejege.>>