1 Babu na̱ linga va amayun n na Mogono Hezekiya yuwain, a̱vu Senakerib mogono ma Asuriya ma̱ riya̱a̱ Yahuda nu uvon. Reve u ka̱nda̱ruwa̱ ilyuci vu kari vu ucira, a majiyan ma na wa lyuwa le nu uvon, adama o o'wo a̱za̱ a̱yi. 2 A mantsa ma na Hezekiya enei Senakerib ta̱wa̱ ta̱ adama u yuwan uvon na̱ Urishelima, 3 a̱vu Hezekiya yuwan adanshi na̱ azagbain a̱yi oɓolo na̱ nan yali ya̱ a̱soja a̱yi na e geshe esu a̱ mini a na a̱ ri o ucina̱ u lyuci'i, a̱vu a kamba yi. 4 A̱vu a̱soja a̱bunda̱ o oɓoloto, a̱vu e geshe esu a̱ mini'i oɓolo na̱ mini ma na mee yeneshe a̱tsuma̱ e iɗa'a. Reve a damma <<Adama a̱ nye ɗa ngono ma Asuriya ma̱ ta̱wa̱ a̱vu acina mini ma̱ a̱bunda̱?>> 5 A̱vu u reme ulinga lon a lapulusa suru pasu na la̱nga̱i wu ɓaɓu reve u suwaa le kari. A̱vu waru u suwisa ukari u ro uka̱nda̱ruwu na̱ za vu ufaru'u reve u lapula ma̱lyuci ma̱ Milo a̱ lyuci va̱ Da̱wuda. Waru u yuwan ta̱ itana yu uvon na̱ a̱ra̱ga̱ a̱bunda̱.

6 A̱vu u ɗangulaa ama azagbain a̱soja a̱vu u oɓoloto le elime a̱yi agalaci a na a̱ ri o una̱ntsu u lyuci, a̱vu u ca le adanshi ni idanshi i nda: 7 <<I kapanu yi isawan nu ucira. She yi uwwa wovon wan ko i kuɗa okolo wan adama o mogono ma Asuriya oɓolo na̱ a̱soja a na a̱ ri oɓolo na̱ a̱yi wan, adama a na A̱sulazuva a̱ ta̱ oɓolo na̱ a̱tsu, waru ucira wa̱ yi u la'a ta̱ ucira u le. 8 A zuwa ta̱ ucira u le uba̱ta̱ wu ucira wa ama, amma tsu ta̱ na̱ A̱sulazuva A̱sula̱ a na a kamba tsu waru u yuwan uvon adama a̱tsu.>> Adama o ndolo a̱vu ama'a a̱ da̱shi tsura̱ ukadu adama e ili i na Hezekiya mogono ma Yahuda ma dammai.

9 Ana a yuwain ne, a̱vu mogono Senakerib va Asuriya oɓolo na̱ a̱soja a̱yi suru a̱ka̱nda̱ruwa̱ lyuci va Lakish, a̱vu u lyungu nlingata ma̱ a̱yi a̱ tyo Urishelima ni ikaka i nda a̱ tyo ya̱ Hezekiya mogono ma Yahuda oɓolo na ama a Yahuda suru na ri a̱tsuma̱ a̱ Urishelima u damma,

10 <<Apa ili i na mogono Senakerib va Asuriya dammai, a̱ nye ɗa va zuwusa ucira wa̱ wu, hali na vu buwai a̱tsuma̱ a̱ Urishelima uka̱nda̱ruwu? 11 Ana Hezekiya dammai, <A̱sulazuva A̱sula̱ a̱ɗu a ta wawa a̱ɗu e ekere mogono ma Asuriya.> >> U ta̱ lulumusa̱ ɗu na wa zama u lyawa ɗu i kuwa̱ a̱tsuma̱ ambulu na akuli. 12 Ashe Hezekiya na aciya̱yi ɗa wu tawai musula̱ mu ba̱ta̱ va̱ a̱ga̱nda̱ na̱ musa'a adansaa Yahuda na̱ Urishelima, i yuwan a̱ga̱nda̱ a masa'a ma̱ ta̱ waru i ca kucci vu ukula̱tosu ɗe shi? 13 <<I reve ili i na a̱mu na̱ nkaya n va̱ tsu yuwain na akapi a ama e iɗa i ro shi? Musula̱ mu nɗa ndolo a gura ta̱ wawa iɗa i ndolo diga e ekere a̱ va̱? 14 Musula̱ mu nɗa suru aza a na nkaya va̱ o kototoi a gura ta̱ wawa ama e le diga e ekere a̱ va̱? Cine a yuwan A̱sula̱ a̱ɗu a wawa a̱ɗu e ekere a̱ va̱? 15 Gogo she i lyawa Hezekiya luluma̱ ɗu wan waru na wa̱ pusa̱n ɗu tsu nda wan. She i usu yi wan, adama a na babu musula̱ mu nɗa ko tsugono tsa na tsa gura wawai ama a̱yi diga e ekere a̱ va̱ ko e ekere a nkaya n va̱. Cine a yuwan A̱sula̱ a̱ɗu a wawa ɗu e ekere a̱ va̱!>>

16 A̱vu a̱soja o mogono Senakerib a yuwan adanshi a vanvama uba̱ta̱ wa̱ A̱sulazuva A̱sula̱ oɓolo na aagbashi a̱yi Hezekiya. 17 Senakerib ɗana ta̱ waru mepepelime a̱vu u ka̱ra̱ e isulusa a̱ A̱sulazuva A̱sula̱ a Isra'ila. A̱vu u damma a̱tsuma̱ mepepelime'e, <<Cine musula̱ mu nɗa n ro n gura wawai ama a̱yi e ekere a̱ va̱ shi ne ɗa fo A̱sula̱ a̱ Hezekiya a gura wawa ama a̱yi e ekere a̱ va̱ shi.>> 18 A̱vu a yuwan adanshi nu uɗyo u gbain na̱ elentsu a tsu Yahuda e ekere ama a̱ Urishelima aza a na a̱da̱na̱i o ukari u lyuci, adama a ca le wovon waru a da'waton le, tsura̱ a lyuwa lyuci'i. 19 A̱vu a yuwusan adanshi adama A̱sula̱ a̱ Urishelima, she damma u ta̱ una̱ uta̱ na akapi a̱ musula̱ ma ama o uvaɗi, aza a na ama yuwain ne e ekere e le.

20 A̱vu Mogono Hezekiya na̱ vumava̱sula̱ Ishaya ulobo wa Amoz e showen A̱sulazuva adama adanshi o ndolo, a̱vu a yuwan avasa a̱ tyo zuva adama A̱sulazuva a kamba le. 21 A̱vu A̱sulazuva a̱ lyungu malingata na wo kototo a̱soja a na a gurai uvon suru, na azagbain na̱ nan yali ya̱ a̱soja, aza a na a̱ ri o uva̱la̱ta̱ u mogono ma Asuriya. Adama o ndolo a̱vu Senakerib ka̱mba̱ e iɗa ya̱ a̱yi na̱ wono. Mantsa ma na u uwai a̱a̱'isa̱ urana u ro a yuwusaan ma̱sula̱ ma̱ a̱yi a̱ga̱nda̱, a̱vu ozo o ro a̱tsuma̱ olobo a̱yi o kototo yi na̱ matsun me pe'eni. 22 Ne ɗa A̱sulazuva a wawai Hezekiya na̱ a̱za̱ a̱ Urishelima suru diga e ekere o mogono Senakerib va Asuriya na̱ n'yuwatan nle suru. A̱vu u ca le asuvu nden na̱ nɗa nle n na n ri u ka̱nda̱ruwu ne le suru. 23 Ama na̱ a̱bunda̱ a̱ ta̱wa̱ ta̱ nu une'e u le uba̱ta̱ wa̱ A̱sulazuva a̱tsuma̱ a̱ Urishelima, a̱vu waru a̱ ta̱wa̱ nu une'e wi itana isa'ani uba̱ta̱ wa̱ Hezekiya mogono ma Yahuda. Diga a mantsa mo ndolo, Hezekiya tsura̱ ta̱ tsugbain esu a̱za̱ o tsugono na̱ aza a tsugbain tsu nɗa suru.

24 A̱tsuma̱ a rana ndolo a̱vu Hezekiya reme mɓa̱la̱ hali u rawa a gan ma̱a̱ kuwa̱. A̱vu u yuwan avasa e ekere A̱sulazuva, reve u usu yi, waru u ca yi iroci na wa̱ tsura̱ gbaga. 25 Amma adama aciyogbamu a̱yi, Hezekiya yuwan ma̱za̱nga̱ adama e isa'ani i na a yuwaan niyi shi. Adama o ndolo a̱vu A̱sulazuva a yuwan upan na̱ yi oɓolo na ama a Yahuda na̱ a̱za̱ a̱ Urishelima. 26 Ɗaɗa Hezekiya vadalai diga aciyogbamu wa̱ yi oɓolo na̱ a̱za̱ a̱ Urishelima. Adama o ndolo upan wa̱ A̱sulazuva u cipa̱a̱ le a mantsa ma wuma wa̱ Hezekiya shi.

27 Hezekiya da̱na̱ ta̱ nu utsuru lon, waru ama suru a casu yi ta̱ tsugbain. A̱vu u suwa asula e izuwa adama a azurufa na̱ zinariya na atali e ikebe ni itana yu ucita na̱ a̱ra̱ga̱ na̱ cu'un vi ili isa'ani biti. 28 Avu waru u suwa asula adama a na a yuwan uzuwa wi ishina na̱ masayan ma inabi na̱ mani'in ma̱ zetun. A̱vu waru u shuwa̱ ogodo adama cu'un vi inan ni iliyamunga suru. 29 Agba waru u suwa ta̱ mulyuci na̱ a̱bunda̱, waru u da̱na̱ ta̱ ni iliyamunga ya̱ a̱bunda̱ ni inan, adama a na A̱sulazuva a ca yi ta̱ utsuru wa̱ a̱bunda̱ lon.

30 Adama a na Hezekiya ɗa za na geshei mini ma na me yeneshe diga o ɗolu wa̱ Gihon, a̱vu u vadalai na wa̱ ka̱ra̱ e yeneshe a̱ tyo a̱ Lyuci va̱ Da̱wuda. Hezekiya gba tsura̱ ta̱ ulyuwu we elime a̱tsuma̱ e ili i na u yuwain suru. 31 Amma a na nlingata n na azagbain a Babila a̱ lyunguyi a rawai ecei e ili ya asalama i na A̱sula̱ a yuwan niyi, a̱vu A̱sula̱ a lyawa Hezekiya damma ili i na a̱yi aciya̱yi u shi ucigai na wa damma, adama u lyungwa̱i ko Hezekiya ta damma A̱sula̱ a ɗa a yuwain ili ya asalama'a.

32 Akapi o ulinga u tsugono tsa̱ mogono Hezekiya ni ili isa'ani i na u yuwain, a̱da̱na̱ ta̱ pe uɗanu a̱tsuma̱ aatagada a vumava̱sula̱ Ishaya ulobo wa Amoz, na akapi aatagada a̱za̱ a̱ tsugono a Yahuda na aza a Isra'ila. 33 Hezekiya kuwa̱ ta ucina nkaya ma̱ yi, a̱vu a̱ ciɗo yi aagaɗi uba̱ta̱ u na aason a limatan va Da̱wuda a̱ ri. A̱vu aza a Yahuda na̱ Urishelima suru a ca yi tsugbain a mantsa ma na u kuwa̱i. A̱vu ulobo wa̱ yi Manase wo o'wo mogono o una̱ wa̱ yi.