1 A mantsa ma na Rehobowam enei tsugono tsa a̱yi tsa̱ shuwa̱ ta̱ reve u yuwan ucira, a̱vu a̱yi na ama a Isra'ila suru a 'yuwan a yuwan tsutoni na̱ wila̱ wa̱ A̱sulazuva. 2 Adama a na a̱da̱na̱ ta̱ nu ulambu wa̱ a̱ɓula̱ uba̱ta̱ wa̱ A̱sulazuva, a̱tsuma̱ a'wan a tawun o Mogono Rehobowam, a̱vu mogono Shisha va Masar riya̱a̱ Urishelima nu uvon. 3 Shisha da̱na̱ ta̱ ni ikeke yi ido ukpakukupa nu ukpakure (1,200), na akumbi e ido ukpakukupa kupota̱li (60,000), oɓolo na̱ a̱soja na a tsu gura kece shi a̱tsuma̱ ele a̱da̱na̱ ta̱ na̱ a̱soja a Libiya na aza a Sukim na̱ a̱za̱ a̱ Kush* aza a na a̱ ta̱wa̱i oɓolo na̱ a̱yi diga Masar. 4 A̱vu usa ilyuci i na i ri na̱ kari vu ucira wa aza a Yahuda hali a̱ tyo Urishelima.

5 A̱vu vumava̱sula̱ Shemaya ta̱wa̱ uba̱ta̱ wa Rehobowam na̱ akapi azagbain a Yahuda aza a na o ɓolotoi a̱tsuma̱ a̱ Urishelima adama a na a ta uwwusa wovon wa Shisha na wa̱ ta̱wa̱ u damma le, <<A̱sulazuva a damma ta̱, <I lyawa mu ta̱, adama o ndolo a̱mu fo n ta lyawa a̱ ɗu na ma ca a̱ɗu e ekere a Shisha.> >>

6 A̱vu mogono na azagbain a Isra'ila a̱ ka̱ɗa̱to aciyele a damma, <<Amayun A̱sulazuva a yuwan ta̱ ili i na i ri mejege.>>

7 A mantsa ma na A̱sulazuva enei a̱ ka̱ɗa̱to ta̱ aciyele, a̱vu A̱sulazuva a̱ da̱shi yuwan adanshi na̱ Shemaya u damma, <<Ana wo o'woi gogo a tara aciyele ili i ro shi, mo kototo le shi, amma n ta kamba le. Upan u va̱ wa̱ cipa̱ aciya Urishelima e ekere a Shisha shi. 8 Amma adama o ndolo oto o'wo agbashi a Shisha, adama a na a gura kurato mayan ma̱ a̱ga̱nda̱ a̱ tyo uba̱ta̱ wa̱ A̱sula̱ na̱ mayan ma̱ a̱ga̱nda̱ e ekere aza a na a yuwusan tsugono tso o uvaɗi.>>

9 Ana mogono Shisha va Masar riya̱yi Urishelima nu uvon, a̱vu waru u pura̱ itana isa'ani diga a̱tsuma̱ e izuwa ya̱ A̱a̱'isamapaɗa a̱ A̱sulazuva, na aza a sa'ani a na a̱ ri pe a̱tsuma̱ o ukobu u mogono. U pura̱ ta̱ a̱ra̱ga̱ a zinariya aza a na Sulemanu yuwain. 10 Reve mogono Rehobowam yuwan a̱ra̱ga̱ a̱ rumushili o una̱ wa aza a na a̱ pura̱i. A̱vu u ca nan yali e ipiri yu una̱ntsu wu ukobu u mogono. 11 Mantsa ma na mogono ma̱a̱ 'ya̱wa̱ A̱a̱'isamapaɗa a̱ A̱sulazuva suru, a̱vu aza a na a yuwusan ipiri a̱ pura̱ le a̱ guza̱ o toni yi. A mantsa ma na u ka̱ra̱i a̱vu a tara itana'a a̱ ka̱mbuwa̱ le uba̱ta̱ u na a tsu zuwusa le.

12 Ana Rehobowam ka̱ɗa̱toi aciya̱yi, avu upan wa̱ A̱sulazuva o von aciya̱yi. Agba A̱sulazuva o kototo yi suru suru shi. Suru na̱ ne a̱vu u ta̱wa̱ ni isa'ani a̱tsuma̱ a Yahuda.

13 Mogono Rehobowam shuwa̱ ta̱ tsugono tsa̱ a̱yi nu ucira a̱tsuma̱ a̱ Urishelima, a̱yi na a'wan amunga na̱ za̱ ta̱ nu u matsun ɗaɗa wo o'woi mogono. U yuwan ta̱ tsugono a'wan kupa na̱ a̱za̱ cindere a̱tsuma̱ a̱ Urishelima e ilyuci i na A̱sulazuva a ɗangulai diga a̱tsuma̱ o gundo va Isra'ila suru na wa zuwa Aala yi. Aala mma va Rehobowam ɗa Na'ama za va Amon. 14 Rehobowam gba yuwan ta̱ iwuya adama a na u 'yuwan na wa zami urewesu wa̱ A̱sulazuva. 15 Suru linga na Rehobowam yuwain, diga o ufaru acina ukosu, a̱da̱na̱ ta̱ uɗanu a̱tsuma̱ aatagada o ucuɗuwu u vumava̱sula̱ Shemaya na̱ Iddo za yindi. Uvon u da̱na̱ ta̱ lo mantsa suru e ekere a Rehobowam na̱ Yerobowam. 16 Reve Rehobowam kuwa̱ ucina nkaya ma̱ yi reve a̱ ciɗo yi a̱ Lyuci va̱ Da̱wuda. A̱vu ulobo wa̱ yi Abija wo o'wo mogono o una̱ wa̱ yi.